Oukwatya wewi

OVANHU ihava kumwa ashike kwaasho tashi popi, ndele ohava kumwa yo konghedi omo tashi popiwa. Mbela iho kala wa hokwa okupwilikina komunhu oo ta popi nohamu, nohole, ta holola oukaume nolune, shi dulife oo ta popi nonyanya noita yavala?

Okukala noukwatya wewi u li nawa inaku likolelela ashike konghedi omo omunhu ta fuda ile ha kala ofika ile omutumba ngeenge ta popi. Otashi dulika ku kale kwa kwatela mo yo ounhu womeni. Eshi omunhu ta ende ta ningi exumokomesho mokulihonga eeshili dOmbibeli noku di tula moilonga, exumokomesho laye otali ke limonikila yo mokupopya kwaye. Omaukwatya ngaashi ohole, ehafo nosho yo oukaume otae ke limonikila mokupopya kwaye. (Gal. 5:22) Ngeenge oku na ko nasha navamwe, ohashi liudikila yo mewi laye. Ngeenge otwa efa po oikala yokungongota, ndele hatu kala tu na olupandu, eendjovo detu nomutono wewi letu otai ke shi holola. (Omaimb.kemo. 3:39-42; 1 Tim. 1:12; Jud. 16) Nokuli nonande ku udite ko elaka olo tali popiwa, oto dulu oku shi mona mo kutya omunhu wonhumba oku na ounhwa, ondudi, ile kutya ota kembaula ile ota popi nonyati. Oto dulu yo oku shi mona ngeenge omunhu okwe lininipika, oku nelidiiniko, olune nohole.

Omunhu otashi dulika aha kale newi li li nawa molwaashi a vela oudu wonhumba oo wa nyonauna okangongonino kaye ile a dalwa e na ounghundi wonhumba. Omaupyakadi amwe a tya ngaho otashi dulika a kale a kwata moiti noitaa dulu okukandulwa po filufilu monghalelo ei yoinima. Ndele luhapu omunhu ota dulu okuxwepopala ngeenge okwe lihongo nghee e na okulongifa nawa oilyo yokuninga omawi.

Osha fimana okukaleka momadiladilo kutya omaukwatya ewi ovanhu ve lili noku lili okwa yoolokafana. Onghee hano, ku na okulalakanena okukala newi la fa lomunhu wonhumba. Ponhele yaasho, ou na okukendabala okuxwepopaleka oukwatya wewi loye, olo li na omaukwatya e likalekelwa. Mbela oshike tashi ke ku kwafela opo u dule okuninga ngaho? Ope na oinima ivali ya fimanenena oyo tai dulu oku ku kwafela.

Lihonga okukala ho fuda nawa. Opo ewi loye li kale tali di mo nawa, owa pumbwa okukala ho fudile momapunga oye omhepo ya wana nokukala ho i fuda mo nawa. Ngeenge hasho, ewi loye itali ka dja mo nawa, notashi dulika u kale to popi to nhakula.

Oshitukulwa shinene shomapunga oye kashi li pombada, ndele oshi li pedu. Onhulo ohai monika ashike ya kula omolwomapepe oye. Oshitukulwa shinene shomapunga oshi li pedu, popepi nolwiidililo. Olwiidililo ola kwatafana neemhati, nola tongola onhulo kedimo.

Ngeenge owa kala ho fudile mo omhepo ndele iho yadifa omapunga oye, omhepo otai kala hai pu mo diva. Nokungaho, ewi loye itali ka udika nawa, noto ka loloka diva. Opo u kale to fuda nawa, owa pumbwa okukala omutumba ile okukala ofika wa yukilila, ino tunga oshoongo. Kendabala alushe okukala ho fudile mo momapunga oye omhepo ya wana. Ngeenge owa yadifa nawa omapunga oye nomhepo, eemhati doye ohadi umuka mo. Pefimbo opo tuu opo, olwiidililo loye ohali linyenge la yuka pedu, tali undulile poshi edimo nomandjadja, nokungaho, oho kala u udite omwiya woye tau shili ile oikutu yoye tai nane. Ashike osho inashi hala okutya omapunga oku li lwokedimo, ndele okwa uvikwa keemhati. Opo u shi mone, tenheka eke loye lwopedu leemhati ndele to fudile mo omhepo ya wana nokufuda mokule. Ngeenge oto fuda mo omhepo yoye nawa, edimo loye itali ke liketa nomapepe oye itaa ka yeluka. Oto ka kala ashike u udite eemhati doye tadi umuka mo kanini.

