Eulu onhele ya tya naanaa ngahelipi?
OVANHU vamwe ohava diladila kutya itatu dulu okushiiva kutya eulu onhele ya tya ngahelipi, molwaashi kape na oo a dile mo meulu e tu lombwele kutya ola tya ngahelipi. Otashi dulika va dimbwa kutya Jesus okwa tile: “Ame [onda] dja keulu.” (Johannes 6:38) Jesus okwa li yo a lombwela ovawiliki vomalongelokalunga vamwe, a ti: “Nye ovopedu, Aame owopombada.” (Johannes 8:23) Mbela Jesus okwa ti shike kombinga yeulu?
Jesus okwa koleka kutya Jehova oha kala meulu. Okwa popya shi na sha naJehova e li ‘Tate womeulu.’ (Mateus 12:50) Ashike Jesus okwa li yo a longifa outumbulilo eulu ta ulike koinima imwe i lili. Pashihopaenenwa, okwa li a popya evalelwa li li ‘eulu’ eshi a ti: “Taleni eedila dokeulu.” (Mateus 6:26) Ndele Jehova iha kala mevalelwa. Ombibeli otai ti: “Ye oku li omutumba kombada yongonga yedu.” — Jesaja 40:22.
Mbela ‘Tate womeulu’ oha kala mokati keenyofi? Omishangwa Diyapuki oda ti yo kutya evalelwa nalo “eulu.” Pashihopaenenwa, omushangi umwe wepsalme okwa ti: “Ngenge handi tale keulu, koshilongwa shominwe doye, kohani nokeenyofi, edi wa shita, omunhu omushike, eshi ho mu dimbulukwa, nomona womunhu eshi ho mu file oshisho?” — Epsalme 8:3, 4.
Jehova Kalunga iha kala mevalelwa olo hatu mono nomesho ngaashi ashike omuhongi woipilangi ita dulu okukala moshikopa oyo a honga. Onghee hano, eshi ohamba Salomo ya li tai yapulile Jehova otembeli muJerusalem, okwa li ya tya: ‘Kalunga ta kala tuu kombada yedu? Taleni, eulu, heeno, eulu lopombadambada itali mu wanene, hano unene ngahelipi ongulu ei ame nde i tunga.’ (1 Eehamba 8:27) Ngeenge Jehova iha kala mevalelwa olo tu wete nomesho, oha kala meulu lilipi hano?
Nonande ovanhu ohava konakona oinima oyo i li mevalelwa tava longifa omafano opashinanena e na eenghono nohaa dulu okutala kokule, Ombibeli oya popya oshili eshi ya ti: “Kape na ou a mona Kalunga nande.” (Johannes 1:18) Jesus okwa yandja etomheno kutya omolwashike itatu dulu okumona Kalunga, a ti: “Kalunga Oye Omhepo.” — Johannes 4:24.
Olutu lopamhepo oli dule kokule omalutu opambelela. Olutu lopamhepo inali tungwa po koinima ngaashi ombelela nohonde oyo hai monika nomesho ile hai dulu okukumwa kovanhu. Onghee hano, eshi Jesus a ti kutya okwa li ha kala pamwe naXe “meulu,” okwa li a hala okutya okwa li e na onghalamwenyo ya denga mbada neenghono meulu. (Johannes 17:5; Ovafilippi 3:20, 21) Onhele yoishitwa yopamhepo omo Jesus kwa li ha kala naXe otai popiwa kOmbibeli kutya “eulu.” Mbela eulu onhele ya tya ngahelipi? Ohamu longwa shike?
