Omolwashike Kalunga iha nyamukula omailikano aeshe?
Tate yetu womeulu, Jehova Kalunga, okwa halelela noha kala a hafa ngeenge hatu ilikana kuye tashi di komutima. Ashike ope na oinima imwe hai mu imbi a nyamukule omailikano etu. Mbela oinima oyo oilipi noshike tu na okukaleka momadiladilo ngeenge hatu ilikana? Natu ka taleni osho Ombiibeli tai ti.
“Ngeenge to ilikana, ino endulula oinima ya faafana.” — Mateus 6:7.
Jehova ina hala tu kale hatu endulula omailikano oo twa kopela ile tu a leshe membo leilikano. Ponhele yaasho, okwa hala tu popye naye tashi di komutima. Mbela oto ka kala u udite ngahelipi ngeenge ou na kaume oo ha endulula eendjovo da faafana efimbo keshe? Ookaume vawa ova mangulukilafana nohava popi tashi di komutima. Ngeenge hatu ilikana kuTate yetu womeulu hatu longifa eendjovo detu vene, otashi ulike kutya otwe mu tala ko e li kaume ketu.
“Ngeenge tamu pula sha, ihamu shi pewa molwaashi ohamu indile nomalinyengotomheno a puka.” — Jakob 4:3.
Kashi li pandunge okuteelela Kalunga a nyamukule omailikano etu ngeenge ohatu mu pula oinima tu shii kutya ina hala tu i ninge ile tu kale tu i na. Pashihopaenenwa, natu tye nee ngeno ope na omunhu oo ta ndobola nokwa ilikana kuKalunga e mu kwafela e mu pe elao opo a dule okuvena oimaliwa ihapu. Mbela Kalunga ota ka nyamukula ngoo eilikano la tya ngaho? Okwe tu lombwela kutya inatu kala ovanalwisho; fye inatu itavela moinima oyo ihe fi yoshili, ngaashi okupewa elao. (Jesaja 65:11; Lukas 12:15) Itashi ka kala nandenande pandunge okuteelela Jehova a nyamukule omailikano a tya ngaho! Opo Kalunga a nyamukule omailikano etu, otwa pumbwa okushilipaleka kutya osho hatu mu indile oshi li metwokumwe naasho e tu lombwela mOmbiibeli.
“Ou ta fitike okutwi kwaye aha ude omhango, neilikano laye nokuli oixuna.” — Omayeletumbulo 28:9.
Pefimbo eshi Ombiibeli ya li tai shangwa, Kalunga ka li a nyamukula omailikano aavo ihava dulika keemhango daye douyuki. (Jesaja 1:15, 16) Kalunga ina lunduluka. (Malakia 3:6) Ngeenge otwa hala Kalunga a nyamukule omailikano etu, otwa pumbwa okuninga keshe osho hatu dulu opo tu kale metwokumwe neemhango daye. Ongahelipi ngeenge otwa li twa ninga omapuko monakudiwa? Mbela osho osha hala okutya Kalunga ita ka pwilikina komailikano etu? Hasho nandenande! Kalunga ote ke tu dimina po pahole ngeenge otwe livele shili ombedi nokuhovela okulonga osho tashi mu hafifa. — Oilonga 3:19.