Jehova ote tu hongo okuvala omafiku etu

JEHOVA KALUNGA oye Omushiti wetu nOmuyandjimwenyo wetu. (Epsalme 36:10; Ehololo 4:11) Onghee hano, kape umwe ta dulu okukala ponghatu i li xwepo oku tu honga nghee tu na okulongifa omido donghalamwenyo yetu monghedi yopandunge. Onghee hano, osha wapala eshi omupsalme a ilikana kuKalunga ta ti: “Tu longa okuvala omafiku etu, fye tu pewe omutima wa nongopala.” (Epsalme 90:12) Eilikano eli ohatu li hange mEpsalme eti-90, olo la wana shili okukonakonwa noukeka kufye. Ndelenee natu konakone tete pauxupi eimbilo eli la nwefwa mo kuKalunga.

2. (a) Olyelye a tumbulwa e li omushangi wEpsalme 90, notashi dulika la shangwa naini? (b) Ongahelipi Epsalme eti-90 li na okunwefa mo etaleko letu longhalamwenyo?

² Eendjovo dopetameko dEpsalme 90 otadi li ifana “eilikano laMoses, omulumenhu waKalunga.” Molwaashi epsalme eli otali divilike nghee okukalamwenyo kwomunhu ihaku kalelele, otashi dulika la shangwa konima yokumangululwa kwOvaisrael okudja moupika waEgipti pefimbo lomido 40 detembu lavo mombuwa, eshi epupi li he fi lidiinini la xulifwa po omolwomayovi oo a fya. (Numeri 32:9-13) Kutya nee oshike, Epsalme 90 otali ulike kutya onghalamwenyo yovanhu inava wanenena oixupi. Onghee hano, osha yela kutya otu na okulongifa neendunge omafiku etu a fimana.

3. MEpsalme 90 omwa shangwa shike?

³ MEpsalme 90, ovelise 1 fiyo 6 otadi ulike Jehova e li ehondameno letu laalushe. Ovelise 7 fiyo 12 otadi ulike osho twa pumbwa opo tu longife omido detu donghalamwenyo tadi endelele monghedi oyo ya tambulwa ko kuye. Nongaashi sha ulikwa movelise 13 fiyo 17, otwa hala okukala ovatambuli volune laJehova li na ohole nomanangeko noupuna aye. Doshili, epsalme eli itali xunganeke oimoniwa yetu yopaumwene tu li ovapiya vaJehova. Ndelenee, otu na okukoneka paumwene oikala yokwiilikana yomulo. Onghee hano, natu tale noukeka kEpsalme eti-90 okupitila momesho aavo ve liyandja kuKalunga.

Jehova—“ehondameno letu lashili”

4-6. Ongahelipi Jehova e li ‘ehondameno lashili’ kufye?

⁴ Omupsalme ota tameke neendjovo edi: “Akutu Jehova, ove u li ehondameno letu lashili okudja koludalo noludalo. Eemhunda fimbo kwa li inadi dalwa natango, nofimbo kwa li inaku shitwa edu nounyuni nouyahame wokufetwa, nokuli alushe fiyo alushe ove u li Kalunga.”—Epsalme 90:1, 2, NW.

⁵ Kufye ‘Kalunga kaalushe,’ Jehova, oku li ‘ehondameno lashili’—ehondameno lopamhepo. (Ovaroma 16:26) Otu udite twa amenwa omolwaashi opo e li alushe oku tu kwafela e li “Omuudi womailikano.” (Epsalme 65:3) Molwaashi ohatu undulile oisho yetu kuTate womeulu okupitila mOmona waye omuholike, ‘ombili yaKalunga ei i dule eendunge adishe, otai ka amena omitima detu nomadiladilo etu.’—Ovafilippi 4:6, 7; Mateus 6:9; Johannes 14:6, 14.

⁶ Ohatu hafele eameno lopamhepo molwaashi Jehova oye “ehondameno letu lashili,” oku shi popya pafaneko. Ota yandje yo ‘eenduda’—tashi dulika tadi yelekanifwa nomaongalo oshiwana shaye—di li ehondameno lopamhepo, omo ovafita ovanahole tave tu kwafele tu kale tu udite twa amenwa. (Jesaja 26:20; 32:1, 2; Oilonga 20:28, 29) Kakele kaasho, vamwe vomufye ove li momaukwaneumbo oo e na ondjokonona ile yoilonga yokulongela Kalunga notwe mu mona paumwene e li “ehondameno letu lashili okudja koludalo noludalo.”

