“Omhangela yaJehova” itai ka ponya nandenande
“Onda hala okushiivifila omhangela [yaJehova, NW]. Oye a tya kuame: Oove Omona wange . . . Ehela kuame, ndee handi ku pe ovapaani va ninge efyuululo loye.”—EPSALME 2:7, 8.
1. Ekondjifafano lilipi li li pokati kelalakano laKalunga naalo loiwana?
JEHOVA KALUNGA oku na elalakano li na sha novanhu nosho yo edu. Oiwana nayo oi na elalakano. Ndele omalalakano oo okwa yoolokafana neenghono! Otu na okukala twa teelela shi kale ngaho, molwaashi Kalunga okwa ti: “Ngaashi eulu li li pombada li dule edu, osho yo eendjila dange di dule deni, nomadiladilo ange e dule omadiladilo eni.” Elalakano laKalunga otali ka wanifwa shili, molwaashi okwa weda ko ta ti: “Ngaashi odula nomume tai loko meulu itai shuna mo vali, ndelenee otai talaleke edu, tai menifa ndee tai tutumifa, tai yandje ombuto komukuni neendya okulya, osho yo ondjovo yange tai di mokanya kange: itai alukile kuame oshimha, ndelenee otai longo osho sha wapalela nge, ndee tai wanifa eshi nde i tumina.”—Jesaja 55:9-11.
2, 3. Oshike sha yelifwa mepsalme etivali, ndele omapulo elipi a holoka po?
2 Oushili oo kutya elalakano laKalunga li na sha nOhamba yopaMessias otali ka wanifwa owa yelifwa mepsalme etivali. Omushangi walo, ohamba David yaIsrael shonale, okwa li ya nwefwa mo kuKalunga i xunganeke kutya otapa ka kala efimbo likonekwedi eshi oiwana tai ka lundalala. Ovapangeli vayo otava ka fikama va kondjife Jehova Kalunga nosho yo Omuvaekwa waye. Ndelenee omupsalme okwa imba yo a ti: “Onda hala okushiivifila omhangela [yaJehova, NW]. Oye a tya kuame: Oove Omona wange . . . Ehela kuame, ndee handi ku pe ovapaani va ninge efyuululo loye nominghulo dedu odoye.”—Epsalme 2:7, 8.
3 “Omhangela yaJehova” otai ka tya shike koiwana? Ongahelipi ya kuma ovanhu aveshe? Doshili, oiningwanima ye i pamba otai ka tya shike kovaleshi aveshe vepsalme etivali ovatilikalunga?
Oiwana tai lundalala
4. Oitwa ya fimanenena ilipi i li mEpsalme 2:1, 2?
4 Mokupopya shi na sha neenghatu doiwana novapangeli vayo, omupsalme okwa hovela eimbilo laye ta ti: “Ovapaani otava lundalalele shike, noiwana tai diladilile shike oinima yongaho? Eehamba dedu tadi fikama, ovapangeli otava kundafana pamwe notava tu ondubo nOmwene nomuvaekwa waye.”—Epsalme 2:1, 2.a
5, 6. Oiwana otai ‘diladila oinima yongaho’ ilipi?
5 “Oinima yongaho” ilipi oiwana yokunena tai ‘diladila’? Ponhele yokutambula ko Omuvaekwa waKalunga—Messias ile Kristus—oiwana oya kala tai ‘diladila’ ile tai dilonga shi na sha nokukaleka po eenghonopangelo dayo vene. Eendjovo odo depsalme etivali okwa li yo da wanifwa mefelemudo lotete O.P., eshi ovapangeli Ovajuda nOvaroma va li va longela kumwe mokudipaa Jesus Kristus, oo a li ta ka kala Ohamba ya tulwa po kuKalunga. Ndele ewanifo linene ola hovela mo 1914 eshi Jesus a nangekwa po e li Ohamba meulu. Okudja opo, kapa li nande oshitukulwa shopapolotika kombada yedu osho sha dimina Ohamba oyo ya nangekwa po kuKalunga.
6 Omupsalme okwa li a hala okutya shike eshi a pula kutya ‘oiwana otai diladila shike oinima yongaho’? Osha hala okutya elalakano loiwana olongaho; oloshimha nokali na fiku li wanifwe. Oiwana itai dulu okweeta ombili noukumwe kombada yedu. Ndelenee oya katuka eenghatu fiyo oposhitwa shokukondjifa epangelo laKalunga. Doshili, oya fikama ye limanga kumwe ya hanya nokukundafana pamwe i kondjife Omukombadambada nOmuvaekwa waye. Inashi nyika tuu oulai!
