Eedjo dokafo Onghalamwenyo yopaKriste noilonga yokuudifa
© 2023 Watch Tower Bible and Tract Society of Pennsylvania
1-7 MEI
OMAMONA OMEENDJOVO DAKALUNGA | 2 OMAFIMBO 17-19
“Kala wa tala ko vamwe ngaashi Jehova”
Mbela oto ka yandja elitulemo nomutima woye aushe koinima oyo ya shangwa?
7 Ongahelipi kombinga yomonamati waAsa, Josafat? Josafat okwa li e na omaukwatya mahapu mawa. Molwaashi okwa li e lineekela muJehova, okwa longa osho sha yuka. Ashike nande ongaho, okwa li yo a ninga omatokolo ehe li pandunge. Pashihopaenenwa, okwa li a ninga eudafanotwokumwe a ninge oshitenya shOhamba ikolokoshi Ahab yomauhamba okolundume. Nonande Josafat okwa li a londwelwa komuprofeti Mikaia, okwa li a waimina Ahab va ka lwife Ovasiria. Josafat hanga a dipaelwa molwoodi olo. Lwanima okwa ka shuna kuJerusalem. (2 Omaf. 18:1-32) Omuprofeti Jehu okwa li e mu pula a ti: “Ove wa li tuu u nokukwafa omuhenakonasha naKalunga, ndele wa li tuu u nokuhola ou ta tondwa kuKalunga?” — Lesha 2 Omafimbo 19:1-3.
w15 8/15 6-¶8-9
Dilonga kohole yaJehova i na oudiinini
8 Jehova okwa hala tu shiive kutya oku tu hole, noha yandje elitulemo komaukwatya etu mawa ponhele yokuyandja ashike elitulemo kokuhawanenena kwetu. (2 Omafimbo 16:9) Natu ka taleni nghee Jehova a li a tala komaukwatya mawa ohamba Josafat yaJuda. Josafat okwa li a ninga etokolo lihe li pandunge eshi a li a ya pamwe nohamba Ahab yaIsrael noku ka lwifa Ovaasiria kuRamot shomuGilead. Nonande ovaprofeti ovanaipupulu 400 ova li va lombwela ohamba ikolokoshi Ahab kutya otai ka findana moita, omuprofeti washili waJehova Mika okwa li a lombwela Ahab naJosafat kutya ngeenge ova ka lwa otava ka findwa. Naasho osho naanaa sha li sha ningwa. Ahab okwa fila moita oyo, na Josafat okonyala a fye. Konima yoita, Jehova okwa li a longifa Jehu a pe Josafat omayele omolwepuko laye. Kakele kaasho, Jehu okwa li e mu lombwela a ti: “Muove mwa monika oinima iwa.” — 2 Omafimbo 18:4, 5, 18-22, 33, 34; 19:1-3.
9 Omido donhumba fimbo osho sha li inashi ningwa, Josafat okwa li a lombwela omalenga, Ovalevi nosho yo ovapristeri va ye koilando aishe yaJuda va ka honge ovanhu Omhango yaJehova. Ova li va pondola lela, naasho osha ningifa nokuli novanhu vomoiwana imwe va shiive kombinga yaJehova. (2 Omafimbo 17:3-10) Onghee hano, nokuli nonande lwanima Josafat okwa ka ninga etokolo lihe li pandunge, Jehova ka li a dimbwa oilonga iwa oyo a li a longa metetekelo mokukalamwenyo kwaye. Oshihopaenenwa osho otashi tu tu omukumo neenghono molwaashi ohatu ningi omapuko omafimbo amwe. Ndele ngeenge otwa ningi ngaashi hatu dulu tu longele Jehova, ota ka twikila okukala e tu hole noita ka dimbwa oilonga iwa oyo twa longa.
Omamona opamhepo
Longela Jehova nomutima aushe!
10 Omonamati waAsa, Josafat, “okwa enda nondjila yaxe.” (2 Omaf. 20:31, 32) Mbela okwa li e shi ninga ngahelipi? Josafat okwa li a ladipika oshiwana shaye shi konge Jehova, ngaashi xe, eshi a li a unganeka oshikonga shokuhonga ovanhu “embo lOmhango yaKalunga.” (2 Omaf. 17:7-10) Okwa li yo a ya koitukulwa yomauhamba aIsrael lokolundume nokeemhunda daEfraim opo e ‘va alulile kOmwene.’ (2 Omaf. 19:4) Josafat okwa li ohamba oyo ya “konga Omwene nomutima aushe.” — 2 Omaf. 22:9.
11 Atusheni otu na okukufa ombinga moilonga inene oyo Jehova e tu pa tu longe kunena. Mbela owe li tulila po ngoo elalakano omwedi keshe u kale ho hongo ovanhu Eendjovo daKalunga noku va kwafela va longele Kalunga? Ngeenge otwa tamununa mo oukalele wetu, Jehova ote ke tu nangeka noupuna tu hovele omakonakonombiibeli. Mbela oho ilikana ngoo kombinga yelalakano olo? Mbela oto ka dula ngoo okuyamba po efimbo loye lopaumwene u longe oilonga yaJehova? Ngaashi ashike Josafat a li a ya koitukulwa yaEfraim opo a kwafele ovanhu va alukile kelongelokalunga lashili, nafye ohatu dulu yo okukwafela ovo inave lipyakidila vali. Natango, ovakulunhuongalo ohava unganeke va talele po nokukwafela ovo va kondwa moshitukulwa omo mu na eongalo notashi dulika va efa po omanyono avo onale.
