Omailikano oye ohaa holola shike kombinga yoye?
“Oove, Omuudi womailikano, ombelela aishe i nokuuya kuove.” — EPS. 65:3.
1, 2. Omolwashike ovapiya vaJehova tava dulu okwiilikana kuye ve na elineekelo?
JEHOVA oha pwilikine alushe komailikano ovapiya vaye ovadiinini. Ohatu dulu okukala nelineekelo kutya oha udu omailikano etu. Nokuli nongeenge omamiliyona Eendombwedi daJehova okwa ilikana kuye pefimbo limwe, kape na nande olimwe lomomailikano oo tali kala inali udika.
2 Omupsalme David okwa li e na elineekelo kutya Kalunga oha udu omailikano aye, nomolwaasho okwa imba a ti: “Oove, Omuudi womailikano, ombelela aishe i nokuuya kuove.” (Eps. 65:3) Jehova okwa li ha nyamukula omailikano aDavid, molwaashi David okwa li he mu longele noudiinini. Otu na okulipula kutya: ‘Mbela omailikano ange ohaa ulike ngoo kutya onde lineekela Jehova nonokutya onda pitifa komesho elongelokalunga la koshoka? Mbela omailikano ange ohaa holola shike kombinga yange?’
Ilikana kuJehova nelininipiko
3, 4. (a) Otu na okupopya naKalunga meilikano noikala ya tya ngahelipi? (b) Otu na okuninga po shike ngeenge otwa wililwa po ‘komadiladilo’ shi na sha nenyono la kwata moiti?
3 Ngeenge otwa hala Kalunga a nyamukule omailikano etu, otu na okukala hatu popi naye twe lininipika. (Eps. 138:6) Otu na okupula Jehova e tu konakone ngaashi David a li a ninga, eshi a ti: “Kalunga, konakone nge, u koneke omutima wange! Yeleke nge, u dilakane omadiladilo ange, opo u mone, ngenge ndi li mondjila yepukifo, Ove u endife nge mondjila, ei tai twala moukwaalushe.” (Eps. 139:23, 24) Katu na ashike okukala hatu ilikana kuKalunga, ndele otu na yo okuliyandja kuye e tu konakone nokudulika komayele Eendjovo daye. Jehova ota dulu oku tu endifa “mondjila, ei tai twala moukwaalushe,” sha hala okutya, te tu kwafele tu ende mondjila oyo tai twala komwenyo waalushe.
4 Mbela ongahelipi ngeenge otwa wililwa po ‘komadiladilo’ shi na sha nenyono la kwata moiti? (Lesha Epsalme 32:1-5.) Ngeenge otwa kendabala okulipwililikila eliudo li udite etimba otashi ke tu nghundipaleka, ngaashi ashike omuti hau ende tau nganye omolwoupyu muhapu wokwenye. David okwa li a kanifa ehafo notashi dulika a li ta vele omolwenyono laye. Ndele okwa li e udite a pepelelwa konima eshi a hepaululila Kalunga enyono laye. David okwa li shili a hafa eshi a li e udite kutya ‘omanyono aye okwa dimwa po’ nosho yo kutya Jehova okwe mu dimina po. Okuhepaululila Kalunga omanyono otaku dulu okweetela omunhu epepelelo, ashike ovakulunhuongalo Ovakriste otava dulu yo okukwafela omunyoni a veluke pamhepo. — Omayel. 28:13; Jak. 5:13-16.
Ilikana Kalunga noku mu pandula
5. Okwiindila kuJehova osha hala okutya shike?
5 Ngeenge otwa wililwa po koisho omolwomatomheno onhumba, otu na okudulika komayele aPaulus, oo taa ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo.” (Fil. 4:6) Okwiindila otashi ti “okupula sha nelininipiko.” Pashihopaenenwa, ngeenge tu li moshiponga ile hatu hepekwa, otu na okwiindila Jehova e tu kwafele noku tu pe ewiliko laye.
6, 7. Otu na okupandula Kalunga meilikano omolwomatomheno elipi?
