Jehova oha dimine po ovanhu filufilu

1. Metwokumwe nOmuudifi 7:20, ohamba Salomo oya popya oshili ilipi?

OHAMBA Salomo oya ti: “Kombada yedu [kaku na] nande omunhu omuyuki, ou ha ningi ngeno ouwa auke, ndele ita nyono.” (Omuud. 7:20) Osho oshoshili, molwaashi atushe ovalunde. (1 Joh. 1:8) Onghee hano, atushe otwa pumbwa okudiminwa po kuKalunga nokovanhu vakwetu.

2. Oho kala u udite ngahelipi, ngeenge wa diminwa po kukaume koye kopofingo?

² Nopehe na omalimbililo, oto dimbuluka oshikando shimwe, eshi wa li wa udifa nai kaume koye kopofingo. Molwaashi owa li wa hala okuyukifa oinima nokupanga vali oukaume, owa li we mu dimina po tashi di komutima. Ndele mbela owa li u udite ngahelipi, eshi kaume koye e ku dimina po? Mbela owa li wa pepelelwa? Heeno, nowa li yo wa hafa.

3. Oshike hatu ka kundafana moshitukulwa eshi?

³ Otwa hala okuninga ookaume kaJehova kopofingo, ashike omafimbo amwe otashi dulika tu popye sha, ile tu ninge osho tashi mu handukifa. Omolwashike hatu dulu okukala noshili kutya Jehova okwa halelela oku tu dimina po? Eyooloko lilipi li li pokati kaJehova, ngeenge a dimina po umwe nosho yo ngeenge twa dimina po umwe? Oolyelye hava diminwa po kuJehova?

JEHOVA OKWE LILONGEKIDA OKU TU DIMINA PO

4. Omolwashike hatu dulu okukala noushili kutya Jehova okwe lilongekida oku tu dimina po?

⁴ Eendjovo daKalunga ode tu shilipaleka kutya Jehova okwe lilongekida oku tu dimina po. Eshi Jehova a li e lihololela Moses pomhunda yaSinai, okwa popya okupitila momweengeli waye a ti: “Omwene Kalunga omunefilonghenda, Kalunga omunanghenda, omunanheni, nomunene mouwanghenda nomoudiinini, nouwanghenda waye te u diinine kovanhu omayovi, ou ta dimi po omanyonauno nomatauluko nomatimba.” (Ex. 34:6, 7) Jehova oKalunga omunalukeno nomunanghenda, oo ha kala alushe e lilongekida okudimina po ovanyoni ovo ve livela ombedi.​—Neh. 9:17; Eps. 86:15.

5. Molwaashi Jehova oku shii oshitwe yovanhu, ohashi mu linyengifa a ninge shike metwokumwe nEpsalme 103:13, 14?

⁵ E li Omushiti wetu, Jehova oku shii keshe shimwe shi na sha nafye. Diladila ashike kwaasho! Oku shii ouyelele aushe u na sha nomunhu keshe e li kombada yedu. (Eps. 139:15-17) Oku wete okuhawanenena akushe oko twa fyuulula kovadali vetu. Shikwao vali, oku shii eenghalo adishe omo twa pita, odo da nwefa mo oukwatya wetu. Molwaashi Jehova oku tu shii nawanawa, ohashi mu linyengifa a ninge shike? Ohashi mu linyengifa a ungaunge nafye nonghenda.​—Eps. 78:39; lesha Epsalme 103:13, 14.

6. Jehova okwa ulika ngahelipi kutya okwa halelela oku tu dimina po?

⁶ Jehova okwa ulika kutya okwa halelela oku tu dimina po. Oku shii kutya ovanhu aveshe ovalunde nohava fi, omolweenghatu domunhu wotete, Adam. (Rom. 5:12) Katwa li tu na osho hatu dulu okuninga po, opo tu liamene koulunde nokefyo, ile okwaamena ovanhu vakwetu kefingo la tya ngaho. (Eps. 49:7-9) Ashike Kalunga ketu omunahole okwa ulika olukeno nokwa ninga po sha, opo e tu mangulule. Okwa ninga po shike? Ombiibeli oya popya muJohannes 3:16 kutya Jehova okwa tuma Omona waye ewifa, opo e tu file. (Mat. 20:28; Rom. 5:19) Jesus okwa mona oixuna nokwa fya ponhele yetu, opo a mangulule ovo ve na eitavelo muye. (Heb. 2:9) Jehova ka li tuu e udite ouyehame okutala Omona waye omuholike ta fi efyo linyanyalifi noli fifa ohoni! Onghee hano, ngeno Jehova ka li a hala tu diminwe po, ngeno ina efa Omona waye a fye.