Eulu onhele yomalipyakidilo mahafifa
Ombibeli oya popya kutya eulu olo onhele omo mu na omalipyakidilo mahapu. Oya popya kombinga yoishitwa yopamhepo idiinini omamiliyona omafele oyo hai kala meulu. (Daniel 7:9, 10) Oshishitwa shopamhepo keshe shomoishitwa oyo oshi na omaukwatya asho a yooloka ko kuikwao. Mbela osho otu shi shii ngahelipi? Ngeenge otwa tale keshito olo tu wete nomesho, kamu na oinima ya faafana filufilu, onghee hano, ohatu dulu okukala noushili kutya oishitwa yomeulu nayo oya yoolokafana filufilu. Shihokwifa, oishitwa yomeulu aishe ohai longele kumwe, naasho osha ningifa pa kale pe na etongoko la kula pokati keulu nedu, molwaashi ovanhu ovo ve li kedu ihava longele kumwe lela.
Tala kwaasho Ombibeli tai popi shi na sha noilonga oyo hai longwa meulu, ya ti: “Ovaengeli vaye nye, hambeleleni Omwene, ovaladi ovanaenghono nye, oonakuwanifa vondaka yaye, ava hamu dulika kelombwelo leendjovo daye! Eengudu dovakwaita vaye amushe, hambeleleni Omwene, ovapiya vaye nye, ava hamu wanifa ehalo laye.” (Epsalme 103:20, 21) Hano meulu ohamu longwa oilonga ihapu nohatu dulu okukala noushili kutya oilonga yamo oihafifa.
Ovaengeli ova kala tava hafele oilonga iwa nokuli fimbo edu inali shitwa. Ombibeli otai ti kutya eshi Jehova a shita edu ovanamati vaye ova “hafa mumwe” nova li va “nyakukwa.” (Job 38:4, 7) Umwe womovanamati vaKalunga okwa li nokuli e na oufembanghenda wokulonga pamwe naKalunga mokushita oinima ikwao aishe. (Ovakolossi 1:15-17) Ehokololo olo lihokwifa li na sha noilonga yomeulu ihafifa otali dulu oku ku ningifa u diladile kombinga yomapulo vali amwe e na sha neulu nosho yo ovanhu.
Ovanhu ova li ngoo va shitwa nelalakano lokuya meulu?
Molwaashi ovaengeli ova kala tava longele Kalunga okudja nale nokuli nofimbo edu la li inali shitwa, kungaho osha yela kutya omulumenhu nomukainhu wotete kava li va shitwa nelalakano lokuyadifa eulu. Ponhele yaasho, Kalunga okwa li a lombwela ovalihomboli votete a ti: “Dalafaneni nokuhapupala ndee yadifeni edu.” (Genesis 1:28; Oilonga 17:26) Adam oye a li omunhu wotete kombada yedu oo a li ta dulu okushiiva Kalunga noku mu longela noudiinini. Okwa li ta ka kala xekulululwa yovanhu aveshe ovo tava ka kala kombada yedu. Ombibeli oya ti: “Eulu olo olOmwene, ndelenee edu okwe li pa ovana vovanhu.” — Epsalme 115:16.
Ovanhu ihava kala nandenande va hala okufya, molwaashi efyo kali fi oshinima shopaushitwe. Kalunga okwa li a popya kutya Adam ota ka pewa ashike ehandukilo lefyo ngeenge ina dulika kuye. Ngeno Adam okwa dulikile kuKalunga, ngeno ina fya nandenande. — Genesis 2:17; Ovaroma 5:12.
Itashi kumwifa eshi Kalunga a li ina lombwela sha Adam kombinga yokuya meulu. Edu kali fi onhele yomalolelo oko ovanhu hava talwa ngeenge ova wana okuya meulu ile hasho. Onghee hano, ovanhu ova li va shitwa va kale nomwenyo fiyo alushe kombada yedu, na Kalunga ota ka wanifa po elalakano laye olo. Ombibeli oya udaneka kutya “ovayuki, vo otava ka fyuulula [edu, OB-1986], ndee tava kala mo alushe.” (Epsalme 37:29) Osha yela kutya ovanhu kava li va shitwa nelalakano lokuya meulu. Ndele mbela omolwashike Jesus a li a udanekela ovayapostoli vaye omwenyo womeulu? Mbela Jesus okwa li a hala okutya ovanhu aveshe ovo hava longo ouwa otava i meulu?