⁸ Omhango yaMoses nosho yo oipango yayo ihapu oya li ya tokola ovalunde. Kakele kaasho, ovapristeri ovakulunhu ovo va li hava longo koshi yOmhango oyo kava li va wanenena nomayambo avo kaa li ta dulu okuxulifa po oulunde filufilu. Nomolwaasho taku dulu okutiwa kutya Omhango oya “nyengifwa kombelela.” (OB-1954) Kalunga “okwa tokola oulunde mombelela” eshi a “tuma Omona waye mwene molupe lombelela ya nyika oulunde” noku mu yandja e li ekuliloyambo, nokungaho, okwa wanifa po osho sha li sha “nyenga omhango.” Oshidjemo, Ovakriste ovavaekwa ova talwa ko ovayuki kuKalunga pakanghameno leitavelo lavo mekuliloyambo laJesus. Ovavaekwa ova ladipikwa yo vaha ‘ende pambelela ndele opamhepo.’ (Lesha Ovaroma 8:3, 4.) Ndele opo va ka pewe “oshishani shomwenyo,” ove na okutwikila okuninga ngaho fiyo opexulilo lokukalamwenyo kwavo kwokombada yedu. — Eh. 2:10.

10. Omeityo lilipi tu li koshi yomhango youlunde nefyo?

¹⁰ Omuyapostoli Paulus okwa ti: “Ngaashi oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” (Rom. 5:12) Atusheni otu li koshi yomhango youlunde nefyo molwaashi otu li oludalo laAdam. Ombelela yetu ilunde ohai kala tai tu fininike tu ninge oinima oyo tai nyemateke Kalunga, noshidjemo otashi ka kala efyo. Omuyapostoli Paulus okwa popya monhumwafo oyo a li a shangela Ovagalati kutya eenghatu noikala ya tya ngaho oi li “oilonga yombelela.” Opo nee, okwa weda ko a ti: “Ava tava longo oilonga ya tya ngaha, itava ka fyuulula ouhamba waKalunga.” (Gal. 5:19-21) Ovanhu ovo hava longo oilonga ya tya ngaho vamwe aveke naavo hava ende pambelela. (Rom. 8:4) ‘Eamo lavo lomeni’ nosho yo ‘onghedi yavo yokukalamwenyo’ oi li filufilu pambelela. Ndele mbela ovanhu ovo hava i moluhaelo, hava longele oikalunga, hava kufa ombinga moumhulile ile hava nyono omanyono makwao a kwata moiti ovo aveke hava ende pambelela? Hasho nandenande! Oilonga yombelela oya kwatela mo yo oinima imwe oyo vamwe tashi dulika va kale ve i tala ko ashike i li omaunghundi ongaho, ngaashi efupa, ehandu, eenhamanana nondubo. Mbela ope na ngoo umwe womufye ta dulu okutya iha ende nandenande pambelela?

¹² Onghalo oyo tu li muyo otai dulu okufaafanifwa nokuhakula omunhu oo a kwatwa komukifi wa kwata moiti. Ngeenge omunhu a tya ngaho okwa hala okuveluka filufilu, oku na okuninga ngaashi ndokotola te mu lombwele. Sha faafana, nonande okukala tu na eitavelo tali longo mekuliloyambo otaku dulu oku tu kwafela tu manguluke ko komhango youlunde nefyo, natango inatu wanenena nohatu nyono. Onghee hano, otwa pumbwa okuninga shihapu opo tu kale tu na oupamhepo muwa, twa hokiwa kuKalunga noku tu nangeke noupuna. Paulus okwa popya yo shi na sha nokweenda momhepo eshi a li ta popi kombinga yokulonga “ouyuki, ou tau pulwa komhango.”

Ongahelipi hatu dulu okweenda pamhepo?

13. Okweenda momhepo otashi ti shike?

¹³ Okweenda otashi ulike keenghatu odo hatu katuka ngeenge hatu di ponhele yonhumba twa finda kuikwao ile ngeenge hatu lalakanene oshinima shonhumba. Onghee hano, okweenda momhepo itashi ti kutya okukala ihatu ningi omapuko nandenande, ndele otashi ti okukala hatu ningi alushe exumokomesho lopamhepo. (1 Tim. 4:15) Otu na okukala hatu ningi eenghendabala ngaashi hatu dulu tu ende, ile tu tye, tu kale metwokumwe newiliko lomhepo efiku nefiku. Ngeenge otwa kala ‘nokweenda momhepo’ ohatu ka kala twa hokiwa kuKalunga. — Gal. 5:16.