7. Omondunge ilipi eemhunda da “dalwa” nosho yo edu la etwa po ‘kouyahame wokufetwa’?

⁷ Jehova okwa kala ko fimbo eemhunda inadi “dalwa” ile edu fimbo kwa li inali shitwa “nouyahame wokufetwa.” Pataleko lopanhu, okushita po edu eli nomaukwatya alo aeshe, oudindoli nosho yo eenghedi dalo da kitakana osha pula eenghendabala dinene. Nomokutya kutya eemhunda oda “dalwa” nosho yo edu ola li la etwa po ‘kouyahame wokufetwa,’ omupsalme ota ulike efimaneko linene omolwoilonga ihapu ya li ya kwatelwa mo eshi Jehova a shita oinima oyo. Mbela itatu ka kala nefimaneko nonolupandu la faafana omolwoilonga yokomake yOmushiti?

Jehova okwe lilongekida alushe oku tu kwafela

8. Outumbulilo oo kutya Jehova oKalunga ‘e li po alushe fiyo alushe’ otau ti ngahelipi?

⁸ “Nokuli alushe fiyo alushe ove u li Kalunga” osho omupsalme a imba. Oshitya shomelaka lotete osho sha tolokwa “fiyo alushe” otashi dulu okuulika koinima oyo i na exulilo ndelenee oule wefimbo layo inau tumbulwa kondadalunde. (Exodus 31:16, 17; Ovaheberi 9:15) Ndele mEpsalme 90:2 nosho yo meenhele dimwe mOmishangwa dOshiheberi, oshitya osho otashi ti fiyo alushe ngaashi naanaa etoloko eli tali ulike. (Omuudifi 1:4) Omadiladilo etu itaa dulu okuuda ko nghee tashi shiiva kutya Kalunga opo e li alushe. Ndelenee, Jehova ke na etameko noita ka kala nexulilo. (Habakuk 1:12) Ota ka kala alushe nomwenyo nokwe lilongekida oku tu kwafela.

9. Omupsalme okwa faafanifa nashike omido eyovi dokukala po kwomunhu?

⁹ Omupsalme okwa nwefwa mo kuKalunga a faafanife omido eyovi nokukala po kwomunhu nefimbo lixupi pataleko lOmushiti waalushe. Mokupopya naKalunga, okwa shanga ta ti: “Ove to shunifa omunhu mondwi yedu, ndee to ti: Alukeni, oludi lovanhu nye. Osheshi omido eyovi—kuove oda fa efiku longhela, eshi la pita po, nongaashi olufo loufiku lomunangeli.”—Epsalme 90:3, 4.

10. Ongahelipi Kalunga a ninga omunhu a ‘shune mondwi yedu’?

¹⁰ Omunhu oha fi naKalunga ohe mu ‘shunifa mondwi yedu.’ Eshi otashi ti kutya omunhu ota shuna “mondwi yedu,” e li ondwi ile edu. Osha fa Jehova ta ti: ‘Shuna medu omo wa shitwa.’ (Genesis 2:7; 3:19) Eshi otashi ulike kwaaveshe—ovanaenghono ile oimbebe, ovayamba ile ovafyoona—omolwaashi kape na omunhu ina wanenena ‘ta dulu okukulila omumwaina, nokuyandjela mukwao oikulila kuKalunga, ngeno a kale nomwenyo alushe.’ (Epsalme 49:7-10, yelekanifa OB-1954.) Ndelenee inatu pandula tuu eshi ‘Kalunga a yandja Omona waye Ewifa, opo keshe ou [e na eitavelo tali longo muye, NW] a ha kane, ndelenee a kale e nomwenyo waalushe’!—Johannes 3:16; Ovaroma 6:23.

11. Omolwashike hatu dulu okutya efimbo lile kufye olixupi unene kuKalunga?

¹¹ Pataleko laJehova, nokuli naMetusala oo a kala ko omido 969, okwa kala ko shi he fike nopefiku. (Genesis 5:27) Omido eyovi kuKalunga odi li ngaashi onghela—efimbo ashike leevili 24—ngeenge la pita. Omupsalme okwa didilika yo kutya omido eyovi kuKalunga oda fa omunangeli ta nangele onhanda konguloshi eevili nhee. (Ovatokolipangeli 7:19) Onghee hano, osha yela kutya efimbo lile kufye olixupi unene kuKalunga kaalushe, Jehova.

