Okweenda momhepo otaku tu kwafele tu kale metwokumwe neliyapulo letu
“Kaleni nokweenda mOmhepo, onye noitamu wanifa vali ouhalu wombelela.” — GAL. 5:16.
1. Omaninginifo elipi a li a ningwa mefiku lOpentekoste?
OVASHIKULI vaJesus ova li va popya omalaka e lili noku lili mefiku lOpentekoste 33 O.P., konima eshi va ninginifwa nomhepo iyapuki. Ova li va longifa eeshalinghenda domhepo dopashikumwifilonga. (1 Kor. 12:4-10) Mbela eeshalinghenda odo nosho yo oshipopiwa osho sha li sha yandjwa komuyapostoli Petrus oya li ya etifa oidjemo ilipi? Ovanhu vahapu ova li va ‘tuwa komitima.’ Eshi Petrus a li e va ladipika, ova li ve lidilulula nokuninginifwa. Ombibeli oya ti: ‘Ava va tambula nehafo eendjovo daye ova ninginifwa, mefiku olo mwa wedelwa ovanhu ve fike pomayovi atatu.’ (Oil. 2:22, 36-41, yelekanifa no-NW.) Ova li va ninginifwa momeva medina laXe nolOmona nolomhepo iyapuki, ngaashi Jesus a popya. — Mat. 28:19.
2, 3. (a) Yelifa eyooloko pokati kokuninginifwa nomhepo iyapuki nosho yo okuninginifwa medina lomhepo iyapuki. (b) Omolwashike aveshe ovo hava ningi Ovakriste vashili kunena ve na okuninginifwa momeva?
2 Ndele mbela ope na eyooloko pokati kokuninginifwa nomhepo iyapuki nosho yo okuningifwa medina lomhepo iyapuki? Heeno, ope na eyooloko. Ovo va ninginifwa nomhepo iyapuki ova dalululwa va ninga ovana vaKalunga va vaekwa nomhepo. (Joh. 3:3) Ova vaekwa va ka ninge eehamba nosho yo ovapristeri mOuhamba waKalunga womeulu, nove li oshitukulwa sholutu lopamhepo laKristus. (1 Kor. 12:13; Gal. 3:27; Eh. 20:6) Onghee hano okudja pOpentekoste, Jehova okwa kala ta ninginifa oohandimwe nomhepo iyapuki ovo a hoolola va ka pangele pamwe naKristus. (Rom. 8:15-17) Ndele mbela ongahelipi shi na sha nokuninginifwa momeva medina lomhepo iyapuki oko haku ningwa pandjikilile poyoongalele yoshiwana shaJehova kunena?
3 Ovakriste vashili ohava ninginifwa momeva opo va ulike kutya ove liyapulila Jehova Kalunga oye aeke. Ovo ve na eifano lomeulu navo ohava ninginifwa yo momeva. Ashike ovanhu omamiliyona kunena ovo ve na eteelelo loku ka kala fiyo alushe kombada yedu navo ove na yo okuninginifwa momeva. Opo ovanhu va kale va hokiwa kuKalunga, ove na okuninginifwa momeva medina laXe, nolOmona nolomhepo iyapuki, kashi na nee mbudi kutya ove na eteelelo lilipi. Onghee hano, Ovakriste aveshe ovo va ninginifwa monghedi ya tya ngaho ove na ‘okweenda momhepo.’ (Lesha Ovagalati 5:16.) Mbela oho ende ngoo momhepo opo u dule okukala metwokumwe neliyapulo loye?
‘Okweenda momhepo’ osha hala okutya ngahelipi?
4. ‘Okweenda momhepo’ otashi ti naanaa shike?
4 ‘Okweenda momhepo’ osha kwatela mo okutambula ko ewiliko lomhepo iyapuki, sha hala okutya, okweefa i ku nwefe mo. Noitya imwe, otashi ti okuwilikwa komhepo iyapuki mukeshe osho to ningi efiku keshe. Ovagalati etukulwa eti-5 ova popya eyooloko olo li li pokati kokukala hatu wilikwa komhepo iyapuki nosho yo kombelela. — Lesha Ovagalati 5:17, 18.
