Jehova oha tale nge ko omunhu a tya ngahelipi?
1. Ongahelipi Ombibeli ya faafanifwa noshitengelelo?
1 Oho litalele lungapi moshitengelelo? Vahapu vomufye ohatu litalele mo efiku keshe molwaashi ohashi tu kwafele tu mone eholokepo letu lokombada olo tu na okuyandja elitulemo kulo. Ombibeli oya faafanifwa noshitengelelo. Okulesha Eendjovo daKalunga otashi dulu oku tu kwafela tu mone ounhu wetu womeni, oo Jehova ha mono. (1 Sam. 16:7; Jak. 1:22-24) Ondjovo yaKalunga otai dulu ‘okutokola omadilongo nomadiladilo omutima.’ (Heb. 4:12) Ongahelipi okulesha nokudilonga kOmbibeli keshe efiku taku dulu oku tu kwafela tu mone eembinga odo twa pumbwa okupameka opo tu ninge ovaudifi hava pondola neenghono?—Eps. 1:1-3.
2. Ongahelipi Ombibeli tai dulu oku tu kwafela tu likonakone?
2 Longifa Ombibeli onga oshitengelelo: Omahokololo Ombibeli ovapiya vaJehova ovadiinini otae tu hongo kutya omaukwatya mawa elipi a li a hokwa muvo. Pashihopaenenwa, David okwa li a ulika ouladi u na sha nedina laKalunga. (1 Sam. 17:45, 46) Jesaja okwa li eliyamba a ka udife nouladi moshitukulwa shidjuu. (Jes. 6:8, 9) Ohole yaJesus yokuhola Xe womeulu oya li ye mu linyengifa a tale ko oukalele waye u li odjo yepepelelo newaneno ponhele yokukala e u tala ko u li omutengi mudjuu. (Joh. 4:34) Ovakriste vomefelemudo lotete ova li hava udifa nouladi, ve lineekela muJehova nova li va tokola toko vaha sholole. (Oil. 5:41, 42; 2 Kor. 4:1; 2 Tim. 4:17) Okudilonga koihopaenenwa oyo otaku tu kwafele tu likonakone nawa opo tu xwepopaleke ongushu yoilonga yetu iyapuki.
3. Omolwashike tuhe na okwoongaonga okuninga omalunduluko oo a pumbiwa?
3 Katuka onghatu u pukulule omapuko: Oshoshili kutya itashi ke tu etela ouwa washa okulitalela moshitengelelo ndele hatu lidimbike omapuko etu. Ohatu dulu okupula Jehova etu kwafele tu likonakone nawa notu ninge omalunduluko oo a pumbiwa. (Eps. 139:23, 24; Luk. 11:13) Molwaashi efimbo olo la xupa ko olixupi neemwenyo oda kwatelwa mo, katu na okwoongaonga okuninga omalunduluko oo a pumbiwa. — 1 Kor. 7:29; 1 Tim. 4:16.
4. Oshike hashi ningilwa omunhu oo ha konakona Eendjovo daKalunga noha katuka metwokumwe naasho e lihonga?
4 Jehova oha yandje elitulemo kounhu wetu womeni oo wa fimanenena unene u dule eholokepo letu lokombada. (1 Pet. 3:3, 4) Oshike hashi ningilwa omunhu oo ha konakona Eendjovo daKalunga noha katuka metwokumwe naasho e lihonga? Ota kala ‘omupwilikini iha dimbwa, ndelenee omuwanifi shili nota kala omunelao mokulonga kwaye.’ (Jak. 1:25) Onghee hano, ohatu ka kala ovaudifi va hafa nohava pondola molwaashi otwa fa “oshitengelelo tashi limonikila oshinge shOmwene.”—2 Kor. 3:18, OB-1986.