JESUS okwa li e uya okulonga shike kombada yedu? Jesus okwa ti: ‘Ondi na okuudifa evangeli louhamba waKalunga, osheshi olo tuu eli nde li tuminwa.’ (Lukas 4:43) Paife natu ka konakoneni oinima inhe oyo Jesus a li a honga shi na sha nOuhamba waKalunga, oo wa li enenediladilo leudifo laye.

1. Jesus okwa li ta ka nangekwa po a ninge Ohamba. Jesus okwa li e lipopya kondadalunde kutya oye Messias oo a li a udanekwa. (Johannes 4:25, 26) Okwa li yo a ulika kutya oye Ohamba oyo omuprofeti Daniel a li a mona memoniko. Okwa li a lombwela ovayapostoli vaye kutya ota ka kala omutumba ‘kolukalwapangelo loshinge’ nonokutya navo otava ka kala yo komalukalwapangelo pamwe naye. (Mateus 19:28) Jesus okwa li a popya kutya ovo tava ka pangela pamwe naye ove li “okangudu,” nokwa li yo a popya kutya oku na ‘eedi dimwe’ odo dihe fi oshitukulwa shokangudu oko. — Lukas 12:32; Johannes 10:16, OB-1986.

2. Ouhamba waKalunga otau ka pangela pauyuki. Jesus okwa li a ulika kutya Ouhamba waKalunga otau ka xulifa po odino inene yokudina Jehova Kalunga eshi tau ka yapulifa edina laye olo la kala tali shekifwa kuSatana okudja pounashibofa womuEden. (Mateus 6:9, 10) Okwa li a ulika kutya ke na onhondo, molwaashi okwa li ha hongo ovanhu aveshe kutya nee ovalumenhu, ovakainhu, oipuna ile eehepele. Nonande okwa li a tumwa a udifile unene tuu Ovaisrael, okwa li yo ha kwafele Ovasamaria nosho yo ovanhu ovo vehe fi Ovajuda. Ka li e na nandenande olwaamambinga ngaashi ovawiliki vomalongelokalunga vopefimbo laye.

3. Ouhamba waKalunga kawa li tau ka kala oshitukulwa shounyuni. Eshi Jesus a li kombada yedu, opa li omakuyunguto opapolotika. Oshilongo shavo osha li tashi pangelwa kepangelo enailongo. Ndele eshi ovanhu va li tava kendabala oku mu fininika a kufe ombinga moinima yopapolotika, okwa li e va henuka. (Johannes 6:14, 15) Okwa li a lombwela omunapolotika umwe a ti: “Ouhamba wange kau fi womounyuni ou.” (Johannes 18:36) Okwa li yo a lombwela ovashikuli vaye a ti: ‘Kamu fi vomounyuni.’ (Johannes 15:19) Ka li e va pitika va longife oilwifo, nokuli naashi va li va hala oku mu amena. — Mateus 26:51, 52.

4. Kristus ota ka pangela pahole. Jesus okwa li a udaneka kutya ota ka tulumukifa ovanhu nota ka pupaleka omitengi davo. (Mateus 11:28-30) Naasho osho naanaa a li a ninga. Okwa li a yandja omayele opahole notaa longo, oo taa kwafele ovanhu va ungaunge nomupondo noisho, va xwepopaleke omakwatafano avo, va finde ohole yokuhola omaliko nova kale va hafa. (Mateus etukulwa eti-5 fiyo eti-7) Ovanhu okwa li hava kala va manguluka okupopya naye, molwaashi okwa li ha ungaunga navo pahole. Nokuli novanhu ovo va li va dinika ova li hava mbobolokele kuye, molwaashi ova li ve na elineekelo kutya ota ka ungaunga navo pahole nonefimaneko. Okwa li a ulika shili kutya ota ka kala Omupangeli muwa.

Jesus okwa li yo a honga ovanhu shi na sha nOuhamba waKalunga monghedi imwe vali ididilikwedi. Okwa li a longa oikumwifilonga ihapu. Mbela omolwashike Jesus a li a longa oikumwifilonga? Enyamukulo kepulo olo ohatu ke li mona moshileshwa tashi landula ko.

