Owa ninga tuu oshili yoye mwene?

“Shitukeni vape momadiladilo eni, opo mu shiive okukonakona ehalo laKalunga lilipi, naashi shiwa, sha wapalela nosha wana.”—OVAROMA 12:2.

KASHIPU okukala Omukriste washili momafiku aa axuuninwa—‘omafimbo aa madjuu okukaliwa muo.’ (2 Timoteus 3:1, NW) Oshili oyo ei kutya okushikula oshihopaenenwa shaKristus, omunhu oku na okufinda ounyuni. (1 Johannes 5:4) Diladila osho Jesus a ti kombinga yondjila yopaKriste: “Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” Okwa ti vali: “Ngenge pe na ou a hala okushikula nge, ye ne lixupule ye mwene, ne litwike [omuti waye womahepeko, NW] keshe efiku, ye na shikule nge.”—Mateus 7:13, 14; Lukas 9:23.

1, 2. Omolwashike shi he fi shipu okukala Omukriste washili kunena?

² Eshi Omukriste a mona ondjila ya finana oyo tai twala komwenyo, eshongo hali shikula ko olo okukala muyo. Omolwashike eshi shi li eshongo? Omolwaashi eliyandjo letu neninginifo ole tu ninga oshihakanwa shoilonga yomakoto yaSatana ile oilonga yaye yekonda. (Ovaefeso 6:11; eshangelo lopedu mo NW) Oha didilike omaunghundi etu noha kongo oupitilo muo nelalakano lokunghundipaleka oupamhepo wetu. Doshili, ye okwa li a kendabala okunghundipaleka Jesus, hano mbela fye ote ke tu enda tuu pomunghulo?—Mateus 4:1-11.

Oilonga yoinheya yaSatana

3. Ongahelipi Satana a kuna omalimbililo momadiladilo aEva?

³ Oinheya imwe oyo Satana ha longifa, okukuna omalimbililo momadiladilo etu. Oha kongo omaunghundi moilwifo yetu yopamhepo. Petameko lela, okwa longifile oinheya ei kuEva, moku mu pula ta ti: “Kalunga okwa tile tuu shili: nye inamu lya komiti adishe domoshikunino?” (Genesis 3:1) Noitya imwe, Satana okwa ti: ‘Mbela Kalunga ota dulu tuu shili e mu tulile po engabeko la tya ngaho? Mbela ote mu kelele sha osho shiwa kunye? Doshili, Kalunga oku shii kutya mefiku olo tuu olo tamu li komuti oo omesho eni otaa ka pashuka notamu ka kala mwa fa Kalunga nokushiiva ouwa nowii!’ Satana okwa kuna omalimbililo momadiladilo aEva nokwa teelela ashike a mene.—Genesis 3:5.

4. Omalimbililo ashike tashi dulika a kwate vamwe kunena?

⁴ Ongahelipi Satana ta longifa oinheya ei kunena? Ngeenge otwa efa okulesha kwetu Ombibeli ku djaalele, mwa kwatelwa ekonakono letu lopaumwene, omailikano etu, oukalele wetu wopaKriste nosho yo okwoongala kwetu, ohatu ke liefela fye vene momalimbililo oo haa etwa po kuvamwe. Pashihopaenenwa: “Otu shii ngahelipi kutya ei oyo oshili ngaashi Jesus e i honga?” “Mbela aa omafiku axuuninwa shili? Doshili, fye otu li nale mefelemido eti-21.” “Mbela otu li komungenge waHarmagedon ile ope na natango efimbo lile?” Ngeenge omalimbililo a tya ngaha taa holoka, oshike hatu dulu okuninga tu a kufe po?

5, 6. Otu na okuninga shike ngeenge omalimbililo taa holoka?

⁵ Jakob okwa yandja omayele taa longo eshi a shanga ta ti: “Ngenge umwe womunye okwa hepa ounongo, ne u indile kuKalunga ou e hole okuyandjela aveshe noku he nokungongota, opo nee ote u pewa. Ashike ye na indile meitavelo, ina limbililwa, osheshi ou ta limbililwa, a fa ekufikufi tali twalwaatwalwa notali telaanifwa komhepo. Omunhu a tya ngaha ina diladila kutya, ota pewa sha kOmwene, omulumenhu womitima mbali nomutengauki meendjila daye adishe.”—Jakob 1:5-8.

