Natu kaleni hatu hafele pamwe!
KUNENA kashipu okukala twa hafa notwa nyakukwa. Ovanhu vahapu ihava lombwelafana naanaa oinima tai tungu. Onghalamwenyo yokunena, unene tuu yomoilando inene, oya ningifa ovanhu va kale tava yandje ashike elitulemo kuvo vene nokulitukula ko kuvakwao.
Omuprofesa umwe moinima i na sha nokukalafana kwovanhu wedina Alberto Oliverio okwa ti: “Ovanhu vahapu ove udite owike, nosha yela kutya onghalamwenyo yomoilando inene oya ningifa ovanhu ve litongole ko kuvakwao. Peemhito dihapu, onghalo oyo ohai tu ningifa tuha kale tu na ko nasha nomunambelewa mukwetu, omushiinda shetu ile omulandifi oo ha longo mofitola yopopepi nafye.” Luhapu okulitukula ko kuvamwe ohaku ningifa ovanhu va kwatwe kepolimano.
Ovakriste vashili kave na oikala ya tya ngaho. Omuyapostoli Paulus okwe tu ladipika a ti: “Hafeni alushe!” (1 Tes. 5:16) Otu na omatomheno mahapu okukala twa hafa nokunyakukilwa pamwe navakwetu. Pashihopaenenwa, ohatu longele Kalunga Omukombadambada, Jehova; otu na eudeko lashili lOmbibeli; otu na eteelelo loku ka xupifwa noku ka kala nomwenyo fiyo alushe notu na yo oufembanghenda wokukwafela vamwe navo va dule oku ka hafela omanangeko noupuna a tya ngaho. — Eps. 106:4, 5; Jer. 15:16; Rom. 12:12.
Ovakriste vashili ohava kala va hafa nohava nyakukilwa pamwe navakwao. Onghee hano, itashi kumwifa eshi Paulus a li a lombwela Ovafilippi, a ti: “Ohandi hafe, nohandi nyakukwa pamwe nanye amushe, nosho nanye yo, hafeni nokunyakukwa pamwe naame!” (Fil. 2:17, 18) Metumbulo ashike olo, Paulus okwa li a popya lwoikando ivali shi na sha nokuhafa nokunyakukilwa pamwe navamwe.
Oshoshili kutya Ovakriste ova pumbwa okulungamena eamo lokulitukula ko kuvamwe, molwaashi okuninga ngaho otashi ke tu imba tu kale hatu hafele pamwe novaitaveli vakwetu. Ndele mbela ongahelipi hatu dulu okuulika kutya ohatu dulika komayele aPaulus e na sha nokukala hatu ‘hafele mOmwene’ pamwe novamwatate? — Fil. 3:1.
Natu kaleni hatu hafele pamwe novaitaveli vakwetu
Paulus otashi dulika a li a shangela Ovafilippi onhumwafo pefimbo opo a li a idililwa modolongo muRoma omolwoilonga yaye yokuudifa. (Fil. 1:7; 4:22) Ashike okutulwa kwaye modolongo kakwa li kwe mu ningifa a kanife ouladi waye wokuudifa. Ndele mepingafano naasho, okwa li a hafa eshi ta longele Jehova ngaashi ta dulu ‘nokutilwashi ngaashi [oshikunwayambo, NW].’ (Fil. 2:17) Oikala yaPaulus otai ulike kutya ehafo ihali kala le likolelela keenghalo odo omunhu e li mudo. Nonande Paulus okwa li modolongo pomhito oyo, okwa li a dula okutya: ‘Ohandi ke shi hafela komesho yo.’ — Fil. 1:18.
Paulus oye a li a tota po eongalo lokuFilippi nokwa li e hole ovamwaxe vomeongalo olo neenghono. Okwa li e shii kutya ngeenge okwe va lombwele kombinga yehafo olo a mona mokulongela Jehova otashi ke va twa yo omukumo. Onghee hano, okwa li e va lombwela a ti: “Ovamwatate, nda hala mu kale mu shi shii, eshi sha ningilwa nge, osha tandavelifa evangeli, fiyo sha shiivika ketanga alishe lovakwaita vomouhamba nokuvamwe aveshe nokutya, ame nda mangwa omolwaKristus.” (Fil. 1:12, 13) Eshi Paulus a li a hokololela ovamwaxe oshimoniwa shaye tashi tu omukumo osha li she mu etela ehafo nokwa nyakukilwa pamwe navo. Kungaho, Ovafilippi navo ova li va dula okunyakukilwa pamwe naye. Ashike opo va dule okuhafela pamwe naye, ova li ve na okukondjifa etekomukumo omolwonghalo oyo Paulus a li muyo. Ponhele yaasho, ova li va pumbwa okuhopaenena oshihopaenenwa shaye. (Fil. 1:14; 3:17) Ovafilippi ova li yo va pumbwa okutwikila okukwatela Paulus momailikano avo noku mu pa ekwafo keshe olo va li tava dulu oku mu pa noku mu yambidida. — Fil. 1:19; 4:14-16.