7. Oihopaenenwa yavamwe ilipi tai hangwa mOmbiibeli yaavo va li va diminwa po nehalo liwa kuJehova?

⁷ MOmbiibeli omu na oihopaenenwa yavamwe ovo va diminwa po nehalo liwa kuJehova. (Ef. 4:32) Olyelye e uya momadiladilo oye? Otashi dulika to diladila kohamba Manasse. Omulumenhu oo omukolokoshi okwa li a nyona kuJehova meenghedi dinyanyalifi. Okwa li a kwatela komesho elongelokalunga loipupulu. Okwa li a dipaa ovana vaye nokwa li e va yambela oikalunga yoshipaani. Okwa tula yo oshikalunga motembeli iyapuki yaJehova. Ombiibeli oya popya kombinga yaye ya ti: “Okwa ninga shihapu osho inashi yuka momesho Omwene, a handukifa Omwene.” (2 Omaf. 33:2-7) Ashike eshi Manasse a ulika kutya okwe livela ombedi shili, Jehova okwa li e mu dimina po nehalo liwa nokwe mu shunifila yo ouhamba waye. (2 Omaf. 33:12, 13) Otashi dulika yo to diladila kohamba David, oyo ya li ya nyona kuJehova omanyono a kwata moiti, mwa kwatelwa okuya momilele nokudipaa. Ndele David eshi a li e livela ombedi shili nokwa dimina epuko laye, okwa diminwa po kuJehova. (2 Sam. 12:9, 10, 13, 14) Onghee hano, ohatu dulu okukala noushili kutya Jehova okwa halelela oku tu dimina po. Ngaashi hatu ke shi mona, Jehova ihe tu dimine po, ngaashi ovanhu hava dimine po ovanhu vakwao.

JEHOVA OHA DIMINE PO MONGHEDI IKUMWIFI

8. Ondodo yaJehova ye likalekelwa yokukala Omutokoli ohai mu linyengifa ngahelipi a dimine po ovanhu?

⁸ Jehova oku li “Omutokoli wedu alishe.” (Gen. 18:25) Omutokoli muwa okwa pumbwa eudeko lomoule li na sha nomhango. Jehova naye osho e li ngaho filufilu, molwaashi nonande oku li Omutokoli, oku li yo Omuyandjimhango wetu. (Jes. 33:22) Kape na nande oumwe e shii ouwa nowii e dulife Jehova. Omutokoli muwa okwa pumbwa vali shike? Okwa pumbwa okushiiva ouyelele aushe we lixwa po u na sha noshinima, ofimbo ina ninga etokolo. Onghee hano, Jehova naye oku li Omutokoli a denga mbada, molwaashi oha kala e shii ouyelele aushe we lixwa po.

9. Ngeenge Jehova ta tokola okudimina po umwe, ile okuhe mu dimina po, oha kala e na ouyelele ulipi?

⁹ Mepingafano novatokoli vopanhu, Jehova alushe oha kala e na ouyelele we lixwa po u na sha noshibofa keshe. (Gen. 18:20, 21; Eps. 90:8) Oku shii keshe shimwe. Oku shii filufilu nghee eenghatu dovanhu da nwefwa mo komaukwatya, keputuko, komudingonoko, komaliudo nokomadiladilo. Jehova oha tale yo omutima. Oku shii filufilu omalinyengotomheno, eemhangela nomahalo omunhu keshe. Kape na osho she mu holekwa. (Heb. 4:13) Onghee hano, ngeenge Jehova ta dimine po umwe, alushe oha kala e na ouyelele we lixwa po u na sha nonghalo yonhumba.

10. Omolwashike hatu dulu kutya omatokolo aJehova alushe ohaa kala pauyuki? (Deuteronomion 32:4)

¹⁰ Omatokolo aJehova alushe ohaa kala pauyuki. Jehova ke na okatongo nandenande. Ngeenge ta dimine po umwe iha tale keholokepo lomunhu, koupuna waye, kefimano, ile kokudula kwaye. (1 Sam. 16:7; Jak. 2:1-4) Kape na umwe ta dulu okufininika Jehova a ninge sha, ile oku mu pa ombubo. (2 Omaf. 19:7) Omatokolo aye ihaa nwefwa mo nandenande komaliudo. (Ex. 34:7) Osho otashi ulike kutya Jehova oku li Omutokoli a denga mbada, molwaashi oku shii keshe shimwe kombinga yetu neenghalo omo hatu piti.​—Lesha Deuteronomion 32:4.