6 Ngeenge otwa kala hatu ilikana ashike ngeenge twa pumbwa sha, mbela osho otashi ka holola shike shi na sha nafye? Paulus okwa ti kutya otu na okushiivifila Kalunga omaindilo etu “pamwe nomapandulo.” Otu na lela omatomheno okupandula Jehova ngaashi David, oo a ti: ‘Omwene, ounene owoye, neenghono odoye, noshinge oshoye, nouyelele owoye, nepangelofimano oloye, heeno, aishe yomeulu nokombada yedu oyoye. Oshilongo oshoye Omwene, ndele Oove Omupangeli waaishe! Kalunga ketu, hatu ku hambelele ndele hatu fimaneke edina loye noshinge shalo.’ — 1 Omaf. 29:11-13.
7 Jesus okwa li a pandula Kalunga omolwoikulya nomolwomungome nomaviinyu oo a li a longifa pOuvalelo wOmwene. (Mat. 15:36; Mark. 14:22, 23) Kakele kokukala tu na oikala ya tya ngaho, otu na yo ‘okupandula Omwene omolwoikumwifi yaye oyo ha longele ovana vovanhu,’ ‘eemhangela daye douyuki’ nosho yo eendjovo daye ile etumwalaka laye olo tali hangwa kunena mOmbibeli. — Eps. 107:15; 119:62, 105.
Kwatela mo vamwe momailikano oye
8, 9. Omolwashike tu na okukwatela Ovakriste vakwetu momailikano etu?
8 Nopehe na omalimbililo, ohatu ilikana kuKalunga omailikano e na sha nafye vene, ndele otu na yo okukwatela mo vamwe momailikano etu, nokuli nOvakriste vakwetu ovo tuhe shii komadina. Nonande omuyapostoli Paulus otashi dulika ka li e shii ovaitaveli aveshe vomuKolossi, okwa ti: “Ohatu pandula Kalunga Xe yOmwene wetu Jesus Kristus alushe ngenge hatu mu ilikanene, osheshi [eitavelo] leni lomuKristus Jesus, nohole yeni yokuhola ovayapuki aveshe, otwe i uda.” (Kol. 1:3, 4) Paulus okwa li yo a kwatela mo Ovakriste vokuTessaloniki momailikano aye. (2 Tes. 1:11, 12) Omailikano a tya ngaho ohaa holola oikala yetu nohaa ulike kutya otwa tala ko ngahelipi ovamwatate novamwameme vopamhepo.
9 Omailikano oo hatu ilikanene Ovakriste ovavaekwa nosho yo ‘eedi dimwe’ otaa yandje oumbangi kutya otu na ko nasha nehangano laKalunga. (Joh. 10:16, OB-1986) Paulus okwa li a pula ovalongelikalunga vakwao ve mu ilikanene a ‘pewe eendjovo da yuka opo a udife oshiholekwa shevangeli.’ (Ef. 6:17-20) Mbela nafye ohatu ilikanene Ovakriste vakwetu monghedi ya tya ngaho?
10. Okukwatela vamwe momailikano etu otaku dulu oku tu kuma ngahelipi?
10 Okukwatela vamwe momailikano etu otaku dulu okulundulula etaleko letu li na sha navo. Ngeenge otwa kwatele momailikano etu omunhu wonhumba oo tuhe na onghwa naye, etaleko letu li na sha naye otashi dulika li lunduluke. (1 Joh. 4:20, 21) Omailikano a tya ngaho ohaa tungu nohaa xumifa komesho oukumwe wovamwatate. (Fil. 4:8, 9) Kakele kaasho, omailikano a tya ngaho ohaa ulike kutya otu na ohole ya fa yaKristus. (Joh. 13:34, 35) Ohole oi li oshitukulwa shoshiimati shomhepo yaKalunga. Mbela ohatu ilikana kuJehova pauhandimwe e tu pe omhepo iyapuki, hatu mu pula e tu kwafele tu kale hatu ulike omaukwatya oshiimati shomhepo, ngaashi ohole, ehafo, ombili, onheni, oukaume, ouwa, oudiinini, engungumano nelididimiko? (Luk. 11:13; Gal. 5:22) Ngeenge osho ngaho, eendjovo detu nosho yo oilonga yetu otai ka ulika kutya ohatu ende nohatu kala mewiliko lomhepo. — Lesha Ovagalati 5:16, 25.