8-14 MEI
OMAMONA OMEENDJOVO DAKALUNGA | 2 OMAFIMBO 20-21
“Itaveleni Omwene Kalunga keni”
Natu kaleni moukumwe eshi twa taalela exulilo lounyuni ou wa kulupa
8 Pefimbo lohamba Josafat, oshiwana shaKalunga osha li sha taalela omutondi omunaenghono, “eengudu dihapu” dovanhu ovo va li ve va dingilila. (2 Omaf. 20:1, 2) Ashike ovapiya vaKalunga kava li va kendabala okufinda ovatondi vavo kuvo vene. Ponhele yaasho, ova li va konga ekwafo kuJehova. (Lesha 2 Omafimbo 20:3, 4.) Ovaisrael pauhandimwe kava li va ninga osho tava diladila ile osho ve wete ekandulepo lomukundu. Ehokololo lOmbibeli ola ti: ‘Ovajuda aveshe va kala ofika koshipala shOmwene pamwe nounona vavo novalikadi vavo novana vavo ovamati.’ (2 Omaf. 20:13) Ovanyasha novakulunhu ova li va tokola okukala neitavelo nokushikula omalombwelo aJehova, naJehova okwa li e va amena kovatondi vavo. (2 Omaf. 20:20-27) Mbela osho kashi fi oshihopaenenwa shiwa ngeenge twa taalela omashongo tu li oshiwana shaKalunga?
Ovo opo mwa hombola pitifeni komesho okulongela Jehova
7 Jehova okwa li a popya naJosafat okupitila mOmulevi wedina Jahasiel. Jehova okwa ti: “Fikameni, kaleni mu li ofika ndele taleni nhumbi Omwene te mu xupifa.” (2 Omaf. 20:13-17) Oshoshili kutya oyo hayo onghedi va li hava longifa moita. Ashike omalombwelo oo okwa li a dja kuJehova, ndele inaa dja komunhu. Josafat okwa li e lineekela muKalunga nokwa li a ninga ngaashi a lombwelwa. Eshi ye noshiwana va ka shakeneka omutondi, ka li a tula komesho ovakwaita, ovo ve na owino muhapu. Ponhele yaasho, okwa li ashike a tula ko ovaimbi ovo nokuli va li inava homata sha. Jehova okwa li a wanifa po eudaneko olo a udanekela Josafat nokwa li a finda etangakwaita lovatondi. — 2 Omaf. 20:18-23.
Omamona opamhepo
it-1-E 1271 ¶1-2
Jehoram
Pomhito imwe, Jehoram ka li a shikula eendjila daxe Josafat, molwaashi okwa li a nwefwa mo komukulukadi waye Atalia. (2Eeh 8:18) Jehoram ka li ashike a dipaa ovamwaina ovalumenhu vahamano nosho yo ovakulunhu vaJuda, ndele okwa li yo a ningifa ovanhu va longele oikalunga ponhele yaJehova. (2Omaf 21:1-6, 11-14) Okupangela kwaye akushe okwa li kuyadi omaupyakadi. Potete, Edom okwa li a tukula ounashibofa, opo nee Libna okwe liteeka Juda. (2Eeh 8:20-22) Omuprofeti Elia okwa li a londwela Jehoram monhumwafo a ti: “Tala, Omwene ta ka tuma oshiponga shinene mokati kovanhu voye nokovana voye ovamati nokovalikadi voye naaishe u i kwete.” Kakele kasho ohamba Jehoram “naave mwene to ka vela oudu mudjuu, oudu wendjadja, fiyo pa pita omudo umwe ile omido mbali, omandjadja oye taa tika mo koudu ou.”— 2Omaf 21:12-15.
Aishe oya li ya ningwa ngaashi sha popiwa. Jehova okwa li a pitika Ovaarabi nOvafilisti va kwate ko oshilando nokutula ovakulukadi vaJehoram novanamati vaye moukwatwa. Kalunga okwa li a pitika ashike omonamati waJehoram onghelo, Joahas, (oo ha ifanwa yo Ahasia), opo a ye onhapo. Ndele osho okwa li ashike e shi ninga omolwehangano louhamba olo a ninga naDavid. “Ndele konima yoinima ei aishe, Omwene okwe mu handukila noudu wendjadja, noudu inau velulwa kusha.” Nokonima yomido mbali ‘omandjadja aye okwa tokauka mo’ nokwa fya. Onghalamwenyo yomulumenhu oo omukolokoshi opo ya xulila opo ‘nokape na ou e mu pongola.’ Okwa li a pakwa moshilando shaDavid, “ndelenee hameembila deehamba.” Ahasia omonamati waye okwa ninga ohamba. — 2Omaf 21:7, 16-20; 22:1; 1Omaf 3:10, 11.
15-21 MEI
OMAMONA OMEENDJOVO DAKALUNGA | 2 OMAFIMBO 22-24
“Jehova oha nangeke noupuna ovo hava katuka nouladi”
w09 4/1-E 24 ¶1-2
Joas okwa fiya po Jehova omolweendafano lii
OSHA li efimbo lidjuu muJerusalem, oshilando omo mwa li otembeli yaKalunga. Ohamba Ahasia oya hangwa ashike opo ya dipawa. Oshidjuu okwiitavela osho sha ningwa kuAtalia ina yaAhasia. Okwa dipaifa ovatekulu vaye, ovanamati vaAhasia. Mbela ou shii kutya omolwashike? Opo a dule okupangela ponhele yavo.
Joas, umwe womovatekulu vaAtalia, okwa li a xupifwa, nainakulu ka li nokuli e shi shiiva. Mbela owa hala okuuda kutya osha enda ngahelipi? Joseba okwa kufa Joas, ndele te mu holeke motembeli yaKalunga. Okwa li a dula okuninga ngaho molwaashi omushamane waye, Jehoiada, okwa li omupristeri omukulunhu. Ova li va shilipaleka kutya Joas okwa li a amenwa.
w09 4/1-E 24 ¶3-5
Joas okwa fiya po Jehova omolweendafano lii
Joas okwa kala a holekwa motembeli oule womido hamano. Ofimbo a li omo, okwa hongwa oinima aishe kombinga yaJehova Kalunga neemhango daye. Opo nee eshi Joas a wanifa eedula heyali, Jehoiada okwa katuka onghatu, opo a ninge Joas ohamba. Mbela owa hala okuuda nghee Jehoiada e shi enda, naasho sha ningilwa inakulu yaJoas, ohambakainhu i kolokoshi Atalia?