12. Ongahelipi ovanhu va ‘kungululwa po’ kuKalunga?

¹² Mepingafano nokukala po kwaalushe kwaKalunga, onghalamwenyo yopaife yovanhu oixupi shili. Omupsalme ota ti: “Ove to va kungulula po, ove li [ashike, NW] ngaashi eemhofi; ongula ve li ngaashi omwiidi tau twiyuka; ou tau penduka mutalala, ndee tau tutuma, nomokutokelwa kwao tau lembalala, ndee tau kukuta ngaho.” (Epsalme 90:5, 6) Moses okwa mona omayovi Ovaisrael va fya mombuwa, ‘va kungululwa po’ kuKalunga va fa ve li mefundja. Okatukulwa aka kepsalme oka tolokwa ngaha: “Owa kungulula po ovalumenhu meemhofi defyo.” (New International Version) Mepingafano naasho, okukalamwenyo kwovanhu inava wanenena oku li “ashike ngaashi eemhofi” defimbo lixupi—taku faafanifwa ashike nokukofa oufiku umwe.

13. Ongahelipi tu li “ngaashi omwiidi,” naashi oshi na okunwefa mo ngahelipi okudiladila kwetu?

¹³ Otu li ‘ngaashi omwiidi tau twiyuka ongula’ ndele konguloshi owa kukuta koupyu muhapu wetango. Heeno, onghalamwenyo yetu oixupi ngaashi omwiidi hau kukuta mefiku limwe. Onghee hano, inatu hepekeni oshinima eshi shi na ondilo inene. Ponhele yaasho, otu na okukonga ewiliko laKalunga nghee tu na okulongifa omido detu odo da xupa ko monghalelo ei yoinima.

Jehova ote tu kwafele    ‘tu valule omafiku etu’

14, 15. Epsalme 90:7-9 okwa li li na ewanifo lilipi kOvaisrael?

¹⁴ Shi na sha naKalunga, omupsalme okwa weda ko: “Fye ohatu nyonaunwa po kehandu loye, nohatu vakulwa po kokuudonya kwoye. Owii wetu u kaleka ofika koshipala shoye, noiholekwa yetwelela oto i holola ya yela koshipala shoye. Osheshi omafiku etu aeshe otaa piti po ketikuko loye; omido detu ohatu di xulifa po [ongomufudo, OB-1954].”—Epsalme 90:7-9.

¹⁵ Ovaisrael ve he fi ovadiinini ova ‘nyonaunwa po kehandu laKalunga.’ Ova li va ‘vakulwa po kokuudonya kwaye’ ile va ‘tilifwa kehandu laye.’ (New International Version) Vamwe ova li va “nyonauninwa po mombuwa” shi li oshidjemo shomatokolo aKalunga. (1 Ovakorinto 10:5) Jehova ‘owii wavo okwe u kaleka ofika koshipala shaye.’ Okwe va hokololifa omolwomapuko avo omoipafi, ndelenee nokuli “noiholekwa” ile omatimba a holekwa okwa li ‘a yela koshipala shaye.’ (Omayeletumbulo 15:3) Omolwehandu laKalunga, Ovaisrael inave livela ombedi ova ‘xulifa po omido davo ongomufudo.’ Doshili, ouxupi wetu wokukalamwenyo owa fa omufudo tau piti pokati komilungu detu.

16. Ngeenge vamwe otava longo oulunde meholeko, ove na okuninga shike?

¹⁶ Ngeenge ope na umwe womufye ta longo oulunde meholeko, otashi dulika tu dule okuholeka elihumbato la tya ngaho kovanhu vakwetu oule wefimbo. Ndelenee okuholeka enyono kwetu otaku ka kala ‘kwa yela koshipala shaJehova,’ noilonga yetu otai ka nyonauna po ekwatafano letu naye. Okumonununa oukaume naJehova, otu na okwiilikana omolwediminepo laye, okufiya po omanyono etu nokutambula ko nolupandu ekwafo lopamhepo lovakulunhuongalo Ovakriste. (Omayeletumbulo 28:13; Jakob 5:14, 15) Eshi itashi ka kala tuu shiwa unene shi dulife ‘okuxulifa po omido detu ongomufudo,’ manga tu na eteelelo letu lomwenyo waalushe u li moshiponga!