⁶ Ndele mbela oshike tu na okuninga? Otu na ‘okwiindila kuKalunga’ meilikano tu mone eitavelo neudeko notu na okunghonopaleka eenghendabala detu mekonakono lopaumwene shi na sha nomapulo keshe ile omalimbililo. Ohatu dulu yo okupula ekwafo kwaavo va pama meitavelo, noku he na omalimbililo kutya Jehova ota dulu oku tu pa ekwafo olo twa pumbwa. Jakob okwa ti yo: “Dulikeni hano kuKalunga, kondjifeni Satana, ndele ye te mu i onhapo. Eheneni kuKalunga, opo nee Ye ta ehene kunye.” Heeno, omalimbililo etu otaa ka dja po ngeenge ohatu ehene kuKalunga tashi pitile mokukonakona nosho yo meilikano.—Jakob 4:7, 8.

7, 8. Omaukwatya amwe a fimana elipi oo taa ulike onghedi yokulongela Kalunga oyo ya hongwa kuJesus, noolyelye tava wanifa po omaukwatya aa?

⁷ Pashihopaenenwa, tala kepulo eli: Otu shii ngahelipi kutya ohatu longifa onghedi yokulongela Kalunga oyo Jesus a honga? Okunyamukula epulo eli, mbela omaukwatya elipi e na okutalwa? Ombibeli otai ulike kutya Ovakriste vashili ove na okukala ve na ohole mokati kavo. (Johannes 13:34, 35) Ove na okufimanekifa edina laKalunga, Jehova. (Jesaja 12:4, 5, NW; Mateus 6:9) Nove na okushiivifa edina olo.—Exodus 3:15; Johannes 17:26.

⁸ Oukwatya umwe oo tau konekifa elongelokalunga lashili oo okufimaneka Eendjovo daKalunga, Ombibeli. Oyo ashike embo le likalekelwa olo tali holola oukwatya waKalunga nosho yo omalalakano aye. (Johannes 17:17; 2 Timoteus 3:16, 17) Natango, Ovakriste vashili otava udifa Ouhamba waKalunga u li eteelelo lomwenyo waalushe kovanhu moparadisa kombada yedu. (Markus 13:10; Ehololo 21:1-4) Ove li va yooloka ko keepolotika da nyonauka dounyuni ou nosho yo onghedi yao yonghalamwenyo ya shunduka. (Johannes 15:19; Jakob 1:27; 4:4) Mbela oolyelye kunena va wanifa po omaukwatya aa? Oshili otai ulike kutya ope na ashike enyamukulo limwe—Eendombwedi daJehova.

Ongahelipi ngeenge omalimbililo taa twikile?

9, 10. Oshike osho hatu dulu okuninga tu finde omalimbililo taa twikile?

⁹ Ongahelipi ngeenge otwa kwatwa komalimbililo? Oshike nee tu na okuninga? Ohamba inaendunge Salomo otai yandje enyamukulo tai ti: “Omumwange, ove ngenge ho tambula eendjovo dange noipango yange ho i tuvikile muove, opo u pakalekele omatwi oye okupwilikina ounongo nokulemena omutima woye keendunge; heeno, ngenge ho ifana omayele, ho yelulile ondaka yoye keendunge, ngenge to di kongo ngaashi oshisilveri ndee to di shitilile ngaashi omamona a holekwa, opo nee to ka uda ko etilo lokutila Omwene nokumona eshiivo lokushiiva Kalunga.” (Eendada ofye twe di shanga da endama.)—Omayeletumbulo 2:1-5.

¹⁰ Mbela olo kali fi ediladilo likumwifa? Ngeenge otwa hala okuyandja elitulemo la mana mo kounongo waKalunga, ohatu ka mona “eshiivo lokushiiva Kalunga.” Heeno, eshiivo lokushiiva Omwene Omunamapangelo weshito alishe ohatu dulu oku li mona ngeenge otwa hala okutambula nokutuvikila eendjovo daye. Eshi osha hala okutya okupungulukila kuJehova meilikano nosho yo okupitila mekonakono lopaumwene. Omamona a holekwa Eendjovo daye otaa dulu okukufa mo omalimbililo keshe notae tu kwafele tu mone ouyelele woshili.

