Jehova ote ke ku dimbuluka ngahelipi?
“DIMBULUKWE nge, Kalunga kange.” Nehemia oikando ihapu okwa ilikana Kalunga neendjovo nda tya ngaha. (Nehemia 5:19; 13:14, 31) Oshi li oshinima shopaushitwe kutya ngeenge ovanhu va hangika koudjuu, ohava ehene kuKalunga neendjovo domailikano da faafana naado.
Ndele mbela ovanhu ohava kala tava diladila shike ngeenge tava pula Kalunga e va dimbuluke? Osha yela kutya otava pula Kalunga opo a ninge shihapu shi dulife ashike pokudimbuluka omadina avo. Kape na omalimbililo kutya ohava kala tava pula naanaa nelalakano la faafana naalo lomukolokoshi oo a dipawa pamwe naJesus. Omukolokoshi ou, ka li e li ngaashi mukwao, molwaashi okwa indila Jesus ta ti: “Dimbulukwa nge, ngenge wa fika mouhamba woye.” Kakwa li ashike a hala Jesus a dimbuluke edina laye kutya oye lyelye, ndele okwa li a hala yo e mu ningile sha—hano e mu nyumune.—Lukas 23:42.
Luhapu Ombibeli otai ulike kutya ‘okudimbuluka’ kwaKalunga otashi ti okukatuka onghatu. Pashihopaenenwa, konima eshi omeva eyelu a kala nokutumbalala kombada yedu oule womafiku 150, “Kalunga okwa dimbulukwa Noa . . . Ndele Kalunga okwa pepifa omhepo kombada yedu opo omeva a oholoka.” (Genesis 8:1) Konima yomafelemido, Simson, oo a twiyulwa omesho nokwa mangwa nomalyenge kOvafilisti, okwa ilikana ta ti: “Kalunga, dimbulukwe nge, u pameke nge lumwe aluke.” Jehova okwa dimbuluka Simson okupitila moku mu pa eenghono di dule domunhu opo a dule okushunifa owii oo a ningilwa kovatondi vaKalunga. (Ovatokolipangeli 16:28-30) Shi na sha naNehemia, Jehova okwa nangeka noupuna eenghendabala daye, nelongelokalunga lashili ola tungululwa muJerusalem.
Omuyapostoli Paulus okwa shanga ta ti: “Keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nokehekeleko lomomishangwa.” (Ovaroma 15:4) Ngeenge ohatu dimbuluka Jehova okupitila mokuninga eenghendabala dokulonga ehalo laye, ngaashi ovapiya vaye ovadiinini vonale va ninga, ohatu dulu okukala nelineekelo kutya Jehova ote ke tu dimbuluka okupitila moku tu kwafela tu wanife po eemhumbwe detu defiku keshe, okupitila moku tu kwafela momayeleko etu, nosho yo okupitila moku tu xupifa eshi ta ka tokola ovahenakalunga.—Mateus 6:33; 2 Petrus 2:9.
CT0OWA HALA OKUTALELWA PO?CT100
Nokuli mounyuni ou u yadi omaupyakadi, oto dulu okumona elao tali di meshiivo lolelalela lOmbibeli lokushiiva Kalunga, Ouhamba waye nelalakano laye likumwifi olo a udanekela ovanhu. Ngeenge owa hala okumona ouyelele we lixwa po ile ngee owa hala umwe e ku talele po nokuninga naave ekonakonombibeli lopeumbo oshali, alikana shangela koWatch Tower, Private Bag X2067, Krugersdorp, 1740, South Africa, ile kuimwe yomeendjukifi odo da shangwa pepandja 30.