Mbela ovanhu aveshe ovo hava longo ouwa ohava i ngoo shili meulu?
KONIMA eshi Jesus a lya ouvalelo waye waxuuninwa pamwe novayapostoli vaye fimbo ina dipawa, okwa li e va udanekela kutya ote ke va longekidila onhele meulu. Okwa ti: “Meumbo laTate omu na [eendjuwo] dihapu, ndele ngeno kapa li ngaha, ngeno handi mu lombwele, ohandi ke mu longela onhele.” (Johannes 14:2) Mbela omolwashike Jesus a li ta ka longekidila ovayapostoli vaye onhele meulu? Otava ka ninga shike meulu?
Jesus okwa li e na momadiladilo oshinakuwanifwa she likalekelwa osho a li ta ka pa ovahongwa vaye. Okwa popya vali onguloshi oyo tuu oyo, a ti: “Onye tuu ava mwa kala puame momayeleko ange, osheshi Ame ohandi mu tokolele, ongaashi Tate a tokolela nge, ouhamba.” (Lukas 22:28, 29) Kalunga okwa li a udanekela Jesus kutya ota ka ninga Ohamba oyo tai ka wanifa po omhumbwe inene yovanhu, sha hala okutya, ta ka kala omupangeli muwa. Jesus ota ka xulifa po okumona oixuna nota ka hanauna po ovo hava hepeke vakwao. Nonande ovapangelwa vaJesus otava ka kala ‘fiyo okexulilo ledu,’ oshipangelapundi shaye otashi ka kala meulu. — Epsalme 72:4, 8; Daniel 7:13, 14.
Ashike Jesus ita ka pangela oye aeke, nomolwaasho a li a udanekela ovayapostoli vaye onhele meulu. Ovayapostoli vaye ovo ovahoololwa votete vomwaavo tava ka ‘pangela kombada yedu.’ — Ehololo 5:10.
Mbela ovanhu vangapi tava i meulu? Ngaashi ashike shi li mepangelo keshe, ovapangeli vOuhamba waKalunga womeulu ovanini momuvalu okuyelekanifa novapangelwa vOuhamba. Jesus okwa popya shi na sha naavo tava ka pangela pamwe naye a ti: “Ino tila, okangudu ove, osheshi Xo a hala oku mu pa ouhamba.” (Lukas 12:32) Hauxuuninwa, omuvalu ‘wokangudu’ oko owa li tau ka kala 144 000. (Ehololo 14:1) Omuvalu oo omunini okuyelekanifa novanhu omamiliyona ovo tava ka kala nomwenyo fiyo alushe kombada yedu ve li ovapangelwa ovadiinini vOuhamba. — Ehololo 21:4.
Onghee hano, havanhu aveshe ovo hava longo ouwa hava i meulu. Pashihopaenenwa, omuyapostoli Petrus okwa popya sha yela shi na sha nohamba David oyo ya li hai longo ouwa, a ti: “David haye a londele meulu.” (Oilonga 2:34) Johannes Omuninginifi naye okwa li ha longo ouwa. Ndele nande ongaho, Jesus okwa li a popya kutya Johannes ita ka yelwa a ka pangele e li ohamba meulu. Okwa ti: “Muava va dalwa kovakainhu kaku nomunene e dule Johannes [Omuninginifi, NW]; ndele ou munini e dulike kuaveshe mouhamba womeulu, oye e mu dule.” — Mateus 11:11.
Mbela naave oto ka mona ngoo ondjabi oyo tai ka pewa ovo hava longo ouwa?
Mbela omunhu oku na okuninga shike opo a ka mone ondjabi yomwenyo waalushe kombada yedu? Jesus okwa ti: “Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Johannes 3:16) Didilika kutya ohole yaKalunga yokuhola ounyuni oyo ye shi ningifa tashi shiiva opo ovanhu aveshe va dule oku ka mona omwenyo waalushe, ndele ovo ve na ‘eitavelo’ tali longo ovo aveke tava ka pewa ondjabi oyo.
Otwa pumbwa okukala tu na eitavelo le likolelela keshiivo lashili. (Johannes 17:3) Oto dulu okuulika kutya oho longo ouwa mokulihonga shihapu kombinga yelalakano laJehova li na sha novanhu. Eitavelo loye mwaasho to lihongo nali ku linyengife u katuke eenghatu. Kala wa shilipalekwa kutya omhito yoku ka mona omwenyo waalushe oye ku yeulukila shili.
[Oshimhungu pepandja 7]
Ombibeli otai ti ngahelipi?
Epulo:
Oshike hashi ningilwa ovanhu ovo hava longo ouwa ngeenge va fi?
Enyamukulo:
‘Oonakufya inava shiiva nande sha.’ — OMUUDIFI 9:5.
Epulo:
Ovanhu ovo hava longo ouwa ove na eteelelo lilipi li na sha nonakwiiwa?
Enyamukulo:
‘Efimbo tali uya, opo aveshe ava va kala meembila otava udu ondaka [yaJesus]. Ndee tava holoka mo.’ — JOHANNES 5:28, 29.
Epulo:
Ovanhu vahapu ovo hava longo ouwa otava ka kala peni?
Enyamukulo:
‘Ovayuki, vo otava ka fyuulula [edu, OB-1986], ndee tava kala mo alushe.’ — EPSALME 37:29.