Jehoiada okwa ufana meholeko ovanangeli vohamba, ovo va li muJerusalem pefimbo opo. Okwe va lombwela nghee ye nosho yo omukulukadi waye va xupifa omonamati wohamba Ahasia. Opo nee Jehoiada okwa ulikila ovanangeli ovo Joas, nova mona kutya oye a wana okukala ohamba. Opa li pa ningwa omhangela.
Jehoiada okwa eta Joas pondje noku mu nangeka po e li ohamba. Opo nee “ovanhu ova pandula nomake avo ndele tava ti: ‘Ohamba nai kale nomwenyo!’” Ovanangeli ova li va dingilila Joas, opo ve mu amene. Eshi Atalia a uda ehafo linene lovanhu, okwa endelela e ke va kangheke. Ashike Jehoiada okwa lombwela ovanangeli va dipae Atalia. — 2Eeh 11:1-16.
it-1-E 379 ¶5
Okupakwa, eenhele dokupakwa
Jehoiada, omulumenhu oo a li omuyuki nokwa li omupristeli omukulunhu, okwa li a pewa efimano eshi a pakwa “peehamba moshilando shaDavid,” oye ashike a li omunhu a tumbulwa ina dja mepata leehamba, a pewa efimano li fike opo. — 2Omaf 24:15, 16.
Omamona opamhepo
it-2-E 1223 ¶13
Sakaria
12. Omonamati womupristeli omukulunhu Jehoiada. Konima yefyo laJehoiada, ohamba Joas oya fiya po elongelokalunga lashili noya kala hai pwilikine komayele a puka, ponhele yokupwilikina kovaprofeti vaJehova. Sakaria, omumwaina wopopepi waJoas (2Omaf 22:11), okwa kala nokulondwela ovanhu kombinga yoshinima osho, ponhele yokulialuluka ove mu dipaa nomamanya moshiyale shotembeli. Eshi Sakaria a li pokufya okwa ti: “Omwene ne shi tale ndele ne shi handukile.” Eindilo olo lopaxunganeko ola ka wanifwa eshi Ovasiria va ponokela Juda, naashi ovapiya vavali va dipaa Joas “omolwohonde yomona womupristeli Jehoiada.” OSeptuagint yOshigreka noVulgate yOshilatin oya ti kutya Joas okwa dipawa, opo a futile po ohonde “yomonamati” waJehoiada. Ashike omashangelo o-Masoretic noSyriac Peshitta okwa ti kutya “ovanamati,” tashi dulika a longifa omuvalu wopauhapu u kalele po ongushu yomonamati waJehoiada, Sakaria omuprofeti omupristeli. — 2Omaf 24:17-22, 25.
22-28 MEI
OMAMONA OMEENDJOVO DAKALUNGA | 2 OMAFIMBO 25-27
“Omwene ta dulu oku ku pa shihapu shi dule oyo”
it-1-E 1266 ¶6
Joas
Joas okwa yandja yo ovakwaita vaye omayovi efele kohamba yaJuda va ka lwife Ovaedom. Ashike kelondwelo ‘lomulumenhu waKalunga kashili’ ova li va lekelwa va shune, ndele nonande ova li va futwa komesho yefimbo oitalenti yoisiliveli efele (eedola daNamibia 11 892 300), ova li va handuka eshi va shunifwa komaumbo, tashi dulika molwaashi ve udite kutya itava ka mona ko sha koixuulwa. Konima eshi va shuna ova kwata ko eedolopa odo di li koumbuwanhu wouhamba waSamaria (tashi dulika opo va li va onga onhanda yavo) fiyo okuBet-Horon. — 2Omaf 25:6-10, 13.
Ongahelipi hatu dulu ‘okumakela’ ouwa waJehova?
16 Ninga omaliyambo omolwaJehova. Inatu pumbwa okweefa po oinima aishe oyo hatu hafele, opo tu hafife Jehova. (Omuud. 5:19, 20) Ngeenge ohatu ongaonga okulonga shihapu moilonga yaJehova, molwaashi inatu hala okweefa po oinima oyo tu hole, ohatu ka ninga epuko la fa lomulumenhu womefaneko laJesus. Omulumenhu oo okwa li e na onghalamwenyo ya denga mbada, ndele te lidimbike Kalunga. (Lesha Lukas 12:16-21.) Omumwatate wedina Christian, wokoFrance, okwa ti: “Kanda li handi pe Jehova nosho yo oukwaneumbo wange efimbo neenghono da wana.” Ye nomukulukadi waye ova li va tokola okukokola ondjila. Ndele opo va hange elalakano olo, ova li ve na okweefa po oilonga yavo. Ova li va tota po okangeshefa kanini kokuwapaleka, opo va dule okuliyambidida nove lihonga okukala va wanenwa ku shinini. Mbela eliyambo olo va ninga ola li ngoo tali ti sha? Christian okwa ti: “Paife ohatu hafele oukalele shi dulife nale nohatu kala twa hafa, eshi ovakonakonimbiibeli nomalishuneko etu tave lihongo kombinga yaJehova.”
Omamona opamhepo
w07-E 12/15 10 ¶1-2
Ou na ngoo omuhongi wopamhepo?
