Eedjo dokafo Onghalamwenyo yopaKriste noilonga yokuudifa
1-7 NOVEMBA
OMAMONA OMEENDJOVO DAKALUNGA | JOSUA 18-19
“Jehova okwa li a tukula edu pandunge”
it-1-E 359 ¶1
Eengaba
Osha fa shi li ngaha kutya omapata okwa li haa tukulilwa edu taku talika koinima ivali: okuumbilwa oshihoololifo nosho yo kounene wepata. Oshihoololifo otashi dulika shi kwate ashike oshitukulwa shimwe shedu osho sha fyuululwa kepata keshe, kungaho efyuululo ola li hali ningwa koshitukulwa shimwe shedu, ngaashi kolundume ile kolukadi, koushilo ile kouninginino, popepi noluhaela lokomunghulofuta ile koshitukulwa shokeemhunda. Etokolo li na sha noshihoololifo ola li la dja kuJehova, nola li hali kelele ondubo, ile eenhamanana pokati komapata. (Omayel 16:33) Osho osha yela kutya Kalunga okwa li ha wilike oinima opo onghalo yepata keshe i kale metwokumwe naasho sha xunganekwa kutatekulululwa Jakob ofimbo ina fya, osho sha popiwa muGenesis 49:1-33.
it-1-E 1200 ¶1
Efyuululo
Efyuululwadu. Efyuululo lOvaisrael ove li pewa kuJehova, oo a li a lombwelwa Moses kutya eengaba dedu odi na okweenda peni. (Num 34:1-12; Jos 1:4) Oludalo laGad, oludalo laRuben nosho yo etata lepata laManasse, ola li la pewa oshitukulwa shalo kuMoses. (Num 32:33; Jos 14:3) Omapata makwao okwa li a pewa efyuululo lavo pashihoololifo, okupitila mewiliko laJosua naEliaser. (Jos 14:1, 2) Metwokumwe nexunganeko laJakob olo ta li hangwa muGenesis 49:5, 7, Simeon naLevi kava li va pewa oshitukulwa sha tukulwa shefyuululo. Oshitukulwa shaSimeon osha li sha kwatela mo oitukulwa (kumwe noilando aishe ya tukulwa) oyo i li moshitukulwa shaJuda (Jos 19:1-9), ofimbo Ovalevi ova li va pewa oilando 48 moitukulwa aishe yaIsrael. Molwaashi Ovalevi ova li va pewa oilonga ye likalekelwa ketwali, Jehova oye a li e na okukala efyuululo lavo. Ova li va pewa oitimulongo, ile oshitukulwafyuululwa omolwoilongayakulo oyo va li tava longo. (Num 18:20, 21; 35:6, 7) Omaukwaneumbo okwa li a pewa oinakuwanifwa she likolelela koitukulwa yomapata avo. Eshi omaukwaneumbo a enda taa kulu, ovanamati ova li hava fyuulula, noitukulwa oyo oya li hai tukulwa alushe moutukulwa vanininini.
it-1-E 359 ¶2
Eengaba
Konima eshi oshihoololifo sha umbwa shi tokole kutya epata otali pewa oshitukulwa shilipi, otashi ka kala shi li xwepo okutokola kutya oshitukulwa otashi ka kala shi fike peni pakanghameno letomheno etivali kutya epata oli fike peni. Ombiibeli oya ti: “Ndele nye mu nokutaula edu olo efyuululwa pamapata eni. Kepata linene oshitukulwafyuululwa tashi ka ninga shinene, ndee kepata linini oshitukulwafyuululwa tashi ka ninga shinini.” (Num 33:54) Oshihoololifo otashi ka tokola kutya oshitukulwa shilipi po, ashike otapa dulu okuningwa elunduluko she likolelela kounene wefyuululo. Eshi kwa li kwa monika kutya oshitukulwa shaJuda osha kula unene, osha li sha tukulwa, ndele oshitukulwa shimwe tashi yandjwa kepata laSimeon. — Jos 19:9.
