Ehongo eti-6: Kalunga okwa hokwa elongifo lomafano nosho yo loihongwafano meilikano
Ehongo loipupulu olo ola dile peni?
O-Cyclopedia of Biblical, Theological, and Ecclesiastical Literature, yaMcClintock naStrong, embo 4, epandja 503 nosho yo 504, oya ti: “Ovakriste vonale kava li hava longifa oihongwafano mokulongela Kalunga kwavo . . . Okutambulwa ko kwoihongwafano mongeleka okwa li kwa yukipalifwa mefelemudo eti-4 neti-5, taku tiwa kutya osha ningwa nelalakano opo ovanhu ovo vehe shii sha va dule okulihonga eeshili dOukriste koihongwafano ponhele yokulihonga momaudifo ile momambo.”
Ombibeli otai hongo shike?
“Ino lihongela oshihongwafano ile efano lashi shi li kombada meulu ile lashi shi li poshi yedu, ile lashi shi li momeva koshi yedu. Ino linyongamena moipafi yavo ndee ino i longela.” (Exodus 20:4, 5) Omuyapostoli Johannes okwa li a shangela Ovakriste vomefelemudo lotete a ti: “Ovamwange, livangekeni oikalunga!” — 1 Johannes 5:21.
Mbela oihongwafano oi li ashike oupitilo wokupopya nomunhu oo i lile po noku mu fimaneka, ngaashi eengeleka hadi ti? O-The Encyclopedia of Religion oya ti: “Tete oihongwafano otashi dulika ashike ya li ya nuninwa [okuhonga] nokufeweka, osho osho sha li omalipopilo a longifwa opo ku yukipalifwe okulongifwa kwayo. Ndele diva oihongwafano oya li hai fimanekwa nokwiilikanwa. Osho oshoshili unene tuu shi na sha noihongwafano oyo ya li ya ninga oshitukulwa sha fimana shelongelokalunga lOvaortodoks vokOushilo.” Ashike omuprofeti Jesaja okwa li a pula a ti: “Omwa hala okuyeleka Kalunga nalyelye, nomwa hala mu mu fafanife nalyelye?” — Jesaja 40:18.
Yelekanifa eevelishe dOmbibeli edi: Jesaja 44:13-19; Oilonga 10:25, 26; 17:29; 2 Ovakorinto 5:7
OSHILI OYOYO KUTYA:
Kalunga ina hokwa elongifo lomafano nosho yo oihongwafano
EKELASHI OMAHONGO OIPUPULU, DIININA OSHILI
Mbela ohatu dulu okufika pexulifodiladilo lilipi eshi twa konakona pauxupi kombinga yomahongo oipupulu oo haa hongwa natango meengeleka dihapu? “Eengano [mOshigreka, my ʹthos] da totwa nounongo” itadi dulu okuyelekanifwa neeshili dOmbibeli di li paunafangwa notadi hekeleke. — 2 Petrus 1:16.
Onghee hano, konakona noukeka Eendjovo daKalunga, ino ongaonga okuyelekanifa osho wa hongwa noshili yEendjovo daKalunga. (Johannes 17:17) Opo nee oto ka wanifilwa eudaneko eli tali ti: “Tamu ka shiiva oshili, noshili otai mu mangulula.” — Johannes 8:32.