USSIA okwa ninga ohamba youhamba wokuoumbuwanhu waJuda, eshi a li e na omido16. Okwa pangela omido di dulife 50 okudja pexulilo lefelemudo etimuwoi fiyo opehovelo lefelemudo etihetatu K.O.P. Okudja kounona waye, Ussia okwa kala ha ‘ningi osho sha yuka momesho Omwene.’ Oshike sha li she mu nwefa mo a landule ondjila oyo? Ombiibeli oya ti: ‘Ussia okwa konga Kalunga ofimbo Sakaria a li e nomwenyo, ou a li e nounongo wokushiiva omamoniko aKalunga. Ndele pomafiku oo ye eshi a konga Omwene, Kalunga e mu pa elao.’ — 2 Omafimbo 26:1, 4, 5.
Kaku shiivike naanaa shihapu kombinga yomuyandjimayele wohamba, Sakaria, kakele ashike kouyelele oo u li mOmbiibeli. Ashike Sakaria “ou a li e nounongo wokushiiva omamoniko aKalunga,” okwa nwefa mo omupangeli omunyasha a longe osho sha yuka. Embo The Expositor’s Bible ola ti kutya Sakaria okwa li “omulumenhu e shiivikile okulihonga oinima iyapuki, e na oupamhepo muwa nokwa li ha dulu okulombwela vamwe eshiivo olo e na.” Omuhongwanhu umwe wOmbiibeli okwa fika pexulifodiladilo li na sha naSakaria a ti: “okwa li e shiivikile nawa omaxunganeko . . . a li e na eendunge, e na omutima muwa, omulumenhu muwa; notashi dulika a li a nwefa mo naUssia.”
29 MEI–4 JUNI
OMAMONA OMEENDJOVO DAKALUNGA | 2 OMAFIMBO 28-29
“Oto dulu okulongela Jehova, nonande ovadali voye kave li oshihopaenenwa shiwa”
Natu hopaeneneni ookaume kaJehova vopofingo
8 Hiskia okwa putuka monghedi ya yooloka ko kuyaRut. Okwa dja moshiwana shOvaisrael osho sha li sha yapulilwa Jehova. Ashike havaIsrael aveshe va li ovadiinini. Xe yaHiskia wedina Ahas okwa li omukolokoshi. Ka li a fimaneka otembeli yaKalunga, nokwa li a nwefa mo ovanhu va longele oikalunga. Ahas okwa li nokuli a xwika po nomwenyo ovamwainamati vamwe vaHiskia e va yambela oikalunga. Osha yela kutya Hiskia okwa putuka monghalo inyanyalifa. — 2 Eehamba 16:2-4, 10-17; 2 Omafimbo 28:1-3.
Natu hopaeneneni ookaume kaJehova vopofingo
9 Oshihopaenenwa shii shaAhas osha li tashi dulu okuningifa Hiskia a kale a handukila Jehova. Kunena, vamwe ovo tave lididimikile eenghalo dii di dulike nokuli kwaadi daHiskia ove udite kutya ove na omatomheno a femba ‘okuhandukila’ Jehova ile ehangano laye. (Omayeletumbulo 19:3) Vamwe ove udite kutya oinima ii oyo ya ningwa momaukwaneumbo avo eshi tava putuka otai dulu oku va ningifa va kale ve na onghalamwenyo ii ile va ninge omapuko oo ovadali vavo va ninga. (Hesekiel 18:2, 3) Ndele mbela osho oshoshili?
10 Onghalamwenyo yaHiskia oya ulika kutya hasho. Kape na oo e na omatomheno okuhandukila Jehova molwaashi iha etele ovanhu owii. (Job 34:10) Oshoshili kutya onghedi omo ovadali tava hongo ovana vavo otai dulu oku va ningifa va longe osho shiwa ile osho shii. (Omayeletumbulo 22:6; Ovakolossi 3:21) Ashike osho inashi hala okutya osho sha kala hashi ningwa moukwaneumbo wetu eshi hatu putuka osho tashi ka ufa kutya ohatu ka kala ovanhu va tya ngahelipi. Omolwashike hatu tile ngaho? Omolwaashi Jehova okwe tu pa oshali yokuninga omatokolo, sha hala okutya ohatu dulu okuhoolola okuninga osho shii ile osho shiwa. (Deuteronomion 30:19) Hiskia okwa li a longifa ngahelipi oshali oyo?
11 Nonande xe okwa li ohamba ikolokoshi neenghono, Hiskia okwa ka kala ohamba imwe yomeehamba odo diwa. (Lesha 2 Eehamba 18:5, 6.) Okwa li a hoolola aha landule oshihopaenenwa shii shaxe. Ponhele yaasho, okwa li a hoolola a kale ha pwilikine nawa kovaprofeti vaJehova, ngaashi Jesaja, Mika naHosea. Okwa li ha tambula ko omayele nomapukululo avo. Osho osha li she mu kwafela a pongolole po omaupyakadi oo a li a etifwa kuxe. Okwa li a koshola otembeli, a ilikana Kalunga a dimine po oshiwana shaye nokwa hanauna po oihongwafano moshilongo ashishe. (2 Omafimbo 29:1-11, 18-24; 31:1) Lwanima eshi ohamba yaAssiria yedina Sanherib ya li ya ninga omatilifo okuponokela Jerusalem, Hiskia okwa li a ulika ouladi neitavelo. Okwa li e lineekela meameno laJehova nokwa li a pameka oshiwana shaye. (2 Omafimbo 32:7, 8) Ope na efimbo limwe opo Hiskia a li a kwatwa kounhwa, ndele eshi Jehova e mu pukulula, okwa li e lininipika. (2 Omafimbo 32:24-26) Osha yela kutya Hiskia oku li oshihopaenenwa sha denga mbada osho hatu dulu okuhopaenena. Ka li a efa oinima ii oyo ya ningwa meumbo lavo eshi ta putuka i nyone po okukalamwenyo kwaye. Ponhele yaasho, okwa li a ulika kutya oku li kaume kaJehova.
