Natu kaleni twe lineekela Jehova, ‘Kalunga kehekeleko alishe’!
“Kalunga naXe yOmwene wetu Jesus Kristus na hambelelwe, oXe yefilonghenda naKalunga kehekeleko alishe.” — 2 KOR. 1:3.
1. Ovanhu ohava kala va hala okuningilwa shike, kashi na nee mbudi kutya ovepupi lilipi?
OVANHU ohava kala va hala okuhekelekwa okudja kedalo. Okahanana ohaka kala taka kwena ngeenge ka hala okuhekelekwa, tashi dulika ngeenge ka hala okuukatwa ile okulya. Ndele ovakulunhu navo omafimbo amwe ohava kala va hala okuhekelekwa, naunene tuu ngeenge va taalela eenghalo didjuu.
2. Eshilipaleko lilipi Jehova e tu pa olo tali ulike kutya ota ka hekeleka ovo ve mu lineekela?
2 Luhapu otashi dulika oilyo yomaukwaneumbo nosho yo ookaume ketu ve tu hekeleke monghedi yonhumba. Omafimbo amwe, otashi dulika tu lihange meenghalo omo twa pumbwa ehekeleko li dulife pwaalo lopanhu. Ndele Kalunga oye aeke ta dulu oku tu hekeleka, kashi nee mbudi kutya otu li meenghalo dinyikifa oluhodi shi fike peni. Okwe tu shilipaleka meendjovo daye a ti: ‘Omwene oku li popepi naaveshe, have mu ifana, nonghuwo yavo ohe i udu.’ (Eps. 145:18, 19) Omupsalme umwe okwa ti: “Omesho Omwene [okwe] a talifila ovayuki, nomatwi aye okwa a ameka kekwenauko lavo.” (Eps. 34:16) Ndele opo Kalunga e tu yambidide noku tu hekeleke, otu na okukala twe lineekela muye. Omupsalme David okwa li a yelifa nawa oshinima osho eshi a ti: “Omwene Oye emanyahote kovafininikwa, emanyahote mefimbo loudjuu. Ava va shiiva edina loye, otave ku lineekele, Omwene, Ove ito efa ava tave ku kongo.” — Eps. 9:10, 11.
3. Ongahelipi Jesus a li a ulika kutya Jehova oku hole ovapiya vaye?
3 Jehova okwa lenga neenghono ovapiya vaye. Jesus okwa koleka nawa oshinima osho eshi a ti: “Eehanda nhano ihadi landwa mbela mouhaulapa vavali? Kalunga ina dimbwa nande oimwe yomudo. Neexwiki deni dokomutwe oda valulwa adishe. Inamu tila, nye omu dule eehanda dihapu.” (Luk. 12:6, 7) Jehova okwa li a lombwela nokuli oshiwana shaye shopefimbo lonale okupitila momuprofeti Jeremia, a ti: “Onda kala ndi ku hole nohole yaalushe. Onghee nde ku shilila kuame nouwanghenda.” — Jer. 31:3.
4. Omolwashike tu na okukala twe lineekela momaudaneko aJehova?
4 Okukala twe lineekela muJehova nosho yo kutya omaudaneko aye otaa ka wanifwa otaku ke tu hekeleka ngeenge tu li momaupyakadi. Onghee hano, nafye otu na okukala twe lineekela muKalunga ngaashi Josua oo a ti: “Kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa. Adishe de mu wanifilwa, kape na nande imwe inai wanifwa.” (Jos. 23:14) Kakele kaasho, nokuli nongeenge twa wililwa po pakafimbo keenghalo dinyikifa oluhodi, otu na okukala noushili kutya ‘Kalunga omudiinini’ noita efa ovapiya vaye ovadiinini. — Lesha 1 Ovakorinto 10:13.
5. Ongahelipi nafye hatu dulu okuhekeleka ovanhu vakwetu?
5 Omuyapostoli Paulus okwa ti kutya Jehova ‘oKalunga kehekeleko alishe.’ “Okuhekeleka” otashi ti okuudifa nawa omunhu oo e li moudjuu ile oo a nyika oluhodi. Osho ohashi ningwa opo a kwafelwe aha kale unene a nyika oluhodi ile a wililwa po koudjuu oo e li muo. Jehova osho naanaa he tu hekeleke ngaho. (Lesha 2 Ovakorinto 1:3, 4.) Tate yetu womeulu ota dulu okuhekeleka ovo ve mu hole, kashi na nee mbudi kutya ove li meenghalo da tya ngahelipi, molwaashi iha nyengwa kusha. Nafye ohatu dulu okuhekeleka ovaitaveli vakwetu ovo “ve li moudjuu keshe,” hatu shi ningi ‘nehekeleko olo Kalunga he tu hekeleke nalo.’ Jehova ota dulu shili okuhekeleka ovo ve li momaudjuu monghedi ya denga mbada.
