“Omupashukili muwa nakaume omuholike”

JOHN (JACK) BARR, oo a li oshilyo shOlutuwiliki lEendombwedi daJehova, okwa mana eengeda daye dokombada yedu mOlomakaya ongula, 4 Desemba 2010. Okwa li e na omido 97 nokwa kala ha popiwa kutya oku li “omupashukili muwa nakaume omuholike.”

Omumwatate Jack Barr okwa dalelwa muAberdeen shomuScotland, nova dalwa vatatu, ye oye onghelo. Ovadali vaye aveshe ova li ovavaekwa. Omumwatate Barr luhapu okwa li ha hokolola nehafo kombinga yanghee onghalamwenyo ya li moukwaneumbo wavo fimbo a li okaana nokwa pandula ovadali vaye ovaholike omolwoshihopaenenwa sha denga mbada osho ve mu tulila po.

Eshi Jack a li e na omido omulongo nasha okwa li ha mono shidjuu neenghono okupopya novanhu ovo ehe shii nale. Ndele okwa li a ninga eenghendabala da mana mo opo a finde ounghundi oo, nOsoondaxa imwe omutenya 1927, fimbo a li e na omido 14, okwa li a lombwela xe kutya okwa hala okuya pamwe naye moilonga yokuudifa eumbo neumbo. Kungaho, okwa li a hovela onghalamwenyo yaye yokulongela Jehova. Okudja ngoo efiku olo fiyo efyo laye, omumwatate Barr okwa kala omuudifi wonghundana iwa omuladi.

Omunyasha Jack okwa li e linyengifwa a diladile a mana mo kombinga yelalakano longhalamwenyo omolwoshiponga shinyanyalifa osho konyala shi twaalele omwenyo waina omuholike, opo nee okwa li e liyapulila Jehova mo 1929, nokwa li e shi ulika moipafi mo 1934. Mo 1939, okwa li a ninga oshilyo shoukwaneumbo waBetel muLondon shomuEngland. Kungaho, okwa li a hovela oilonga yefimbo li yadi omo a kala oule womido 71.

Mo 29 Oktoba 1960, omumwatate Barr okwa li a panga oukaume oo a ti kutya ou li “ekwatafano le likalekelwa li na ondilo,” eshi a hombola Mildred Willett, omukokolindjila nomutumwa wefimbo lile omuladi. Omumwatate nomumwameme Barr ova li va shiivika nawa ve li ovalihomboli ve li oshihopaenenwa shiwa novadiinini, nova twikila okuninga ngaho fiyo osheshi Mildred a mana eengeda daye dokombada yedu muOktoba 2004. Ova li hava lesha pamwe oshitukulwa shonhumba mOmbibeli efiku keshe monghalamwenyo yavo ve li ovalihomboli.

Ovo ve mu shii nawa, ngeenge tava udu edina Jack Barr tali tumbulwa, otava ka dimbuluka omulumenhu oo ha yandje omayele a diladilwa nawa, e na alushe ondjele nolune noha popi e likolelela kOmishangwa. Okwa li ha longo noudiinini nokwa li omupashukili e na ko nasha navamwe nomunahole nokwa li kaume omudiinini. Omatyekosha aye, oipopiwa yaye nosho yo omailikano aye oya li hai ulike kutya oku hole oshili neenghono noku na ekwatafano lopofingo naJehova.

Nonande ohatu ka kala twa djuulukwa omumwatate omuholike Barr, otwa hafa eshi a mona oshali youkwatya wokuhafya, oufembanghenda oo a kala a teelela nodjuulufi nokwa kala ha popi kombinga yao luhapu. Okwa longifa okukalamwenyo kwaye opo a kale a wana okupewa ondjabi oyo. — 1 Kor. 15:53, 54.a

[Eshangelo lopedu]