Omamona opamhepo
it-1-E 359 ¶5
Eengaba
Ehokololo li na sha nokutukulwa kwedu koitukulwa oyo ya ama kouninginino womulonga waJordan otali ulike kutya oshihoololifo shotete osha li sha hoolola Juda (Jos 15:1-63), Josef (Efraim) (Jos 16:1-10) nosho yo etata lepata laManasse olo la li kouninginino womulonga waJordan (Jos 17:1-13) okwa li la ufwa, neengaba noilando oyo ya valulwa. Konima yaasho, opa fa pa li pa holoka sha osho sha li sha ya moshipala okutukulwa kwedu, molwaashi onhanda yOvaisrael oya li ya tembuka okudja kuGilgal ya ya kuShilo. (Jos 14:6; 18:1) Efimbo olo la pita po inali tumbulwa, ashike xuuninwa Josua okwa li a hanyena omapata aheyali omolwokweenda kanini shi na sha nokukufa ko edu alishe. (Jos 18:2, 3) Okwa yandjwa omayelifo mahapu e na sha naasho sha li sha ningifa omapata aheyali a kale e na oikala ya tya ngaho yokulata, ovayandjimayele vamwe otava tomhafana kutya oixuulwa ihapu oyo ya dja pefimbo lefindano lOvaisrael nosho yo emanguluko linini olo va li va mona okudja kOvakaanana, otashi dulika olo la ningifa omapata oo a kale e wete inashi endelela okunangala edu olo la li la xupa ko. Okwoongaonga okutaalela oupyakadi u na sha nokutaalela ovatondi ve na eenghono otashi dulika osho sha li sha etifa okulata oko. (Jos 13:1-7) Natango, otashi dulika kaa li e shii oshitukulwa shEdu lEudaneko osho shi dulife oitukulwa oyo ya tukulwa nale.
8-14 NOVEMBA
OMAMONA OMEENDJOVO DAKALUNGA | JOSUA 20-22
“Oilihongomwa okudja mokuhaudafana”
w06-E 4/15 5 ¶3
Oinima oyo tai kwafele ovalihomboli va kale hava kundafana
Okukundafana mwa manguluka otaku dulu okuya moshipala okuhaudafana. Pehovelo londjokonona yOvaisraeli, epata laRuben, laGad nosho yo etata lepata laManasse, oo a li koushilo womulonga waJordan okwa li a tunga “oaltari inene unene.” Omapata makwao kaa li e udite ko kutya omolwashike a katuka eenghatu odo. Molwaashi okwa li taa diladila kutya omapata makwao oo a ama kombinga ikwao yomulonga kaa li madiinini, omapata oo a ama kouninginino okwa li a hala okulwifa makwao oo a li a tala ko e li “ovanandubo.” Ndele fimbo a li inaa hovela okulwa, okwa li a tuma ovatumwa va ka popye nomapata oo a ama koushilo. Oyo kaya li tuu onghatu yopandunge! Okwa li a mona kutya oaltari kaya li ya kwatela mo okuyandja omayambo inaa ufwa. Ponhele yaasho, omapata oo a li a ama koushilo okwa li a tila kutya monakwiiwa omapata makwao otae ke a lombwela kutya: “Nye muhe noshitukulwa mOmwene.” Oaltari oya li tai ka kala oumbangi kutya navo ove li ovalongeli vaJehova. (Josua 22:10-29) Oaltari ova li ve i luka Ondombwedi, tashi dulika molwaashi oya li ya ninga ondombwedi kuvo kutya Jehova oye Kalunga kashili. — Josua 22:34, eshangelo lopedu.
w08-E 11/15 18 ¶5
‘Lalakanena oinima oyo tai eta ombili’
Ovaisreal vamwe ova li tava diladila kutya ove na oumbangi wa yela u na sha nenyono nonokutya eponokelo lomonanguwi ola li ashike tali ka dipaifa ovanhu vanini. Ndele ponhele yokukatuka diva, epata olo la li kouninginino waJordan ola li la tuma ovatumwa va ka kundafane oupyakadi oo wa li pokati kavo novamwaxe. Ova pula vati: “Nye omwa tauluka ngahelipi eudafano nokuliteeka Kalunga kaIsrael, nye eshi tamu liteeka Omwene nena eli?” Oushili oyoo kutya, epata olo la tunga oaltari kala li la ulika okuhena oudiinini. Mbela ola li le linyenga ngahelipi eshi la li tali lundilwa? Mbela ola li tali ka handuka noku va ponokela, ile liha popye navo? Epata olo la li tali lundilwa ola li la nyamukula nombili, nola li la yelifa kutya eenghatu dalo oda li de linyengifwa kehalo lavo lokulongela Jehova. Onghedi omo ve linyenga oya kaleka po ekwatafano lavo naKalunga noya xupifa eemwenyo davo. Eenghundafana davo odo va li va ninga nengungumano oda li da pongolola po okuhaudafana oko kwa li po nova li va panga ombili. — Jos. 22:13-34.
