Ombiibeli oi na ounongo u li pefimbo

NATU TYE NEE NGENO: Oto talele po momuseum mu na oilongwanima yopefimbo lonale. Ihapu yomuyo oya kokoka noya kulupa. Oitukulwa yayo imwe oya kana ko. Ndele omu na shimwe shi li ngaashi shi li; inashi ninga sha nandenande. Otashi dulika u pule oo te ku ulikile oinima to ti: “Eshi oshipe shi dule ikwao?” Opo nee ta nyamukula ta ti: “Ahowe, osho osho shikulu shi dule ihapu yomuyo, noinashi ningululwa nandenande.” Opo nee owa pula vali to ti: “Osha kala sha amenwa?” Oo te ku ulikile okwa nyamukula a ti: “Ahowe, osho osho sha pita momhepo nomodula yamatutu. Ovanyoni vomaliko vahapu ova kendabala oku shi hanauna po.” Otashi dulika u lipule wa kumwa to ti: ‘Mbela osha longwa moshike?’

Konyala Ombiibeli nayo oya fa oshilongomwa osho shididilikwedi. Ombiibeli embo lonalenale, likulu li dule omambo mahapu. Oshoshili kutya oku na omambo vali amwe onale, ndele ngaashi oilongomwa oyo ya kokoka noya kulupa, omambo mahapu okwa nyonauka molwaashi okwa kala ko eedula dihapu. Pashihopaenenwa, ouyelele wao u na sha nounongononi itau tu kumwe naao mupe, oo tau yambididwa komaumbangi. Omayele ao e na sha nounamiti luhapu ohaa monika a nyika oshiponga ponhele yokukwafela. Natango, omambo onale mahapu kae ko vali, noitukulwa yao oya kana ile ya nyonauka.

Ashike Ombiibeli oya yooloka ko komambo oo. Oya hovelwa okushangwa omafelemido e dule po 35 a pita, ashike oi li ngaashi i li. Ndele nonande ovanhu ova kala va hala oku i hanauna po oule womafelemido, ngaashi oku i xwika po, oku i shilika noku i sheka, eendjovo dayo inadi lunduluka. Ponhele yokukala tai kondjifafana nouyelele mupe, Ombiibeli oya popya shihapu osho tashi ulike kutya oi na ounongo wa denga mbada. — Tala oshimhungu “Ombiibeli oya kwisha ile oi li pefimbo?”

OI NA OMAFINAMHANGO OO TAA WILIKE OVANHU KUNENA

Otashi dulika u lipule kutya: ‘Omahongo Ombiibeli otae tu kwafele ngoo shili kunena?’ Opo u mone enyamukulo, lipula kutya: ‘Omaupyakadi a kwata moiti elipi a taalela ovanhu kunena? Elipipo matilifa neenghono?’ Otashi dulika u diladile kombinga yoita, enyateko, ekaulonyanga, ile oulingilingi. Paife natu ka kundafane kombinga yomafinamhango amwe Ombiibeli. Eshi to dilonga kuo, lipula kutya, ‘Ngeno ovanhu ova dulikile komafinamhango oo, mbela ngeno ounyuni owa kala u li xwepo?’

OKUKALA TU HOLE OMBILI

“Ovanelao ovanambili, osheshi ovo tava ka ifanwa ovana vaKalunga.” (Mateus 5:9) “Ngeenge tashi dulika, kombinga yeni kaleni nombili novanhu aveshe.” — Ovaroma 12:18.

ONGHENDA NEDIMINEPO

“Ovanelao ovananghenda, osheshi ovo tava ka filwa onghenda.” (Mateus 5:7) “Lididimikilafaneni, diminafaneni po omanyono, ngeenge mwa ningafana nomukweni, ngaashi [Kalunga] e mu dimina po, osho nanye yo mu ninge.” — Ovakolossi 3:13.

OKUHENOKATONGO

Kalunga “okwa shita oiwana aishe yovanhu, opo i kale kombada yedu alishe.” (Oilonga 17:26) “Kalunga iha tale omunhu kombada. Ndele moshiwana keshe, keshe ou he mu tila ndele ta diinine ouyuki, ote mu wapalele.” — Oilonga 10:34, 35.

OKUFIMANEKA EDU

“Omwene Kalunga okwa kufa omunhu, ndele te mu nangeke moshikunino shaEden, oku shi longa noku shi kelela.” (Genesis 2:15) Kalunga ota ka ‘nyonauna po ava hava nyono edu.’ — Ehololo 11:18.

OKUTONDA OLWISHO NOLUHAELO

“Pashukeni nye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” (Lukas 12:15) “Oluhaelo nakeshe tuu onyata youlunde ile olwisho inali tumbulwa nande vali mokati keni, ngaashi sha wapalela ovayapuki.” — Ovaefeso 5:3.

