Ehongo limwe loipupulu ohali etifa po ehongo likwao loipupulu

OMUYAPOSTOLI Paulus okwa li a shangela Ovakriste ovo va li ko pexulilo lefelemudo lotete O.P., a ti: “Lungameni.” Paulus okwa li te va londwele shi na sha nashike? Okwa ti: “Pa ha kale umwe te mu yuulifa ounongo wovanhu nomapukifo ongaho, te likwatelele meenghedinghulu nomoihovelanghono younyuni.” — Ovakolossi 2:8.

Nonande Paulus okwa li a londwela Ovakriste, okudja mokati kefelemudo etivali O.P., Ovakriste vamwe ova li va hovela okulongifa omahongo a dja kovafilosofi vonale opo va yelife eitavelo lavo. Omolwashike mbela? Omolwaashi ova li va hala okupandika kovahongwanhu vomouhamba waRoma, nokungaho ova li ve lidilululifa ovanhu vahapu.

Justin Martyr, umwe womOvakriste va tumbala neenghono, okwa li a itavela kutya Omupopikalelipo waKalunga okwe lihololela nale ovafilosofi Ovagreka fimbo Jesus ine uya kombada yedu. Pakupopya kwaJustin nosho yo kwovahongi ovo va li hava hongo omahongo a fa aye, okuweda mo ounongo wopanhu nosho yo omahongo oipupulu mOukriste okwa ningifa elongelokalunga olo li kale la wapalela ovanhu aveshe.

Onghedi yaJustin Martyr yOukriste oya li ya pondola neenghono mokulidilululifa ovanhu. Ndele okutambula ko ehongo limwe loipupulu okwa etifa po omahongo amwe vali oipupulu nosho yo oinima oyo ya itavelwa kunena kovanhu vahapu kutya oi li omahongo Oukriste. Opo u nyaneke pomutenya omahongo oipupulu a tya ngaho, yelekanifa omauyelele a dja meedjo domauyelele aa taa landula apa naasho Ombibeli tai hongo lela.