Omamona opamhepo
it-1-E 402 ¶3
Kanaan
Nonande Ovakaanan vahapu ova li va xupa eshi va findwa nokava li va hala okuliyandja, natango otaku dulu okutiwa kutya “Omwene okwa yandja kuIsrael edu alishe, Ye e li udanekelele ooxe nokwaana e li va pe,” nonokutya okwe “va pa etulumuko keembinga adishe” ‘noka pe na nande ondjovo imwe yomeendjovo adishe diwa, Omwene e di popya neumbo laIsrael, ya kala inai wanifwa. Adishe da wanifwa.’ (Jos 21:43-45) Ovatondi vOvaisrael aveshe ova li va tila, nokava li ve va ningila omatilifo. Kalunga okwa li a popya nale kutya okwa li ta ka taataa Ovakaanan “kanini nakanini” opo oifitukuti iha hapupale medu olo la fiwa po ombadilila. (Ex 23:29, 30; Deut 7:22) Nonande Ovakaanan ova li ve na oilwifo yoita ya denga mbada, ya kwatela omatemba oita e na omalola oivela, Jehova haye a li ta ka pewa ombedi kutya ina wanifa po eudaneko laye ngeno Ovaisrael ova kalele inava kufa ko oitukulwa imwe yedu. (Jos 17:16-18; Ovatok 4:13) Ponhele yaasho, ondjokonona otai ulike kutya Ovaisrael ova li va findwa peemhito dimwe omolwokuhena oudiinini kwavo. — Num 14:44, 45; Jos 7:1-12.
15-21 NOVEMBA
OMAMONA OMEENDJOVO DAKALUNGA | JOSUA 23-24
“Josua ta kumaida oshiwana lwaxuuninwa”
it-1-E 75
Okulimanga kumwe
Opa li pa holoka onghalo imwe eshi oshiwana shaIsrael sha li sha ya muKanaan, Edu lEudaneko. Kalunga Omunaenghono adishe okwa li a pa Ovaisrael oufemba wokuya medu olo opo eudaneko olo a udanekela ooxekulululwa li wanifwe. Ashike kava li ve na okuya mo ve li ovanailongo, na Jehova okwa li e va kelela vehe limange kumwe noiwana yovapaani oyo ya li medu olo. (Ex 23:31-33; 34:11-16) Ova li ashike ve na okudulika keemhango nokomifindalandu daKalunga, ndele hadoiwana oyo ya li ina okuhanaunwa po. (Lev 18:3, 4; 20:22-24) Ova li va londwelwa vaha hombole novanhu vomoiwana oyo. Okulimanga kumwe nayo monghedi oyo kasha li ashike tashi va ningifa va kale ve na ekwatafano novakulukadi ovapaani, ndele osha li tashi ke va kokela momalongelokalunga neenghulunghedi davo doipupulu, naasho osha li tashi ke va ningifa va ninge ovashunimonima notashi va twala momwiyo. — Deut 7:2-4; Ex 34:16; Jos 23:12, 13.
Jehova oha wanifa po alushe omaudaneko aye
Molwaashi otwa mona omaudaneko amwe aJehova taa wanifwa, ohatu dulu okutya: ‘Kape na nande ondjovo imwe yomeendjovo adishe diwa Omwene Kalunga ketu e i tonga ya kala inai wanifwa. Adishe ode tu wanifilwa, kape na nande imwe inai wanifwa.’ (Josua 23:14) Jehova oha mangulula, oha amene noha file oshisho ovapiya vaye. Mbela ope na limwe lomomaudaneko oo a udanekwa kuJehova inali wanifwa peufwafimbo lalo? Hasho nandenande! Onghee hano, natu kale twe lineekela filufilu momaudaneko aKalunga oo e li mEendjovo daye.
Onakwiiwa yetu otai ka kala ya tya ngahelipi? Jehova okwa udaneka kutya vahapu vomufye otu na eteelelo loku ka kala kombada yedu olo tali ka lundululilwa moparadisa iwa, omanga vanini vomufye ve na eteelelo loku ka pangela pamwe naKristus meulu. Onghee hano, ohatu dulu okukala ovadiinini ngaashi Josua, kashi na nee mbudi kutya eteelelo letu olilipi, molwaashi eudaneko olo otali ka wanifwa. Opo nee ohatu ka diladila shi na sha nomaudaneko aeshe oo Jehova a li e tu udanekela, nohatu ka dula yo okutya ‘kape na nande ondjovo imwe inai wanifwa’.”
Omamona opamhepo
Omanenediladilo okudja membo laJosua
24:2 — Mbela Tera, xe yaAbraham, okwa li ha longele oikalunga? Tango, ka li ha longele Jehova Kalunga. Osha yela kutya okwa li ha longele kalunga komwedhi e na edhina Sin, oshikalunga shi holike muUr. Pamuthigululwakalo gwOshijuda, Tarah otashi vulika nokuli a li ha ningi iikalunga. Ihe sho Abraham a zi muUr molwelombwelo lyaKalunga, Tarah okwa li a yi pamwe naye kuHaran. — Genesis 11:31.