11. Omolwashike sha yuka okupula vamwe ve tu kwatele mo momailikano avo?
11 Ngeenge otwa didilike kutya ounona vetu ohava yelekwa va vake moukonakono kofikola, otu na oku va ilikanena noku va kwafela yo nOmishangwa opo va kale ovanashili novaha longe nande owii washa. Paulus okwa li a lombwela Ovakriste vomuKorinto a ti: “Ohatu ilikana Kalunga, mu ha ninge owii nande washa.” (2 Kor. 13:7) Okwiilikana nelininipiko kwa tya ngaho ohaku hafifa Jehova nohaku ulike kutya otu na oikala iwa. (Lesha Omayeletumbulo 15:8.) Nafye ohatu dulu okupula vamwe ve tu kwatele mo momailikano avo, ngaashi ashike omuyapostoli Paulus a li a ninga. Okwa ti: “Ilikaneni omolwetu, osheshi fye otu shi shii shili, otu nomaliudo mawa, eshi twa hala okweenda nawa [moinima] aishe.” — Heb. 13:18.
Omailikano etu ohaa holola shihapu shi na sha nafye
12. Oinima ya fimanenena ilipi tu na okukwatela momailikano etu?
12 Omailikano etu ohaa ulike ngoo kutya otu li Eendombwedi daJehova diladi noda hafa? Mbela omaindilo etu ohaa yukifa ngoo elitulemo kokukala metwokumwe nehalo laKalunga, okuudifwa kwetumwalaka lOuhamba, okuyukipalifwa kwounamapangelo waJehova nosho yo okuyapulifwa kwedina laye? Oinima ya tya ngaho oi na okukala i li oshitukulwa sha fimanenena shomailikano etu, ngaashi Jesus e shi ulika moshihopaenenwa shaye sheilikano, olo la hovela neendjovo tadi ti: “Tate yetu ou u li meulu! Edina loye nali yapulwe; ouhamba woye nau uye; ehalo loye nali wanifwe kombada yedu yo ngaashi meulu.” — Mat. 6:9, 10.
13, 14. Omailikano etu ohaa holola shike kombinga yetu?
13 Omailikano etu oo hatu ilikana kuKalunga ohaa holola omalinyengotomheno etu, oinima oyo tu na ohokwe muyo nosho yo omahalo etu. Jehova oku shii kutya fye ovanhu va tya ngahelipi. Omayeletumbulo 17:3 otaa ti: “Onhelekelo koshingoldo, nediko loshisilveri, ndelenee Omwene ta yeleke omitima.” Kalunga oha mono osho shi li momitima detu. (1 Sam. 16:7) Oku shii nghee hatu kala tu uditile okwoongala, oukalele wetu nosho yo ovamwatate novamwameme vopamhepo. Jehova oku shii yo kutya ohatu kala tu uditile ngahelipi ‘ovamwaxe’ vaKristus. (Mat. 25:40) Jehova oha kala e shii kutya osho hatu mu indile otwe shi halelela tuu shili ile ohatu endulula ashike eendjovo. Jesus okwa ti: “Ngenge tamu ilikana, inamu popyaana ngaashi ovapaani ovo ve shii [pamwe] tava udilwa okupopyaana kweendjovo dihapu.” — Mat. 6:7.
14 Eendjovo odo hatu popi momailikano etu ohadi holola yo kutya otwe lineekela Kalunga shi fike peni. David okwa ti: “Ove [Jehova] wa kala nale ehondamo lange, nohote yange ya pama koshipala shomutondi wange. Itavela . . . ndi kale alushe metwali loye, ndi hondame meameno lomavava oye.” (Eps. 61:4, 5) Ngeenge Kalunga ‘ta diki etwali laye kombada yetu’ pafaneko, otashi ulike kutya ote tu amene note tu file oshisho. (Eh. 7:15) Itashi hekeleke tuu okweehena popepi naJehova okupitila meilikano tu na elineekelo kutya ‘okwaama kufye’ efimbo keshe eitavelo letu tali yelekwa! — Lesha Epsalme 118:5-9.
