Ovanongononi ova ehenifa popepi okati kOvili yEfiku lEhanauno — Ombiibeli otai ti ngahelipi?

Mo 24 Januali 2023, ovanongononi ova li va ehenifa okati kOvili yEfiku lEhanaunoa popepi elela no-12:00 woufiku, oyo tai faneke exulilo lounyuni.

• Eenghundana do-AFP International Text Wire oda ti: “Ovili yEfiku lEhanauno otai faneke nghee ovanhu ve li popepi elela nokunyonauna po edu. MEtivali, ovanongononi ova ehenifa okati kovili oyo popepi elela no-12:00 woufiku omolwoiningwanima oyo tai ningwa mounyuni, ngaashi oita yaUkraine, va tila ku longifwe oilwifo yolute nosho yo onghalo yomhepo oyo tai naipala neenghono.”

• Eenghundana do-ABC oda ti: “Ovanongononi ova holola mEtivali kutya oku na ashike eesekonde 90, opo o-12:00 woufiku u denge, tashi ulike kutya ounyuni ou li popepi elela nokuhanaunwa po.”

• Oshifo sho-The Guardian osha ti: “Ongudu yovanongononi mounyuni aushe oya londwela kutya ovanhu otashi dulika ve ke lietele ehanauno shi dulife nale.”

Mbela ovanhu nosho yo edu letu oi li pokuxula po mafiku? Mbela otwa pumbwa okukala twa tila kutya oshike tashi ka ningwa monakwiiwa? Ombiibeli otai ti ngahelipi?

Osho twa tuvikililwa monakwiiwa

She likolelela kOmbiibeli, ‘edu otali kala po fiyo alushe’ notapa ka kala ovanhu ovo “tava kala mo alushe.” (Omuudifi 1:4; Epsalme 37:29) Onghee ovanhu itava ka hanauna po edu, ile ve li nyonaune po, opo kuha dule vali okukaliwa.

Ombiibeli oya popya kutya oku na exulilo. Pashihopaenenwa, oya ti “ounyuni otau xulu po.” — 1 Johannes 2:17.

• Opo u mone kutya Ombiibeli oya hala okutya shike, eshi tai popi kombinga yexulilo, lesha oshitukulwa “Is the World Coming to an End? What Is the Apocalypse?”

• Opo u lihonge osho Ombiibeli tai ti shi na sha nefimbo loiningwanima oyo tai ka ningwa, lesha oshitukulwa “When Will the World End?”

Kala u na etaleko liwa

Ombiibeli otai dulu oku tu kwafela tu kale tu na etaleko liwa, nonande mounyuni omu na omaupyakadi. Ngahelipi mbela?

• Ombiibeli otai yandje omayele taa longo. (2 Timoteus 3:16, 17) Pashihopaenenwa, lesha oshitukulwa “How to Control Worry,” opo u mone nghee Ombiibeli tai dulu oku ku kwafela u kale u na etaleko liwa, nonande owa taalela omaupyakadi.

• Ombiibeli otai yandje eteelelo li shii okulineekelwa li na sha nonakwiiwa. (Ovaroma 15:4) Oya yelifa kombinga yoiningwanima oyo tai ningwa paife nosho yo oyo tai ka ningwa monakwiiwa, naasho otashi tu kwafele tu kale tu na omukumo, nonande mounyuni omu na omaupyakadi.

Opo u lihonge shihapu mOmbiibeli yoye, ohatu ku shivi, opo u konakone Ombiibeli nafye oshali.