11. Ongahelipi omupiya waElisa a li a kwatwa komalimbililo?

¹¹ Oshihopaenenwa sha yela shanghee eilikano la kwafela omupiya waKalunga oo a mbadapala nokwa limbililwa otashi hangika 2 Eehamba 6:11-18. Omupiya waElisa okwa li a pumbwa eudeko lopamhepo. Ka li ta dulu okumona kutya omatanga ovakwaita vomeulu opo a li okukwafela omuprofeti waKalunga, oo a li a kondekelwa kovakwaita Ovasiria. Omolwoumbada omupiya okwa ingida ta ti: “Akutu Omwene wange, ohatu ka ninga ngahelipi?” Elisa okwa nyamukula ngahelipi? “Ino tila. Osheshi ava ve li pufye ovahapu, ve dule venya ve li puvo.” Ndele mbela ongahelipi omupiya kwa li e na okutomhwa a itavele? Ka li ta dulu okumona omatanga ovakwaita vomeulu.

12. (a) Omalimbililo omupiya okwa kandulwa po ngahelipi? (b) Ongahelipi hatu dulu okupondola omalimbililo keshe oo tashi dulika tu na?

¹² “Elisa okwa indila ndee ta ti: Omwene, pashukifa omesho aye, opo a mone ko. NOmwene okwa pashukifa omesho omupiya waye, ndee ta mono ko, ndele divadiva, omhunda aishe i yadi eenghambe nomatemba omundilo, a dingilila Elisa.” Moshinima osho Jehova okwa ningifa omupiya a mone ovakwaita vomeulu ovo va li tava amene Elisa. Ndelenee, itatu dulu okuteelela ekwafo lopakalunga la faafana kunena. Dimbuluka kutya, omupiya womuprofeti ka li e na Ombibeli ya wana po omo kwa li ngeno ta dulu okukonakona opo a pameke eitavelo laye. Fye otu na Ombibeli. Ngeenge ohatu i longifa nawa, eitavelo letu otali dulu okupamekwa sha faafana. Pashihopaenenwa, otashi dulika hatu konakona omahokololo e lili naku lili oo taa hokolola Jehova e li momhangu yaye yomeulu. Eshi itashi ka pitika pa kale onhele yomalimbililo asha kutya Jehova oku na ehangano lomeulu tali kwafele ovapiya vaye kunena moilonga yehongo mounyuni aushe.—Jesaja 6:1-4; Hesekiel 1:4-28; Daniel 7:9, 10; Ehololo 4:1-11; 14:6, 7.

Lungameni omakonda aSatana!

13. Omokupitila mushike Satana ta kendabala okunghundipaleka okukanyatela kwetu koshili?

¹³ Eenghedi dimwe dilipi Satana ha longifa okunghundipaleka oupamhepo wetu nosho yo okukanyatela kwetu moshili? Imwe yomudo oluhaelo, nomaludi alo e lili naku lili. Mounyuni wonena oo wa pwiduka komilele, odo hadi ifanwa okuvaka (epupaleko lokunyona ohombo) ile enangalafano olo hali xulile ashike monguloshi imwe (oluhaelo olo hali ningwa nope he na ekwatafano lasha) ola ninga oshinima shakeshe fiku kepupi la fukila omalihafifo kutya nee otashi pula shike. Eekino, oTV nomafano eevidio otaa xumifa komesho onghalamwenyo ya tya ngaho. Omafano oipala okwa tandavela apeshe, unene tuu moInternet. Eyeleko ola teelela ovo ve na okatalekonawa.—1 Ovatessaloniki 4:3-5; Jakob 1:13-15.