15, 16. Eilikano otali dulu oku tu kwafela tu didilike mo shike shi na sha nokukala twa hala oinakuwanifwa yonhumba meongalo?
15 Omailikano e li paushili oo hatu ilikana kuJehova shi na sha nomalinyengotomheno etu otae tu kwafele tu mone ngeenge omalinyengotomheno etu okwa yuka ngoo. Pashihopaenenwa, mbela eshi wa halelela oshinakuwanifwa shokukala omupashukili mokati koshiwana shaKalunga, owe shi hala ngoo shili nelininipiko opo u kwafele vamwe nokulonga ngaashi to dulu mokuxumifa komesho oinima yOuhamba? Ile pamwe otashi dulika wa hala ashike “okukala wotete” ile ‘okupangela’ vakweni nokuli? Osho hasho shi na okukala ngaho mokati koshiwana shaJehova. (Lesha 3 Johannes 9, 10; Lukas 22:24-27.) Ngeenge otu na omahalo a puka, okwiilikana kuJehova Kalunga twa mana mo otaku ke tu kwafela tu a didilike mo notashi ke tu kwafela yo tu ninge omalunduluko ofimbo omahalo a tya ngaho inaa menena mo omidi mufye.
16 Ovakulukadi Ovakriste otashi dulika va kale va halelela ovashamane vavo va ninge ovayakuliongalo nohauxuuninwa va ka ninge ovapashukili ile ovakulunhuongalo. Ovamwameme ovo otava dulu okukatuka metwokumwe nomaliudo avo oo hava popi momailikano avo opaumwene mokukendabala okukala tave lihumbata monghedi i shii okuhopaenenwa. Osho osha fimana, molwaashi okupopya nosho yo elihumbato loukwaneumbo womushamane otai dulu okukuma etaleko lovanhu meongalo shi na sha nomushamane.
Nghee u na okukalela po vamwe meilikano lomoipafi
17. Omolwashike shiwa okulikalela ngeenge hatu ilikana omailikano opaumwene?
17 Jesus okwa li ha fiye po eengudu dovanhu lwoikando opo a ka ilikane kuXe konhele ye likalela. (Mat. 14:13; Luk. 5:16; 6:12) Nafye otwa pumbwa okukala hatu kala ofye atuke omafimbo amwe. Okwiilikana kuJehova tu li ponhele pe limwenenena otaku dulu oku tu kwafela tu ninge omatokolo oo taa hafifa Jehova notu kale hatu mu longele noudiinini. Ashike Jesus okwa li yo ha ilikana moipafi yavamwe, noshiwa okukonakona kutya ongahelipi nafye hatu dulu oku shi ninga monghedi ya yuka.
18. Oitwa imwe ilipi tu na okukaleka momadiladilo ngeenge hatu kalele po eongalo meilikano lomoipafi?
18 Meongalo lopaKriste, omu na ovalumenhu ovadiinini ovo hava ilikana moipafi ve lile po eongalo. (1 Tim. 2:8) Shimha eilikano la pu, ovaitaveli vakwetu ove na okutya “amen,” osho tashi ti, “nashi kale ngaho.” Ndele opo va dule okuninga ngaho, ove na okudimina osho sha popiwa meilikano. Moshihopaenenwa sheilikano shaJesus kamu na nande osha tashi halukifa ile tashi ulike okuhenelungi. (Luk. 11:2-4) Kakele kaasho, ka li a tumbula eemhumbwe adishe kondadalunde ile omaupyakadi ovapwilikini vaye aveshe ovo va li po eshi ta ilikana. Oshiwa okupopya okunakonasha kwetu navamwe meilikano lopaumwene, ndele hameilikano lomoipafi. Ngeenge hatu ilikana moipafi tulile po ongudu, katu na okukwatela mo oiholekwa momailikano etu.
