Omulumenhu oo a lundulula okukalamwenyo kwovanhu
Kombada yedu okwa li ovanhu omamiliyona omayovi ndele ova fya. Vahapu inava fiya ko ondjokonona yasha ya fimana. Ndele ovanhu ashike vanini tashi dulika va nwefa mo onghalamwenyo yoye yakeshe efiku ile va longa oilonga oyo tai dimbulukiwa mondjokonona.
NATU TYE nee ngeno owa penduka ongula u lilongekide u ye koilonga. Opo nee owa tema olamba ofimbo to lilongekida. To kufa embo ile oshifo shonhumba u ka leshe mobesa. Opo nee owa dimbuluka okunwa omiti dokudipaa eembuto doudu (ee-antibiotic) odo wa pewa kundokotola di ku kwafele u veluke. Fimbo nokuli inaku sha nawa, owa mona nale ouwa moinima oyo omolwovalumenhu vonhumba va tumbala.
Michael Faraday Omunongononi woinima yopaushitwe Omwiingilisha, a dalwa mo 1791, oye a nduluka po ohauto hai longo kolusheno nosho yo eshina olo hali dulu okulundululila eenghono donhumba molusheno. Omashina nosho yo oinima ikwao oyo a nduluka oya kwafela opo olusheno li kale la wanena ovanhu.
Ts’ai Lun Omunambelewa womombala yaChina, oye a tota po onghedi yokuninga eembapila me 105 O.P. lwaapo, naasho osha etifa po okulongwa kweembapila dihapu.
Johannes Gutenberg Omundowishi oo a li ko mo 1450 lwaapo, oye a nduluka po eshina lotete lokunyanyangida oishangomwa. Eshina la tya ngaho ola li le shi ningifa tashi shiiva opo ku kale taku nyanyangidwa oinima kombilixa, nokungaho, opa li tapa dulu okumonika noupu ouyelele muhapu kombinga yoinima i lili noku lili.
Alexander Fleming Omukonakoni woinima Omuskoto, okwa li a mona omuti wokudipaa eembuto doudu mo 1928, hau ifanwa penicillin. Omiti odo ohadi longifwa kunena keshe pamwe okuhakula omikifi odo hadi tandavelifwa keembakiteli.
Nopehe na omalimbililo, oinima oyo ya monika noya ndulukwa kovalumenhu ovo vanini oya kwafela ovanhu omamiliyona omayovi va mone omauwa onhumba ile va kale ve na oukolele muwa.
Ndele ope na omulumenhu umwe oo a yooloka ko kovanhu aveshe. Ina shiivika omolwokumona oinima yonhumba yopaunongononi ile i na sha nounamiti. Ndele ponhele yaasho, omulumenhu oo a li e na onghalamwenyo i li paunafangwa, oo a file omido 2000 lwaapo da pita, okwa fiya po etumwalaka li na eenghono olo tali hekeleke notali kwafele ovanhu va kale ve na eteelelo. Ngeenge otwa tale kutya etumwalaka laye ola nwefa mo ovanhu ngahelipi kombada yedu, vahapu otava ka dimina kutya okwa lundulula shili onghalamwenyo yovanhu.
Omulumenhu oo oJesus Kristus. Okwa li a udifa etumwalaka lilipi? Etumwalaka olo otali dulu okunwefa mo ngahelipi onghalamwenyo yoye?