5. Opo tu wilikwe komhepo iyapuki otwa pumbwa okuhenuka oilonga yombelela ilipi?
5 Omunhu oo ha wilikwa komhepo iyapuki oha henuka oilonga yombelela. Oilonga yombelela oya kwatela mo oinima ngaashi “oluhaelo, oihole, onyata, okukalela olwisho loipala, oukalele woikalunga, oundudu, etondafano, eemhata, oukodi, ehandu, omashilafano, [omaliyalafano], oimhanga; efupa, omadipao, oukolwe, eenhingo.” (Gal. 5:19-21) Mokuhenuka oilonga ya tya ngaho oto ‘dipaifa oilonga yolutu komhepo.’ (Rom. 8:5, 13) Oshiwa okudiladila kombinga yoinima yopamhepo nokukala metwokumwe newiliko layo, ponhele yokweefa u pangelwe komahalo opambelela.
6. Yelifa to yandje efaneko kutya otwa pumbwa okuninga shike opo tu imike oiimati yomhepo.
6 Oto ka kala u na omaukwatya opakalunga, sha hala okutya, ‘oiimati yomhepo,’ ngeenge owa kala to wilikwa komhepo iyapuki. (Gal. 5:22) Ndele osho otashi pula okuninga eenghendabala. Oku shi faneka, natu tye nee ngeno omunepya okwa lima epya laye. Ndele opo a mone eteyo liwa oikunomwa yaye oya pumbwa eenhe detango nosho yo omeva. Ohatu dulu okuyelekanifa omhepo iyapuki neenhe detango. Otwa pumbwa omhepo iyapuki opo tu imike oiimati yomhepo. Ndele mbela omunepya ota ka teya sha ngoo ngeenge ina longa noudiinini? (Omayel. 10:4) Okulonga edu lopafaneko lomutima woye oko taku ka ufa kutya oto ka imika oiimati yomhepo iyapuki i fike peni noi na ongushu ya tya ngahelipi. Onghee hano, lipula kutya: ‘Mbela ohandi efa ngoo omhepo iyapuki i imike mwaame oiimati yayo mokukala handi longele kumwe nayo?’
7. Omolwashike okukonakona nokudilonga kwa fimanenena ngeenge omunhu okwa hala okwiimika oiimati yomhepo iyapuki?
7 Opo omunepya a mone eteyo liwa, okwa pumbwa yo okutekela oikunomwa yaye. Sha faafana, opo tu imike oiimati yomhepo, otwa pumbwa omeva oshili yOmbibeli, oo haa yandjwa kunena okupitila meongalo lopaKriste. (Jes. 55:1) Otashi dulika wa kwafela ovanhu vahapu va mone kutya Omishangwa Diyapuki oda nwefwa mo komhepo iyapuki. (2 Tim. 3:16) Ongudu yomupiya omudiinini nomunaendunge nayo ohai tu kwafele tu ude ko omeva a koshoka oshili yOmbibeli. (Mat. 24:45-47) Onghee hano, osha yela kutya opo tu kale hatu wilikwa komhepo iyapuki, otu na okukala hatu lesha nokudilonga kEendjovo daKalunga. Ngeenge osho ho ningi ngaho, oto landula oshihopaenenwa shiwa shovaprofeti ovo va li va ‘konga nova konakona’ ouyelele oo va li ve na. Oshididilikwedi eshi novaengeli va li va ulika ohokwe inene mokulihonga eeshili dopamhepo di na sha nOludalo olo la li la udanekwa nosho yo eongalo lOvakriste ovavaekwa. — Lesha 1 Petrus 1:10-12.
Omhepo iyapuki otai dulu oku tu wilika ngahelipi?