Omamona opamhepo
w12 15/2 24-25
Natan okwa li ha yambidida nouladi elongelokalunga la koshoka
Molwaashi Natan okwa li omupiya waJehova omudiinini, okwa li a yambidida nexwamo ondungediladilo yaDavid yokutunga otembeli yotetetete yelongelokalunga la koshoka. Ndele osha yela kutya osho Natan a li a popya pomhito oyo ka li eshi lombwelwa kuJehova, okwa popya ashike omaliudo aye mwene. Moufiku oo tuu oo, Kalunga okwa li a tuma omuprofeti Natan a ka lombwele David kutya haye ta ka tungila Jehova otembeli ngaashi a li e mu lombwela. Ndele otai ka tungwa kuumwe womovanamati vaye. Ashike Natan okwa li a lombwela David kutya Kalunga ota ka ninga ehangano naye olo kutya olukalwapangelo laye otali “ka kala la pama fiyo alushe.” — 2 Sam. 7:4-16.
Eetepo laNatan li na sha nokutungwa kwotembeli kala li metwokumwe nehalo laKalunga. Ndele nande ongaho, omuprofeti oo omulininipiki okwa li a tambula ko ewiliko laJehova nokwa katuka metwokumwe nalo nopehe na okungongota. Natan ine tu tulila po tuu oshihopaenenwa shiwa shokutambula ko ewiliko laKalunga ngeenge te tu pukulula monghedi yonhumba ile yongadi! Eshi Kalunga a kala ta twikile okulongifa Natan e li omuprofeti waye otashi yandje oumbangi kutya okwa kala natango e mu hokwa. Oumbangi otau ulike kutya Jehova okwa li a nwefa mo Natan nosho yo omumonikokule Gad, va wilike David a unganeke ovaimbi 4 000 va kale hava longo motembeli. — 1 Omaf. 23:1-5; 2 Omaf. 29:25.
5-11 JUNI
OMAMONA OMEENDJOVO DAKALUNGA | 2 OMAFIMBO 30-31
“Ohashi tu etele ouwa, ngeenge hatu ongala pamwe”
it-1-E 1103 ¶2
Hiskia
Ouladi waye u na sha nelongelokalunga lashili. Hiskia okwa li a ulika ouladi welongelokalunga laJehova diva konima eshi a nangekwa po, eshi a li e na omido 25. Onghatu yotete oyo a li a katuka okwa li a tungulula otembeli. Opo nee, okwa li a ifana ovapristeli nOvalevi noku va ongela, ndele te va lombwele ta ti: “Ndi na ediladilo momutima wange: okuninga ehangano nOmwene, Kalunga kaIsrael.” Olo ola li ehangano loudiinini, nonande ehangano lomhango ola li natango moilonga nola fiwa po, ola li la yapulwa muJuda. Molwaashi okwa li e na eenghono dihapu okwa li a twikila nokuunganeka Ovalevi moilonga yavo, okwa li a ningulula omalongekido e na sha noishikomwa yomusika nokwiimba omaimbilo ehambelelo. Osha li opefimbo laNisan, omwedi omo oshivilo shOpaasa hashi danwa, ashike otembeli, ovapristeri nOvalevi kava li va koshoka. Mefiku eti-16 laNisan, otembeli oya li ya wapekululwa, noinima aishe oya li ya tulwa mo. Opo nee, opa li pa ningwa omalongekido e likalekelwa e na sha nokukoshola Ovaisrael aveshe. Potete, omalenga okwa eta omayambo, omatimbayambo ouhamba, otembeli novanhu nosho yo omaxwikiloyambo mahapu a yandjwa kovanhu. — 2Omaf 29:1-36.
it-1-E 1103 ¶3
Hiskia
Molwaashi ovanhu ova li inava koshoka kava li va dula okudana Opaasa pefimbo la faafana. Hiskia okwa li a longifa omhango oyo ya pitika ovanhu ovo inava koshoka va dane Opaasa momwedi wa shikula ko. Ka li ashike a ifana Ovajuda, ndele okwa li yo a ifana Ovaisrael okupitila meenhumwafo odo da li da twalwa keenhondoki okudja kuBerseba fiyo okuDan. Eenhondoki oda li da shakena navahapu ovo ve di sheka; ndele nee oohandimwe, vomuAsser, Manasse nomuSebulon, ova li ve lininipika, ndele tave uya, navamwe vokuEfraim naIsaskar navo ova li ve uya. Kakele kaavo, vahapu ovo va li vehe fi Ovaisrael navo opo va li. Osha li shidjuu kwaavo hava longele Jehova ve li kouhamba wokoumbangalanhu va dule okukala po. Ngaashi ashike eenhondoki, navo ova li tava ka shakeneka omahepeko nomasheko. Nongaashi ashike omapata omulongo omouhamba a li ehe na ouyuki e li momalongelokalunga oipupulu nohaa shindwa kOvaasiria. — 2Omaf 30:1-20; Num 9:10-13.
it-1-E 1103 ¶4-5
Hiskia
Konima yOpaasa, oshivilo shomingome dihe na onhafi, osha li sha danwa nehafo oule womafiku aheyali. Neongalo alishe ola li la udafana, opo oshivilo shi danwe natango omafiku aheyali. Nokuli nomomafimbo a nyika oshiponga, Jehova okwa li a nangeka noupuna ‘muJerusalem nomwa li ehafo linene. Osheshi okomafiku enya aSalomo yaDavid, ohamba yaIsrael, oshinima sha tya ngaha inashi ningwa muJerusalem.’ — 2Omaf 30:21-27.
