10. Otu na oihopaenenwa ilipi yovapiya vaKalunga ovo va li va anya okweefa po oudiinini wavo, noshike sha li she va pameka va ninge ngaho?

¹⁰ MOvaheberi etukulwa 11, omuyapostoli Paulus okwa popya kombinga yomayeleko oo ovapiya vaKalunga va li ve na okulididimikila. Pashihopaenenwa, omuyapostoli okwa tumbula ovakainhu ovadiinini ovo va li va filwa ovanamati vavo, ashike lwanima ova li va nyumunwa. Okwa li yo a tumbula vamwe ovo va li “inava hala okumangululwa, opo va mone enyumuko liwa unene.” (Heb. 11:35) Nonande katu shii kutya Paulus okwa li e na oolyelye momadiladilo, vamwe ngaashi Nabot naSakaria ova li va dengwa nomamanya fiyo va fya omolwokudulika kuKalunga nokulonga ehalo laye. (1 Eeh. 21:3, 15; 2 Omaf. 24:20, 21) Daniel nookaume kaye ova li ve na omhito ‘yokumangululwa’ ngeno ova li va efa po oudiinini wavo. Ponhele yaasho, eitavelo lavo meenghono daKalunga ola li le va ningifa, va ‘fitike po omakanya eenghoshi nova dime po eenghono domundilo.’ — Heb. 11:33, 34; Dan. 3:16-18, 20, 28; 6:13, 16, 21-23.

12. Olye e li oshihopaenenwa sha denga mbada shokufinda omayeleko, noshike sha li she mu kwafela?

¹² Konima eshi Paulus a popya kombinga yovalumenhu novakainhu vamwe, okwa li a popya kombinga yaJesus Kristus oo e li oshihopaenenwa dingi sheitavelo. Ovaheberi 12:2 ova ti: “Ou kwa li a hepekelwa [komuti womahepeko, NW] omolwehafo e li tulikilwa, nokwa li e he na ko na sha nomasheko, Oye a kala omutumba kolulyo lolukalwapangelo laKalunga.” Onghee hano, otwa pumbwa ‘okudimbuluka’ oshihopaenenwa sha Jesus sheitavelo eshi a li a taalela omahepeko a nyanyalifa. (Lesha Ovaheberi 12:3.) Ngaashi Jesus, Ovakriste vonale navo ova li va hepekwa omolweitavelo lavo, ngaashi omulongwa Antipas okwa li a anya filufilu okweefa po oudiinini waye. (Eh. 2:13) Ova li tava ka mona ondjabi yoku ka nyumuninwa omwenyo womeulu. Enyumuko olo oli dule kokule “enyumuko liwa unene,” olo ovadiinini vomefimbo lonale va li va teelela. (Heb. 11:35) Konima eshi Jesus a hovela okupangela mo 1914, ovavaekwa aveshe ovadiinini, ovo va hangwa va fya nale, ova li va nyumuninwa omwenyo womeulu va ka pangele pamwe naJesus kombada yedu. — Eh. 20:4.