Oka-JW Box ohaka kwafele ovanhu va pameke eitavelo lavo

Eendombwedi daJehova ohadi mono oishangomwa nouvidio vopaMbiibeli okupitila kointaneta shi dulife nale. Ndele moilongo ihapu, ovamwatate ihava dulu okuuya kointaneta. Vamwe ove li keenhele oko olusheno hali u ko luhapu, ointaneta hai ende kashona, ile kuhe na ointaneta.

Ndele nande ongaho, ovamwatate novamwameme vahapu ohava dulu okutapa oishangomwa nouvidio, nonande kave na ointaneta. Ngahelipi mbela?

Omaongalo oo e li keenhele oko ointaneta ihai longo nawa ohaa tuminwa ou-JW Box. Oka-JW Box ohaka kala ke na o-router oyo ya longwa komahangano oo haa longo oikwaelektronika, oprograma oyo ya longwa kOshikondo shEekombiuta koBetel nosho yo oishangomwa nouvidio ovo ve li ko jw.org. Oka-JW Box kamwe ohaka kosho hanga N$1 250.25.

Ovamwatate novamwameme ohave uya kOlupale lOuhamba, tava konekta koka-JW Box, opo va dule okutapa oishangomwa nouvidio. Naavo ve na oikwaelektronika ikulu, ile yombilixa, otava dulu okukonekta. Ngeenge eongalo kali na ointaneta, oshike hashi ningwa po opo oka-JW Box ka kale ke na oishangomwa i li pefimbo? Efimbo nefimbo, oshitaimbelewa ohashi tumu ou-USB, ovo keshe kamwe haka kosho N$66.68 lwaapo, ovo hava longifwa okupepaleka ouyelele oo u li moka-JW Box.

Oka-JW Box ohaka kwafele ngahelipi ovamwatate? Omudali umwe wokoDemocratic Republic of Congo, Nathan Adruandra, okwa ti: “Onda hetekela lwoikando okutapa oshinyandwa ngaashi, ‘Jehovah, oove nde lineekela’ nosho yo Dimbulukweni omukainhu waLot. Ndele kanda li nda pondola, nosha li sha teya nge omukumo. Paife ohandi dulu okutapela ouvidio ovo kongodi yange, naasho ohashi tu kwafele tu li ovadali tu dule okuhonga nawa ovana vetu.”

Omumwatate umwe, oo ha kwafele omaongalo koNigeria a dule okulongifa ou-JW Box, okwa ti: “Ovamwatate ova tala ko ou-JW Box ve li oshali ye likalekelwa ya dja kuJehova. Paife ova hafa neenghono eshi tava dulu okutapa noupu oishangomwa nouvidio ovo ve li mOshikefa shetu shokuhonga.”

Fiyo opapa, ovamwatate ova tuminwa ou-JW Box ve dulife pe 1 700 muAfrica, Oceania nosho yoSouth America, notapa ningwa eemhangela opo omaongalo muhapu a tuminwe. Ongahelipi hatu dulu okuyambidida shi na sha neefuto dou-JW Box? Omokuyambidida oilonga yetu yomounyuni aushe, navahapu ohave shi ningi okupitila ko donate.jw.org. Otamu pandulwa omolwomayambidido eni ehalo liwa.