Nghee tu na okuungaunga noinima oyo tai dulu oku tu nyikifa oluhodi
6. Tumbula oinima imwe oyo tai dulu okunyikifa ovanhu oluhodi.
6 Ohatu kala twa pumbwa okuhekelekwa peemhito dihapu mokukalamwenyo kwetu. Ohatu kala twa pumbwa ehekeleko unene tuu ngeenge twa filwa omuholike wetu, kutya nee okaume ketu kopahombo ile okaana ketu. Otashi dulika yo tu kale twa pumbwa okuhekelekwa ngeenge vamwe tava ungaunga nafye nonyanya ile nonhondo. Ope na yo oinima imwe vali oyo hai ningifa omunhu a kale a pumbwa okuhekelekwa, ngaashi okuhenoukolele, oukulupe, oluhepo, omaupyakadi omohombo ile eenghalo dikwao dinyikifa oluhodi dounyuni ou.
7. (a) Otwa pumbwa ehekeleko loludi lilipi ngeenge tu li meenghalo dinyikifa oluhodi? (b) Jehova ota dulu okuninga po shike opo a velule omutima oo “wa teyauka nowa alamekwa”?
7 Ngeenge tu li meenghalo dinyikifa oluhodi, otashi dulika tu kale twa pumbwa okuhekelekwa opo omitima detu, omadiladilo etu, omaliudo etu, oupamhepo wetu nomalutu etu a pepalekwe. Pashihopaenenwa, diladila shi na sha nomutima. Eendjovo daKalunga otadi ulike kutya omitima detu otadi dulu ‘okuteyauka nokualamekwa.’ (Eps. 51:19) Ndele Jehova ota dulu oku tu kwafela monghalo ya tya ngaho, molwaashi “oha twamifa ava ve nomutima wa tekauka, ndee ta mange oipute yavo tai yahama.” (Eps. 147:3) Kalunga ota dulu okukwafela ovo ve na omitima da teyauka nokuli nonande ove li meenghalo didjuu neenghono ngeenge ova ilikana kuye ve na eitavelo la kola nokukala hava dulika koipango yaye. — Lesha 1 Johannes 3:19-22; 5:14, 15.
8. Ongahelipi Jehova ta dulu oku tu kwafela ngeenge omadiladilo etu a wililwa po keenghalo didjuu?
8 Luhapu ohatu kala twa pumbwa okuhekelekwa molwaashi omadiladilo etu otashi dulika a kale a yahamekwa neenghono komayeleko e lili noku lili oo twa pita muo. Otashi dulika shi kale shidjuu neenghono kufye okupita meenghalo odo tadi yeleke eitavelo letu ngeenge kape na ekwafo lasha. Ndele omupsalme umwe okwa popya shi na sha naKalunga, a ti: “Ngenge ndi noshisho shoudjuu meni lange, omahekeleko oye oo a hekeleka omwenyo wange.” (Eps. 94:19) Shimwe vali, Paulus okwa ti: “Kaleni mu he na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.” (Fil. 4:6, 7) Ngeenge otwa kala hatu lesha Omishangwa nokudilonga kudo otashi ke tu kwafela neenghono tu ungaunge nomaupyakadi opamadiladilo. — 2 Tim. 3:15-17.
9. Oshike tashi dulu oku tu kwafela tu ungaunge nepolimano?
9 Omafimbo amwe otashi dulika tu kale twa teka omukumo neenghono ndele hatu kwatwa kepolimano. Pashihopaenenwa, otashi dulika tu kale tu udite kutya inatu wana okupewa oshinakuwanifwa shonhumba shopamishangwa ile oufembanghenda wonhumba. Jehova ota dulu yo oku tu hekeleka noku tu kwafela peemhito da tya ngaho. Natu ka taleni koshihopaenenwa eshi: Eshi Josua a li a pewa oshinakuwanifwa shokukwatela komesho oshiwana shaIsrael eshi sha li tashi ka lwifa ovatondi vasho ovanaenghono, Moses okwa li a lombwela oshiwana a ti: “Kala wa pama nokunyatipala. Ino tila. Ino va haluka. Osheshi Omwene Kalunga koye ta ende pamwe naave. Ye ite ku efa ndee ite ku fii po.” (Deut. 31:6) Jehova okwa li a kwafela Josua a finde ovatondi vaye aveshe noku twale oshiwana shaYe mEdu lEudaneko. Moses naye okwa li a kwafelwa kuJehova monghedi ya faafana pEfuta Litilyana. — Ex. 14:13, 14, 29-31.
