Nghee oilonga yOuhamba hai yambididwa moshitukulwa nomounyuni aushe

METWOKUMWE newanifo lexunganeko laJesus li na sha nomafiku axuuninwa, Eendombwedi daJehova ohadi udifa onghundana iwa ‘fiyo okominghulo dounyuni.’ (Oil. 1:8; Mat. 24:14) Opo di ninge ngaho, ohadi longifa efimbo neenghono dado nehalo liwa opo di kwafele vamwe pamhepo. Otadi twikile okupitifa komesho oinima yOuhamba monghalamwenyo yado de lineekela kutya Jehova ota ka fila oshisho ovalongi pamwe naye. (Mat. 6:25-34; 1 Kor. 3:5-9) Oidjemo otai ulike kutya Jehova okwe di hokwa nokwe di nangeka noupuna.

NGHEE OINIMA YOUHAMBA HAI FILWA OSHISHO MOUNYUNI AUSHE

² Eshi ovanhu vamwe va didilika eenghedi odo hatu longifa mokuudifa nosho yo kutya ohatu yandje Eembiibeli noishangomwa ya kanghamena kOmbiibeli oshali, ova pula va ti: “Osho otashi shiiva ngahelipi?” Oshoshili kutya okupilinda nokunyanyangida Eembiibeli noishangomwa ya kanghamena kOmbiibeli ohaku pula oimaliwa. Ohashi pula yo oimaliwa opo ku tungwe nokukalekwe po omaumbo aBetel omolwovaliyambi ovo hava pilinda, hava pashukile oilonga yokuudifa nokulonga oilonga i lili noku lili omolwokuxumifa komesho onghundana iwa. Kakele kaasho, ovapashukilishikandjo, ovatumwa, ovakokolindjila ve likalekelwa nosho yo vamwe ovo ve li moilonga yefimbo li yadi ohava pewa omakwafo opainiwe opo va dule okutwikila noilonga yavo. Osha yela kutya oilonga yokuudifa onghundana iwa kunena ohai pula oimaliwa ihapu, kutya nee omoshitukulwa omo tu li ile omounyuni aushe. Oimaliwa oyo ohai di peni?

³ Ovanhu vahapu ovo ve na olupandu omolwoilonga yokuhonga ovanhu Ombiibeli oyo hai longwa kEendombwedi daJehova ohava yandje omayambidido oilonga yomounyuni aushe. Ashike oilonga yetu ohai yambididwa unene kEendombwedi do vene, nadimwe domudo ohadi tumu omayambidido ehalo liwa koshitaimbelewa shEendombwedi daJehova shomoshitukulwa. Ohadi yandje nehalo liwa ngaashi ovapiya vaJehova vonale ovo va li va yambidida nehalo liwa oilonga yokutungwa kwonhele yelongelokalunga. (Ex. 35:20-29; 1 Omaf. 29:9) Vamwe ohava shangifa ehangano li fyuulule po oikwamaliko yavo ngeenge va fi. Omaongalo novanhu pauhandimwe nosho yo oikandjo nayo ohai yandje omayambidido opashimaliwa, naluhapu ohaa yandjwa momuvalu munini. Ngeenge a tulwa kumwe, ohaa longifwa okuxumifa komesho oukalele.

⁴ Eendombwedi daJehova ode shi tala ko shi li oufembanghenda okulongifa oimaliwa yado nosho yo oiniwe yado ikwao opo di xumife komesho oilonga yokuudifa. Jesus novahongwa vaye ova li ve na okakutu koimaliwa omo va li hava kufa oimaliwa yokufuta oipumbiwa yavo. (Joh. 13:29) Ombiibeli oye tu lombwela kombinga yovakainhu vamwe ovo va li hava yakula Jesus novahongwa vaye. (Mark. 15:40, 41; Luk. 8:3) Omuyapostoli Paulus okwa li a tambula nehafo ekwafo lopainiwe olo a li a pewa pahole kwaavo va li ve na ohokwe mokuxumifa komesho onghundana iwa nova li va hala okukufa ombinga moukalele. (Fil. 4:14-16; 1 Tes. 2:9) Kunena, Eendombwedi daJehova ohadi landula oshihopaenenwa osho mokulonga nouladi nokuyandja nehalo liwa. Osho ohashi kwafele ovanamitimadiwa keshe pamwe va dule okupewa “omeva omwenyo oshali.” — Eh. 22:17.

OKUFILA OSHISHO EEMHUMBWE DEONGALO

⁵ Eefuto di na sha neongalo nado ohadi futwa nomayambidido ehalo liwa. Ihamu umbwa ongalo; ovanhu ihava lombwelwa kutya nava yandje oimaliwa i fike peni ile va pulwe oimaliwa. Meenhele dokwoongalela omu na oukefa vomayambidido opo keshe umwe a dule okuyandja “ngaashi omutima waye tau mu lombwele.” — 2 Kor. 9:7.