17. Ovanhu vahapu ohava kala nomwenyo oule womido di fike peni, nomido detu odi yadi shike?

¹⁷ Shi na sha nonghalamwenyo yovanhu inava wanenena, omupsalme okwa ti: “Okukala po kwetu . . . oku fike pomido 70, ngenge kuhapu, shapu 80, ndelenee ouwa wako: oudjuu auke netutuko; osheshi oko otaku pitilile po diva, fye ohatu vilola po.” (Epsalme 90:10) Ovanhu vahapu ohava kala nomwenyo oule womido 70, ndele Kaleb eshi a li e na omido 85, okwa tumbula eenghono daye inadi monika nale. Opa li vamwe ovo va koyelela, ngaashi Aron (123), Moses (120) naJoshua (110). (Numeri 33:39; Deuteronomion 34:7; Josua 14:6, 10, 11; 24:29) Ndelenee kepupi lOvaisrael li he fi lidiinini olo la dja muEgipti, ovo ve na omido 20 sha yuka komesho ova fya meni lomido 40. (Numeri 14:29-34) Kunena, moilongo ihapu okukalamwenyo kwomunhu oku li mongudu oyo ya yandjwa komupsalme. Omido detu odi yadi “oudjuu auke netutuko.” Ohadi piti po diva ‘nohatu vilola po.’—Job 14:1, 2.

18, 19. (a) Otashi ti ngahelipi “okuvala omafiku etu, fye tu pewe omutima wa nongopala”? (b) Okulongifa ounongo kwetu otaku ke tu linyengifa tu ninge shike?

¹⁸ Mokutwikila ko, omupsalme okwa imba ta ti: “Ndelenee elipi po te lipulaapula neenghono dehandu loye, e lipulaapule nonyengo yoye, opo a kale te ku tila? Tu longa okuvala omafiku etu, fye tu pewe omutima wa nongopala.” (Epsalme 90:11, 12) Kape na umwe womufye e shii eenghono dehandu laKalunga ile ounene wehandu laye, naashi oshi na okuhapupaleka etilofimaneko letu lokutila Jehova. Doshili, otali dulu oku tu linyengifa tu mu pule nghee hatu dulu “okuvala omafiku etu, fye tu pewe omutima wa nongopala.”

¹⁹ Eendjovo domupsalme odo eilikano opo Jehova a honge ovanhu vaye nghee ve na okuulika ounongo mokuvalula nokulongifa omafiku avo a xupa ko monghedi ya hokiwa kuKalunga. Okukalamwenyo kwomido 70 otaku yandje eteelelo lomafiku 25 500. Ndele kutya nee omido detu odi fike peni, ‘katu na owino waashi tashi ningwa mongula; osheshi fye omwifi, ou hau monika okafimbo kanini ndee tau lihane po.’ (Jakob 4:13-15) Molwaashi ‘efimbo nombadilila otali tu hange atushe,’ itatu dulu okupopya kutya ohatu dulu okukala nomwenyo natango efimbo li fike peni. Onghee hano, natu ilikane omolwounongo tu ungaunge nomayeleko, tu kale navamwe nawa nokulonga nawa moilonga yaJehova paife eshi—nena! (Omuudifi 9:11, NW; Jakob 1:5-8) Jehova ote tu wilike okupitila mEendjovo daye, momhepo yaye nosho yo mehangano laye. (Mateus 24:45-47; 1 Ovakorinto 2:10; 2 Timoteus 3:16, 17) Okulongifa ounongo otaku tu linyengifa tu ‘konge tete ouhamba waKalunga’ nokulongifa omafiku etu monghedi oyo tai eta efimano kuJehova nokuhafifa omutima waye. (Mateus 6:25-33; Omayeletumbulo 27:11) Doshili, oku mu longela nomutima aushe itaku ka kufa po omaupyakadi etu aeshe, ndelenee otaku ka eta shili ehafo linene.

Omanangeko noupuna aJehova otae tu etele ehafo

20. (a) Omonghedi ilipi Kalunga e udite “olukeno”? (b) Jehova ota ka ungaunga nafye ngahelipi ngeenge twa nyona sha kwata moiti ndelenee ohatu ulike elivelombedi lashili?

²⁰ Itashi ka kala tuu shiwa unene ngeenge hatu dulu okuhafa monghalamwenyo yetu aishe! Shi na sha noshinima eshi, Moses okwa ilikana ta ti: “Omwene, aluka vali! Wa hala u kale ko fiyo onaini mbela? Ningila ovapiya voye olukeno. Pita ongula, u tu palule nouwanghenda woye [ile “nohole youdiinini”], fye tu shiive okukuwilila nokuhafa momafiku etu aeshe.” (Epsalme 90:13, 14; eshangelo lopedu mo NW) Kalunga iha ningi omapuko. Nande ongaho, oha udu “olukeno” ‘nokulotifa’ ehandu laye nokokweeta ehandukilo ngeenge elondwelo laye kombinga yonghatu ei tali eta elunduluko moikala nomelihumbato kombinga yovanyoni ve livela ombedi. (Deuteronomion 13:17) Onghee hano, nokuli nongeenge otwa li twa nyona sha kwata moiti ndelenee ohatu ulike elivelombedi lashili, Jehova ote ke ‘tu palula nouwanghenda waye,’ nohatu ka kala tu na etomheno ‘lokukuwilila.’ (Epsalme 32:1-5) Nomokulalakanena ondjila youyuki, ohatu ka mona ohole yaKalunga youdiinini yoku tu hola nohatu ka dula ‘okuhafa momafiku etu aeshe’—heeno, moshixupe shokukalamwenyo kwetu akushe.