11. Onghedi yaJehova yokudimina po oya yooloka ko ngahelipi kwaayo yovanhu?

¹¹ Ovashangi vOmishangwa dOshiheberi ova popya kutya Jehova oha dimine po ovanhu monghedi ye likalekelwa. Peemhito dimwe, ova longifa oshitya shOshiheberi osho sha popiwa kodjo imwe ya ti kutya “osho ashike sha longifwa tashi ulike konghedi omo Kalunga ha dimine po ovalunde. Oshitya osho inashi yukifwa konghedi ya ngabekwa yovanhu yokudimina po ovanhu vakwao.” Jehova oye aeke e na eenghono dokudimina po ovalunde filufilu, ovo ve livela ombedi. Ngeenge Jehova e tu dimina po, ohatu mono oidjemo ilipi?

12-13. (a) Omunhu oha mono ouwa ulipi, ngeenge a diminwa po kuJehova? (b) Ouwa oo hau di kuJehova ohau kwata efimbo li fike peni?

¹² Ngeenge otwa dimine oushili oo kutya Jehova ohe tu dimine po, otashi ke tu ‘hekeleka.’ Ohatu ka kala nombili yopamadiladilo neliudo la yela. Mepingafano novanhu, “Jehova” oye ashike ta dulu okuninga ngaho. (Oil. 3:19) Ngeenge e tu dimina po, ohe tu pitike vali tu kale tu na ekwatafano naye, nohe tu tale ko twa fa onga inatu nyona nandenande.

¹³ Ngeenge Jehova e tu dimina po, ihe tu tokola vali, ile e tu handukile omolwenyono olo. (Jes. 43:25; Jer. 31:34) Ndele oha ehenifa omanyono etu kokule “ngaashi oushilo nouninginino u lili kokule.”b (Eps. 103:12) Ngeenge otwa dilonga moule kunghee Jehova he tu dimine po, otashi ke tu linyengifa tu mu fimaneke nokukala tu na olupandu. (Eps. 130:4) Ndele mbela Jehova oha dimine po oolyelye?

JEHOVA OHA DIMINE PO OOLYELYE?

14. Oshike twe lihonga fiyo opapa kombinga yetokolo laJehova li na sha nokudimina po omunhu, ile lokuhe mu dimina po?

¹⁴ Ngaashi twe shi mona, ngeenge Jehova ta tokola okudimina po umwe, ile okuhe mu dimina po, iha tale kutya enyono olinini, ile ola kwata moiti. Natango otwe lihonga kutya Jehova oha longifa eshiivo laye e li Omushiti, Omuyandjimhango nOmutokoli, ngeenge ta tokola okudimina po umwe, ile okuhe mu dimina po. Jehova oha tale koinima ilipi?

15. Metwokumwe naLukas 12:47, 48, Jehova oha tale koshinima shimwe shilipi?

¹⁵ Oshinima shimwe osho Jehova ha tale kusho ngeenge ta tokola okudimina po omunyoni, ile okuhe mu dimina po, ongeenge omunyoni a nyonena owina. Jesus okwe shi yelifa nawa meendjovo odo di li muLukas 12:47, 48. (Lesha.) Omunhu oo a pangela okunyona, e shii kutya osho ta ningi osha puka filufilu, ota nyono kuJehova, nenyono la tya ngaho ola kwata moiti. Omunhu a tya ngaho, otashi dulika aha ka diminwe po kuJehova. (Mark. 3:29; Joh. 9:41) Omafimbo amwe, otashi dulika twa didilika kutya osho twa ninga osha puka. Ndele mbela otu na ngoo fiku tu ka diminwe po okutala konghalo oyo? Heeno! Naasho otashi tu twala koshinima oshitivali, osho Jehova ha tale kusho.