22-28 NOVEMBA
OMAMONA OMEENDJOVO DAKALUNGA | OVATOKOLIPANGELI 1-3
“Ehokololo li na sha nouladi noukengeleledi”
w04-E 3/15 31 ¶3
Ehud ta teya ondjoko youpika
Omhangela yaEhud oya li ya pondola, ndele hamolwaashi a li e na eendunge dihapu, ile molwaashi ngeno ovatondi vaye va li itava dulu sha. Okuwanifwa kwelalakano laKalunga inaku likolelela keenghendabala dovanhu. Etomheno la fimanenena li na sha naashi Ehud a pondola, omolwaashi okwa kwafelwa kuKalunga eshi a li ta katuka metwokumwe nehalo laye li na sha nokumangulula oshiwana shaYe. Kalunga okwa li a nangeka po Ehud, ‘naashi Omwene a pendulila oshiwana shaye ovatokolipangeli, Omwene okwa li pamwe nomutokolipangeli.’ — Ovatok 2:18; 3:15.
w04-E 3/15 30 ¶1-3
Ehud ta teya ondjoko youpika
Tete Ehud okwa li e liningila “eongamukonda” li na eememo akushe, olo la lixupi notali dulu okuholekwa koshi yoikutu yaye. Otashi dulika a li ta diladila kutya ota ka hadwa. Omaonga okwa li haa homatwa kolumosho, oko omunhu ta dulu okulipweya mo noupu nolulyo. Molwaashi Ehud okwa li e na olumosho, oshilwifo shaye osha li “ponho yaye yokolulyo koshi yoikutu yaye,” oko ovanangeli vohamba tashi dulika va li itava ka hada. Onghee, nopehe na oshiimbi, okwa “twala kuEglon, ohamba yaMoab, oifendela.” — Ovatokolipangeli 3:16, 17.
Inapa yandjwa ouyelele u na sha noiningwanima oyo ya ningwa tete mombala yaEglon. Ombiibeli oya ti ashike: ‘Ehud eshi a yandja oifendela, okwa shunifa ovanhu ava va humbata oifendela.’ (Ovatokolipangeli 3:18) Ehud okwa li a yandja oifendela, ndele ta findikile ovahumbati oshinano shokokule okudja meumbo laEglon, opo nee ta shuna mo eshi va ya. Omolwashike mbela? Mbela okwa li e uya novalumenhu ovo omolweameno, ile omilandu donhumba, ile tashi dulika ve li ashike ovahumbati voifendela? Mbela okwa li a hala va ye ve li meameno fimbo ina wanifa po elalakano laye? Kashi na nee mbudi kutya Ehud okwa li ta diladila shike, okwa li a wanifa po elalakano laye nouladi.
“[Ehud] okwa aluka poihongwafano oyo i li muGilgal, ndele ta ti: “Akutu ohamba, ame ndi neenghundafana doiholekwa.” Omishangwa inadi yelifa kutya okwe shi enda ngahelipi opo a ye vali meumbo laEglon. Mbela ovanangeli kava li va didilika sha? Mbela ova li tava diladila kutya Omuisrael umwe ke li oshiponga komwene wavo? Eshi Ehud a li a aluka oye aeke, mbela osho kasha li she va diladilifa kutya ota kengelele ovanhu voshilongo shavo? Kashi na nee mbudi kutya oshike, Ehud okwa li a konga omhito a ye kohamba oye aeke, nokwe i mona. — Ovatokolipangeli 3:19.
Omamona opamhepo
Omanenediladilo okudja membo lOvatokolipangeli
2:10-12. Otu na okukala tu na elandulathano lyekonakonombimbeli ihaali faula opo ‘kaatu dhimbwe uuwanawa washa mboka Jehova e tu ningila.’ (Epsalmi 103:2) Aavali oya pumbwa okuthindila oshili yOohapu dhaKalunga momitima dhaanona yawo. — Deuteronomium 6:6-9.
29 NOVEMBA – 5 DESEMBA
OMAMONA OMEENDJOVO DAKALUNGA | OVATOKOLIPANGELI 4-5
“Jehova okwa li a longifa ovakainhu vavali va xupife oshiwana shaye”
“Ame ina yOvaisrael, nda fikama”
Ovaisrael ova li va tila tava dekweta eshi va uda edina Sisera. Omifyuululwakalo nelongelokalunga lOvakanaan ola li hali longo oushada, hava yambe ounona omaxwikiloyambo notembeli yavo oya li hai xumifa komesho oumbwada. Onghalo oya li ya tya ngahelipi eshi Ovakanaan netangakwaita lavo la li tali pangele? Eimbilo laDebora ola holola kutya kapa li vali oo ta ka kala moilando. (Ovatokolipangeli 5:6, 7) Kala nee ngeno wa fa u wete ovanhu va hondama moixwa nomoikulundudu, va tila okulima omapya nokukala moilando ihe na eehotekuma. Va tila okweenda meendjila daaveshe tava diladila kutya otava ponokelwa, ounona vavo tava kufwa po novakainhu vavo otava kwatwa keenghono.