10. Oshike tashi dulu oku tu kwafela ngeenge tu li meenghalo odo tadi dulu okunyona po oukolele wetu wopalutu?
10 Oinima inyikifa oluhodi oyo tai ningwa mounyuni otai dulu okunyona po oukolele wetu wopalutu. Oshoshili kutya oinima ngaashi okulya oikulya tai wapalele, okukofa sha wana, okulideula nosho yo okuliwapeka nawa otai dulu oku tu kwafela tu kale tu na oukolele muwa. Ndele etaleko letu liwa li na sha naasho Ombibeli ya xunganeka kombinga yonakwiiwa nalo otali dulu oku tu kwafela tu kale tu na oukolele muwa. Onghee hano, ngeenge tu li meenghalo dinyemateka, oshiwa okukaleka momadiladilo oshimoniwa shaPaulus nosho yo eendjovo daye tadi hekeleke, odo tadi ti: “Muaishe otu li po twa fininikwa, ndele inatu patekena po, ofye twa limbililwa, ndele inatu kanifa eteelelo, ohatu tewaatewa, ndele inatu ekelwashi, twa natwa poshi, ndele inatu nyonwa po.” — 2 Kor. 4:8, 9.
11. Oshike tu na okuninga po ngeenge hatu vele pamhepo?
11 Omayeleko amwe oo hatu shakeneke otaa dulu okunyona po oupamhepo wetu. Ndele Jehova ota dulu yo oku tu kwafela ngeenge tu li meenghalo da tya ngaho. Eendjovo daye otadi tu shilipaleke tadi ti: “Omwene, omuyakeli waaveshe tava punduka, naava va nyongamekwa koufiye, ohe va nyongamununa.” (Eps. 145:14) Ndele ngeenge hatu vele pamhepo, otu na okukonga ekwafo lovakulunhuongalo Ovakriste. (Jak. 5:14, 15) Okukaleka alushe momadiladilo eteelelo lopamishangwa li na sha nomwenyo waalushe nako otaku ke tu kwafela yo tu pite meenghalo odo tadi yeleke eitavelo letu. — Joh. 17:3.
Oihopaenenwa yavamwe ovo va li va hekelekwa kuKalunga
12. Yelifa nghee Jehova a li a hekeleka Abraham.
12 Omupsalme umwe a nwefwa mo okwa li a lombwela Jehova a ti: “Dimbulukila omupiya woye ondjovo yoye, ei wa udanekela nge. Eshi osho ehekeleko lange moudjuu wange, kutya eudaneko loye la tula nge omwenyo.” (Eps. 119:49, 50) Kunena otu na Eendjovo daJehova, Ombibeli, omo mu na oihopaenenwa ihapu yaavo va li va hekelekwa kuJehova. Pashihopaenenwa, Abraham otashi dulika a li a nyika oluhodi eshi a uda kutya Jehova ota ka hanauna po Sodom naGomorra. Tatekulululwa oo omudiinini okwa li a pula Kalunga a ti: “Ove to ka nyonauna po tuu omuyuki pamwe nomuhenakalunga?” Jehova okwa li a hekeleka Abraham moku mu shilipaleka kutya ita ka hanauna po oilando oyo ngeenge omu na ashike ovayuki nande 50. Ashike Abraham okwa li a pula natango Jehova lwoikando itano kutya ota ka ninga po shike ngeenge omu na ovayuki nande 45, 40, 30, 20 ile 10. Pomhito keshe, Jehova okwa li a shilipaleka Abraham pahole nonelidiiniko kutya ita ka hanauna po Sodom ngeenge omu na ovayuki ve fike opo. Jehova okwa li a xupifa Lot novanakadona nokuli nonande moilando oyo kamwa li ovayuki ve fike nande opomulongo. — Gen. 18:22-32; 19:15, 16, 26.
