Eendombwedi daJehova ohadi ungaunga ngahelipi naavo vehe fi vali Eendombwedi?

Ohatu ningi ngaashi hatu dulu tu ungaunge nakeshe umwe nohole, nonghenda nonefimaneko. Ngeenge umwe womEendombwedi daJehova okwa talala pamhepo, ile a efa po okwoongala, oha talelwa poa a shilipalekwe kutya oku holike natango noku kwafelwe a kale vali e na ekwatafano liwa naKalunga. — Lukas 15:4-7.

Peemhito dimwe, omunhu otashi dulika a ninge oshinima osho tashi dulu oku mu kufifa mo meongalo. (1 Ovakorinto 5:13) Ndele molwaashi otu hole ovaitaveli vakwetu neenghono, ohatu kendabala okukwafela omunhu oo komesho yefimbo, opo aha kufwe mo meongalo. Nonande omunhu okwa kufwa mo meongalo, ohatu ungaunga naye nohole nonefimaneko, ngaashi Ombiibeli ye tu ladipika tu ninge. — Markus 12:31; 1 Petrus 2:17.

Oshike hashi etifa omunhu a kufwa mo meongalo?

Ombiibeli oya popya sha yela kutya ngeenge Omukriste okwa nyono sha kwata moiti, ndele ta anye okulundulula, oku na okukufwa mo meongalo.b (1 Ovakorinto 5:11-13) Ombiibeli oya popya kutya omanyono elipi a kwata moiti oo taa dulu oku kufifa mo omunhu meongalo. Pashihopaenenwa, oya tumbula oinima ngaashi oluhaelo, oukolwe, edipao, omahepeko omomaumbo noumbudi. — 1 Ovakorinto 6:9, 10; Ovagalati 5:19-21; 1 Timoteus 1:9, 10.

Ashike ihatu endelele okukufa mo omunhu meongalo oo a nyona enyono la kwata moiti. Ovakulunhuongaloc tete ohava kendabala oku mu kwafela a lundulule elihumbato laye. (Ovaroma 2:4) Ohava kendabala oku mu kwafela a lundulule tave shi ningi nombili nononghenda. (Ovagalati 6:1) Okuungaunga nomunyoni monghedi ya tya ngaho, otashi dulika shi mu linyengife a didilike kutya okwa ninga epuko noku livele ombedi. (2 Timoteus 2:24-26) Ashike ngeenge okwa twikile okunyona, nonande ovakulunhuongalo ova twikila oku mu kwafela, nena oku na okukufwa mo meongalo. Ovakulunhuongalo ohava shiivifile eongalo kutya omunhu oo ke fi vali Ondombwedi yaJehova.

Ohashi eta ouwa ulipi, ngeenge omunhu oo ine livela ombedi okwa kufwa mo meongalo? Ouwa umwe oyoo kutya, eongalo ohali diinine omifikamhango daKalunga dopaenghedi nohali kala la amenwa kenwefemo lii lomunhu a tya ngaho. (1 Ovakorinto 5:6; 15:33; 1 Petrus 1:16) Shikwao vali, omunyoni otashi dulika e linyengifwe a efe po oilonga yaye ii noku lundulule. — Ovaheberi 12:11.

Eendombwedi daJehova ohadi ungaunga ngahelipi naavo va kufwa mo meongalo?

Ombiibeli oya popya kutya Ovakriste ove na ‘okweefa po okweendafana’ nomunhu oo a kufwa mo meongalo, nokave na nokuli okulya ‘nomunhu a tya ngaho nandenande.’ (1 Ovakorinto 5:11) Onghee ihatu endafana naumwe oo a kufwa mo meongalo. Ashike ihatu mu henuka filufilu. Ohatu ungaunga naye nefimaneko. Okwa manguluka okuuya kokwoongala, nohatu dulu oku mu popifa.d Ota dulu yo okupula ovakulunhuongalo ve mu kwafele alukile meongalo.

Oshike hashi ningwa po ngeenge umwe okwa kufwa mo meongalo, ashike kaume kaye kopahombo nosho yo ounona vavo vanini ove li Eendombwedi daJehova? Nonande iha longe vali Jehova pamwe noukwaneumbo, ove na natango ekwatafano ve li oukwaneumbo. Molwaashi ohava di meumbo limwe, otava twikile okukala ve na ekwatafano nokuulikilafana ohole.

Omunhu, oo a kufwa mo meongalo, ota dulu okupula a talele po kovakulunhuongalo, ovo tave mu pe omayele opaMishangwa noku mu kwafela pahole e livele ombedi noku alukile kuKalunga. (Sakaria 1:3) Ngeenge okwa efa po elihumbato laye lii nokuulika kutya okwa hala okudulika komifikamhango dOmbiibeli, ota dulu vali okwaalulilwa meongalo. Eongalo otali ke mu ‘dimina po nehalo liwa noku mu hekeleka,’ ngaashi ashike Ovakriste vomuKorinto va li va ninga, eshi omunyoni a li e livela ombedi. — 2 Ovakorinto 2:6-8.

Ovo va li va kufwa mo meongalo ove udite ngahelipi paife?

Tala nghee Eendombwedi daJehova dimwe odo da li da kufwa mo meongalo nolwanima oda ka alukila kuKalunga, da popya.

Maria, wokoUnited States, okwa ti: “Eshi nda li nda tokola okwaalukila keongalo, onda li handi diladila kutya ovakulunhuongalo otava ka kala va hala okushiiva ashishe osho nda li handi ningi omido adishe odo nda kala nda kufwa mo meongalo. Ponhele ova ti ashike, ‘Otwa hala u yandje elitulemo kwaasho to ningi paife.’ Konima yaasho, onda kala nda manguluka.”

Malcom, wokoSierra Leone, okwa ti: “Eongalo ola kala la teelela ndi aluke. Onda li ndi udite nda fimanekwa. Ovamwatate novamwameme ova kwafela nge ndi kale ndi udite nda diminwa po nondi pule komesho. Ovakulunhuongalo ova kala alushe tava kwafele nge ndi kale ndi na vali ekwatafano la kola naJehova. Ova hekeleka nge nova kwafela nge ndi mone kutya ondi na oshilonga natango kuJehova noku hole nge.

Sandi, wokoUnited States, okwa ti: “Onda hafa eshi Jehova ha ulike kutya okuhole oshiwana shaye neenghono, opo a shilipaleke kutya ehangano laye ola koshoka paenghedi. Nonande ovo vehe fi Eendombwedi otashi dulika va diladile kutya osha puka okukufa mo umwe meongalo, oshi li lela onghatu yopahole. Onda hafa eshi Tate yetu womeulu e li Kalunga omunahole noha dimine po.”