“Nandi pewe mo vali okahalasha kamwe”

ALLEN okwa li a hovela okunwa oikunwa yoalkoholi sha pitilila eshi a li e na omido 11.a Allen nookaume kaye ova li hava ka danauka moluxwa tava hopaenene ovanhu ovo hava mono meefilima. Oinima oyo hai ningwa kovadani veefilima oyo va li tava hopaenene kai fi yoshili, ndele oikunwa yoalkoholi oyo va li hava nu oyolela.

Eshi Tony a li e na omido 40 okwa li ha nu okahalasha kamwe ile vavali onguloshi keshe, ndele konima yefimbo okwa ka hovela okukala ha nu ouhalasha vatano ile vahamano. Hauxuninwa, ka li vali e shii kutya oha nu ouhalasha vangapi momukokomoko wefiku.

Allen okwa li a konga ekwafo li na sha noupyakadi waye wokunwa sha pitilila. Ndele Tony ka li a tambula ko ekwafo olo a li a pewa koukwaneumbo wavo nosho yo kookaume kaye ovo va li ve mu hole. Allen oku li momwenyo natango, nokwa dula okuhokolola kombinga yondjokonona yaye, ofimbo Tony a fila moshiponga shohauto omido donhumba da pita eshi a li a nwa sha pitilila.

Nokuli nonande omunhu oha nu sha pitilila oye aeke, okunwa kwaye hauxuuninwa ohaku ka kuma vamwe, naluhapu ohaku eta oilanduliko ya nyika oshiponga.b Okulongifa nai oikunwa yoalkoholi luhapu oko haku ningifa omunhu a longife nai elaka, a hepeke vamwe palutu, ohaku etifa yo omaponokelo nomadipao, oiponga yoihauto noyokoilonga nosho yo omaupyakadi mahapu e na sha noukolele. Okunwa sha pitilila ohaku pula omaulikumwe ovanhu oimaliwa ihapu neenghono omudo keshe, kakele kaasho, ohaku etele yo oohandimwe, omaukwaneumbo nosho yo ounona omaupyakadi opamaliudo.

Ehangango lOundjolowele lOpashiwana lokOilongo yaHangana ola ti: “Havanhu aveshe ovo hava nu pandjikilile ve na oupyakadi wokunwa sha pitilila, na haembuvi adishe hadi nu efiku keshe.” Ovanhu vahapu ovo vehe fi eembuvi ohava hovele okunwa sha pitilila nopehe na oku shi didilika. Ovanhu vamwe ohava nu omalufe, ndele ohava nu ouhalasha ve dule puvatano poshikando.

Ngeenge owa hoolola okunwa oikunwa yoalkoholi, oshike tashi ka ulika kutya oto nu sha pitilila? Ongahelipi to dulu okushiiva kutya ino pumbwa “vali okahalasha kamwe”? (Omayeletumbulo 23:29, 30, Contemporary English Version) Oitukulwa tai landula otai ka kundafana ouyelele tau kwafa kombinga yoshinima osho.

[Omashangelo opedu]