“Ame ina yOvaisrael, nda fikama”
Ovaisrael ova li va pangelwa kOvakaanan oule womido 20 fiyo osheshi Jehova a mona kutya oshiwana shaye osho shitangalali oshe lialuluka filufilu ngaashi Debora naBarak va popya meimbilo, va ti, “Fiyo ame, Debora, nda fikama, heeno, ame ina yOvaisrael, nda fikama.” Kape na oumbangi oo tau ulike kutya Debora, omukulukadi waLappidot okwa li omudali meityo lolela, ashike outumbulilo “ina” oo wa longifwa momushangwa oo owo pafaneko. Kakele kaasho, Jehova okwa longifa Debora a xupife oshiwana e li omudali omwaameni. Okwe mu tuma a ye komutokolipangeli, Barak omulumenhu weitavelo la pama, noku mu wilika a ka lwifwe Sisera. — Ovatokolipangeli 4:3, 6, 7; 5:7.
“Ame ina yOvaisrael, nda fikama”
Jael okwa li e na omadiladilo haa endelele. Okwa li a pa Sisera onhele a fude po. Sisera okwa lombwela Jael e mu holeke opo aha monike kwaavo tave mu kongo. Eshi a nangala, Jael okwe mu tuvika nekumbafa naashi Sisera a pula omeva, okwe mu pa omashini. Divadiva Sisera okwa li a kofa. Jael okwa kufa oilongifo ivali oyo ovakainhu va li hava longifa momaumbo nove na owino wokwiilongifa, ombosha nohamala yokudengela omatwali. Okwe likokela pomutwe waSisera, nokwa li e na okulonga oshilonga shedipao osho shi li metwokumwe netokolo laJehova. Ka li nokuli a ongaonga okulonga oshilonga osho shitilifa. Mbela Jael okwa li ta diladila kombinga yoshiwana shaKalunga nanghee omulumenhu oo e shi hepeka oule womido? Ile oufembanghenda wokukala e li omupiya waJehova? Ombibeli inai shi popya. Otu shii ashike kutya okwa dipaa Sisera meendelelo! — Ovatokolipangeli 4:18-21; 5:24-27.
Omamona opamhepo
Omanenediladilo okudja membo lOvatokolipangeli
5:20 — Eenyofi oda li da lwa ngahelipi keulu omolwaBarak? Ombimbeli itayi popi ngele shoka osha li sha kwatela mo ekwatho lyaayengeli, okukoloka kwoonyothi pombanda hoka kwa li kwa talika ko ku li endhindhiliko lyoshiponga kaanandunge yaSisera, nenge tashi vulika omahunganeko ngoka ga li ga hunganekelwa Sisera kaayanekelinyothi ngoka ga li giifundja. Ihe kapu na omalimbililo kutya Kalunga oye a li e ya katukile oonkatu yontumba.
6-12 DESEMBA
OMAMONA OMEENDJOVO DAKALUNGA | OVATOKOLIPANGELI 6-7
“Inda meenghono tuu edi doye”
w02-E 2/15 6-7
Omafinamhango Ombiibeli oo taa dulu oku ku etela ouwa
Gideon, oo a li omutokolipangeli wOvaheberi vonale, okwa li e na etaleko liwa li na sha naye mwene nokwa li he litale ko pandjele. Kali a lalakanena okukala omuwiliki wOvaisrael. Ashike eshi a li a hoololwa a ninge omuwiliki, okwa li e wete ina wana. Okwa ti: “Oludi letu olongahoelela kuManasse, naame mwene omuxupielela movambuletu.” — Ovatokolipangeli 6:12-16.
w05-E 7/15 16 ¶3
‘Eongamukonda olOmwene nolaGideon’
Ovamidian kava li tuu va tila! Opa li pa holoka omalinyengo ombadilila eshi kwa li kwa tatulwa oiyuma 300, kwa shikwa omanghuma 300 nosho yo eingido lovakwaita 300. Ovamidian ova li va haluka notava ingida, unene tuu keingido olo tali ti ‘eongamukonda olOmwene nolaGideon’! Molwaashi ova li va ngwangwana, kava li tava dulu okuyoolola pokati kookaume kavo novatondi vavo. Ovakwaita 300 ova li va fikama peenhele davo opo va tulwa, ofimbo Kalunga a li a ningifa ovatondi vavo va dipaafane. Onhanda yOvamidian oya li ya dingililwa nokava li tava dulu okuya onhapo. Onghalo ya nyika oshiponga oyo ya kala po oule wefimbo, oya li ya xulifwa po. — Ovatokolipangeli 7:19-25; 8:10-12, 28.