14. Omolwashike vamwe vomOvakriste va ninga oihakanwa yomakonda aSatana?

¹⁴ Ovakriste vamwe ova pitika okatalekonawa kavo ke va pangele nova nyateka omadiladilo nomitima davo mokutala omafano oipala. Ova pitika va wile momwiyo waSatana tau heke. Okuninga ngaho luhapu okwa twala mokuteka kwoshikepa yopamhepo. Ovanhu va tya ngaha ova dopa okukala “ounona mowii.” Inava ninga “ovakulunhu meendunge.” (1 Ovakorinto 14:20, yelekanifa OB-1954.) Odula keshe, ovanhu omayovi ohava mono oixuna koilanduliko omolwokuhadiinina omafinamhango nosho yo omifikamhango dEendjovo daKalunga. Inave lidika nokudiinina “oilwifo aishe yaKalunga.”—Ovaefeso 6:10-13; Ovakolossi 3:5-10; 1 Timoteus 1:18, 19.

Diinina osho tu na

15. Omolwashike tashi dulika vamwe va mona shidjuu okupandula efyuululo lavo lopamhepo?

¹⁵ Jesus okwa ti: “Ndele tamu ka shiiva oshili, noshili otai mu mangulula.” (Johannes 8:32) Eendombwedi dihapu oda li di na okweefa onghalamwenyo yado yotete nosho yo omalongelokalunga avo onale. Onghee hano, otashi dulika va pandule emanguluko olo hali etwa koshili nehalo linene. Mepingafano naasho, ovanyasha vamwe ovo va tekulwa kovadali ovo ve li moshili ohava mono shidjuu okupandula efyuululo lavo lopamhepo. Kava li nande oshitukulwa shelongelokalunga loipupulu ile oshitukulwa shounyuni ou pamwe nomaladipiko ao okukonga okulihafifa, okupikwa kwao koingangamifi nosho yo koluhaelo. Oshilanduliko, otashi dulika va dope okumona eyooloko la kula pokati koparadisa yetu yopamhepo nounyuni waSatana wa nyonauka. Vamwe otashi dulika nokuli ve liefele meyeleko lokumakela oudiyo wounyuni va mone osho va li va kanifa.—1 Johannes 2:15-17; Ehololo 18:1-5.

16. (a) Omapulo elipi hatu dulu okulipula? (b) Ohatu hongwa nohatu ladipikwa tu ninge shike?

¹⁶ Doshili, mbela otwa pumbwa tu xwike ominwe detu opo tu shiive ouyahame nosho yo okumona oixuna? Mbela itatu dulu okulihonga moimoniwa iyahameka yavamwe? Mbela otwa pumbwa okupungulukila “konghungo” younyuni ou tu tale ngeenge otwa kanifa sha? (2 Petrus 2:20-22) Petrus okwa dimbulukifa Ovakriste vomefelemido lotete, ovo va li nale oshitukulwa shounyuni waSatana ta ti: “Osha wana eshi mwa wanifa ehalo lovapaani mefimbo eli la pita, eshi mwa li mwa kala moluhaelo, momalwisho, moukolwe, moivilo youfiku, moufukenhu woikunwa nomoixuna yokulongela oikalunga.” Doshili, katu na okukufa ombinga “monhata youmbwada” wounyuni tu mone nghee onghalamwenyo hai dulu okukala ii. (1 Petrus 4:3, 4) Mepingafano naasho, ohatu hongwa omifikamhango daJehova da denga mbada dopaenghedi pOmalupale etu Ouhamba, oo e li eendingandinga dehongo lOmbibeli. Natango, otwa ladipikwa tu longife eenghono detu dokutomhafana tu ulike fye vene kutya otu na oshili nokungaha ohatu ningi oshili yetu vene.—Josua 1:8; Ovaroma 12:1, 2; 2 Timoteus 3:14-17.

Edina letu kali fi ashike oukonekelo wokombada

17. Ongahelipi hatu dulu okukala Eendombwedi daJehova di na omupondo?

¹⁷ Ngeenge ohatu ningi oshili yetu vene, ohatu ka kendabala tu i tukulilafane navamwe pomhito keshe ya wapala. Eshi inashi hala okutya otu na okukendabala tu i fininikile mwaavo itava ulike ohokwe. (Mateus 7:6) Ponhele yaasho, itatu ka kala twa tila okuliholola tu li Eendombwedi daJehova. Ngeenge omunhu ota ulike elitulemo la twa okupitila mokupula epulo lashili ile okutambula ko oileshomwa yOmbibeli, ohatu ka kala twe lilongekida oku mu shiivifila eteelelo letu. Doshili, eshi otashi ti kutya alushe otu na okukala tu na oileshomwa yonhumba kashi na nee mbudi kutya otu li peni—omeumbo, okoilonga, okofikola, okofitola ile okeenhele domalihafifo.—1 Petrus 3:15.