8. Omolwashike sha fimanenena okupula Jehova e tu pe omhepo yaye?
8 Opo tu wilikwe komhepo iyapuki, katu na ashike okulesha nokudilonga kOmishangwa. Otwa pumbwa okukala hatu pula ekwafo kuJehova nosho yo ewiliko laye. Jehova ota dulu “okulonga shihapuhapu kombada yaai hatu i indile nohatu i diladila.” (Ef. 3:20; Luk. 11:13) Mbela oto ka nyamukula ngahelipi ngeenge umwe okwe ku pula ta ti: “Omolwashike ndi na okukala handi pula ekwafo kuKalunga ngeenge oku shii nale ‘osho twa pumbwa fimbo inatu mu indila’?” (Mat. 6:8) Omolwaashi ngeenge to ilikana kuJehova to mu pula e ku pe omhepo yaye iyapuki, oto ulike kutya owe mu lineekela. Pashihopaenenwa, ngeenge umwe okwe uya oku ku pula ekwafo, oto ka ninga keshe osho to dulu opo u mu kwafele molwaashi okwe ku pula ekwafo, nokungaho ota ulike kutya okwe ku lineekela. (Yelekanifa Omayeletumbulo 3:27.) Sha faafana, Jehova oha kala a hafa ngeenge to mu pula omhepo yaye, note ke i ku pa. — Omayel. 15:8.
9. Ongahelipi okukala pokwoongala kwopaKriste taku ke ku kwafela u wilikwe komhepo yaKalunga?
9 Onghedi imwe natango omo to dulu okuwilikwa komhepo yaKalunga oya kwatela mo okwoongala nosho yo oyoongalele inini naai ya kula. Osha fimanenena okuninga eenghendabala okukala hatu kala pokwoongala nopoyoongalele nosho yo okukala hatu yandje elitulemo kwaasho tashi kundafanwa po. Okuninga ngaho otaku ku kwafele u ude ko “oinima yomoule yaKalunga.” (1 Kor. 2:10, NW) Oshi na yo ouwa okukala ho yandje omatyekosha pandjikilile pokwoongala. Diladila kombinga yokwoongala keshe oko wa li puko oivike ine ya pita. Mbela owa li wa ulika lwoikando ingapi pokwoongala, u yandje omanyamukulo opo u hepaulule eitavelo loye? Mbela ou wete wa pumbwa okuxwepopala moshinima osho? Ngeenge osho, tokola kutya oto ka ninga po shike moivike yokomesho. Jehova ota ka didilika eenghendabala doye odo to ningi nehalo liwa opo u kale ho kufa ombinga pokwoongala note ke ku pa omhepo yaye iyapuki, oyo tai ke ku kwafela u mone ouwa muhapu pokwoongala.
10. Okweenda momhepo okwa kwatela mo okushiva vamwe neshivo lilipi?
10 Okweenda momhepo okwa kwatela mo okutambula ko eshivo olo li li mEhololo 22:17, tali ti: “Omhepo nomuvalekwa otava ti: Ila! Naou te shi udu, na tye: Ila! Naou ta fi enota, ne uye, naou a hala, na tambule omeva omwenyo oshali.” Omhepo otai tu shivi okupitila mongudu yomuvalekwa tu uye tu nwe omeva omwenyo. Ngeenge owa tambula ko eshivo olo kutya “ila,” mbela naave owa tokola okushiva vamwe to ti: “Ila!”? Oshi li oufembanghenda okukufa ombinga moilonga oyo tai xupifa eemwenyo.
11, 12. Omhepo iyapuki otai dana onghandangala ilipi moilonga yokuudifa?
11 Oshilonga sha fimanenena shokushiva ovanhu otashi longwa mewiliko lomhepo iyapuki. Ombibeli otai hokolola nghee omhepo iyapuki ya li ya dana onghandangala mefelemudo lotete opo ovatumwa va dule oku ka udifila koitukulwa ipe. Omuyapostoli Paulus nosho yo ovalongi pamwe naye ova li va kelelwa ‘komhepo iyapuki vaha udife ondjovo muAsia’ nova li yo va indikwa okuya kuBitinia. Katu shii kondadalunde kutya omhepo iyapuki oya li ye va kelela ngahelipi vaha ye keenhele odo, ndele osha yela kutya omhepo iyapuki oya li ya twala Paulus mepya linene laEuropa. Paulus okwa li a mona memoniko omulumenhu wokuMakedonia te mu pula ekwafo. — Oil. 16:6-10.
