Okulongifa ombibeli ngeenge to nyamukula

NGEENGE twa pulwa sha shi na sha neitavelo letu, onghedi yetu yokukalamwenyo, etaleko letu li na sha noiningwanima yokunena, ile eteelelo letu li na sha nonakwiiwa, otu na okukendabala okunyamukula hatu longifa Ombibeli. Omolwashike mbela? Omolwaashi Ombibeli Eendjovo daKalunga. Osho twa itavela osha kanghamena kOmbibeli, nohatu lihumbata metwokumwe naasho tai ti. Ombibeli oya nwefa mo yo etaleko letu li na sha noiningwanima yomounyuni. Eteelelo letu li na sha nonakwiiwa ola kanghamena filufilu komaudaneko a nwefwa mo oo e li mOmbibeli. — 2 Tim. 3:16, 17.

Tu li Eendombwedi daJehova, otu shi shii kutya otu na oshinakuwanifwa shashike. (Jes. 43:12) Onghee hano, ohatu nyamukula omapulo avamwe twe likolelela kwaasho Jehova a ti mEendjovo daye da nwefwa mo, ndele hakounongo wopanhu. Odoshili kutya tu li oohandimwe otu na omataleko a yoolokafana moinima yonhumba, ndele ohatu efa Eendjovo daKalunga odo di vyule omataleko etu molwaashi otwa tomhwa tu itavele kutya odo oshili. Ombibeli oya ulika kutya otu na emanguluko lokuninga omatokolo moinima ihapu. Otwa hala okuhonga vamwe omafinamhango oo e likolelela kOmishangwa, ponhele yokufininikila vamwe omataleko etu, nokungaho ohatu ka kwafela ovapwilikini va kale navo ve na emanguluko lokuninga omatokolo ngaashi fye. Ngaashi omuyapostoli Paulus, otwa hala okukwafela ovanhu va kale hava ‘dulika omolweitavelo.’ — Rom. 16:26.

MEhololo 3:14, Jesus okwa hokololwa e li “Omuhepaululi omudiinini nOmunashili.” Jesus okwa li ha nyamukula ngahelipi omapulo avamwe nokwa li ha ungaunga ngahelipi neenghalo odo a li a taalela? Peemhito dimwe, okwa li ha longifa omafaneko oo taa ningifa ovanhu va diladile. Omafimbo amwe, okwa li ha pula omupuli kutya oku udite ko ngahelipi omushangwa wonhumba. Oikando ihapu, Jesus okwa li ha tofa omishangwa, ile e di ngonge ile a popye eendjovo domOmishangwa nopehe na okupopya kutya oda dja peni. (Mat. 4:3-10; 12:1-8; Luk. 10:25-28; 17:32) Mefelemudo lotete, omishangwatonywa okwa li ashike hadi kala unene tuu meeshinagoga. Kape na oumbangi oo tau ulike kutya Jesus okwa li e na omishangwatonywa daye dopaumwene. Ndele nande ongaho, okwa li e shii nawa Omishangwa, naluhapu okwa li ha tofa mudo ngeenge ta hongo vamwe. (Luk. 24:27, 44-47) Okwa li ta dulu okupopya oshili kutya ina honga osho shaye mwene. Okwa li a popya osho a li a uda kuXe. — Joh. 8:26.

Otwa hala okushikula oshikoti shaJesus. Fye inatu uda Kalunga ta popi ngaashi Jesus a li e mu uda, ndelenee otu na Eendjovo daKalunga, Ombibeli. Ohatu ka henuka okuyukifa elitulemo kufye vene, ngeenge otwa kala hatu nyamukula omapulo avamwe twe likolelela kOmbibeli. Ngeenge otwa ningi ngaho, ohatu ulike kutya otwa tokola toko okweefa Kalunga oye e tu ulikile kutya oshili oilipi, ponhele yokupopya omadiladilo ovanhu inava wanenena. — Joh. 7:18; Rom. 3:4.

Inatu hala ashike okulongifa Ombibeli ngahenya, ndele otwa hala oku i longifa monghedi omo tai etele omupwilikini ouwa pauyadi. Otwa hala omupwilikini a pwilikine nelitulemo. She likolela koikala yomunhu oo to popi naye, oto dulu okuninga etwalemo opo u longife Ombibeli to ti: “Mbela ito dimine kutya osho Kalunga a popya osho sha fimana?” Ile u tye: “Mbela ou shii kutya Ombibeli oya kundafana shi na sha noshinima osho?” Ngeenge oto popi naumwe oo ina fimaneka Ombibeli, otashi dulika wa pumbwa okuninga etwalemo limwe li lili. Oto dulu okutya: “Onda hala tu kundafane shi na sha nexunganeko olo la xunganekwa nalenale.” Ile u tye: “Embo olo li li apeshe mounyuni otali ti . . . ”

Peemhito dimwe, otashi dulika u ngonge ashike omushangwa. Ngeenge otashi shiiva, oto dulu okukufa Ombibeli yoye ndele to lesha omushangwa. Oto dulu yo okuulikila omunhu omushangwa mOmbibeli yaye, ngeenge otashi shiiva. Okulongifa Ombibeli odikilila luhapu ohaku kumu ovanhu komitima. — Heb. 4:12.

Ovakulunhuongalo Ovakriste ova teelelika filufilu va longife Ombibeli ngeenge tava nyamukula omapulo. Shimwe shomoiteelelwa oyo omumwatate e na okuwanifa po opo a ninge omukulunhuongalo, osho ‘okudama mondjovo ei i shii kulineekelwa yopalongo.’ (Tit. 1:9) Oshilyo sheongalo otashi dulika shi ninge etokolo la kwata moiti konima eshi sha pewa omayele komukulunhuongalo. Inashi fimana tuu okuyandja omayele oo e likolelela filufilu kOmishangwa! Oshihopaenenwa shomukulunhuongalo sha tya ngaho otashi dulu okunwefa mo onghedi yokuhonga yavahapu.