OKUKALA OVANASHILI NOKULONGA NOUDIININI

‘Otwa hala okweenda nawa moinima aishe.’ (Ovaheberi 13:18) “Omulunga aha vake vali, ndelenee na longe nokulongifa omake aye ouwa.” — Ovaefeso 4:28.

OSHA FIMANA OKUKWAFELA OVO VE NA OMHUMBWE

“Ovambada va tweni ouladi, yakuleni oingone, aveshe va taleni onheni.” (1 Ovatessaloniki 5:14) ‘Talela po eefiye novafiyekadi momaudjuu avo.’ — Jakob 1:27.

Ombiibeli inai tumbula ashike omafinamhango oo, ndele otai tu hongo tu kale twe a lenga noku a tula moilonga monghalamwenyo yetu yakeshe efiku. Ngeno ovanhu vahapu ova tulile moilonga omahongo oo twa kundafana, ngeno mounyuni kamu na omaupyakadi mahapu kunena. Hano oshoshili kutya omafinamhango Ombiibeli otae tu kwafele kunena, noku li pefimbo lela shi dulife nale. Ndele mbela ongahelipi omahongo Ombiibeli taa dulu oku ku kwafela kunena?

NGHEE OMAHONGO OMBIIBELI TAA DULU OKU KU ETELA OUWA PAIFE

Omulumenhu omunaendunge a shiya ko okwa ti: “Ounongo wa hololwa koilonga yavo kufye, owa yuka.” (Mateus 11:19) Mbela ito tu kumwe naasho? Ounongo ohau limonikila ashike kutya otau longo ngahelipi ngeenge to u tula moilonga. Otashi dulika u tye, ‘Ngeenge Ombiibeli otai tu kwafele shili kunena, mbela itai dulu okukwafela nge monghalamwenyo yange? Ongahelipi tai dulu okukwafela nge kunena kombinga yomaupyakadi oo ndi li muo?’ Natu ka tale koshihopaenenwa.

Delphinea okwa li e lipyakidila monghalamwenyo noinima oya li tai mu endele nawa. Ndele ombadilila, okwa li a hangwa komaupyakadi manene. Okwa filwa okamonakadona komido omulongo nasha. Ohombo yaye oya teka. Okwa li yo a shakeneka oupyakadi wopamaxupilo. Okwa ti: “Ngha li ndi shii kutya nandi ninge shike, nghi na okaana, nghi na omushamane, ame nghi na eumbo. Onda li ndi wete ndihe na oshilonga, nghi na eenghono, nonghalamwenyo yange kai na eityo.”

Delphine ka li a mona nande onale oushili weendjovo odo tadi ti: “Okukala po kwetu kombada yedu oku fike pomido omilongo heyali, ngeenge okuhapu, shapu omilongo hetatu, nouwa wako: oudjuu auke netutuko; osheshi oko otaku pitilile po diva, fye ohatu vilola po.” — Epsalme 90:10.

Delphine okwa li a mona ekwafo mOmbiibeli eshi a li meenghalo didjuu. Ekwafo olo a mona mo ola li le mu kwafela. Ngaashi tashi ka kundafanwa moitukulwa itatu tai landula ko, vahapu navo ova mona yo kutya Ombiibeli oye va kwafela eshi va tula moilonga omayele ayo opo va dule okuungaunga nomaupyakadi oo tava shakeneke. Osho oshe va ningifa va mone kutya Ombiibeli oya fa oilongwanima oyo ya tumbulwa pehovelo loshitukulwa. Ashike oya yooloka ko filufilu komambo mahapu oo a kulupa nokwa ngushuluka. Ndele mbela osho osha hala kutya Ombiibeli oya longwa moshinima she likalekelwa? Ile mbela osheshi i na omadiladilo aKalunga, ndele haovanhu? — 1 Ovatessaloniki 2:13.

Otashi dulika naave wa mona kutya onghalamwenyo oixupi noi na omaupyakadi mahapu. Ngeenge omaupyakadi e ku wilila po, oho kongo ehekeleko, ekwafo nosho yo omayele e shii okulineekelwa peni?

Natu ka taleni koitwa itatu omo Ombiibeli tai dulu oku ku kwafela monghalamwenyo. Otai ku hongo nghee to dulu

1. okuhenuka omaupyakadi apa tashi shiiva.

2. okukandula po omaupyakadi ngeenge a holoka po.

3. okuungaunga nomupondo neenghalo odo ito dulu okulundulula.

Oitukulwa tai landula ko otai ka kundafana eenghedi odo nhatu.