Omamona opamhepo
Omanenediladilo okudja membo lOvatokolipangeli
6:25-27. Gideon okwa kala a kotoka opo kaa geyithe mboka taye mu pataneke. Uuna tatu uvitha onkundana ombwanawa, otu na okukala twa kotoka kaatu uvithe nayi yalwe inaashi pumbiwa okupitila momukalo moka tatu popi.
13-19 DESEMBA
OMAMONA OMEENDJOVO DAKALUNGA | OVATOKOLIPANGELI 8-9
“Elininipiko oli li xwepo li dule ounhwa”
w00-E 8/15 25 ¶3
Oho pongolola po ngahelipi okuhaudafana?
Eshi Gideon a li molwoodi linene lokulwifa Ovamidian, okwa li a ifana epata laEfraim li mu kwafele. Ndele eshi olwoodi la pwa, Ovaefraim ova li va alukila kuGideon nova li tava tanguna neenghono kutya ka li e va ifana pehovelo lolwoodi. Ondjokonona otai ti kutya ‘ove mu twifa eemhata unene.’ Gideon okwa li e va nyamukula a ti: “Nda ninga ngeno shike shi fike pwaashi nye mwa ninga? Epupudululo laEfraim ndishi li dule ekolo leeviinyu daAbieser? Kalunga a yandja eehamba daMidian, Oreb naSeeb momake eni, ndelenee ame nda ninga shike ngeno shi yelekwe naashi mwe shi ninga?” (Ovatokolipangeli 8:1-3) Eshi Gideon a li a longifa eendjovo odo da hoololekeka nokwa popya a ngungumana, okwa li a henuka olwoodi la nyika oshiponga olo la li tali dulu okuholoka po. Otashi dulika epata laEfraim la li li hole efimano nola li li na ounhwa. Ashike, osho kasha li sha imba Gideon a ninge eenghendabala a kaleke po ombili. Mbela nafye itatu dulu okuninga sha faafana?
Omolwashike elininipiko la fimana?
Gideon okwe tu tulila po oshihopaenenwa shiwa shelininipiko. Eshi omweengeli waJehova e mu lihololela, Gideon okwa li a ulika kutya omulininipiki eshi a popya kombinga yepata laye. (Ovatok. 6:15) Konima eshi a tambula ko oshinakuwanifwa osho a pewa kuJehova, okwa li a shilipaleka kutya okuudite ko oiteelelwa yaye nokwa li a konga ewiliko kuJehova. (Ovatok. 6:36-40) Gideon okwa li omuladi nokwa nyatipala. Natango, okwa li ha katuka pandunge. (Ovatok. 6:11, 27) Ka li ha wanifa po oinakuwanifwa yaye nelalakano lokulitumbalekifa. Ponhele yaasho, okwa li a tambula ko nehalo liwa oshinakuwanifwa shaye shonale. — Ovatok. 8:22, 23, 29.
Kala nokweenda meendjila daJehova
Opo tu kale ookaume kaKalunga, otu na okukala ‘ovalininipiki.’ (1 Pet. 3:8; Eps. 138:6) Ovatokolipangeli etukulwa eti-9 otava ulike kutya osha fimana okukala omulininipiki. Omonamati waGideon, Jotam, okwa ti: “Efiku limwe omiti da ya di ke livaekele ohamba.” Omiti odo oda li da kwatela mo olumono, omukwiyu nosho yo omuviinyu. Omiti odo oda li tadi faneke oohandimwe ovo va li va wana, ndele kava li va lalakanena okupangela Ovaisrael vakwao. Ndele eno olo la li hali longifwa li li oikuni ola li tali faneke ouhamba womulinenepeki Abimelek, omudipai oo a li a hala okupangela vakwao. Nonande okwa li a “pangela Israel omido nhatu,” okwa ka fya efyo lomhiva. (Ovatok. 9:8-15, 22, 50-54) Inashi fimana tuu okukala ‘omulininipiki’!
Omamona opamhepo
it-1-E 753 ¶1
Oshikutu shokomapepe, I
Nonande Gideon okwa li e na omalinyengotomheno mawa eshi a li a dana efindano olo Jehova a li a pa Israel noku mu fimanekifa, oshikutu shokomapepe osha li “sha ninga omwiyo kuGideon neumbo laye,” molwaashi Ovaisrael ova li va ya moluhaelo lopamhepo moku shi ilikana. (Ovatok 8:27) Ashike Ombiibeli inai popya kutya Gideon okwa li a ilikana oshikutu osho; mepingafano naasho, okwa tumbulwa komuyapostoli Paulus kutya oku li umwe ‘womongudu inene’ yeendombwedi daJehova odo da tetekela efimbo lOukriste. — Heb 11:32; 12:1.