Olutivali, lihonga okukala ho pangele onghedi yoye yokufuda. Ino kala ho fuda mo omhepo yoye neendelelo; shi ninga to ende kanini. Natango, ino kendabala oku i fitikinina pofingo, molwaashi osho otashi ke ku ningifa u kale to popi wa fa omunhu a fita ondaka ile e kwetwe pofingo. Edimo loye nosho yo eenhumba odo di li pokati keemhati ohadi undula mo omhepo oyo wa li wa fudila mo, nolwiidililo ohali ufa kutya omhepo otai di mo neendelelo shi fike peni.

Ngaashi ashike omulotoki he lideulile omafiyafanepo, omupopi naye oku na okulideula a kale ha fuda nawa. Kala ho fikama wa yukilila, ino tunga oshoongo, opo u dule okuyadifa nawa omapunga oye nomhepo, noku i fuda mo to ende kanini, to valula u tale kutya oto i fiyo openi fimbo omufudo inau pwa mo. Opo nee lideula okukala to lesha mokule to fuda monghedi ya tya ngaho.

Eenhumba doye nadi kale da manguluka. Opo u popye newi li li nawa, owa pumbwa yo okukala wa ngungila. Ohashi kala shikumwifi shili okumona kutya oto dulu okuninga exumokomesho ngeenge owe lihongo okukala to popi wa ngungila. Omadiladilo oye nolutu loye nai kale ya ngungila, molwaashi ngeenge omadiladilo inaa ngungila ohashi ningifa olutu li kale yo inali ngungila.

Ngungumaneka omadiladilo oye mokukala u na etaleko la yuka li na sha novapwilikini. Ngeenge ovapwilikini ovanhu ovo ho shakeneke moukalele, dimbuluka kutya nokuli nonande owa konakona Ombibeli oule ashike weemwedi dinini, ou shii oinima ya fimana i na sha nelalakano laJehova oyo to dulu oku va lombwela. Dimbuluka yo kutya owa ya kuvo molwaashi ova pumbwa ekwafo, kutya nee ove wete kutya ova pumbwa ekwafo ile hasho. Mepingafano naasho, ngeenge oto ka yandja oshipopiwa mOlupale lOuhamba, vahapu ovo to ka popya navo ove li Eendombwedi daJehova, nove li ookaume koye ovo va hala u pondole. Kaku na vali ookaume vawa novanahole ve dule ovo hatu shakeneke pandjikilile kokwoongala.

Fuwifa eenhumba domofingo. Dimbuluka kutya oupatekofipandaka ohava kala tava dedema ngeenge omhepo tai piti pepungunino (omunino womhepo). Omutono wewi ohau lunduluka eshi eenhumba domofingo tadi kindjike ile tadi fuwa, ngaashi omutono woshiketala hau lunduluka sha hanga kutya eengodi dasho oda nana ile oda yululuka shi fike peni. Ngeenge oupatekofipandaka ova fuwa, ewi loye oha li kala la lota. Ngeenge owa fuwifa eenhumba domofingo, otashi ke ku kwafela yo opo omututu weyulu u kale wa patuluka, naasho ohashi nwefa mo oukwatya wewi loye.

Olutu loye alishe nali kale la ngungila; osho osha kwatela mo eengolo doye, omake oye, omapepe oye nofingo yoye. Okukala nolutu la ngungila ohaku ku kwafele opo ewi loye li dje mo nawa. Ndele ngeenge oilyo ya tya ngaho yolutu oya kindjika, ohashi imbi ewi li kale tali twaalele nawa. Ewi olo hali dilile pokangongonino ohali mbolongodja moshikololo shomayulu, momakipa nomeenhumba domonhulo, komayoo, moshihokohoko shokanya nokomanyanga. Oilyo aishe oyo ohai ufa kutya ewi otali di mo la tya ngahelipi. Ngeenge owa tenheke oshinima shidjuu koshiketala, ewi loshiketala otali ka kala la fiilila; oshi na okukala sha manguluka opo shi kale tashi linyenge nawa. Sha faafana, eenhumba dolutu odi na okukala da manguluka opo ewi loye li kale tali di mo nawa, nokungaho oto dulu okupopya to holola omaliudo e lili noku lili. Oto ka dula yo okupopya nengungo lovanhu nopehe na okupopya newi la ponda.