Mbela nafye otu na ngoo oikala ya fa yaPaulus? Mbela ohatu kendabala ngoo okukala tu na etaleko liwa li na sha neenghalo odo hatu shakeneke mokukalamwenyo kwetu nosho yo moukalele wetu wopaKriste? Ngeenge hatu endafana novamwatate, oshiwa oku va hokololela oimoniwa oyo twa mona moilonga yokuudifa opo tu nyakukilwe pamwe navo. Katu na okuteelela tu ye meenghalo didjuu opo tu ninge ngaho. Ohatu dulu okuhafela pamwe novamwatate moku va hokololela nghee twa li twa longifa etwalemo lonhumba nomupondo ile twa tomhafana nomunhu monghedi yonhumba opo tu pendule ohokwe muye a pwilikine ketumwalaka lOuhamba. Otashi dulika yo twa li twa hafela eenghundafana nomuneumbo di na sha novelishe yonhumba yOmbibeli. Ile tashi dulika twa li twa dula okuyandja oundombwedi kuvamwe moshitukulwa shonhumba molwaashi ashike ve tu didilika mo kutya otu li Eendombwedi daJehova. Ngeenge otwa hokololele vamwe kombinga yoimoniwa ya tya ngaho, ohatu ka nyakukilwa pamwe navo.
Ovanhu vahapu vomoshiwana shaJehova ohava ningi omaliyambo mahapu opo va wanife po oilonga yokuudifa. Ovalongi vefimbo li yadi ngaashi ovakokolindjila, ovapashukili ovaendi, Ovabetel, ovatumwa nosho yo ovapiya vopaiwana ohava kala va hafa eshi tava longo oilonga oyo. Mbela ohatu hafele ngoo nokunyakukilwa pamwe navo? Ngeenge osho, natu kale hatu ulikile olupandu ovamwatate novamwameme ovaholike ovo “ve li ovalongi vakwetu molwouhamba waKalunga.” (Kol. 4:11) Natu kale hatu va tu omukumo ngeenge hatu endafana navo pokwoongala kweongalo ile poyoongalele yetu. Ohatu dulu okuhopaenena oshihopaenenwa shavo shouladi. Ohatu dulu yo okukonga “omhito” tu va shive komaumbo etu, tashi dulika tu va shive ve uye tu hafele oikulya yonhumba pamwe navo opo tu pwilikine koimoniwa nosho yo keendjovo davo tadi tungu. — Fil. 4:10.
Natu kaleni hatu hafele pamwe naavo ve li momaudjuu
Omahepeko nosho yo omayeleko oo Paulus a li a shakeneka okwa li e mu kwafela a kale a pama noku kanyatele oudiinini waye kuJehova. (Kol. 1:24; Jak. 1:2, 3) Molwaashi Paulus okwa li e shii kutya ovamwaxe vokuFilippi otashi dulika navo va ka shakeneke omayeleko a faafana nonokutya otava ka tuwa omukumo omolwelididimiko laye, osho osha li she mu pa etomheno lokukala a hafa nokunyakukilwa pamwe navo. Onghee hano, okwa li e va lombwela a ti: “Onye omwa pewa hakwiitavela akuke Kristus, ndelenee oku mu hepekelwa yo, nye mu nolwoodi tuu olo mwe li mona ndee hamu udu paife ndi li kwete.” — Fil. 1:29, 30.
Sha faafana, Ovakriste vokunena navo ohava patanekwa omolwoilonga yavo yokuudifa. Omafimbo amwe, omapataneko a tya ngaho ohaa kala a kwatela mo elongifo leenghono, ashike luhapu ohaa ningwa monanguwi. Otashi dulika tu patanekwe meenghedi di lili noku lili, ngaashi okulundilwa kovashunimonima, okuningwa onyanya koilyo yomaukwaneumbo etu nosho yo okushekwa kovanailonga ile kovanafikola vakwetu. Jesus okwe tu londwela kutya inatu kala twa kumwa ile tu teke omukumo ngeenge hatu shakeneke omayeleko a tya ngaho. Ponhele yaasho, otu na okukala twa hafa ngeenge hatu yelekwa. Okwa ti: “Ovanelao onye, ovanhu ngenge tave mu sheke ndee tave mu taata ndee tave mu popile mowii aushe nokufufya molwange. Hafeni nye mu nyakukwe pombada, osheshi ondjabi yeni oinene meulu.” — Mat. 5:11, 12.
Katu na nande okukala twa tila ngeenge twa udu kutya ovamwatate moilongo yonhumba otava patanekwa nonyanya. Ponhele yaasho, otu na okukala twa hafa molwaashi tave lididimikile eenghalo da tya ngaho. Ohatu dulu oku va ilikanena, hatu pula Jehova e va kwafele va kale ve na eitavelo la pama nove lididimike. (Fil. 1:3, 4) Molwaashi itatu dulu lela okuninga po sha opo tu kwafele ovamwatate ovo ovaholike, ohatu dulu okukwafela ovamwatate vomeongalo letu ovo navo ve li meenghalo didjuu. Ohatu dulu okuulika kutya otu na ko nasha navo noku va yambidida. Ohatu dulu yo okukonga eemhito opo tu nyakukilwe pamwe navo mokukala hatu va shivi omafimbo amwe ve uye tu ninge Elongelokalunga lOukwaneumbo pamwe, tu ka longe pamwe navo moilonga yokuudifa nosho yo tu hafele pamwe navo.
Katu na tuu omatomheno mahapu okukala hatu nyakukilwa pamwe navamwe! Natu henukeni oikala younyuni ou yokukala twe litongola ko kuvakwetu nokutwikila okukala hatu nyakukilwa pamwe novamwatate. Ngeenge otwa ningi ngaho, ohatu ka xumifa komesho ohole noukumwe meongalo nohatu ka hafela oumwainafana wetu wopaKriste pauyadi. (Fil. 2:1, 2) Onghee hano, Paulus okwe tu ladipika a ti: “Hafeni alushe mOmwene! Navali handi ti: Hafeni!” — Fil. 4:4.
[Odjo yefano pepandja 6]
Globe: Courtesy of Replogle Globes