Josef okwa li a hangwa koilanduliko ya kwata moiti. Omukulukadi waPotifar okwa li a hala oku mu alulila owii. Okwa li a kuwa mokule meendelelo, ta ifana ovapiya vaye vakwao ve uye meumbo. Okwe va hokololela kutya Josef okwa li ta kendabala oku mu kwata onghonga ndele ta faduka po eshi a kuwa mokule. Okwa kala e kwete oshikutu osho a teelela omushamane waye e uye keumbo. Eshi Potifar a aluka, okwe mu lombwela oipupulu oyo, noku mu vela ombedi kutya oye e na epuko molwaashi oye a eta meumbo lavo omunailongo oo. Potifar okwa li e linyenga ngahelipi? Ombibeli oya ti: “Ye okwa handuka unene.” Okwa kwatifa po Josef ndele te mu idililifa modolongo. — Genesis 39:13-20.

“EEMHADI DAYE OKWA LI VE DI TULA METI”

Katu shii naanaa kutya eedolongo dOvaegpiti pefimbo opo oda li da tya ngahelipi. Ovalafululi voinima ova mona eenhele odo da hanaunwa po, kutya oda li omatungo a kola noda li di na eedolongo di li koshi yedu. Lwanima Josef okwa ka popya onhele oyo a ti kutya ‘odolongo,’ osho tashi ti lelalela “elambo,” omo muhe na ouyelele neteelelo lasha. (Genesis 40:15) Embo lEpsalme ola ti kutya Josef okwa li vali a hepekwa monghedi imwe: “Eemhadi daye okwa li ve di tula meti, ve mu twalele ko nomalyenge.” (Epsalme 105:17, 18) Omafimbo amwe Ovaegpiti ova li hava tula ovanadolongo meti nokumangela omaoko avo konima peengolo; vamwe ohava tulwa oitenda meefingo. Josef ka li tuu a mona oixuna eshi a ungaungwa naye monghedi ya tya ngaho nonande kali a longa sha shoku mu monififa oixuna i fike opo!

Osho kasha li ashike oupyakadi wopakafimbo. Ombibeli oya ti kutya Josef okwa “kala mo modolongo.” Okwa panga omido monhele ya tya ngaho i tilifa!a Ka li nokuli e shii ngeenge fiku limwe ona ka mangululwe mo. Ndele eshi omafiku oo mai a enda taa ningi oivike, ngolongo a ninga eemwedi, oshike sha li tashi ka kwafela Josef aha teke omukumo nokukala eheneteelelo?