16. Elidilululo oshike, nomolwashike twa pumbwa okulidilulula, ngeenge otwa hala okudiminwa po kuJehova?

¹⁶ Oshinima vali shikwao osho Jehova ha tale kusho, oha tale ngeenge omunyoni okwe lidilulula ngoo shili. Okulidilulula osha hala kutya ngahelipi? Okulidilulula osha hala kutya omunhu oku na “okulundulula omadiladilo, oikala nosho yo elalakano laye.” Osha kwatela mo ediladilo lokulipa oushima nokunyika oluhodi shi na sha noinima ii oyo omunhu a ninga, ile eshi a dopa okulonga ouwa. Omunhu, oo e livela ombedi, iha kala ashike a nyika oluhodi omolwenyono laye, ndele oha kala yo a nyika oluhodi omolwekwatafano laye naJehova olo la nghundipala noshe mu twala mepuko. Ohamba Manasse nosho yo David aveshe ova li va nyona omanyono a kwata moiti, ashike Jehova okwa li e va dimina po, molwaashi ova li ve livela ombedi filufilu. (1 Eeh. 14:8) Osho otashi ulike kutya Jehova ohe tu dimine po ashike ngeenge a mono kutya otwe livela ombedi shili. Ndele inashi wana ashike okuyandja ombili shi na sha nonghatu ya puka oyo twa katuka, ile nenyono letu. Otu na yo okukatuka onghatu.c Naasho otashi tu twala koshinima shikwao vali osho Jehova ha tale kusho.

17. Okulialuluka oshike, nomolwashike twa pumbwa okulialuluka, opo tu henuke okweendulula omapuko omonakudiwa? (Jesaja 55:7)

¹⁷ Oshinima shikwao sha fimana osho Jehova ha tale kusho, osho okulialuluka. Okulialuluka osha hala okutya “okweefa po omanyono etu.” Oku shi popya noitya imwe, omunhu oku na okweefa po okulonga owii, nokuhovela okweenda mondjila oyo Jehova a hala ovanhu va ende. (Lesha Jesaja 55:7.) Omunhu a tya ngaho, oku na okulundulula omadiladilo aye, opo a kale ta wilikwa komadiladilo aJehova. (Rom. 12:2; Ef. 4:23) Oku na yo okukala a tokola toko okweefa po onghedi yaye yokudiladila i kulu inai koshoka nosho yo eenghatu daye. (Kol. 3:7-10) Oshoshili kutya Jehova ohe tu dimine po omatimba etu nohe tu koshola omatimba etu, omolweitavelo letu mekuliloyambo laKristus. Jehova ote ke tu dimina po pakanghameno lekuliloyambo, ngeenge okwa mono kutya ohatu ningi eenghendabala tu lundulule elihumbato letu. ​—1 Joh. 1:7.

KALA U NA ELINEEKELO KUTYA JEHOVA OTA DULU OKU KU DIMINA PO

18. Oshike hatu lihongo kombinga yaJehova, ngeenge tashi uya pokudimina po ovanhu?

¹⁸ Natu endululeni pauxupi oitwa ya fimana imwe oyo twa kundafana. Jehova oku li Omunhu oo ha dimine po ovanhu filufilu meshito alishe. Omolwashike hatu tile ngaho? Oha kala alushe e lilongekida oku tu dimina po. Oshitivali, oku shii shihapu shi na sha nafye. Oku shii omaukwatya etu filufilu noye aeke ta dulu okumona kutya otwe livela ombedi shili. Oshititatu, ngeenge Jehova e tu dimina po, ohe tu dimine po filufilu nohe tu tale ko twa fa twa li inatu nyona. Naasho osho hashi tu ningifa tu kale tu na eliudo la yela noha kala vali e tu hokwa.

19. Nonande inatu wanenena nohatu twikile okunyona, omolwashike hatu dulu okukala twa hafa?

¹⁹ Oshoshili kutya otu na okutwikila okunyona, molwaashi inatu wanenena. Ashike ohatu dulu okuhekelekwa keendjovo odo tadi hangwa membo Insight on the Scriptures, embo 2, epandja 771, odo tadi ti: “Jehova oku na onghenda noku shii ounghundi wopambelela wovapiya vaye. Inava pumbwa okukala va nyika oluhodi efimbo keshe, molwaashi inava wanenena nohava ningi omapuko. (Eps. 103:8-14; 130:3) Ngeenge ova ningi ngaashi tava dulu va kale metwokumwe neendjila daJehova, otava dulu okukala va hafa. (Fil. 4:4-6; 1 Joh. 3:19-22).” Osho itashi tu pameke tuu!

20. Oshike hatu ka kundafana moshitukulwa tashi shikula ko?

²⁰ Otwa pandula neenghono eshi Jehova e lilongekida oku tu dimina po, ngeenge otwe livele ombedi shili omolwomanyono etu. Ndele ongahelipi hatu dulu okukala hatu dimine po vakwetu ngaashi Jehova? Omeenghedi dilipi edimine po letu la faafana naalo laJehova, nomeenghedi dilipi la yoolokafana? Omolwashike sha fimana okushiiva eyooloko olo? Oshitukulwa tashi shikula ko otashi ka kundafana omapulo oo.