Ohamba ifindani oyo ya tulwa po kuJehova
7. Ongahelipi ovashikuli vaJesus vonale va ulika meilikano nghee Epsalme 2:1, 2 la wanifwa?
7 Ovashikuli vaJesus ova li va yukifa eendjovo dEpsalme 2:1, 2 kuye. Eshi kwa li tava hepekelwa eitavelo lavo, ova ilikana tava ti: “Omwene [Jehova], Ove wa shita eulu nedu nefuta nakeshe eshi shi li mo. Oove tuu ou okOmhepo Iyapuki wa popifa okanya katate yetu David, omupiya woye, to ti: Ovapaani otava lundalalele shike, noiwana tai diladilile shike oinima yongaho? Eehamba dedu tadi fikama, novapangeli otava ongalele kumwe notava tu ondubo nOmwene nOmuvaekwa waye. Osheshi moshilando eshi omwa ongalela mo shili Herodes [Antipas] naPontius Pilatus pamwe novapaani, novanhu vaIsrael ova twa ondubo nOmumwoye omuyapuki Jesus, ou we mu vaeka.” (Oilonga 4:24-27; Lukas 23:1-12)b Heeno, mefelemudo lotete opa li omhangela yomeholeko yokulongela omunyonena omupiya omuvaekwa waKalunga, Jesus. Ndelenee epsalme olo okwa li tali ka wanifwa vali pa pita omafelemido konima yaasho.
8. Ongahelipi Epsalme 2:3 tali wanifwa shi na sha noiwana yokunena?
8 Eshi Israel shonale sha li shi na ohamba yopanhu, ngaashi David, oiwana yovapaani novapangeli vayo oya li ye limanga kumwe okukondjifa Kalunga nomuvaekwa waye oo a nangekwa po e li ohamba. Ndele ongahelipi shi na sha nefimbo letu? Oiwana yokunena inai hala okukala metwokumwe noiteelelwa yaJehova naMessias. Onghee otai fanekwa tai popi tai ti: “Tu tokauleni omapando avo, fye tu liduleni omiya davo!” (Epsalme 2:3) Engabeko keshe tali tulwa po kuKalunga nOmuvaekwa waye otali patanekwa kovapangeli noiwana. Ndele odoshili kutya eenghendabala keshe dokutokaula omapando a tya ngaho nokulidula omiya da tya ngaho otadi ka kala doshimha.
Jehova ote va ningi oshiyele
9, 10. Omolwashike Jehova ta ningi oiwana oshiyele?
9 Jehova ke na neenghendabala dovapangeli voiwana dokupangela va manguluka ko kuye. Epsalme etivali ola twikila ko tali ti: “Ou omukali womeulu ote shi va yolele, Omwene ote shi va ningile oshiyele.” (Epsalme 2:4) Kalunga ota twikile nelalakano laye nokwa tala ko kutya ovapangeli ovo kave fi sha. Ota yolo odino yavo note va ningi oshiyele. Nave litadele osho va diladila okuninga. Ndele kuJehova ove li oiyolifa. Ota yolo omapataneko avo oo itaa ti sha.
10 Mepsalme vali limwe laye, David okwa popya shi na sha novanhu noiwana itondadi nokwa imba a ti: “Oove Omwene, Kalunga keengudu dovakwaita, Kalunga kaIsrael, penduka, u handukile ovapaani aveshe, Oove, ino xupifa ko nande umwe [womwaavo] ve he nouyuki nove he noudiinini. Keshe onguloshi otava aluka, ndee tava ono ngaashi eembwa, ndee tava lyangana noshilando. Tala, otava fuluka onhutu mokanya, omikonda odi li momilungu davo, osheshi otava ti: ‘Olyelye mbela te shi udu?’ Ndele Omwene, Ove to shi va yolele, novapaani aveshe oto va sheke.” (Epsalme 59:6-9) Jehova ota yolo okulitada kwoiwana nengwangwano layo eshi ya katuka onghatu ya nyika oulai i li omhinge naye.