13. Hanna okwa li a ulika ngahelipi kutya okwe lineekela muJehova?
13 Omukulukadi waElkana, Hanna, okwa li a halelela okaana, ndele okwa li ongadji. Osho osha li she mu nyikifa oluhodi neenghono nokwa li a lombwela Jehova oupyakadi waye okupitila meilikano. Opo nee, omupristeri omukulunhu Eli okwa li a lombwela Hanna a ti: “Kalunga kaIsrael ne ku pe eshi we mu indila.” Eendjovo odo oda li da hekeleka Hanna, “ndele ina kala vali e noluhodi.” (1 Sam. 1:8, 17, 18) Hanna okwa li e lineekela muJehova nokwa li a efela oinima momake aYe. Hanna okwa li e udite ombili yokomwenyo nonande ka li e shii kutya oidjemo otai ka kala ya tya ngahelipi. Hauxuuninwa, Jehova okwa ka nyamukula eilikano laye. Hanna okwa ka ninga oufimba nokwa dala okaana okamati ndele te ka luku Samuel. — 1 Sam. 1:20.
14. Omolwashike David a li a pumbwa ehekeleko, nokulyelye a li a konga ekwafo?
14 Ohamba David yomuIsrael shonale oyo imwe yomwaavo va li va hekelekwa kuKalunga. Molwaashi Jehova oha “tale omutima,” okwa li e shii kutya David oku hole shili elongelokalunga lashili eshi e mu hoolola a ninge ohamba yOvaisrael yomonakwiiwa. (1 Sam. 16:7; 2 Sam. 5:10) Ndele nande ongaho, lwanima David okwa ka ya moluhaelo naBatseba nokwa li a dipaifa omushamane waye opo ngeno a holeke enyono laye. Ashike eshi David a ka mona kutya enyono laye ola kwata moiti shi fike peni, okwa ilikana kuJehova a ti: “Molwefilonghenda loye linene dima po omatimba ange. Koshe nge owii wange, ndi koshoke, Ove u fetele nge po etimba lange. Osheshi enyono lange, ame mwene ondi li shii nawa, nomatimba ange alushe e li momesho ange.” (Eps. 51:3-5) David okwa li e livela ombedi shili, na Jehova okwa li e mu dimina po. Ashike David okwa li e na okumona oilanduliko yenyono laye. (2 Sam. 12:9-12) Ndele nande ongaho, omupiya waJehova oo omulininipiki okwa li a hekelekwa neenghono eshi Jehova e mu fila onghenda.
15. Ongahelipi Jehova a li a kwafela Jesus eshi a li poku ka dipawa?
15 Jesus okwa li a pita momayeleko mahapu eshi a li kombada yedu. Kalunga okwa li a efa Jesus a pite meenghalo adishe odo da li tadi yeleke eitavelo laye, ashike Jesus okwa li a kanyatela oudiinini waye. Jesus okwa li omunhu a wanenena nokwa li ha kala alushe e lineekela muJehova nokwa tumbalekifa ounamapangelo waYe. Eshi a li e li pokukengelelwa noku ka dipawa, okwa ilikana kuJehova a ti: “Hahalo lange, ndelenee oloye.” Opo nee, omweengeli umwe okwa li e uya kuye ndele te mu dike eenghono. (Luk. 22:42, 43) Kalunga okwa li a hekeleka Jesus, e mu nghonopaleka nokwe mu pa ekwafo olo a li a pumbwa pefimbo olo.
16. Oshike osho Kalunga ta dulu okuninga po ngeenge tu li poku ka dipawa omolwoudiinini wetu?
16 Jehova ota dulu note ke tu kwafela tu kanyatele oudiinini wetu kuye nokuli nonande otu li poku ka dipawa molwoudiinini wetu. Kakele kaasho, eteelelo li na sha nenyumuko nalo ohali tu hekeleke. Otwa teelela yo nodjuulufi efimbo olo omutondi wetu waxuuninwa, efyo, ‘ta ka hanaunwa po.’ (1 Kor. 15:26) Jehova oo iha dimbwa nandenande oku shii ovapiya vaye ovadiinini nosho yo ovanhu vamwe vali ovo va fya nale, note ke va nyumuna. (Joh. 5:28, 29; Oil. 24:15) Okukala twe lineekela meudaneko laJehova li na sha nenyumuko ohashi tu hekeleke nohashi tu kwafele tu kale tu na eteelelo la twa ngeenge hatu hepekwa.