Elongelokalunga lashili ola li la tungululwa shili, naasho kasha li ashike sha ningwa pakafimbo, oshi li wetikile kwaasho sha ka shikula ko. Ofimbo inava shuna komaumbo avo ova ya va ka tataule po omiti, oikulundu, ealtari neengudimanya muJuda ashishe nomuBenjamin nokuli nomuEfraim nomuManasse. (2Omaf 31:1) Hisikia okwa tula po oshihopanenwa mokuteyaula po eyoka loshikushu olo Moses a li e liningila, molwaashi ovanhu ove li ninga oshikalunga noha ve li twimine. (2Eeh 18:4) Konima yoshivilo, Hiskia okwa li a shilipaleka kutya elongelokalunga lashili otali twikile, eshi a unganeka eengudu dovapristeli nosho yo omalongekido e na sha nokuyambidida oilonga yotembeli. Okwa ladipika ovanhu va dulike komhango i na sha nokuyandja oitimulongo nosho yo oshipe kOvalevi novapristeli, novanhu ova li ve linyenga nomutima aushe. — 2Omaf 31:2-12.
Omamona opamhepo
“Eshi ngeenge mu shi shii, onye ovanelao ngeenge tamu shi ningi”
14 Onghedi onhinhatu omo hatu ulike kutya otu li ovalininipiki omokukala hatu pwilikine nawa kuvamwe. Jakob 1:19 okwa ti natu kale hatu “endelele okupwilikina.” Jehova okwe tu tulila po oshihopaenenwa sha denga mbada moshinima osho. (Gen. 18:32; Jos. 10:14) Diladila kwaasho hatu dulu okulihonga meenghundafana odo da shangwa muExodus 32:11-14. (Lesha.) Nonande Jehova ka li a pumbwa ekwafo laMoses, okwa li e mu pa omhito opo e mu lombwele omaliudo aye. Olyelye ta ka pwilikina nelididimiko nokushikula omaetepo omunhu oo ha ningi omapuko luhapu? Jehova oha pwilikine nelididimiko kwaavo have mu ilikana ve na eitavelo.
15 Oshiwa keshe umwe womufye e lipule kutya: ‘Ngeenge Jehova okwa li e lininipika eshi a li ta ungaunga nokupwilikina kovanhu ngaashi ooAbraham, Rakel, Moses, Josua, Manoah, Elia naHesekiel, mbela ame itandi dulu okufimaneka ovamwatate aveshe mokukala inandi va dina, handi pwilikine komaetepo avo, noku a tula nokuli moilonga? Mbela ope na umwe meongalo letu ile moukwaneumbo wetu a pumbwa ekwafo lange? Oshike ndi na okuninga po? Ohandi ka ninga po shike shi na sha naasho?’ — Gen. 30:6; Ovatok. 13:9; 1 Eeh. 17:22; 2 Omaf. 30:20.
12-18 JUNI
OMAMONA OMEENDJOVO DAKALUNGA | 2 OMAFIMBO 32-33
“Kala odjo yetwomukumo pomafimbo madjuu”
it-1-E 204 ¶5
Ovaasiria
Sanheerib. Sanheerib, omonamati waSargon II, okwa ponokela ouhamba waJuda pefimbo lomudo omutimulongo nomutine wokupangela kwaHiskia (732 K.O.P.). (2Eeh 18:13; Jes 36:1) Hiskia okwa li e liteeka ondjoko yOvaasiria oyo ya li ya etifwa koilanduliko yeenghatu daxe, Ahas. (2Eeh 18:7) Naasho osha ningifa Sanheerib a ponokele oilando 46 okudja kuJuda (yelekanifa naJes 36:1, 2), opo nee, okudja kokamba yaye kuLakis, okwa li a pula Hiskia a fute oitalenti 30 yoshingoldo (c. eedola daNamibia 207 952 000) nosho yo oitalenti yoisilveri 300 (c. eedola daNamibia 35 652 000). (2Eeh 18:14-16; 2Omaf 32:1; yelekanifa naJes 8:5-8.) Nonande oimaliwa oyo oya li ya futwa, Sanheerib okwa li a tuma ovakalelipo vaye va ka lombwele ovanhu vokuJerusalem, opo ve liyandje. (2Eeh 18:17–19:34; 2Omaf 32:2-20) Jehova okwa li a hanauna po ovalumenhu 185 000 vaSanheerib moufiku umwe, naasho oshe mu ningifa a faduke po, ndele ta shuna kuNinive. (2Eeh 19:35, 36) Oko oko lwanima a ka dipaelwa kovanamati vaye vavali, nomonamati waye umwe, Esar-haddon, okwa ninga ohamba ponhele yaye. (2Eeh 19:37; 2Omaf 32:21, 22; Jes 37:36-38) Oiningwanima oyo i na sha nokuhanaunwa po kovakwaita vaAsiria oya shangwa yo kemanya laSanheerib nosho yo laEsar-haddon.—OMAFANO, Vol. 1, ep. 957.
Ovafita Va-7 Novakulunhu Va-8 Otava Faneke Shike Kunena?
12 Ngeenge tu na oupyakadi, Jehova oha kala alushe a hala oku tu ningila osho itatu dulu okuninga fye vene, ashike okwa teelela tu ninge ngaashi hatu dulu. Hiskia okwa li a kundafana ‘novakulunhu novaladi vaye’ nova li va udafana va ‘fitike eefifiya odo di li pondje yoshilando. Nokwe linyatipaleka nokwa tungulula ohotekuma ya li ya ngumaunwa po, ndee ta tungu kuyo eeshungongulu. Nokwa tunga yo ohotekuma onhivali pondje. Ndele ta hambulifa omaonga noikelelifo.’ (2 Omaf. 32:3-5) Opo Jehova a amene noku file oshisho oshiwana shaye shopefimbo opo, okwa li a longifa ovalumenhu ovaladi ngaashi, Hiskia nomalenga aye nosho yo ovaprofeti ovo va li ve na oupamhepo wa kola.
Ovafita Va-7 Novakulunhu Va-8 Otava Faneke Shike Kunena?