11. Oshike tashi ningwa po ngeenge oiwana tai kendabala okukondjifa elalakano laKalunga?
11 Eendjovo dEpsalme eti-2 otadi pameke eitavelo letu kutya Kalunga ota dulu okupongolola po eshongo keshe. Ohatu dulu okukala noushili kutya ota ka wanifa alushe ehalo laye noita ka efa nande ovapiya vaye ovadiinini. (Epsalme 94:14) Ndele mbela oshike tashi ka ningwa po ngeenge oiwana tai ningi eenghendabala dokukondjifa elalakano laJehova? Papsalme etivali, Kalunga “ote ke va hanyena mehandu,” a fa ta popi newi lomungungumo munene noutilifi. Kakele kaasho, ‘mokukeshuka kwaye ote ke va tilifa’ a fa te va denge noluvadi linene.—Epsalme 2:5.
Ohamba ya nangekwa po kuKalunga
12. Epsalme 2:6 otali ulike kokunangekwa po kulipi?
12 Osho Jehova a weda ko ta popi okupitila momupsalme, nope he na omalimbililo otashi handula oiwana. Kalunga ota ti: “Ame tuu ou nda nangeka ohamba yange muSion komhunda yange iyapuki.” (Epsalme 2:6) Omhunda yaSion oya li muJerusalem, oko David a li a nangekwa po e li ohamba yaIsrael ashishe. Ndele Ohamba yopaMessias itai kala omutumba kolukalwapangelo moshilando osho ile monhele yonhumba kombada yedu. Doshili, Jehova okwa nangeka po nale Jesus Kristus komhunda yaSion shomeulu, e li Ohamba yopaMessias oyo a hoolola.—Ehololo 14:1.
13. Ehangano lilipi Jehova a ninga nOmona waye?
13 Ohamba yopaMessias otai popi paife tai ti: ‘Onda hala okushiivifila omhangela yaJehova [oo a ninga ehangano nOmona li na sha nOuhamba]. Oye [Jehova Kalunga] a tya kuame: Oove Omona wange, onena tuu eli nde ku dala.’ (Epsalme 2:7, yelekanifa NW.) Kristus okwa popya shi na sha nehangano lOuhamba eshi a lombwela ovayapostoli vaye a ti: “Onye tuu ava mwa kala puame momayeleko ange, osheshi Ame ohandi mu tokolele, ongaashi Tate a tokolela nge, ouhamba.”—Lukas 22:28, 29.
14. Omolwashike taku dulu okutiwa kutya Jesus okwa wana filufilu okuninga Ohamba?
14 Ngaashi sha xunganekwa mEpsalme 2:7, Jehova okwa dimina peninginifo laJesus kutya oku li Omona waYe nosho yo moku mu nyumunina omwenyo wopamhepo. (Markus 1:9-11; Ovaroma 1:4; Ovaheberi 1:5; 5:5) Heeno, Ohamba yOuhamba womeulu oyo Omona ewifa laKalunga. (Johannes 3:16) E li oludalo lomepata leehamba lohamba David, Jesus okwa wana filufilu okuninga Ohamba. (2 Samuel 7:4-17; Mateus 1:6, 16) Papsalme etivali, Kalunga ota lombwele Omona waye ta ti: “Ehela kuame, ndee handi ku pe ovapaani va ninge efyuululo loye nominghulo dedu odoye.”—Epsalme 2:8.
15. Omolwashike Jesus ta pula ovapaani va ninge efyuululo laye?
15 Ohamba—Omona waKalunga—oye a landula ko kuJehova meenghonopangelo. Jesus oku li omulineekelwa waJehova oo a yelekwa nomudiinini. Kakele kaasho, Jesus oku na oufemba wokufyuulula e li Omudalwa wotete waKalunga. Doshili, Jesus Kristus oye “olupe laKalunga iha monika, Omudalwa wotete [woishitwa] aishe.” (Ovakolossi 1:15) Osho e na okuninga osho okupula, opo nee Kalunga ‘ote mu pe ovapaani va ninge efyuululo laye nosho yo ominghulo dedu.’ Jesus ota ningi eindilo olo e li oo a “nyakukilwa ovana vovanhu” nomolwaashi oku na ehalo linene okuwanifa po ehalo laXe womeulu li na sha nedu nosho yo ovanhu.—Omayeletumbulo 8:30, 31.
Omhangela yaJehova okukondjifa oiwana
16, 17. PaPsalme 2:9, oshike sha tuvikililwa oiwana?