12 Omhepo yaJehova otai wilike yo oilonga yokuudifa mounyuni aushe kunena. Jehova iha yandje vali ewiliko okupitila momamoniko opashikumwifilonga, ndele ponhele yaasho, oha wilike ovavaekwa okupitila momhepo yaye iyapuki. Omhepo oyo ohai linyengifa yo ovamwatate nosho yo ovamwameme va ninge keshe osho tava dulu mokuudifa nokuhonga ovanhu. Nopehe na omalimbililo, naave oho kufa ombinga moilonga oyo ya fimanenena. Oto dulu okumona ehafo linene moilonga itunhula ya tya ngaho.
13. Ongahelipi to dulu okudulika kewiliko lomhepo iyapuki? Shi yelifa.
13 Oto dulu okudulika kewiliko lomhepo iyapuki mokutula moilonga ouyelele oo hau pewa oshiwana shaKalunga. Natu ka tale koshihopaenenwa shi na sha naMihoko wokuJapani. Molwaashi okwa li omukokolindjila mupe, okwa li ha kala e wete ina pyokoka okuninga omalishuneko nokwa li e udite kutya iha popi monghedi oyo tai dulu okupendula ohokwe yomuneumbo. Pefimbo opo tuu opo, okwa li a mona omaetepo mawa e na sha nanghee ta dulu okuninga omalishuneko e li pauxupi mokafo Oukalele Wetu wOuhamba. Opo nee, opa li pa nyanyangidwa okabroshure A Satisfying Life — How to Attain It. Okabroshure oko oka li haka pondola neenghono moshitukulwa shOvajapani. Mihoko okwa li a tula moilonga omaetepo e na sha nanghee e na okuyandja okabroshure oko, unene tuu oo e na sha nokuninga omalishuneko e li pauxupi. Diva konima yaasho, okwa li a hovela omakonakonombibeli novanhu ovo tashi dulika va li inava tambula ko nale ekonakonombibeli. Mihoko okwa ti: “Onda li ndi na ovakonakonimbibeli vahapu, handi konakona novanhu 12 pefimbo limwe, nonda li ndi na okulombwela vamwe va teelele manga fiyo ohandi mono omhito yokukonakona navo.” Ngeenge oho ende momhepo, sha hala okutya, ho tula moilonga omalombwelo oo Jehova ha pe ovapiya vaye, oto ka mona ouwa muhapu neenghono.
Kala we lineekela omhepo yaKalunga
14, 15. (a) Ovanhu inava wanenena mbela otava dulu ngoo okukala metwokumwe neliyapulo lavo? (b) Ongahelipi to dulu okumona ookaume ovo va denga mbada?
14 U li omukalele a yapulwa, ou na okuwanifa po oukalele woye. (Rom. 10:14) Otashi dulika u kale u udite ino wana filufilu okuwanifa po oshinakuwanifwa osho. Ndele Kalunga oye he tu kwafele tu kale twa wana, ngaashi ashike ha kwafele ovavaekwa. (Lesha 2 Ovakorinto 3:5.) Oto dulu okukala metwokumwe neliyapulo loye mokuninga ngaashi to dulu nosho yo mokukala we lineekela ekwafo lomhepo yaKalunga.
15 Tu li ovanhu inava wanenena, kashipu okukala metwokumwe neliyapulo letu olo twe liyapulila Kalunga ketu Jehova oo a wanenena. Oupyakadi umwe oyoo kutya vamwe ovo kwa li ho endafana navo nale otava ka kala va kuminwa onghedi yoye ipe yokukalamwenyo notashi dulika ‘ve ku sheke.’ (1 Pet. 4:4) Ndele ino dimbwa oushili oo kutya owa panga oukaume mupe novanhu vavali ovo va fimanenena, Jehova naJesus Kristus. (Lesha Jakob 2:21-23.) Osha fimanenena yo okushiiva ovamwaxo vomeongalo leni, ovo ve li oshitukulwa ‘shoukumwe aushe wovamwatate’ mounyuni aushe. (1 Pet. 2:17, NW; Omayel. 17:17) Jehova ote ke ku kwafela okupitila momhepo yaye u pange oukaume muwa naavo tava ka twikila oku ku nwefa mo nawa.
