“Ino liameka keendunge doye mwene”

“Nomutima woye aushe lineekela Omwene, ino liameka keendunge doye mwene.” — OMAYEL. 3:5.

1, 2. (a) Eenghalo dilipi tadi dulu oku tu yeleka? (b) Okulyelye tu na okukonga ekwafo ngeenge hatu ungaunga neenghalo dinyikifa oluhodi, hatu ningi omatokolo ile hatu kondjifa omayeleko, nomolwashike?

NATU ka taleni keenghalo odo tadi pula omunhu a kale e lineekela muJehova: Omuyandji woilonga waCynthiaa okwa pata nale oitai imwe yongeshefa yaye novanailonga vahapu okwe va pendjelifa nale nokuli. Cynthia okwa li ta diladila kutya naye oku li pokutewa mo moilonga. Ndele mbela ota ka ninga po shike ngeenge okwa kanifa oilonga yaye? Openi ta ka hanga oimaliwa yokufuta eefuto daye dokomwedi? Omumwameme wedina Pamela okwa li a hala okutembukila koshitukulwa shimwe oko ku na omhumbwe inene yovaudifi vOuhamba, ndele mbela okwa li ngoo ta dulu okuya ko? Omulumenhu umwe omunyasha wedina Samuel naye okwa li te lipula shi na sha noshinima shimwe shi lili. Samuel okwa kala ha tale omafano oipala fimbo a li okaana, naashi a wanifa omido 20 nasha, okwa li a kwatwa keamo lokushuna konghedindjikilile yaye yonale. Ndele mbela ongahelipi a li a kondjifa eyeleko olo?

² Okulyelye tu na okukonga ekwafo ngeenge hatu ungaunga neenghalo dinyikifa oluhodi, hatu ningi omatokolo oo a fimana ile hatu kondjifa omayeleko? Mbela oho liameke keendunge doye mwene ile ‘omutengi woye oho u undulile kOmwene’? (Eps. 55:23) Ombibeli oya ti: ‘Omesho Omwene okwe a talifila ovayuki, nomatwi aye okwe a ameka kekwenauko lavo.’ (Eps. 34:16) Onghee hano, osha fimana okukala twe lineekela muJehova nomutima wetu aushe nokukala ihatu liameke keendunge detu vene. — Omayel. 3:5.

3. (a) Okulineekela muJehova okwa kwatela mo shike? (b) Omolwashike vamwe tashi dulika va kwatwe keamo lokuliameka keendunge davo vene?

³ Okulineekela Jehova nomutima woye aushe osha kwatela mo okuninga oinima monghedi oyo ta hokwa nosho yo metwokumwe nehalo laye. Okukala hatu ilikana alushe kuJehova tashi di komutima nokukonga ewiliko laye osho unene tashi ke tu kwafela tu ninge ngaho. Ndele nande ongaho, ohashi kala eshongo kuvahapu okukala ve lineekela filufilu muJehova. Pashihopaenenwa, omumwameme umwe wedina Lynn okwa ti: “Osha li shidjuu kwaame okukala nde lineekela muJehova nomutima wange aushe.” Omolwashike mbela? Okwa ti: “Inandi kala ndi na ekwatafano liwa natate, meme naye ka li ha yavelele omaliudo ange noina fila nge oshisho palutu. Osho osha li sha ningifa nge ndi lihonge okulifila oshisho ame mwene okudja eshi nda li okaana.” Onakudiwa yaLynn oye mu ningifa aha kale vali e lineekela filufilu omunhu wonhumba. Okudula nokupondola kwomunhu ohaku dulu yo oku mu ningifa a kale e lineekela muye mwene. Pashihopaenenwa, omukulunhuongalo otashi dulika a ungaunge noinima yonhumba meongalo noina konga ewiliko kuKalunga okupitila meilikano molwaashi tashi dulika a li a pita nale monghalo ya faafana naayo.

