⁸ Ngeenge osho a li ta diladila ngaho, okwa li a puka filufilu. Kakele kaasho, ngeenge vo naAdam ova li hava lombwele Kain oshinima sha tya ngaho eshi ta kulu, ova li ashike ve mu ningifa a kale e na ounhwa. Mokweendela ko kwefimbo, Eva okwa li vali a dala omonamati umwe, ndele ka li a popya eendjovo da yukila kwaado a li a popya eshi a dala Kain. Okaana oko ove ka luka Abel, olo tali ti “Omufudo” ile “Oinima yongaho.” (Gen. 4:2) Mbela ova li ve mu luka ngaho molwaashi vaha li ve na eteelelo la sha muye ngaashi olo va li ve na muKain? Otashi dulika osho ngaho, ashike katu na oushili mwaasho.

10, 11. Kain naAbel ova li hava longo oilonga yoludi lilipi, naAbel okwa li a kulika oukwatya ulipi?

¹⁰ Eshi ovanamati vavali vaAdam tava putuka, otashi dulika a li e va deulila oilonga oyo tai kwafele oukwaneumbo. Kain okwa li a ninga omunamapya ofimbo Abel a li omufita.

¹³ Abel okwa li ha longifa efimbo opo a dilonge kombinga yaJehova. Kala nee wa fa u mu wete ta lifa eedi daye. Oilonga yomufita oya kwatela mo okweendaenda. Abel okwa li ha endifa oinamwenyo oyo inambili koikulundudu, momalufilu noku i taulukifa omilonga, ta kongo apa pe na oulifilo muwa, omeva mawa nosho yo onhele iwa okutulumukila. Koinamwenyo aishe oyo Kalunga a shita, eedi odo hadi monika da fa dihe na ekwafo lasha, da fa ashike da shitwa di kale mewiliko nomeameno lovanhu. Mbela Abel okwa li e wete naye a pumbwa ewiliko, eameno nosho yo efiloshisho laKalunga oo omunaendunge noku na eenghono e dule ovanhu aveshe? Nopehe na omalimbililo, okwa kala ha ilikana luhapu kombinga yaasho, nosha li sha pameka eitavelo laye.