16. Omolwashike to dulu ‘okuhokwa oungone’ ngaashi Paulus?
16 Nonande ou kale u na ookaume meongalo ovo hava dulu oku ku kwafela, otashi dulika u mone shidjuu okuungaunga nomaupyakadi efiku keshe. Oupyakadi oo to ungaunga nao omafimbo amwe otashi dulika u ku ningife u kale u udite wa kana, wa fa wa wila membulukwena lile lomaupyakadi. Pefimbo la tya ngaho, opo naanaa u na okupula ekwafo lomhepo iyapuki yaJehova. Omuyapostoli Paulus okwa ti: “Ngenge ndi li oshingone, aame omunaenghono.” (Lesha 2 Ovakorinto 4:7-10; 12:10.) Paulus okwa li e shi shii kutya omhepo yaKalunga otai dulu oku tu pameka nonande otu na omaunghundi opanhu, kashi na nee mbudi kutya okwa tya ngahelipi. Kungaho, eenghono daKalunga tadi longo otadi dulu oku ku pameka ngeenge u udite wa nghundipala nowa pumbwa ekwafo. Paulus okwa ti: “Nda hokwa oungone.” Okwa li ha kala e wete omhepo iyapuki tai mu kwafele ngeenge e udite a nghundipala. Naave osho to dulu okukala u udite ngaho. — Rom. 15:13.
17. Omhepo iyapuki otai dulu ngahelipi oku ku kwafela u ende mondjila oyo ya yuka opo u ka hange efikilo?
17 Otwa pumbwa omhepo yaKalunga opo tu dule okukala metwokumwe neliyapulo letu. Okulongela kwoye Jehova otaku dulu okufaafanifwa nolweendo lomomeva. Ove ou li onga omukulunhu woshikepa oyo hai shingwa neefaila. Omhepo iyapuki oya fa omhepo oyo wa hala eefaila di kwate opo u dule oku ka hanga efikilo, sha hala okutya, okuhanga elalakano loye lokulongela Jehova fiyo alushe. Ino hala okukala to twalwaatwalwa komhepo younyuni waSatana. (1 Kor. 2:12) Oku shi popya pafaneko, ou na okutala kutya omhepo ya yuka ilipi to ka kwata. Ou na okukwata omhepo iyapuki. Omhepo iyapuki otai ke ku yukifa mondjila oyo ya yuka okupitila mEendjovo daKalunga nosho yo mehangano laye tali wilikwa komhepo.
18. Owa tokola toko okuninga shike paife, nomolwashike?
18 Ngeenge owa kala to konakona nEendombwedi daJehova nokuhafela eendafano lopamhepo nado, ndele ino katuka natango onghatu ya fimanenena u liyapulile Jehova nokuninginifwa, lipula kutya: ‘Omolwashike handi ongaonga?’ Ngeenge owa didilika onghandangala oyo omhepo iyapuki tai dana mokuwanifwa kwehalo laJehova kunena nowa pandula shi na sha naasho, katuka eenghatu odo u wete kutya oda yuka. Jehova ote ke ku nangeka noupuna munene. Ote ke ku pa omhepo yaye iyapuki nehalo liwa. Ngeenge owa ninginifwa omido dinini ile omido omilongo da pita, osha yela kutya owa mona onghandangala oyo omhepo iyapuki tai dana. Owa mona nowa didilika nghee Kalunga ta dulu oku ku pameka okupitila momhepo yaye. Jehova ota dulu oku ku ningila ngaho nokuli fiyo alushe. Onghee hano, kala wa tokola toko okutwikila okweenda momhepo iyapuki.
Oto dimbuluka?
• ‘Okweenda momhepo’ osha hala okutya ngahelipi?
• Oshike tashi dulu oku ku kwafela u ‘ende momhepo’?
• Ongahelipi to dulu okukala metwokumwe neliyapulo loye?
[Efano pepandja 17]
Okulongekida edu lomutima woye lopafaneko otaku pula eenghendabala
[Omafano pepandja 19]
Mbela oho wilikwa ngoo komhepo iyapuki yaKalunga?