⁶ Oimaliwa oyo hai yambididwa ohai longifwa unene okufuta eefuto di na sha nokukaleka po Olupale lOuhamba. Olutu lovakulunhuongalo otali dulu okutokola kutya oimaliwa imwe nai kale hai tumwa koshitaimbelewa shEendombwedi daJehova shomoshitukulwa i ka longifwe mokuxumifa komesho oilonga yomounyuni aushe. Opo osho shi ningwe, eongalo oli na okuninga okatokolifo ke na sha naasho. Kungaho, omaongalo mahapu ohaa yandje omayambidido pandjikilile koilonga yomounyuni aushe. Ngeenge aveshe ova kala ve shii eemhumbwe odo hadi holoka po meongalo lavo efimbo nefimbo, inaku pumbwa okuningwa omashiivifo luhapu e na sha nomayambidido.

NGHEE OMAYAMBIDIDO HAA UNGAUNGWA NAO

⁷ Konima yokwoongala keshe, ovamwatate vavali ohava kufa mo oimaliwa oyo ya tulwa moukefa vomayambidido ndele tava shange kutya oi li ingapi. (2 Eeh. 12:9, 10; 2 Kor. 8:20) Olutu lovakulunhuongalo ohali ningi omalongekido taa wapalele opo oimaliwa oyo i kale ya amenwa fiyo osheshi ya tumwa koshitaimbelewa ile i longifwe omolweemhumbwe deongalo. Omumwatate oo ha ungaunga noimaliwa yeongalo oha longekida omushangwahokololo welongifo loimaliwa komwedi opo a shiivifile eongalo, nomuunganeki wolutu lovakulunhuongalo oha ningi omalongekido opo omavalulo oimaliwa yeongalo a talululwe konima yeemwedi nhatu keshe.

EEFUTO DI NA SHA NOSHIKANDJO

⁸ Eefuto doyoongalele yoikandjo nosho yo oikandjo imwe ohadi futwa nomayambidido oo haa yandjwa kEendombwedi odo di li moshikandjo osho. Poshoongalele ohapa kala oukefa vomayambidido opo ovanhu va dule okuyandja omayambidido nehalo liwa. Opo ku dule okufutwa eefuto odo tadi twikile, omaongalo otaa dulu okuyandja omayambidido peemhito dimwe.

⁹ Luhapu, oikandjo oi na okufuta eefuto dayo, nongeenge opa xupa oimaliwa, ohai yandjwa komayambidido omounyuni aushe. Ngeenge oshikandjo kashi na oimaliwa ya wana mombaanga yokufuta eefuto doshoongalele ile kashi na oimaliwa inini yoku ka longifa poshoongalele tashi landula, ngaashi okudeposita onhele, omupashukilishikandjo ota dulu okuyandja omayele opo omaongalo a dimbulukifwe kombinga youfembanghenda wokuyambidida. Olutu lovakulunhuongalo keshe otali ka kundafana oshinima osho nokutala kutya eongalo lavo otali ka yandja omayambidido e fike peni koshikandjo. Oli na okuninga okatokolifo opo li yandje omayambidido oo.

¹⁰ Ngeenge opa holoka oupyakadi wopashimaliwa notau pula ovakulunhu voshikandjo va ye meenghundafana, otava dulu okuninga omutumba mefiku loshoongalele shoshikandjo opo va kundafane. Ovakulunhuongalo ove na okuninga outokolifo ngeenge tava ningi omatokolo e na sha nanghee oimaliwa yoshikandjo osho sha hoololwa i na okulongifwa, kakele ashike ngeenge tashi uya peefuto dakwalukeshe. Outokolifo ovo ove na okukala va shangwa omuvalu wokondadalunde nokupula va popilwe keshe efimbo taku longifwa oimaliwa yoshikandjo.

¹¹ Ohapa ningwa omalongekido opo omavalulo oimaliwa yoshikandjo a talululwe konima yefimbo lonhumba.

OKUFILA OSHISHO EEHEPELE

¹² Jesus novahongwa vaye ova li hava kala nokakutu koimaliwa opo va dule yo okukwafela eehepele. (Mark. 14:3-5; Joh. 13:29) Oshinakuwanifwa shopaKriste osho otashi twikile fiyo okunena, molwaashi Jesus okwa ti: “Eehepele omu di kwete alushe mokati keni.” (Mark. 14:7) Eendombwedi daJehova ohadi wanifa po ngahelipi oshinakuwanifwa osho kunena?