19. Otu na okulihumbata monghedi ya tya ngahelipi pefimbo leilikano lomoipafi?
19 Ngeenge umwe ta ilikana eilikano lomoipafi, otwa pumbwa okuulika etilofimaneko ‘lokutila Kalunga.’ (1 Pet. 2:17) Oinima imwe oyo hatu ningi otashi dulika i wapalele pefimbo lonhumba nosho yo ponhele yongadi, ndele otashi dulika iha wapalele pokwoongala kwopaKriste. (Omuud. 3:1) Pashihopaenenwa, natu tye nee ngeno umwe okwa hala ovanhu aveshe ve likwate komapepe ve li ongudu ile ve likwate meenyala eshi taku ilikanwa. Osho otashi dulu okuhandukifa ile okupiyaaneka vamwe, mwa kwatelwa ovanhu ovo vehe fi veitavelo letu. Ovalihomboli vamwe otashi dulika ve likwate meenyala nelungi, ndele ngeenge ove likwata meembwetule pefimbo leilikano lomoipafi, elihumbato la tya ngaho otashi dulika li pundukife vamwe ovo ve va wete. Otashi dulika ovanhu va fike pexulifodiladilo kutya ovalihomboli va tya ngaho otava yandje elitulemo kokuulikilafana ohole ponhele yokufimaneka Jehova. Onghee hano, molwaashi otwa fimaneka Kalunga neenghono, ‘keshe osho hatu ningi natu shi ningeni okufimanekifa Kalunga’ nokuhenuka okulihumbata monghedi oyo tai piyaaneke vamwe, tai halukifa ile tai va pundukifa. — 1 Kor. 10:31, 32; 2 Kor. 6:3.
Otu na okwiilikana kombinga yashike?
20. Yelifa Ovaroma 8:26, 27.
20 Omafimbo amwe otashi dulika tu kale tuhe shii kutya natu tye shike momailikano etu opaumwene. Paulus okwa ti: ‘Katu shi shii eshi tu noku shi ilikana, ndelenee omhepo [iyapuki] oyo vene tai tu ilikanene nomikemo dihe shi kutumbulwa. Ndele [Kalunga] omukonakoni womitima oku shi shii eshi omhepo tai shi diladila.’ (Rom. 8:26, 27) Jehova okwa shangifa omailikano mahapu mOmishangwa. Oha tambula ko omailikano a nwefwa mo a tya ngaho onga ofye twe a ilikana, onghee, ohe a nyamukula. Kalunga oku tu shii noku shii eityo loinima oyo a shangifa mOmbibeli kovashangi ovo va nwefwa mo komhepo yaye. Jehova oha nyamukula omailikano etu ngeenge omhepo tai tu “ilikanene.” Ndele ngeenge otwa shiiva nawa Eendjovo daKalunga, ohatu ka kala tu shii osho tu na okutya meilikano.
21. Oshike hatu ka konakona moshitukulwa tashi landula?
21 Ngaashi twe lihonga, omailikano etu ohaa holola shihapu kombinga yetu. Pashihopaenenwa, otaa dulu okuholola kutya otwa ehena popepi naJehova shi fike peni nonokutya otu shii nawa Eendjovo daye shi fike peni. (Jak. 4:8) Moshitukulwa tashi landula, ohatu ka konakona omailikano onhumba nosho yo eendjovo domailikano odo da shangwa mOmbibeli. Mbela okukonakona Omishangwa da tya ngaho otaku ka kuma ngahelipi onghedi omo hatu ilikana kuKalunga?
Oto nyamukula ngahelipi?
• Otu na okupopya naJehova meilikano noikala ya tya ngahelipi?
• Omolwashike tu na okukala hatu kwatele ovaitaveli vakwetu momailikano etu?
• Omailikano etu otaa dulu okuholola shike kombinga yetu nosho yo omalinyengotomheno etu?
• Otu na okulihumbata monghedi ya tya ngahelipi pefimbo leilikano lomoipafi?
[Efano pepandja 11]
Mbela oho tange Jehova noku mu pandula pandjikilile?
[Efano pepandja 13]
Onghedi omo omalutu etu haa kala ngeenge taku ilikanwa moipafi oi na alushe okufimanekifa Jehova