4. Oshike hatu ka kundafana moshitukulwa eshi?

⁴ Jehova okwa teelela tu ninge eenghendabala da mana mo tu kale metwokumwe nomailikano etu nosho yo nehalo laye. Ndele mbela ongahelipi hatu dulu okuundulila omitengi detu kuJehova ndele pefimbo opo tuu opo nafye ohatu ningi yo eenghendabala tu kandule po omaupyakadi oo a kwata moiti? Oinima ilipi tu na okulungamena ngeenge hatu ningi omatokolo onhumba? Omolwashike twa pumbwa okukala hatu ilikana ngeenge hatu kondjifa omayeleko? Ohatu ka kundafana omapulo oo mokutala koihopaenenwa yopamishangwa.

Ngeenge u li moudjuu

5, 6. Hiskia okwa li e linyenga ngahelipi eshi a li ta ningilwa omatilifo kohamba yaAssiria?

⁵ Ombibeli oya popya shi na sha nohamba yaJuda, Hiskia, ya ti: “Okwa kanyatela mOmwene, ina kanduka mo muye ndele a diinina oipango yaye, oyo Omwene e i lombwela Moses.” Doshili, Hiskia okwa kala e “lineekela Omwene Kalunga kaIsrael.” (2 Eeh. 18:5, 6) Ndele mbela Hiskia okwa li e linyenga ngahelipi eshi ohamba Sanherib yaAssiria ya li ya tuma ovakalelipo vayo kuJerusalem, mwa kwatelwa Rabsake, pamwe netangakwaita enaenghono? Etangakwaita laAssiria enaenghono ola li la hanauna po nale oilando ihapu yeehotekuma da kola yaJuda, na Sanherib okwa li a diladila oku ka hanauna po Jerusalem. Hiskia okwa li a ya mongulu yaJehova ndele ta ilikana ta ti: “Tu xupifa, Omwene Kalunga ketu, momake ayo, opo oilongo aishe yokombada yedu i shiive nokutya, Oove Omwene auke Kalunga kashili.” — 2 Eeh. 19:14-19.

⁶ Hiskia okwa li a katuka metwokumwe neilikano laye. Nokuli fimbo a li ina ya kotembeli a ka ilikane, okwa hangwa nale a lombwela ovanhu kutya inava nyamukula Rabsake oo a li ta tukana nokusheka Kalunga. Hiskia okwa li yo a tuma ovakalelipo vaye komuprofeti Jesaja va ka pule omayele. (2 Eeh. 18:36; 19:1, 2) Hiskia okwa li a katuka pandunge. Pomhito oyo, ka li a konga ekwafo okudja kuEgipti ile koishiindalongo imwe molwaashi osho kasha li metwokumwe nehalo laJehova. Hiskia ka li e lineekela meendunge daye mwene, ndele ponhele yaasho, okwa li e lineekela muJehova. Konima eshi omweengeli waJehova a dipaa ovakwaita vaSanherib 185 000, Sanherib okwa li a “fikama” ndele ta shuna kuNinive. — 2 Eeh. 19:35, 36.

7. Ehekeleko lilipi hatu dulu okumona meilikano laHanna nosho yo laJona?

⁷ Omukulukadi waElkana wedina Hanna okwa li e lineekela muJehova pefimbo opo a li a nyika oluhodi molwaashi a li ongadji. (1 Sam. 1:9-11, 18) Omuprofeti Jona okwa li a kufwa mo medimbo loshi inene konima eshi a ilikana a ti: “Moudjuu wange onda kuwa kOmwene, ndele Ye a uda nge. Moshovafi onda kuwa onghuwo, Ove owa uda ondaka yange.” (Jona 2:1, 2, 10) Itashi hekeleke tuu okushiiva kutya nonande otu hangwe keenghalo didjuu ohatu dulu “okweehela” ekwafo kuJehova! — Lesha Epsalme 55:2, 17.

8, 9. Eilikano laHiskia, Hanna nosho yo laJona otali ulike kutya ova li tave lipula unene nashike, noshike hatu lihongo moshihopaenenwa shavo?

