Kala omudiinini kuJehova

Ovakriste vashili ova tokola vaha efe nande oshinima shonhumba, ile omunhu a ye moshipala ekwatafano lavo naJehova. Kape na omalimbililo kutya naave osho u udite ngaho. Jehova okwa lenga oudiinini woye. (Lesha 1 Omafimbo 28:9.) Eenghalo dilipi tadi dulu okuyeleka oudiinini woye kuye, nongahelipi to dulu okuungaunga nado?

1. Vamwe otava dulu ngahelipi okuyeleka oudiinini wetu kuJehova?

Ovanhu vamwe otava kendabala oku tu efifa po okulongela Jehova. Oolyelye tava kendabala okuninga ngaho? Vamwe ovo va fiya po oshili ohava popi oipupulu kombinga yehangano laKalunga nelalakano lokunyona po eitavelo letu. Ovanhu va tya ngaho ohava ifanwa ovashunimonima. Natango, ovawiliki vomalongelokalunga ohava tandavelifa oipupulu kombinga yetu, opo va ningife ovo inave i didilika mo va fiye po oshili. Onghee osha nyika oshiponga okupopya novapataneki va tya ngaho, okulesha omambo avo, ile osho va shanga kointaneta, okuya komapandja avo okointaneta, ile okutala ouvidio vavo. Jesus okwa popya kombinga yaavo hava kendabala okuteya vamwe omukumo vaha kale ovadiinini kuJehova, eshi a ti: “Va efeni, ovo ovakwatiketi ovapofi. Ngeenge omupofi oku kwete omupofi mukwao komhango, aveshe otava ka wila melambo.”— Mateus 15:14.

Ongahelipi ngeenge umwe oo tu shii okwa tokola aha kale vali Ondombwedi yaJehova? Oshiyahameka neenghono, ngeenge umwe oo tu shii okwa ningi ngaho, notashi dulika shi tu ningife tu kale twa hala oku mu shikula, ponhele yokukala ovadiinini kuJehova. Otwa pumbwa okukala twa tokola toko okukala ovadiinini kuKalunga komesho yaaishe. (Mateus 10:37) Onghee ohatu dulika koshipango shaJehova shi na sha nokuhaendafana novanhu va tya ngaho.— Lesha 1 Ovakorinto 5:11.

2. Omatokolo opaumwene elipi tashi dulika a yeleke oudiinini wetu kuJehova?

Ngeenge otu hole Jehova, ohatu ka henuka keshe osho tashi tu ningifa tu kale tu na ekwatafano nelongelokalunga loipupulu. Onghee, oilonga yetu, ile ehangano lonhumba omo tu li, ile keshe osho hatu ningi inashi pumbwa okukala shi na ekwatafano nelongelokalunga loipupulu. Jehova okwe tu londwela a ti: ‘Djeni mo muBabilon Shinene ovanhu vange.’— Ehololo 18:2, 4.

KONAKONA MOULE

3. Lungamena omahongo oipupulu

Ohatu ke linyenga ngahelipi, ngeenge otwa udu oinima ii kombinga yehangano laJehova? Lesha Omayeletumbulo 14:15, ndele tamu kundafana epulo tali shikula:

• Omolwashike twa pumbwa okukala twa lungama tuha itavele keshe osho hatu udu?

Lesha 2 Johannes 10, ndele tamu kundafana omapulo taa shikula:

• Otu na okuungaunga ngahelipi novashunimonima?

• Nonande ihatu popi komudidi novashunimonima, ongahelipi hatu dulu okukwatafana nomahongo avo?

• Mbela oto diladila kutya Jehova ota ka kala e udite ngahelipi, ngeenge otwa kala hatu pwilikine kwaavo tave mu popile mowii, ile ehangano laye?

4. Kala omudiinini kuKalunga, ngeenge wa mona omumwatate a nyona

Ngeenge otwa mono, ile twa uda kutya umwe meongalo okwa nyona enyono la kwata moiti, otu na okuninga po shike? Konakona efinamhango limwe okudja mOmhango yaKalunga, oyo a li a pa Ovaisrael vonale. Lesha Leviticus 5:1.

Ngaashi sha popiwa movelishe oyo, otwa pumbwa okulombwela ovakulunhuongalo osho twa mona, ile twa uda. Ashike, ofimbo inatu ninga ngaho, otwa pumbwa tete okulombwela omunyoni a ye kovakulunhuongalo a ka hepaulule enyono laye. Ngeenge ine shi ninga, oudiinini wetu kuJehova otau ke tu linyengifa tu lombwele ovakulunhuongalo osho twa mona, ile twa uda. Onghatu ya tya ngaho otai ulike ngahelipi ohole i na oudiinini . . .

• yokuhola Jehova Kalunga?

• yokuhola omunhu oo a nyona?

• yokuhola vamwe meongalo?

5. Dja mo muBabilon Shinene

OKAVIDIO: Dja mo muBabilon Shinene! (5:06)

Lesha Lukas 4:8 nosho yo Ehololo 18:4, 5, ndele tamu kundafana omapulo taa shikula:

• Mbela edina lange oli li natango kelongelokalunga loipupulu?

• Mbela ondi li mehangano olo li na ekwatafano nelongelokalunga lonhumba?

• Mbela oilonga yange ohai yambidida elongelokalunga loipupulu monghedi yonhumba?

• Mbela ope na oinima yonhumba i na ekwatafano nelongelokalunga loipupulu, oyo handi ningi, nonda pumbwa oku i efa po?

• Ngeenge enyamukulo lange oheeno komapulo oo, omalunduluko elipi nda pumbwa okuninga po?

Meenghalo adishe odo, ninga etokolo olo tali ku fiye neliudo la yela notali ulike oudiinini woye kuJehova.

ENGONGO

Opo tu kale ovadiinini kuJehova, otwa pumbwa okuhenuka okweendafana naavo vehe fi ovadiinini kuye. Otwa pumbwa yo okuhakala tu na ekwatafano nandenande nomalongelokalunga oipupulu.

Eendululo

• Omolwashike tuhe na okutala, okulesha, ile okupwilikina koinima yovashunimonima?

• Otu na okuungaunga ngahelipi naavo inava hala vali okukala Eendombwedi daJehova?

• Ongahelipi hatu dulu okudulika kelondwelo li na sha nokudja mo momalongelokalunga oipupulu?

TALA OUYELELE WA WEDWA PO

Lihonga osho to dulu okuninga po, ngeenge vamwe tava popi oipupulu kombinga yEendombwedi daJehova.

“Mbela ou na ngoo ouyelele u li mondjila?” (Oshungonangelo, Auguste 2018)

Ongahelipi to dulu okudidilika mo omahangano, ile oilonga oyo hai yambidida Babilon Shinene?

“Kala we lipyakidila pexulilo ‘lomafiku axuuninwa’” (Oshungonangelo, Oktoba 2019, okatendo 16-18)

Ovapataneki vamwe ova ninga po shike, opo va kendabale okunghundipaleka eitavelo letu?

Lungamena ovapukifi (9:32)

Mehokololo “Onda kala handi kongo Kalunga okudja kounona,” lesha kombinga yaumwe, oo a li omupristeri waShinto, oo a efa po elongelokalunga loipupulu.

“Ombibeli ohai lundulula onghalamwenyo yovanhu” (Oshungonangelo, 1 Oktoba 2011)