13 Oshinima shimwe vali osho Hiskia a li a ninga osha li nokuli sha fimanenena shi dulife okufitika eefifiya domeva ile okupameka ekuma loshilando. Molwaashi Hiskia okwa li omufita muwa, okwa li a ongela oshiwana nokwe shi twa omukumo pamhepo neendjovo edi tadi ti: “Inamu tila ndele inamu haluka molwohamba yaAssiria . . . , osheshi ava ve li pufye ovahapu, ve dule venya ve li puyo. Puyo ope nokwooko kwombelela, ndelenee pufye ope nOmwene Kalunga ketu te tu kwafa mokulwa moita yetu.” Kasha li tuu sha pameka eitavelo loshiwana eshi Hiskia a li e shi dimbulukifa kutya Jehova ote ke shi kondjela! Eshi Ovajuda ve shi uda, ‘ove lineekela eendjovo daHiskia, ohamba yaJuda.’ Didilika kutya “eendjovo daHiskia” odo da li da kwafela oshiwana shiha teke omukumo. Hiskia nomalenga aye novalumenhu ovaladi nosho yo omuprofeti Mika naJesaja, ova li va ulika kutya ove li ovafita vawa ngaashi Jehova a li a xunganeka okupitila momuprofeti waye. — 2 Omaf. 32:7, 8; lesha Mika 5:4, 5.
Omamona opamhepo
Elidilululo lashili oshike?
11 Mokweendela ko kwefimbo, Jehova okwa li a nyamukula omailikano aManasse. Okwa li a mona kutya Manasse okwa lundulula shili oikala yaye okutala komailikano aye. Jehova okwa li a pwilikina kuye, eshi e mu pula e mu dimine po. Okwa li e mu shunifila ouhamba waye. Manasse okwa li a longifa omhito oyo pauyadi, opo a ulike kutya okwe livela ombedi shili. Okwa li a ninga oshinima osho inashi ningwa kuAhab. Okwa li a lundulula oikala yaye. Okwa li a xulifa po elongelokalunga loipupulu nokuladipika oshiwana shi longele Jehova. (Lesha 2 Omafimbo 33:15, 16.) Manasse okwa li a pumbwa okukala e na ouladi neitavelo, opo a dule okuninga ngaho. Fimbo ine livela ombedi, okwa kala e li oshihopaenenwa shii koukwaneumbo waye, koidale nokoshiwana. Ashike eshi a ninga omunamido, okwa li a longa noudiinini, opo a xwepopaleke omaupyakadi amwe, oo a li a etifa. Okwa li a nwefa mo nawa omutekulu waye, Josia, oo lwanima a ka kala ohamba iwa kuhe na vali. — 2 Eeh. 22:1, 2.
12 Oshike hatu lihongo moshihopaenenwa shaManasse? Okwa li e lininipika nokwa ninga shihapu. Okwa ilikana, ta pula Jehova e mu file onghenda. Okwa lundulula oikala yaye. Okwa longa noudiinini, opo a xwepopaleke omaupyakadi oo a etifa, a hovela vali okulongela Jehova nokuladipika ovanhu vakwao va ninge sha faafana. Oshihopaenenwa shaManasse otashi kwafele neenghono ovo va nyona omanyono a kwata moiti. Otashi tu kwafele tu mone kutya Jehova Kalunga oku na ‘onghedi iwa, noku yadi ekufilo.’ (Eps. 86:5) Jehova ota ka dimina po ovo ve livela ombedi shili.
19-25 JUNI
OMAMONA OMEENDJOVO DAKALUNGA | 2 OMAFIMBO 34-36
“Mbela oto mono ngoo ouwa pauyadi mEendjovo daKalunga?”
it-1-E 1157 ¶4
Hulda
Eshi Josia a uda “embo lomhango,” olo la monika kuHilkia omupristeli omukulunhu pefimbo lotembeli tai tungwa, tali leshwa mokule okwa pula vamwe va ye ve ke mu pulile ko kuJehova. Ova ya kuHulda, oo a li a fatulula eendjovo daJehova kutya omaupyakadi aeshe oo a shangwa “membo,” aavo ihava dulika, otaa ka hanga ovashunimonima. Hulda okwa weda ko a ti kutya molwaashi Josia okwa li e lininipika koshipala shaJehova ita ka hangwa komupya, ndele ota ka ongelwa pooxe, ndele ta ka pakwa nombili mombila yaye.—2Eeh 22:8-20; 2Omaf 34:14-28.
Kala u na ouladi weumbo laJehova
20 Pefimbo loilonga yokutungululwa oyo ya li ya unganekwa kohamba Josia, omupristeri omukulunhu Hilkia okwa “mona embo lomhango yOmwene, oyo ya yandjwa kuMoses.” Okwe i yandja kuhamushanga Sefan oo lwanima e ke i leshela Josia. (Lesha 2 Omafimbo 34:14-18.) Oshidjemo osha li shike? Ohamba oya pombaula diva oikutu yayo ya nyika oluhodi, ndele tai lombwele ovalumenhu va ye va ka pule Jehova. Okupitila momuprofeti Hulda, Kalunga okwa li a yandja etumwalaka tali tokola oilonga imwe yomalongelokalunga oyo hai longwa muJuda. Ashike eenghendabala diwa daJosia di na sha nokukufa mo oihongwafano oda li da didilikwa, nokwa kala a hokiwa kuJehova kashi na nee mbudi kutya omaupyakadi elipi a li taa ka hanga oshiwana ashishe. (2Omaf 34:19-28) Oshike hatu dulu okulihonga moshinima osho? Nafye otwa hala okuninga ngaashi Josia. Otwa hala okukala hatu tambula ko ewiliko laJehova, hatu tale koshihopaenenwa shelondwelo shi na sha naasho tashi dulu oku tu ningilwa, ngeenge otwa efa ovashunimonima naavo vehe fi ovadiinini ve limbwange melongelokalunga letu. Nohatu dulu okukala tu na elineekelo kutya Jehova ota ka didilika ouladi wetu u na sha nelongelokalunga lashili, ngaashi ashike a li a ningila Josia.