¹³ Omafimbo amwe, Ovakriste vamwe ovadiinini meongalo otashi dulika va kale va pumbwa okukwafelwa painiwe omolwoukulupe, okuhenoukolele, ile omaupyakadi amwe vali oo itava dulu okuninga po sha. Oilyo yomaukwaneumbo, ovapambele nosho yo ovo ve shii omhumbwe oyo otashi dulika shi ve linyengife ve va kwafele. Osho oshi li metwokumwe neendjovo domuyapostoli Johannes odo tadi ti: “Ngeenge ope na ou e kwete emona lounyuni ou, ndele ta mono omumwaxe a hepa, ndele te mu kukutikile omutima waye, ohole yaKalunga otai kala mo ngahelipi muye? Ovamwange, inatu kaleni nokuhola nondjovo nelaka, ndelenee omoilonga nomoshili!” (1 Joh. 3:17, 18; 2 Tes. 3:6-12) Elongelokalunga lashili ola kwatela mo okufila oshisho Ovakriste ovadiinini ovo tashi dulika va pumbwa ekwafo lopainiwe. — Jak. 1:27; 2:14-17.

¹⁴ Omuyapostoli Paulus okwa yelifa nghee taku dulu okuyandjwa ekwafo lopainiwe kwaavo va wana oku li pewa monhumwafo yaye yotete oyo a li a shangela Timoteus. Oto dulu okulesha kombinga yomayele aye mu 1 Timoteus 5:3-21. Omukriste keshe oku na tete okufila oshisho eemhumbwe dovanhu vambulavo. Ovanamido ile ovo vehe na oukolele ove na okupewa ekwafo kounona vavo, kovatekulu, ile kovapambele vamwe vali vopopepi. Omafimbo amwe, otava dulu okumona omakwafo oo haa yandjwa kepangelo ile komahangano amwe e lili, nomolwaasho ovapambele ile vamwe otava dulu okukwafela ovo ve na omhumbwe va ninge eindilo li na sha nomakwafo oo. Otapa dulu okuholoka onghalo oyo tai pula eongalo alishe li yandje ekwafo kovamwatate novamwameme vonhumba ovo va pumbwa ekwafo, ovo va kala ovadiinini efimbo lile. Ngeenge kape na oilyo youkwaneumbo ile ovapambele vamwe ovo tava dulu okukwafela ovamwatate va tya ngaho nosho yo ngeenge omakwafo oo haa yandjwa kepangelo inaa wana, olutu lovakulunhuongalo otali dulu okuninga eetepo opo li kwafele. Ovakriste ove shi tala ko shi li oufembanghenda okutukula oiniwe yavo naavo ve na omhumbwe.

¹⁵ Ovamwatate novamwameme vahapu otashi dulika va hangwe komhumbwe omolwomahepeko, oita, omakakamo edu, omafundja, ondjala, ile omaupyakadi vali amwe oo haa holoka po luhapu momafimbo aa madjuu. (Mat. 24:7-9) Omaongalo omoshitukulwa otashi dulika a kale itaa dulu okukwafela, nomolwaasho Olutuwiliki ohali ningi omalongekido opo ovamwatate keenhele dimwe va yandje ekwafo olo la pumbiwa. Osho osha faafana naashi Ovakriste vomuAsia Linini va li va yandja oikulya kovamwaxe muJudea pefimbo londjala. (1 Kor. 16:1-4; 2 Kor. 9:1-5) Ngeenge otwa landula oshihopaenenwa shavo, ohatu ulike kutya otu hole ovamwatate nonokutya otu li ovahongwa vaJesus Kristus vashili. — Joh. 13:35.

NGHEE OISHANGOMWA HAI TANDAVELIFWA

¹⁶ Eembiibeli nosho yo oishangomwa ya kanghamena kOmbiibeli ohai dana onghandangala ya fimanenena mokutandavelifa etumwalaka lOuhamba. Luhapu olutu lovakulunhuongalo ohali tula po omuyakuliongalo umwe a kale ta yakula poishangomwa yeongalo. Ovamwatate ovo hava tulwa po va kale tava ungaunga noishangomwa ohava wanifa po oinakuwanifwa yavo nelitulemo. Ohava ningi omadidilikoshango opo pa kale oishangomwa ya wana eemhumbwe deongalo.

¹⁷ Tu li Ovakriste ve liyapula, otu shii kutya Kalunga oye e tu pa efimbo, okudula kwopamadiladilo nokwopalutu, ounghulungu, oiniwe nosho yo oshali yomwenyo, notwa hala oku i longifa moilonga yaye. (Luk. 17:10; 1 Kor. 4:7) Ngeenge otwa longifa nawa oiniwe yetu aishe, ohatu ulike kutya otu hole Jehova neenghono. Otwa hala okufimanekifa Jehova neliko letu, molwaashi otu shii kutya oha hokwa oshali keshe oyo hatu mu pe nomutima aushe. (Omayel. 3:9; Mark. 14:3-9; Luk. 21:1-4; Kol. 3:23, 24) Jesus okwa ti: “Onye mwa tambula oshali, yandjeni yo oshali.” (Mat. 10:8) Ngeenge hatu liyambe nokulongifa oiniwe yetu moilonga yaJehova, ohatu mono ehafo linene. — Oil. 20:35.