Natu longifeni nawa oishangomwa yetu
1. Ongahelipi hatu dulu okuhopaenena oshihopaenenwa shaJesus shi na sha nokukala nolupandu lomafiloshisho oo Jehova he tu pe?
1 Konima eshi Jesus a li a palula eemhunga dovanhu pashikumwifilonga, okwa li a ninga omalongekido opo oikulya oyo ya xupa po i ongelwe. (Mat. 14:19-21) Eshi Jesus a li a ulika olupandu li na sha nomafiloshisho aJehova, okwe tu tulila po oshihopaenenwa shiwa ‘shokukala tu shii okupandula,’ mokukala hatu longifa nawa oinima aishe oyo Jehova he tu pe okupitila ‘momukeleli weumbo omudiinini.’ — Kol. 3:15; Luk. 12:42; Mat. 24:45-47.
2. Oshike hatu dulu okuninga po opo tu henuke okundubalalelwa koifo?
2 Oifo: Oifo otai dulu oku tu ndubalalela noupu. Ngeenge ohatu kala alushe tu na oifo ya xupa po, otu na okuninipika omuvalu woifo oyo hatu mbestele. Ongahelipi shi na sha noifo oyo ikulu? Oifo ya tya ngaho ihai ngushuluka. Ngeenge otu na oifo ikulu ihapu, ohatu dulu okukwafelwa komupashukili ile komukulunhuongalo umwe opo tu dule okuyandja po oifo oyo moukalele.
3, 4. Oitwa ilipi tu na okukaleka momadiladilo ngeenge hatu kufa oishangomwa kOlupale lOuhamba?
3 Oishangomwa imwe vali: Ngeenge otaku yandjwa oshishangomwa shonhumba, tala tete ngeenge pamwe ou na oishangomwa oyo keumbo, noya wana oku ka yandja moilonga yomomapya fimbo ino ka kufa imwe kOlupale lOuhamba. Kufa ashike oishangomwa oyo wa pumbwa oku ka longifa moukalele moule woshivike shimwe, opo nee oto dulu oku ka kufa vali imwe ngeenge oyo wa li wa kufa oya pu po.
4 Shi na sha noishangomwa yopaumwene, mbestela ashike oyo wa pumbwa. Shanga ko edina loye koishangomwa yoye yopaumwene. Osho otashi ke ku kwafela u mone oshishangomwa shoye ngeenge osha kana. Ngeenge oho longifa o-Watchtower Library oyo i li moungalo vokombiyuta hava ifanwa CD-ROM nowa tuvikila yo oifo yopaumwene, ino pumbwa vali okumbestela omaxwata Oshungonangelo no-Awake!.
5. Oshike tu na okukaleka momadiladilo ngeenge hatu yandje oishangomwa yetu?
5 Nghee tu na okuyandja oishangomwa: Ohatu kendabala ashike okuyandja oishangomwa yetu kovanhu ovo ve na ohokwe shili. Ashike natu dimbuluke kutya ofye unene tu na oshinakuwanifwa shokuyandja omayambidido opashimaliwa e na sha noilongifo i na ondilo oyo hatu longifa moukalele. Ngeenge hatu yandje oshishangomwa komunhu oo e na ohokwe, inatu ongaonga oku mu lombwela kutya oku na omhito yokuyandja omayambidido oilonga yomounyuni aushe.
6. Omolwashike twa lenga oishangomwa yetu neenghono, naasho otashi ke tu linyengifa tu ninge shike?
6 Nonande Jesus okwa li a palula ovanhu palutu pashikumwifilonga, okwa li unene he va palula pamhepo. Jesus okwa ti: “Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” (Mat. 4:4) Oishangomwa yetu ohai hongo ovanhu eeshili dOmbibeli odo tadi va kwafele va ka mone omwenyo waalushe. (Joh. 17:3) Onghee hano, oishangomwa oyo oi na ondilo neenghono nokai na okuhepifwa.