voshifo eshi ova kala nokumona ouyelele u na sha noiningwanima yomounyuni oo tau va kwafele pauhandimwe va mone kutya exulilo oli li popepi. Ovakembauli vamwe inave shi dimina, ova itavela kutya oushili nomavalulo oo oshinima shopaumwene notashi dulu okuningwa kovanhu. Ova ti yo okudja eshi omakwatafano omounyuni aushe taa ende nokuhapupala, neenghalo dounyuni onghee ngoo tadi naipala. Kakele kaasho, ope na oumbangi inau monika nale tau ulike kutya otu li mefimbo la xuuninwa lididilikwedi mondjokonona yovanhu.

Ovanawino vamwe ove wete kutya otwa teelela okumona omalunduluko manene kombada yedu. Pashihopaenenwa, mo 2014, ovanongononi vamwe okwa li va popya molaporta yavo shi na sha noshiponga shinene osho tashi ka xulifa po ovanhu. Ovanongononi ovo ova ti: “Eshi twa konakona noukeka oiningwanima younyuni otwa mona kutya eemwenyo dovanhu odi li monghuwo i na onghambe.” Ovanhu vahapu ova tomhwa filufilu kutya otu li pefimbo lididilikwedi mondjokonona. Ovanyanyangidi voshifo eshi nosho yo ovaleshi vahapu vasho ova tomhwa kutya efimbo eli lididilikwedi otali ulike kutya otu li momafiku axuuninwa nonokutya exulilo oli li popepi. Ndele ponhele yokukala wa tila onakwiiwa, oto dulu okukala wa hafela exulilo. Omolwashike hatu tile ngaho? Omolwaashi oto dulu okuxupa pexulilo.

Ombibeli oye tu lombwela kutya exulilo otali ka kwatela mo ehanauno eshi ya ti: “Omafiku oo otapa kala oudjuu unene, inau kala ko okehovelo lounyuni fiyo opaife . . . Ndele omafiku enya ngeno inaa xupipikwa, ngeno kaku na nande ombelela imwe tai xupifwa.” (Mateus 24:21, 22) Ashike Kalunga okwa udaneka kutya ovanhu vahapu otava ka xupa eshi a ti: “Ounyuni otau xulu po . . . , ndelenee ou ta longo ehalo laKalunga, oye ta kala alushe.” — 1 Johannes 2:17.

Oshike wa pumbwa okuninga ngeenge owa hala oku ka xupa pexulilo lounyuni ou ‘noku ka kala fiyo alushe’? Mbela owa pumbwa okulituvikilila omamona nosho yo oipumbiwa yopalutu opo u ka xupe? Hasho. Ombibeli oye tu lombwela tu lalakanene shimwe shi lili. Oya ti: “Hano oinima ei aishe ngenge tai hanauka ngaha, omu nokuhangika mwa tya ngahelipi moweenda uyapuki nometilokalunga mokuteelela nokweendelelifa euyo lefiku laKalunga.” (2 Petrus 3:10-12) Omushangwa oo otau ulike kutya “oinima ei aishe” otai ka hanaunwa po mwa kwatelwa omapangelo ounyuni ou wa nyonauka naaveshe ovo va hoolola okupangelwa komapangelo oo ponhele yaKalunga. Osha yela kutya, ngeenge otwe lituvikilile oinima yopamaliko, itai ke tu amena kehanauno.

Opo tu ka xupifwe, otu na okudulika kuJehova Kalunga nokulihonga eenghedi noilonga oyo tai mu hafifa. (Sefanja 2:3) Ponhele yokulandula eemhunga dovanhu nokulidimbika omadidiliko oo taa ulike kutya otu li pefimbo lididilikwedi, otwa pumbwa ‘okuteelela euyo lefiku laKalunga.’ Eendombwedi daJehova otadi dulu oku ku ulikila mOmbibeli nghee to dulu okuxupa mefiku olo.