⁸ Oshihopaenenwa shaHiskia, Hanna nosho yo shaJona otai tu hongo yo oshilihongomwa sha fimanenena shi na sha naasho tuhe na okudimbwa ngeenge hatu ilikana pefimbo opo tu li meenghalo dinyemateka. Aveshe vatatu ova li tava yahama pamaliudo omolweenghalo didjuu neenghono odo va li mudo. Ashike omailikano avo otaa ulike kutya kava li ashike tave lipula shi na sha navo vene ile nekandulepo lomaupyakadi avo. Ndelenee ova li tave lipula unene shi na sha nedina laKalunga, elongelokalunga laye nosho yo okulonga ehalo laye. Hiskia okwa li a nyemata eshi edina laJehova la li tali shekwa. Hanna okwa li a udaneka kutya okaana oko a indila kuJehova ote ke ka yandja ka ka longe ketwalihangano olo la li muSilo. Jona okwa ti: ‘Eshi nde shi udaneka, ohandi ke shi wanifa.’ — Jona 2:9.

⁹ Oshi li pandunge okukonakona omalinyengotomheno etu ngeenge hatu indile ekwafo opo tu pite meenghalo didjuu. Mbela ohatu lipula ashike shi na sha nekandulepo lomaupyakadi etu ile ohatu lipula ngoo shi na sha naJehova nosho yo omalalakano aye? Okukala hatu lipula unene shi na sha nokumona oixuna oko tu li muko otashi dulu oku tu ningifa noupu tu dimbwe okuyandja elitulemo koinima yopamhepo. Ngeenge hatu pula ekwafo kuJehova, natu kaleni hatu lipula unene shi na sha nokuyapulifwa kwedina laye nosho yo okuyukipalifwa kwounamapangelo waye. Okuninga ngaho, otaku ke tu kwafela tu kale tu na etaleko liwa nokuli nonande inatu mona ekandulepo lomaupyakadi etu ngaashi twa li twa teelela. Jehova ota dulu okunyamukula omailikano etu moku tu kwafela tu lididimikile omaupyakadi oo tu li muo. — Lesha Jesaja 40:29; Ovafilippi 4:6, 7.

Ngeenge to ningi omatokolo

10, 11. Josafat okwa li a ninga po shike eshi a li monghalo omo ehe shii kutya na ninge po shike?

¹⁰ Oshike hashi ku kwafele ngeenge to ningi omatokolo a fimana monghalamwenyo? Mbela oho ningi tete etokolo loye mwene opo nee to ka ilikana kuJehova a nangeke noupuna etokolo olo wa ninga nale? Natu taleni kwaasho ohamba yaJuda, Josafat, ya li ya ninga po eshi omatangakwaita Ovamoab nOvaamon a li e limbwanga mumwe e uye oku i kondjifa. Pomhito oyo, Ovajuda kava li tava dulu okulipopila nandenande. Ndele mbela Josafat okwa li a ninga po shike?

¹¹ Ombibeli oya ti: “Josafat okwa tila nokwe liameka okukonga Omwene.” Okwa li yo a lombwela Ovajuda aveshe ve lidilike oikulya nokwe va ongaleka opo “va ka konge ekwafo lOmwene.” Opo nee, okwa li a kala ofika mokati keongalo lOvajuda nolaJerusalem ndele ta ilikana. Okwa indila kuJehova a ti: “Kalunga ketu, ito va tokola? Osheshi mufye kamu neenghono okulwifa ongudu inene tai tu homona. Ndele inatu shiiva eshi tu noku shi ninga, ndelenee omesho etu taa tale kuove.” Kalunga kashili okwa li a uda eilikano laJosafat nokwa li e mu xupifa pashikumwifilonga. (2 Omaf. 20:3-12, 17) Ngeenge hatu ningi omatokolo, unene tuu oo tashi dulika a kume oupamhepo wetu, mbela katu na okukala twe lineekela muJehova ponhele yokukala twe lineekela meendunge detu vene?

12, 13. Ohamba David oye tu tulila po oshihopaenenwa shilipi ngeenge hatu ningi omatokolo?

¹² Oshike tu na okuninga po ngeenge otwe lihange meenghalo odo tadi monika da fa dipu kufye okukandula po, tashi dulika molwaashi twa li twa pita nale meenghalo da faafana? Ehokololo laDavid otali tu kwafele moshinima osho. Eshi Ovaamalek va li va ponokela oshilando shedina Siklag ova li va kwata po ovakulukadi vaDavid nounona vaye nosho yo vovakwaita vaye. David okwa li a indila Jehova a ti: “Ame ohandi ka shikula tuu ongudu oyo?” Jehova okwa li e mu nyamukula a ti: “Shikula, osheshi to ke i hanga shili ndee to ka xupifa mo venya.” Opo nee, David okwa fikama ndele ta “xupifa aveshe ovo Ovaamalek va kufa.” — 1 Sam. 30:7-9, 18-20.