21. Meendjovo da shangwa mEpsalme 90:15, 16, Moses otashi dulika kwa li ta pula shike?

²¹ Omupsalme okwa ilikana a mana mo ta ti: “Hovela oku tu hafifa omafiku e fike puaa we tu nyematifa, nomido di fike puadi twa li noudjuu. Okulonga kwoye, efa ku monike kovapiya voye, noshingetumbalo shoye okoludalo lavo.” (Epsalme 90:15, 16) Moses otashi dulika kwa li ta pula Kalunga a nangeke noupuna Ovaisrael nehafo olo tali tu kumwe ile tali kalelele ngaashi omafiku avo okuhepekwa nosho yo omido odo va mona oixuna koudjuu. Okwa pula opo “okulonga” kwaKalunga kwokunangeka noupuna Ovaisrael ku monike kovapiya vaYe nosho yo oshinge shaYe shi hololelwe oludalo lavo. Ohatu dulu okwiilikana sha yuka opo omanangeko noupuna a tililwe kovanhu ovaduliki mounyuni mupe waKalunga wa udanekwa.—2 Petrus 3:13.

22. PaPsalme 90:17, oshike sha yuka okwiilikanwa?

²² Epsalme eti-90 otali xulifa neilikano eli: “Efilonghenda lOmwene Kalunga ketu nali kale kombada yetu! Noilonga yomake etu i punika, heeno, oilonga yomake etu i nangeka noupuna.” (Epsalme 90:17) Eendjovo edi otadi ulike kutya ohatu dulu okwiilikana sha yuka kuKalunga a nangeke noupuna eenghendabala detu moilonga yaye. Kutya nee otu li Ovakriste ovavaekwa ile oovakwao, “eedi dimwe” otwa hafa eshi ‘efilonghenda laKalunga’ li li kombada yetu. (Johannes 10:16, OB-1954) Inatu hafa tuu eshi Kalunga a ‘nangeka noupuna oilonga yomake etu’ tu li ovaudifi vOuhamba nosho yo meenghedi dimwe!

Natu twikile okuvalula omafiku etu

23, 24. Ongahelipi hatu dulu okumona ouwa mokudilonga Epsalme eti-90?

²³ Okudilonga Epsalme eti-90 oku na okuhapupalifa elineekelo letu muJehova, “ehondameno letu lashili.” Mokudiladila eendjovo dalo kombinga youxupi wonghalamwenyo, ohatu ka shiiva unene omhumbwe oyo tu na yewiliko laKalunga mokuvalula omafiku etu. Nongeenge ohatu twikile okukonga nokulongifa ounongo wopakalunga, otu na oushili kutya ohatu ka mona olune li na ohole nomanangeko noupuna aJehova.

²⁴ Jehova ota ka twikila oku tu ulikila nghee tu na okuvalula omafiku etu. Nongeenge ohatu dulika kehongo laye, ohatu ka dula okutwikila okuvalula omafiku etu fiyo alushe. (Johannes 17:3) Ndelenee, ngeenge otwa tula omwenyo waalushe momadiladilo, Jehova oku na okukala eameno letu. (Judas 20, 21) Ngaashi hatu ke shi mona moshitukulwa tashi shikula, oshitwa eshi osha yelifwa nawa meendjovo tadi ladipike dEpsalme eti-91.

1. Omolwashike sha yuka okupula Jehova e tu honge nghee tu na “okuvala omafiku etu”?

[Efano pepandja 9]

Jehova okwa kala Kalunga “eemhunda fimbo kwa li inadi dalwa natango”

[Efano pepandja 10]

Pataleko laJehova, Metusala oo a kala ko omido 969 okwa kala ko shi he fike nopefiku

[Efano pepandja 12]

Jehova okwa ‘nangeka noupuna oilonga yomake etu’

[Efano pepandja 12]

Oto nyamukula ngahelipi?

• Ongahelipi Jehova e li “ehondameno letu lashili”?

• Omolwashike hatu dulu okutya Jehova okwe lilongekida alushe oku tu kwafela?

• Ongahelipi Jehova te tu kwafele tu ‘valule omafiku etu’?

• Oshike tashi tu dulifa tu ‘hafe momafiku etu aeshe’?