20-26 DESEMBA
OMAMONA OMEENDJOVO DAKALUNGA | OVATOKOLIPANGELI 10-12
“Jefta, okwa li e na oupamhepo muwa”
Kalunga oku hole ovo ve li ovadiinini
Oshihopaenenwa shaJosef otashi dulika osho sha kwafela Jefta. Oku na okukala e lihonga kombinga yaJosef nghee a li a filonghenda ovamwaxe nonande ova li ve mu tonde. (Genesis 37:4; 45:4, 5) Oshihopaenenwa osho otashi dulika sha kwafela Jefta a katuke monghedi oyo tai hafifa Jehova. Oshoshili kutya osho ovamwaxe vaJefta va li va ninga osha li she mu handukifa. Ashike osho sha li sha fimanenena kuJefta okukondjela edina laJehova nosho yo oshiwana shaye ponhele yomaliudo aye mwene. (Ovatokolipangeli 11:9) Okwa li a tokola toko okukala omudiinini kuJehova. Oikala ya tya ngaho okwa li ye mu etela omanangeko noupuna ye mwene nosho yo Ovaisrael. — Ovaheberi 11:32, 33
it-2-E 27 ¶2
Jefta
Jefta okwa li omuwiliki, ha katuka eenghatu nopehe na okwoongaonga. Okwa li a tumina ohamba Ammoni etumwalaka, nokwa popya kutya Ammoni okwa li a hala okukufa ko edu lOvaisrael. Ohamba oya li ya nyamukula kutya edu olo lOvaisrael ola li layo. (Ovatok 11:12, 13) Pomhito oyo Jefta okwa li a ulika kutya ke fi ashike omukwaita wongaho ehe na elandulafano, ndele okwa li e shii ondjokonona, unene tuu yanghee Kalunga ha ungaunga noshiwana shaye. Ka li a twa kumwe nOvaammoni, nokwa li a ulika kutya (1) Ovaisrael kava li va ponokela Ovaammoni, Ovamoab, ile Ovaedom (Ovatok 11:14-18; Deut 2:9, 19, 37; 2Omaf 20:10, 11); (2) Ammoni ka li e na oshitukulwa shedu osho pefimbo opo Ovaisrael va li va findwa, molwaashi osha li momake Ovakaanan Ovaamori, na Kalunga okwa li a yandja ohamba yavo nedu lavo momake Ovaisrael; (3) Ammoni ka li a kondjela edu lOvaisrael oule womido 300 da ka pita; onghee hano, mbela omolwashike va li ve na etomheno lokuninga ngaho paife? — Ovatok 11:19-27.
it-2-E 27 ¶3
Jefta
Jefta okwa li a yandja elitulemo koshinima osho sha fimanenena, eshi a li a ulika kutya oshinima osho osha kwatela mo elongelokalunga. Okwa li a popya kutya Jehova Kalunga okwa pa Ovaisrael edu, nomolwaasho itava ka yandja nande oshitukulwa shinini shalo kovalongeli voikalunga. Okwa li a ifana Kemosh oshikalunga shaAmmoni. Vamwe ova li tava diladila kutya osho osha puka. Ndele nonande Ammoni okwa li e na oshikalunga shedina Molek, nonokutya Kemosh osha li oshikalunga shaMoab, oiwana oyo ya pambafana oya li hai longele oikalunga ihapu. Salomo okwa li nokuli a eta papuko elongelokalunga laKemosh muIsrael omolwovakulukadi vaye ovanailongo. (Ovatok 11:24; 1Eeh 11:1, 7, 8, 33; 2Eeh 23:13) Kakele kaasho, ovahongwanhu vamwe ova ti kutya edina “Kemosh” otashi dulika tali ti “Omufindi, Omufindani.” (Tala Gesenius’s Hebrew and Chaldee Lexicon, ya tolokwa kuS. Tregelles, 1901, ep. 401.) Jefta okwa tumbula oshikalunga osho, molwaashi otashi dulika Ovaamoni va li have shi fimaneke ‘omolwokufinda,’ ile ‘okukwatako’ oiwana imwe nokukufa ko edu layo.