¹³ Konima yefimbo lonhumba okudja eshi Ovaamalek va li va ponokela oshilando Siklag, Ovafilisti ova li natango ve uya okukondjifa Israel. Pomhito opo, David okwa li natango a indila ekwafo kuJehova nokwa li a nyamukulwa monghedi ya yela. Kalunga okwa ti: “Inda, osheshi Ame ohandi yandje shili Ovafilisti meke loye.” (2 Sam. 5:18, 19) Diva konima yaasho, Ovafilisti ova li ve uya natango okukondjifa David. Mbela David okwa li ta ka ninga po shike pomhito oyo? Mbela okwa li ta ka tomhafana ta ti kutya ‘nandi ye ashike ndi ka lwife ovatondi vaKalunga, molwaashi nde va findile nonale oikando ivali?’ Ile mbela okwa li ngoo ta ka konga natango ewiliko laJehova? David ka li a ungaunga nonghalo oyo she likolelela koimoniwa yaye yomonakudiwa. Natango okwa li ashike a pula ekwafo kuJehova okupitila meilikano. Ka li tuu a hafa eshi a ninga etokolo la tya ngaho! Ashike omalombwelo oo a li a pewa kuJehova oshikando osho okwa li a yooloka ko kwaao onale. (2 Sam. 5:22, 23) Ngeenge otwa shakeneke onghalo ile oupyakadi wa faafana naao twa pita muo nale, otu na okulungama tuha diladile kutya ohatu ka pondola ashike ngahenya molwaashi twa pondolele nonale. — Lesha Jeremia 10:23.

14. Oshike hatu lihongo monghedi omo Josua novakulunhu vaIsrael va li va ungaunga nOvagibeon?

¹⁴ Molwaashi inatu wanenena, atusheni otwa pumbwa okulungamena eamo lokuhakonga ewiliko laJehova ngeenge hatu ningi omatokolo, kutya nee ovakulunhuongalo ovo va pyokoka. Pashihopaenenwa, natu ka taleni kutya omuwiliki woshiwana shaIsrael oo a li a landula Moses, Josua, novakulunhu vasho ova li ve linyenga ngahelipi eshi va kengelelwa kOvagibeon. Ovagibeon ova li va kotokela Josua novakulunhu, molwaashi ova li ve uya kuvo tava pula va pange ombili navo, va djala oikutu yoinyanyu nova ti kutya ova dja koshilongo shokokule. Josua novakulunhu ova li ashike va panga ombili nokuninga ehangano nOvagibeon nopehe na okupula ewiliko laJehova. Nonande Jehova okwa li ngoo a yambidida eudafano olo, oshimoniwa osho okwe shi shangififa mOmishangwa opo tu dule okulihonga mo sha. — Jos. 9:3-6, 14, 15.

Ngeenge to kondjo neyeleko

15. Yelifa kutya omolwashike eilikano la fimana mokukondjifa omayeleko.

¹⁵ Molwaashi otu na “omhango youlunde” momalutu etu, otu na okukala hatu kondjifa eamo loulunde twa mana mo. (Rom. 7:21-25) Ohatu dulu okupondola monghalo ya tya ngaho. Ngahelipi mbela? Jesus okwa li a lombwela ovashikuli vaye kutya ove na okukala va lenga eilikano opo va dule okufinda omayeleko. (Lesha Lukas 22:40.) Nokuli ngeenge omahalo mai ile omadiladilo a puka inaa xula po konima eshi twa ilikana, otu na natango ‘okwiindila kuKalunga’ e tu pe ounongo opo tu ungaunge neyeleko la tya ngaho. Jakob okwe tu shilipaleka kutya Jehova oku “hole okuyandjela aveshe noku he nokungongota.” (Jak. 1:5) Jakob okwa ti yo: “Ope na tuu umwe mokati keni ta vele [pamhepo]? Oye na ifane ovakulunhu veongalo, ndele vo nave mu ilikanene ndele nave mu vaeke omaadi medina lOmwene. Neilikano leitavelo otali xupifa omunaudu.” — Jak. 5:14, 15.

