Hesekiel
41 Opo nee okwa twala nge monhele iyapuki* yokondje, nokwa yeleka eengudi domomunghulo; oda li di na omutamo womaludimbo ahamano* kombinga imwe, nokombinga ikwao omutamo womaludimbo ahamano. 2 Oshivelo osha li shi na ounene womaludimbo omulongo, nomakuma omomunghulo* oposhivelo okwa li e na omaludimbo atano kombinga imwe, nokombinga ikwao omaludimbo atano. Okwa yeleka oule washo, oo wa li u na omaludimbo 40 nosho yo ounene washo, oo wa li u na omaludimbo 20.
3 Opo nee okwa ya meni,* nokwa yeleka ongudi yomomunghulo yoposhivelo, noya li i na ounene womaludimbo avali, noshivelo osha li shi na ounene womaludimbo ahamano. Omakuma omomunghulo oposhivelo okwa li e na* omaludimbo aheyali. 4 Opo nee okwa yeleka onduda, oyo ya taalela konhele iyapuki yokondje, noya li i na oule womukokomoko womaludimbo 20 nosho yo ounene womaludimbo 20. Ndele ta ti kwaame: “Ou oo Ouyapuki elela.”
5 Opo nee okwa yeleka ekuma lotembeli, nola li li na ounene womaludimbo ahamano. Oukololo vomomunghulo, ovo va dingilila otembeli, ova li ve na ounene womaludimbo ane. 6 Oukololo vomomunghulo ova li va londafana lutatu okuyuka pombada, keshe kamwe kombada yakakwao, nedimo keshe ola li li na oukololo 30. Ekuma lotembeli ola li li na omingenge, odo da li tadi yambidida oukololo vomomunghulo, opo oiyambididifo iha dule okutwa mekuma lotembeli lo vene. 7 Keembinga adishe dotembeli okwa li ku na omukala wokweendela,* oo tau ende tau ningi wa kula, eshi tau ende wa finda pombada poukololo vopombada. Ounene owa enda tau tamunuka mo okudja kedimo limwe wa finda kulikwao, eshi to londo okudja kedimo lopedu elela wa finda kedimo lopombada elela, eshi to piti medimo lopokati.
8 Onda mona kutya opa li omutune wa yeluka wa dingilila otembeli, nomakanghameno oukololo vomomunghulo oku fike polumbungu alishe lomaludimbo ahamano fiyo omohuke. 9 Ounene wekuma lokombada loukololo vomomunghulo owa li omaludimbo atano. Opa li ehalandjadja* polwamba lomutungilo woukololo vomomunghulo, ovo va li ve li oshitukulwa shotembeli.
10 Pokati kotembeli neenhele* dokulila opa li onhele, oyo ya li i na ounene womaludimbo 20 kombinga keshe. 11 Opa li oshivelo pokati koukololo vomomunghulo nosho yo ehalandjadja kombinga yokolundume noshivelo shikwao kombinga yokolukadi. Ounene, oo wa dingilila ehalandjadja, owa li u na omaludimbo atano.
12 Etungo olo la li kouninginino, la taalela ehalandjadja, ola li li na ounene womaludimbo 70 nosho yo oule womukokomoko womaludimbo 90; ounene wekuma alishe owa li omaludimbo atano.
13 Okwa yeleka otembeli, noya li i na oule womaludimbo 100. Ehalandjadja, etungo* nosho yo omakuma ayo oya li yo i na oule womaludimbo 100. 14 Omutamo wokomesho yotembeli kombinga yokoushilo nosho yo ehalandjadja oya li i na omaludimbo 100.
15 Okwa yeleka oule wetungo, olo la taalela mehalandjadja konima, pamwe nomikala dalo keembinga adishe, nowa li u na omaludimbo 100.
Okwa yeleka yo onhele iyapuki yokondje, onhele iyapuki yomeni noulupale vokufikila vomomukala 16 nosho yo oivelo, omakende oo haa andjuka ombinga imwe, ofimbo ikwao hai kala inini, nosho yo omikala, odo da li meenhele odo nhatu. Popepi noshivelo opa li pa dengelwa oiti okudja pedu fiyo okomakende, nomakende okwa li a tuvikwa. 17 Pombada yoshivelo opa li pa yelekwa nosho yo meni lotembeli nokondje nosho yo ekuma alishe le i dingilila. 18 Omwa li ovakerubi va hongwa nosho yo omafano omilunga, omulunga keshe u li pokati kovakerubi vavali, nomukerubi keshe okwa li e na oipala ivali. 19 Oshipala shomunhu osha li sha taalela komulunga kombinga imwe, noshipala shonghoshi* osha li sha taalela komulunga kombinga ikwao. Oya li ya hongwa monghedi oyo motembeli aishe. 20 Okudja pedu fiyo oponhele oyo i li pombada yoshivelo, opa li ovakerubi va hongwa nosho yo omafano omilunga, e li kekuma lonhele iyapuki.
21 Oikulo yoposhivelo* yonhele iyapuki oya li i na eembinga nhee di fike pamwe. Komesho yonhele iyapuki* okwa li ku na oshinima sha fa 22 oaltari yoshiti, oyo ya li i na oule wopombada womaludimbo atatu nosho yo oule womukokomoko womaludimbo avali. Oya li i na eengudi domohuke, noshitako* shayo nosho yo eembinga dasho oda li da longwa moiti. Opo nee okwa tya kwaame: “Eshi oshitaafula osho shi li komesho yaJehova.”
23 Onhele iyapuki yokondje nosho yo onhele iyapuki, keshe imwe oya li i na oivelo ivali. 24 Oshivelo keshe osha li shi na omivelo mbali. 25 Komivelo donhele iyapuki okwa li ovakerubi va hongwa nosho yo omafano omilunga, ngaashi oo e li komakuma. Opa li yo okatala ka longwa moiti komesho yokalupale kokufikila pondje. 26 Opa li yo eelama domakende nomafano omilunga keembinga adishe dokalupale kokufikila, nosho yo keembinga doukololo vomominghulo dotembeli noutala.