18. Ongahelipi okuliulika pouyelele tu li Ovakriste taku dulu okukala oshinima shiwa monghalamwenyo yetu?

¹⁸ Ngeenge hatu li ulike pouyelele tu li Ovakriste, ohatu pameke eameno letu okukondjifa okuponokelwa komakoto aSatana. Ngeenge pe na oshivilo shedalo ile shOkrismesa ile ngeenge ovalongi pamwe nafye tava ndobola koilonga, luhapu ohava ti: “Inamu mu piyaaneka. Ye oumwe womEendombwedi daJehova.” Netomheno la faafana, ovanhu ihava kala nehalo okupopya oiyolifa yoififahoni ngeenge tu li po. Kungaha, okushiivifa omufika wetu wopaKriste oku li ouwa munene monghalamwenyo yetu, nokuli ngaashi omuyapostoli Petrus a ulika ta ti: “Olyelye ou te mu etele oshiponga shasha, ngenge tamu lalakanene ouwa? Ndele nande mu hepekelwe ouyuki, onye ovanelao.”—1 Petrus 3:13, 14.

19. Otu shi shii ngahelipi kutya otu li mokati komafiku axuuninwa?

¹⁹ Ouwa mukwao wokuninga oshili yetu vene oyou kutya ohatu ka kala tu na oushili kutya aa oo omafiku axuuninwa lelalela onghalelo ei yoinima. Ohatu ka shiiva kutya omaxunganeko mahapu Ombibeli otaa wanifwa mefimbo letu.a Elondwelo laPaulus kutya ‘momafiku axuuninwa otape ke uya omafimbo madjuu okukaliwa muo’ ola kolekwa unene koiningwanima itilifa yomefelemido la pita. (2 Timoteus 3:1-5, NW; Markus 13:3-37) Oshitukulwa shoshifokundaneki shopaife shi na sha nefelemido eti-20 osha li noshipalanyole tashi ti: “Otali ka dimbulukiwa ngaashi efimbo lomido doulafalafi.” Oshitukulwa osho osha ti: “Metatakati lomafelemido oo a li nomadipao mahapu neenghono, odula yo 1999 oya li odula omo mwa ningwa omadipao mahapu inaku shiya vali.”

20. Paife olo efimbo loilonga yashike?

²⁰ Paife kali fi efimbo lokwoongaonga. Omanangeko noupuna aJehova oku wetike a yela moilonga inene yehongo lOmbibeli oyo tai longwa mounyuni aushe i ningile oiwana aishe ondombwedi. (Mateus 24:14) Ninga oshili yoye mwene noku i tukulilafana navamwe. Omwenyo woye waalushe owe likolelela kwaasho to ningi paife. Omaoko a wa poshi itaa ka mona omanangeko noupuna aJehova. (Lukas 9:62) Ponhele yaasho, eli olo efimbo lokukala ‘twa pama, tu ha tengauke, alushe tu kale ovaladi moilonga yOmwene, tu kale tu shi shii nokutya, oshilonga shetu kashi fi oshimha omOmwene.’—1 Ovakorinto 15:58.

[Omashangelo opedu]

[Efano pepandja 19]

Ekonakonombibeli neilikano ihali faula otali dulu oku tu kwafela tu ekeleshi omalimbililo

[Efano pepandja 20]

Omalimbililo omupiya waElisa okwa kufwa po kemoniko

[Efano pepandja 21]

Ohatu hongelwa omifikamhango daJehova da denga mbada dopaenghedi mOmalupale Ouhamba ngaashi eli muBenin

[Efano pepandja 22]

Oto dimbuluka?

• Ongahelipi hatu dulu okweekelashi omalimbililo?

• Oshike hatu dulu okulihonga moshihopaenenwa shomupiya waElisa?

• Otu na alushe okukala twa lungama tu kondjife omayeleko opaenghedi elipi?

• Omolwashike tu na oku liulika fye vene tu li Eendombwedi daJehova?