Ehongo eti-3: Ovanhu aveshe ovo hava longo ouwa ohava i meulu

Ehongo loipupulu olo ola dile peni?

Pehovelo lefelemudo etivali O.P., konima yefyo lovayapostoli vaJesus, Ovafita vOngeleka vonale ova li va tumbalekwa neenghono. O-New Catholic Encyclopedia (2003), embo 6, epandja 687, oya popya shi na sha nomahongo avo, ya ti: “Ehongo olo la li apeshe ololo kutya omwenyo womunhu oo wa fiya po olutu ohau pewa ondjabi yomeulu diva shimha pa ningwa omakoshokifo onhumba oo a pumbiwa konima eshi omunhu a fya.”

Ombibeli otai hongo shike?

‘Ovanelao ovananheni, osheshi ovo tava ka fyuulula edu.’ — Mateus 5:5.

Nonande Jesus okwa udanekela ovahongwa vaye kutya okwa li te ‘ke va longela onhele’ meulu, okwa li yo a ulika kutya havanhu aveshe ovayuki tava i meulu. (Johannes 3:13; 14:2, 3) Mbela Jesus ka li a ilikana kutya ehalo laKalunga nali wanifwe ‘kombada yedu yo ngaashi meulu’? (Mateus 6:9, 10) Hano osha yela kutya, omuvalu munini wovayuki otau ka pangela pamwe naKristus meulu, ofimbo ongudu inene yovayuki tai ka kala fiyo alushe kombada yedu. — Ehololo 5:10.

Mokweendela ko kwefimbo, ongeleka yopefimbo lonale oya li ya lundulula etaleko layo li na sha nonghandangala oyo tai dana kombada yedu. Mbela osho osha li sha etifa shike? O-The New Encyclopædia Britannica oya ti: “Ongeleka oya enda tai litula pondodo opo pe na okukala Ouhamba waKalunga oo wa kala wa teelelwa.” Ongeleka oya li ya hovela okulinghonopaleka mokukufa ombinga moinima yopapolotika, ya ekelashi eendjovo daJesus da yela odo a li a lombwela ovashikuli vaye a ti kutya ‘kave na okukala vomounyuni.’ (Johannes 15:19; 17:14-16; 18:36) Omolwenwefemo laConstantine omupangeli waRoma, ongeleka oya efa po omahongo ayo amwe, mwa kwatelwa ehongo li na sha nokutya Kalunga omunhu a tya ngahelipi.

Yelekanifa eevelishe dOmbibeli edi: Epsalme 37:10, 11, 29; Johannes 17:3; 2 Timoteus 2:11, 12