16, 17. Onaini tu na okwiilikana ngeenge twa pumbwa ekwafo opo tu kondjife omayeleko?

¹⁶ Osha fimanenena okukala hatu ilikana ngeenge tu li momayeleko, ashike otu na okukala tu shii kutya onaini twa pumbwa okwiilikana. Natu ka taleni koshihopaenenwa shomulumenhu umwe omunyasha oo a popiwa mOmayeletumbulo 7:6-23. Eshi kwa wiwila, omumati oo okwa li a ka enda mepandavanda lonhumba omo mwa li mwa shiivika kutya ohamu kala ombwada. Omulumenhu oo okwa li a hongaulwa komapopyo omukainhu oo nomolwomufenhu womilungu daye, nokwe mu shikula diva ngaashi ongobe tai twalwa kokatomheno. Ndele mbela omunyasha oo okwa li a ka tala ko shike kepandavanda olo? Okwa li a ya ko molwaashi “e he neendunge” notashi dulika a li a kwatwa komahalo mai. (Omayel. 7:7) Mbela okwa li e na okwiilikana pefimbo lilipi? Doshili, okwa li ta dulu okwiilikana efimbo keshe a taalela omayeleko. Ndele omhito iwa yokwiilikana oya li efimbo olo a li ta yelekwa oshikando shotete a ka ende kepandavanda oko.

¹⁷ Nokunena omunhu otashi dulika a kale ta kondjifa eamo lokutala omafano oipala. Ndele natu tye nee ngeno okwa hala okuya keenhele dokointaneta oko e shii kutya oku na omafano nouvidio inava koshoka. Mbela ite ke lihanga ashike monghalo ya faafana naayo yomulumenhu omunyasha oo a popiwa mOmayeletumbulo, etukulwa 7? Inashi nyika tuu oshiponga okuninga ngaho! Opo omunhu a kondjife eamo lokutala omafano oipala, oku na okupula ekwafo kuJehova fimbo ina hetekela okuya keenhele odo dokointaneta.

18, 19. (a) Omolwashike okukondjifa omayeleko taku dulu okukala eshongo, ndele ongahelipi hatu dulu oku a finda nomupondo? (b) Owa tokola toko okuninga shike?

¹⁸ Ihashi kala shipu okukondjifa omayeleko ile okweefa po eenghedindjikilile dii. Omuyapostoli Paulus okwa ti: ‘Ombelela oi nondubo nomhepo, nomhepo i nondubo nombelela; opo tuha ninge osho twe shi hala.’ (Gal. 5:17) Ndele opo tu finde eyeleko olo, otwa pumbwa okwiilikana divadiva shimha omadiladilo mai a hovele mufye, fye hatu katuka nee metwokumwe nomailikano etu. Ombibeli oya ti kutya itatu “hangika keyeleko limwe, olo tuu olo lopanhu,” ndele Jehova ote ke tu kwafela tu kale ovadiinini kuye. — 1 Kor. 10:13.

¹⁹ Jehova okwe tu pa oshali ikumwifi yeilikano oyo tai dulu oku tu kwafela ngeenge hatu ungaunga neenghalo didjuu, hatu ningi omatokolo a kwata moiti ile hatu kondjifa omayeleko. Ohatu dulu okuulika kutya otwe lineekela muJehova okupitila meilikano. Otu na yo okukala hatu indile Jehova e tu pe omhepo yaye iyapuki i tu wilike noku tu pameka. (Luk. 11:9-13) Onghee hano, natu kaleni twe lineekela filufilu muJehova ndele hakuliameka keendunge detu vene.

[Eshangelo lopedu]

Oto dimbuluka?

• Oshike twe lihonga moshihopaenenwa shaHiskia, Hanna nosho yo shaJona shi na sha nokukala twe lineekela muJehova?

• Ongahelipi oshihopaenenwa shaDavid naJosua tashi ulike kutya otwa pumbwa okukala twa lungama ngeenge hatu ningi omatokolo?

• Onaini unene twa pumbwa okwiilikana ngeenge hatu yelekwa?

[Efano pepandja 9]

Onaini eilikano tali dulu unene oku tu etela ouwa ngeenge twa taalela eyeleko?