Omamona opamhepo
it-2-E 26
Jefta
Jefta a dalwa kondje yohombo. Nonande ina yaJefta okwa li ‘ombwada,’ osho inashi hala okutya Jefta okwa dalwa kombwada, ile kondje yohombo. Ina okwa li ombwada fimbo ina hombolwa e li omukulukadi omutivali waGilead, ngaashi ashike Rahab a li ombwada pomhito imwe, ndele lwanima ta ka hombolwa kuSalmon. (Ovatok 11:1; Jos 2:1; Mat 1:5) Oushili oo kutya Jefta kali a dalwa kondje yohombo otau kolekwa kwaasho ovamwaxe ovo va dalwa komukulukadi wotete waGilead va li va ninga, eshi va li ve mu taataa opo aha mone efyuululo. (Ovatok 11:2) Natango, lwanima Jefta okwa ka ninga omuwiliki wovanhu a tambulwa ko muGilead (ovo vahapu vomuvo tashi dulika va li va kwatela mo ovamwaxe). (Ovatok 11:11) Kakele kaasho, okwa li a yandja omayambo kuKalunga ketwali. (Ovatok 11:30, 31) Oinima aishe oyo kaya li tai shiva ngeno Jefta okwa li a dalwa kondje yohombo, molwaashi Omhango oya popya kondadalunde ya ti: “Omulatu nande umwe ita dulu okukala meongalo lOmwene; nande umwe womoludalo [laye] ita dulu okuuya moshiongalele shOmwene.” — Deut 23:2.
27 DESEMBA – 2 JANUALI
OMAMONA OMEENDJOVO DAKALUNGA | OVATOKOLIPANGELI 13-14
“Oshike ovadali tava dulu okulihonga kuManoah nomukulukadi waye?”
Ovadali tekuleni ovana veni okudja kouhanana
Ombibeli oya popya shi na sha nomulumenhu umwe womepata laDan wedina Manoah, oo a li ha di modoolopa yedina Sorea muIsrael shonale. Omweengeli waJehova okwa li a lombwela omukulukadi waManoah oo a li ongadji kutya ota ka dala okamati. (Ovatok. 13:2, 3) Ndele nonande Manoah nomukulukadi waye ova li va hafifwa konghundana oyo, ova li yo tave lipula shi na sha nanghee tava ka tekula okaana kavo. Nomolwaasho Manoah okwa li a ilikana ta ti: “Akutu Omwene, omulumenhu waKalunga, ou we mu tuma, ne uye vali lumwe kufye, opo ye e tu longe nhumbi tu nokuninga nokaana okamati aka taka ka dalwa.” (Ovatok. 13:8) Manoah nomukulukadi waye ova li va honga okaana kavo Simson omhango yaKalunga notashi ulike kutya oka li ka tambula ko osho ka hongwa. Ombibeli oya ti: ‘Omhepo yOmwene ya hovela okuendifa’ Simson. Oshidjemo, Simson okwa ka longa oilonga yeenghono ihapu e li umwe womovatokolipangeli vaIsrael. — Ovatok. 13:25; 14:5, 6; 15:14, 15.
w05-E 3/15 25-26
Simson ta findana keenghono daJehova
Eshi Simson a enda ta kulu, ‘Omwene okwe mu nangeka noupuna.’ (Ovatokolipangeli 13:24) Efiku limwe Simson okwa ya kuxe naina ta ti: “Ame nda mona omukainhu umwe womovana oukadona Ovafilisti muTimna, mu pei nge paife a ninge omwalikadi wange.” (Ovatokolipangeli 14:2) Ovadali vaye ove na okukala va li va kumwa. Ponhele yokumangulula Ovaisrael momake ovatondi vavo, omona wavo okwa li a hala okuhombola nava. Okuhombola omukulukadi a dja movalongeli voikalunga osha li omhinge nOmhango yaKalunga. (Exodus 34:11-16) Ovadali vaye ova li ve li omhinge nasho, moku mu pula tava ti: “Movana oukadona ovakweni nomokati koshiwana ashishe eshi shetu kamu nomukainhu hamba, eshi wa hala okuya kOvafilisti, ava inava pita etanda, oko u ka kufe omukainhu?” Ashike nande ongaho, Simson okwa li a kondjifa ta ti: “Pe nge winya, osheshi ye a wapalela nge.” — Ovatokolipangeli 14:3.
Omamona opamhepo
w05-E 3/15 26 ¶1
Simson ta findana keenghono daJehova
Omonghedi yokondadalunde ilipi omukainhu oo Omufilisti a li a “wapalela” Simson? O-McClintock and Strong’s Cyclopedia oya ti kutya, hamolwaashi ngeno omukainhu oo a li “muwa, e na ondjelo iwa nomuhokwifa,” “ndele okwa li ta wapalele omolwokuwanifa po elalakano lonhumba.” Okuwanifa po elalakano lashike? Ovatokolipangeli 14:4 ova yelifa kutya Simson “okwa konga omhito okutwila Ovafilisti ondubo.” Simson okwa li a hokwa omukainhu oo omolwelalakano olo. Eshi Simson a kula, ‘omhepo yOmwene oya li ya hovela oku mu endifa,’ ile oku mu linyengifa a katuke eenghatu. (Ovatokolipangeli 13:25) Onghee hano, omhepo yaJehova oyo ya li ye linyengifa Simson a pule a pewe omukainhu oo nosho yo a ninge omutokolipangeli waIsrael ashishe.