7, 8. Jehova ote ke tu tokola ngahelipi omolweendjovo detu?

⁷ Etomheno etitatu molwaashi tu na okulungamena okupopya kwetu ololo kutya ohatu ke lihokolola kuJehova omolweendjovo odo hatu popi. Onghedi omo hatu longifa elaka letu ihai kumu ashike ekwatafano letu novanhu vakwetu, ndele ohai kumu yo ekwatafano letu naJehova. Jakob 1:26 okwa ti: “Ngenge ope na umwe mokati keni e lishii oye omulongelikalunga ndele ita pangele elaka laye, ndele ota pukifa omutima waye, okulongelakalunga kwaye okwongaho.”b Ngaashi twa mona metukulwa la tetekela, okupopya kwetu okwa pambafana nelongelokalunga letu. Ngeenge ihatu pangele elaka letu, hatu popi eendjovo dii notadi yahameke vamwe, omalipyakidilo etu aeshe opaKriste otaa ka kala ongaho koshipala shaKalunga. Mbela ediladilo olo itali tu kwafele tu lungamene okupopya kwetu? — Jakob 3:8-10.