17. Jehova ohe tu hekeleke ngahelipi ngeenge twa filwa ovaholike vetu?
17 Itashi hekeleke tuu okushiiva kutya ovaholike vetu ovo va fya otava ka alulilwa momwenyo mounyuni mupe mukumwifi omo itamu ka kala vali mu na omaupyakadi aeshe oo hae tu hange kunena! “Ongudu inene” yovapiya vaJehova ovo tava ka xupa pexulilo longhalelo ei yoinima youkolokoshi nayo itai ka kala tuu i na oufembanghenda munene wokuhambelela nokuhonga ovanyumunwa ovo tava ka kala nomwenyo oku kombada yedu! — Eh. 7:9, 10.
Kalunga ohe tu papatele koshi yomaoko aye aalushe
18, 19. Oshike hashi hekeleke ovapiya vaJehova ngeenge tava hepekwa?
18 Moses okwa li a shilipaleka oshiwana shaIsrael neendjovo deimbilo di na eenghono notadi kumu omutima, a ti: “Kalunga kaalushe Oye ehondameno loye, ndele koshi omaoko aalushe taa papata.” (Deut. 33:27) Lwanima, omuprofeti Samuel okwa ka lombwela Ovaisrael a ti: “Inamu kanduka po pOmwene, ndele longeleni Omwene nomutima weni aushe. . . . Osheshi Omwene omolwedina laye linene ina hala okweekelashi ovanhu vaye.” (1 Sam. 12:20-22) Jehova ite ke tu efa nandenande, shimha ashike tu li ovadiinini kuye nosho yo kelongelokalunga lashili. Ote ke tu pa alushe ekwafo olo twa pumbwa.
19 Jehova oha pe alushe oshiwana shaye ekwafo olo sha pumbwa nohe shi hekeleke momafiku aa axuuninwa madjuu okukaliwa muo. Omido di dulife pefelemudo lwaapo da pita, ovaitaveli vakwetu omayovi mounyuni aushe ova kala tava hepekwa nokutulwa meedolongo molwaashi ashike tava longele Jehova. Ndele oimoniwa yavo otai koleke oushili oo kutya Jehova oha hekeleke shili ovapiya vaye ngeenge ve li momayeleko. Pashihopaenenwa, omumwatate umwe wokuSoviet Union shonale okwa li a idililwa modolongo oule womido 23 omolweitavelo laye. Ndele nande ongaho, opa li pa ningwa ondunge opo a kale ha twaalelwa eendja dopamhepo odo da li de mu pameka node mu hekeleka. Omumwatate oo okwa ti: “Onde lihonga momukokomoko womido adishe odo okukala nde lineekela muJehova nokwa li a pameka nge.” — Lesha 1 Petrus 5:6, 7.
20. Omolwashike hatu dulu okukala noushili kutya Jehova ite ke tu fiya po?
20 Kashi na nee mbudi kutya ohatu ka shakeneka shike monakwiiwa, otashi ka kala shiwa okukaleka momadiladilo eendjovo tadi hekeleke domupsalme umwe, odo tadi ti: “Jehova ita ka fiya po oshiwana shaye.” (Eps. 94:14, NW) Nonande otashi dulika twa pumbwa ehekeleko pauhandimwe, nafye otu na yo oufembanghenda munene wokuhekeleka vamwe. Ngaashi hatu ke shi mona moshitukulwa tashi landula, ohatu dulu okuhekeleka ovo va polimanekwa keenghalo dounyuni ou u yadi omaupyakadi.
Oto nyamukula ngahelipi?
• Oinima imwe ilipi tai dulu oku tu nyikifa oluhodi?
• Jehova oha hekeleke ngahelipi ovapiya vaye?
• Oshike tashi dulu oku tu hekeleka ngeenge tu li meenghalo odo tadi pula omwenyo ile efyo?
[Oshimhungu/Omafano pepandja 25]
NGHEE TU NA OKUUNGAUNGA NOINIMA OYO TAI DULU OKUKUMA . . .
▪ omitima detu Eps. 147:3; 1 Joh. 3:19-22; 5:14, 15
▪ omadiladilo etu Eps. 94:19; Fil. 4:6, 7
▪ omaliudo etu Ex. 14:13, 14; Deut. 31:6
▪ oukolele wetu wopalutu 2 Kor. 4:8, 9
▪ oupamhepo wetu Eps. 145:14; Jak. 5:14, 15