— Oshileshwa eshi osha kanghamena kembo laMateus, Markus, Lukas nosho yo Johannes.

KALUNGA okwa li a pa Jesus eenghono opo a dule okulonga oikumwifilonga oyo ovanhu itava dulu oku i longa. Jesus okwa li a longa oikumwifilonga ihapu, naihapu yomuyo okwa li e i longa moipafi yeemhunga dovanhu. Oikumwifilonga oyo oya li ya ulika kutya Jesus oku na eenghono e dule eemhepo dowii nota dulu okukandula po omikundu odo ovanhu inava wanenena va nyengwa oku di kandula po filufilu. Paife natu ka taleni koihopaenenwa imwe.

Ondjala. Oshikumwifilonga osho Jesus a li a longa tete osho okushitukifa omeva omaviinyu. Oikando ivali, okwa li a palula ovanhu omayovi nomingome neeshi dinini. Peemhito adishe odo mbali oikulya oya li ya wanena ovanhu ndele tapa xupu.

Ouyahame. Jesus okwa li a velula “oudu keshe noungone aushe movanhu.” (Mateus 4:23) Okwa li yo a twikulula ovapofi, a fitulula omatwi eembolo, a velula ovanashilundu nosho yo ovo va li ve na oshinhona. Okwa li yo a velula oingudu noilema. Ka li a nyengwa okuvelula omukifi nande oumwe.

Eenghalo domhepo da nyika oshiponga. Pomhito imwe eshi Jesus novahongwa vaye va li tava tauluka Efuta laGalilea, omwa li mwa tukuluka oshikungulu shinene shomhepo. Osho osha li sha tilifa neenghono ovahongwa vaye. Jesus okwa tala mefuta ndele ta ti: “Mwena, ove u lote.” Opo nee omhepo oya lota. (Markus 4:37-39) Pomhito imwe, Jesus okwa li a enda kombada yomeva efuta fimbo mwa li mu na oshikungulu shinenenene. — Mateus 14:24-33.

Eemhepo dowii. Eemhepo dowii odi na eenghono di dule dovanhu. Ovanhu vahapu ohava nyengwa okukondjifa ovatondi vaKalunga ovo ovakwanyanya. Ndele peemhito dihapu, Jesus okwa li ha lombwele eemhepo dowii di dje mo movanhu, noda li hadi di mo. Jesus ka li ha tila eemhepo odo. Ndele mepingafano naasho, eemhepo dowii oda li di shii kutya Jesus oku na eenghonopangelo noda li hadi mu tila.

Efyo. Osha yukila ko eshi efyo tali ifanwa “omutondi wahauxuuninwa,” molwaashi kape na omunhu ta dulu oku li henuka. (1 Ovakorinto 15:26) Ashike nande ongaho, Jesus okwa li a nyumuna ovafi. Pashihopaenenwa, okwa li a nyumuna omonamati womufiyekadi umwe nosho yo okakadona kamwe oko ovadali vako va li va nyika oluhodi neenghono. Okwa li yo a nyumuna kaume kaye kopofingo Lasarus moipafi yeemhunga dovalilanghali, naasho osha li oshinima sha tongomana molwaashi opa hangwa pa pita omafiku ane lwaapo konima eshi Lasarus a fya. Nokuli novanhu ovo va li ve tonde filufilu Jesus ova li va dimina kutya okwa longa oshikumwifilonga osho. — Johannes 11:38-48; 12:9-11.

Omolwashike Jesus a li a longa oikumwifilonga aishe oyo? Ovanhu aveshe ovo Jesus a li a nyumuna ova ka fya vali. Ndele nande ongaho, oikumwifilonga yaJesus oya li yandja oumbangi wa fimanenena oo kutya, omaxunganeko aeshe matunhula e na sha nepangelo lOhamba yopaMessias otaa ka wanifwa. Kape na omalimbililo kutya Ohamba oyo Kalunga a nangeka po otai dulu okuxulifa po ondjala, ouyahame, eenghalo domhepo da nyika oshiponga, eemhepo dowii nosho yo efyo. Oikumwifilonga yaJesus oya li ya ulika kutya Kalunga okwe mu pa eenghono dokukandula po omaupyakadi aeshe oo.