16 Molwaashi epsalme etivali otali wanifwa paife, pefimbo lokukala po kwaJesus Kristus ku he wetike, oshike sha tuvikililwa oiwana? Mafiku Ohamba otai ka wanifa elombwelo laKalunga tali ti: “Ove u noku va nyanyaula [oiwana] nodibo yoshivela, ndee to va tataula ngaashi oshiyuma.”—Epsalme 2:9.
17 Eedibo deehamba domomafimbo onale oda li omadidiliko eenghonopangelo dopauhamba. Eedibo dimwe okwa li da longwa moivela, ngaashi oyo ya popiwa mepsalme etivali. Efaneko olo la longifwa omo otali ulike nghee tashi ka kala shipu kuKristus Ohamba okuhanauna po oiwana. Okudenga onghama oiyuma yedu nodibo yoshivela otaku i tataula po filufilu.
18, 19. Opo di hokiwe kuKalunga, oshike osho eehamba dokombada yedu da pumbwa okuninga?
18 Mbela ovapangeli voiwana ove na ashike okuhanaunwa po ofilufilu? Hasho, omolwaashi omupsalme ote va kumaida neendjovo edi tadi ti: “Eehamba nye, paife pukulukeni, ovatokoli nye vokombada yedu, lungameni.” (Epsalme 2:10) Eehamba otadi ifanwa di pwilikine nodi pukuluke. Odi na okudimina kutya eemhangela dado odongaho, ndele ponhele yaasho Ouhamba waKalunga oo tau ka etela ovanhu ouwa.
19 Opo di hokiwe kuKalunga, eehamba dokombada yedu odi na okulundulula eenghedi dokukalamwenyo kwado. Otadi kumaidwa di ‘kalele Omwene netilo nokunyakukwa nokukakama.’ (Epsalme 2:11) Ongahelipi ngeenge ode shi ningi? Ponhele yokulundalala ile okukala da ngwangwana pamadiladilo, otadi dulu okuhafela etimaumbwile olo Ohamba yopaMessias tai di timaumbwilifa. Ovapangeli vokombada yedu otava ka kala va pumbwa okweefa po ounhwa oo hava holola mokupangela kwavo. Kakele kaasho, ove na okulunduluka meendelelo nokupukuluka shi na sha nounene u he fi kuyelekwa wounamapangelo waJehova neenghono daye dinenenene nosho yo shi na sha nOhamba yopaMessias oyo a tula po.
“Xupiteni Omona”
20, 21. Otashi ti ngahelipi ‘okuxupita Omona’?
20 Epsalme eti-2 otali shiivifa paife eshivo lopanghenda kovapangeli voiwana. Ponhele yokulimanga kumwe mokupataneka, otava kumaidwa taku ti: “Xupiteni Omona komilungu, opo [Jehova Kalunga] e he mu handukile ndee tamu nyonauka mondjila yeni; osheshi ehandu laye kali kwete kufuluka.” (Epsalme 2:12a) Omwene Omunamapangelo aeshe Jehova oku na okupwilikinwa ngeenge a yandja elombwelo. Eshi a nangeka Omona waye kolukalwapangelo, ovapangeli vokombada yedu okwa li ve na okweefa ‘okudiladila oinima yongaho.’ Okwa li ve na okudimina diva Ohamba oyo nokudulika kuyo filufilu.
21 Omolwashike ‘Omona e na okuxupitwa’? Eshi epsalme etivali la shangwa, okuxupita okwa li euliko loukaume nokwa li haku ningwa okuhambelela ovaenda meumbo, omo kwa li tava ka yakulwa nawa. Okuxupita okwa li yo euliko lelineekelo ile loudiinini. (1 Samuel 10:1) Movelishe oyo yepsalme etivali, Kalunga ota lombwele oiwana i xupite ile i hambelele Omona waye e li Ohamba ya vaekwa.