Omamona opamhepo
Mbela oto ka yandja elitulemo nomutima woye aushe koinima oyo ya shangwa?
15 Elondwelo lilipi hatu hange moshihopaenenwa shOhamba iwa, Josia? Natu ka konakoneni osho sha li she mu kwafela a findane naasho sha li sha eta efyo laye. (Lesha 2 Omafimbo 35:20-22.) Josia ‘okwa fikama a ka shakeneke’ Neko, Ohamba yaEgipiti, nonande ohamba oyo oya li ye mu lombwela kutya ke na oupyakadi naye. Ombiibeli oya ti kutya eendjovo daNeko oda li “da dja mokanya kaKalunga.” Mbela omolwashike Josia a li a ya kolwoodi? Ombiibeli inai shi popya.
16 Ongahelipi Josia a li ta dulu okushiiva kutya eendjovo daNeko oda dja kuJehova? Okwa li ta dulu okupula Jeremia, oo a li umwe womovaprofeti ovadiinini. (2 Omaf. 35:23, 25) Ashike Ombiibeli inai popya kutya osho a li a ninga. Natango, Neko okwa li tai kuKarkemi a ka lwife ‘epata olo la li tali mu lwifa’ ndele ka li ta ka lwifa Jerusalem. Ndele nande ongaho, Kalunga ka li a kwatelwa mo molwoodi olo, na Neko ka li ta shindi Jehova ile oshiwana shaye. Osha li sha puka eshi Josia a lwifa Neko. Mbela oshike hatu lihongo moshihopaenenwa shaJosia? Ngeenge twa taalela oupyakadi, otu na okukonakona kutya Jehova okwa tala ko ngahelipi oshinima sho.
17 Ngeenge opa holoka oupyakadi, otu na okukonakona kutya omifikamhango dOmbiibeli oda kwa kwatela mo shike noku di tula moilonga. Peemhito dimwe, otashi dulika twa pumbwa okupula ekwafo kovakulunhuongalo. Otashi dulika tu pewe ouyelele oo tu shii nale kombinga yoshinima shonhumba ile tashi dulika nokuli twa ninga omapekapeko moifo yetu. Natango, otashi dulika pa kale pe na omafinamhango Ombiibeli amwe oo tu na okukonakona, nomukulunhuongalo ota dulu oku tu kwafela tu dilonge kuo. Pashihopaenenwa, omumwameme oku shii kutya oku na oshinakuwanifwa shokuudifa onghundana iwa. (Oil. 4:20) Natu tye nee ngeno omumwameme okwa ninga omhangela aye moukalele efiku lonhumba, ashike omushamane waye oo ehe fi omwiitaveli okwa hala a kale meumbo. Omushamane waye otashi dulika e mu lombwele kutya opa pita efimbo lihapu inava kala pamwe, nokwa hala va ninge oshinima shonhumba pamwe ve li ovalihomboli. Omumwameme otashi dulika a diladile kOmishangwa da fimana, ngaashi oo wokudulika kuKalunga nokoshipango shokuninga ovanhu ovalongwa. (Mat. 28:19, 20; Oil. 5:29) Ashike okwa pumbwa yo okudiladila kombinga yanghee ovakainhu ve na okudulika kovalumenhu vavo nokukala ve na ondjele. (Ef. 5:22-24; Fil. 4:5) Mbela omushamane waye oku li ngoo shili omhinge nokuya kwaye moukalele, ile pamwe ote mu pula ashike efiku olo a longe sha peumbo? Otwa pumbwa okukala tu na ondjele eshi hatu longo ehalo laKalunga nokukendabala tu kale tu na eliudo la yela.
26 JUNI–2 JULI
OMAMONA OMEENDJOVO DAKALUNGA | ESRA 1-3
“Pitika Jehova e ku longife”
Mbela ou wete osho Sakaria a li a mona?
OVAJUDA ova li va hafa neenghono. Jehova Kalunga “okwa pendula omhepo yaKores, ohamba yaPersia,” opo i mangulule Ovaisrael, ovo va kala moukwatwa waBabilon oule womido omilongo. Ohamba oya li ya yandja elombwelo kutya Ovajuda nava shune keduumbo lavo va ka “tunge ongulu yOmwene, Kalunga kaIsrael.” (Esra 1:1, 3) Osho kasha li tuu shitunhula neenghono! Osho osha li sha hala okutya Ovajuda ova li natango tava ka longela Kalunga kashili medu olo e va pa.
Omatemba noshishani osho shi lile po eameno letu
2 Sakaria okwa li e shii kutya Ovajuda ovo va tembukila kuJerusalem ova li ve neitavelo. ‘Omhepo yavo oya li ya pendulwa kuKalunga ndele tava fikama’ opo va fiye po omaumbo neengeshefa davo. (Esra 1:2, 3, 5) Ova li va fiya po oshilongo osho va li ve shii opo va ye konhele oyo vahapu vomuvo va li inava mona nande onale. Ngeno okutungululwa kwotembeli yaJehova kakwa li kwa fimana kuvo, ngeno inava ya molweendo olo lile nolingulutila leekilometa 1 600, tali pula okutavakana edu olo li neemhunda nomalufilu.
Omamona opamhepo
Omanenedhiladhilo okuza membo lyaEsra
1:3-6. Ngaashi Aaisraeli mboka ya li ya kala muBabilonia, oyendji yomOonzapo dhaJehova itaya vulu okuya miilonga yethimbo lyu udha nenge okulonga mpoka pu na ompumbwe onene. Ihe ohaya yambidhidha nohaya ladhipike mboka taya vulu oku shi ninga nohaya gandja omayambidhidho gehalo ewanawa okuhumitha komeho iilonga yeuvitho noyokuninga aantu aalongwa.