— Oshileshwa eshi osha kanghamena kembo laMateus, Markus, Lukas nosho yo Johannes.

FIKU limwe, ofimbo Jesus a li omutumba kOmhunda yEemono a taalela kuJerusalem nokotembeli yasho, ovayapostoli vaye vane ova li ve mu pula shi na sha noinima yonhumba oyo a li e va lombwela. Okwa hangwa ashike opo e va lombwele kutya Jerusalem otashi ka hanaunwa po. Okwa li yo e va lombwela nale kombinga ‘yefimbo lexulilo longhalelo yoinima.’ (Mateus 13:40, 49, NW) Pomhito oyo eshi Jesus a li omutumba kOmhunda yEemono, ovayapostoli ova li ve mu pula tava ti: “[Oshike] tashi ka kala edidiliko lokukala po kwoye nolefimbo lexulilo longhalelo yoinima?” — Mateus 24:3, NW.

Jesus okwa li e va lombwela kombinga yoinima oyo ya li tai ka ningwa po fimbo Jerusalem inashi hanaunwa po. Ndele enyamukulo laye ola li yo la kwatela mo omaxunganeko e na sha noiningwanima yomonakwiiwa oyo ya li tai ka kuma ounyuni aushe. Okwa li a xunganeka oiningwanima nosho yo eenghalo odo da li tadi ka kala di li oshitukulwa shedidiliko olo tali ka ulika kutya okwa hovela okupangela meulu. Noitya imwe, edidiliko olo ola li tali ka ulika kutya Jehova Kalunga okwa nangeka po Jesus e li Ohamba yOuhamba wopaMessias oo wa li wa xunganekwa nale. Edidiliko olo ola li yo tali ka ulika kutya Ouhamba wopaMessias ou li pokuxulifa po oukolokoshi nokweeta ombili yashili kombada yedu. Ola li yo tali ka ulika kutya ovanhu ove li momafiku axuuninwa onghalelo yoinima ya kulupa, oyo ya kwatela mo oinima yopalongelokalunga, yopapolotika nosho yo yopanghalafano, nonokutya onghalelo ipe oi li poduka.

Eshi Jesus a li ta yelifa edidiliko lokukala po kwaye e li Ohamba meulu, okwa li a popya kutya otapa ka kala oita yomounyuni aushe, ondjala, omakakamo edu manene nosho omikifi dolutapo. Okwa li a xunganeka kutya oukolokoshi otau ka hapupala nonokutya ovahongwa vaye vashili otava ka udifa onghundana iwa yOuhamba waKalunga mounyuni aushe. Oiningwanima aishe oyo oya li tai ka twala fiyo ‘opoudjuu munene’ oo inau kala ko nande onale. — Mateus 24:21.

Ovashikuli vaJesus okwa li tave ke shi shiiva ngahelipi kutya oudjuu munene ou li poduka? Jesus okwa li e va lombwela a ti: “Lilongeni omafaneko komukwiyu.” (Mateus 24:32) Ngeenge omukwiyu tau hape, osha li edidiliko li liwetikile kutya okwenye oku li popepi. Sha faafana, oiningwanima oyo Jesus a li a xunganeka, oyo ya li tai ka ningwa pefimbo limwe, oya li tai ka kala edidiliko li liwetikile olo tali ulike kutya exulilo ola ehena popepi. Ndele Xe, Jehova Kalunga, oye ashike e shii otundi nefiku lokondadalunde omo oudjuu munene tau ka hovela. Onghee hano, Jesus okwa li a ladipika ovahongwa vaye a ti: ‘Kaleni oupafi, osheshi kamu shii kutya efimbo olo onaini tali uya.’ — Markus 13:33.

— Oshileshwa eshi osha kanghamena kuMateus etukulwa 24 neti-25; Markus etukulwa 13; nosho yo Lukas etukulwa 21.