18. (a) Omolwashike Mordekai a li a anya okutwila Haman eengolo? (Tala yo eshangelo lopedu.) (b) Ongahelipi ovalumenhu novakainhu veitavelo hava shikula oshihopaenenwa shaMordekai kunena?

¹⁸ Omulumenhu wedina Haman okwa li a pewa ondodo ya tumbala mouhamba waAhasveros. Ohamba oya li ye mu nangeka po e li omuprima nomuyandjimayele wayo, nokwa li omutivali mouhamba. Ohamba oya li nokuli ya yandja oshipango kutya keshe ou ta mono elenga olo oku na oku li linyongamena. (Ester 3:1-4) Omhango ya tya ngaho oya li oupyakadi kuMordekai. Okwa li a itavela kutya oku na okudulika koshipango shohamba, ashike hangeenge shi li omhinge nehalo laKalunga. Haman okwa li “Omuagag.” Osha yela kutya okwa dja moludalo laAgag, ohamba yOvaamalek oyo ya li ya dipawa komuprofeti waKalunga, Samuel. (1 Sam. 15:33) Ovaamalek ova li ovakolokoshi nova li ve lininga ovatondi vaJehova naIsrael. Ovaamalek ova li va tokolwa kuKalunga.c (Deut. 25:19) Ongahelipi Omujuda omudiinini ta dulu okutwila eengolo Ovaamalek? Mordekai ka li ta dulu oku shi ninga, onghee okwa li a anya okutwila Haman eengolo. Fiyo okunena ovalumenhu novakainhu veitavelo, ohava tula eemwenyo davo moshiponga mokudiinina efinamhango olo tali ti: “Okudulika kuKalunga ku dule okudulika kovanhu.” — Oil. 5:29.