22. Ovapangeli voiwana ove na ngeno okupwilikina kelondwelo lilipi?
22 Ovo tava anye okudimina eenghonopangelo dOhamba oyo Jehova a hoolola, ove mu dina. Otava anye okudimina ounamapangelo weshito alishe waJehova Kalunga nosho yo eenghonopangelo daye nokudula kwaye okuhoolola Ohamba oyo ya wapalela filufilu ovanhu. Ovapangeli voiwana otava ka mona eshi ehandu laKalunga tali ke va hanga ombadilila, eshi tava kendabala okuwanifa po eemhangela davo vene. “Ehandu laye kali kwete kufuluka,” ohali xwama diva noitali dulu okukondjifwa. Ovapangeli voiwana ove na ngeno okutambula ko elondwelo olo nomwenyo muwa nokukatuka metwokumwe nalo. Okuninga ngaho otaku ti omwenyo.
23. Ope na efimbo natango opo ovanhu va ninge shike?
23 Epsalme olo litunhula otali xulifa tali ti: “Ovanelao ovava aveshe, have [lineekele Jehova].” (Epsalme 2:12b) Ope na natango efimbo opo ovanhu, nokuli novapangeli pauhandimwe, ovo va kala ve li paka meemhangela doiwana dokweeta eameno ve uye kuJehova. Otava dulu okuuya kuJehova, oo ta yandje eameno koshi yepangelo lOuhamba. Ndele ove na oku shi ninga fimbo Ouhamba wopaMessias inau hanauna po oiwana oyo i li omhinge naKalunga.
24. Ongahelipi hatu dulu okuhafela okukalamwenyo ku hafifa nokuli nomounyuni ou wa piyaana?
24 Ngeenge otwa konakona noukeka Omishangwa nokutula moilonga omayele ado mokukalamwenyo, ohatu dulu okuhafela okukalamwenyo ku hafifa nokuli nopaife mounyuni oo wa piyaana. Okutula moilonga omayele opamishangwa otaku etifa omakwatafano mawa moukwaneumbo nosho yo okumanguluka kokukala noisho ihapu noumbada oo wa taalela ounyuni ou. Okulandula omifindalandu dOmbibeli otaku tu pe elineekelo kutya ohatu hafifa Omushiti. Kakele kOmunamapangelo weshito alishe kape na umwe oo ta dulu oku tu shilipalekela ‘omwenyo wopaife nowokomesho,’ oo tau ka monika konima eshi a kufa ko kedu ovo ve li omhinge naasho shi li mondjila nova ekelashi epangelo lOuhamba.—1 Timoteus 4:8.
25. Molwaashi “omhangela yaJehova” itai ka ponya nandenande, oshike hatu dulu okuteelela shi ningwe mefimbo letu?
25 “Omhangela yaJehova” itai ka ponya nandenande. E li Omushiti wetu, Kalunga oku shii osho shiwa elela kovanhu nota ka wanifa omalalakano aye okunangeka noupuna ovanhu ovaduliki nombili newanenwo nosho yo neameno tali kalelele koshi yOuhamba wOmona waye omuholike. Shi na sha nefimbo letu omuprofeti Daniel okwa shanga a ti: “Pomafiku eehamba dinya Kalunga ou komeulu ota ka dika ouhamba itau ka teka po fiyo alushe . . . Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau kala fiyo alushe.” (Daniel 2:44) Onghee hano, oshi li shili sha endelela ‘okuxupita Omona’ nokulongela Omwene Omunamapangelo aeshe Jehova!
[Omashangelo opedu]
a Mewanifo lotete, ohamba David oyo ya li ‘omuvaekwa,’ novapangeli Ovafilisti ovo va li “eehamba dedu” odo da ongaleka omatanga ado oku mu kondjifa.
b Eevelishe dimwe dOmishangwa dopaKriste dOshigreka nado otadi ulike kutya Jesus oye Omuvaekwa waKalunga oo a popiwa mepsalme etivali. Osho oshi liwetikile mokuyelekanifa Epsalme 2:7 nOilonga 13:32, 33 nosho yo nOvaheberi 1:5; 5:5. Tala yo Epsalme 2:9 nEhololo 2:27.
Oto nyamukula ngahelipi?
• “Oinima yongaho” ilipi oiwana ya kala tai ‘diladila’?
• Omolwashike Jehova ta ningi oiwana oshiyele?
• Omhangela yaKalunga okukondjifa oiwana oilipi?
• Otashi ti ngahelipi ‘okuxupita Omona’?
[Efano pepandja 15]
Ovapangeli noshiwana shaIsrael okwa li va pangela omhangela yomeholeko okulongela Jesus Kristus omunyonena
[Efano pepandja 16]
Kristus okwa nangekwa po e li Ohamba komhunda yaSion shomeulu