Omapulo a dja kovaleshi
Mbela ohatu dulu ngoo okushiiva filufilu kutya Jesus Kristus okwa li a valelwa pongapi?
Epulo olo ola holoka po molwaashi opa fa pe na ekondjifafano pokati kehokololo lEvangeli laMarkus naalo lomuyapostoli Johannes li na sha nefimbo opo Jesus a fya. Markus okwa ti: ‘Otundi ei ve mu valela [komuti womahepeko, NW] oya li onhinhatu.’ (Mark. 15:25) Ofimbo Johannes okwa ti kutya Pilatus okwa li a yandja Jesus kOvajuda ve ke mu valele ‘potundi onhi-6’ lwaapo. (Joh. 19:14-16) Ovahongwanhu vOmbibeli ova yandja omayelifo e lili noku lili eshi va li tava kendabala okupongolola po oupyakadi oo. Ashike Omishangwa inadi yandja oumbangi we lixwa po kutya omolwashike pe na eyooloko pokati komahokololo oo avali. Ndele nande ongaho, otashi dulu okukala ekwafo ngeenge otwa tale kutya ovanhu vopefimbo lonale ova li hava valula eevili ngahelipi.
Mefelemudo lotete, ovanhu kava li ve na eevili ngaashi dokunena. Ova li ashike hava kwafelwa ketango opo va tengeneke kutya otundi onhingapi. Kakele kaasho, efimbo leningino nolepito letango ohali lunduluka momukokomoko womudo. Onghee hano, ovanhu ova li ashike hava tengeneke eevili. Luhapu Omishangwa dopaKriste dOshigreka oda tumbula oiningwanima yonhumba ya ningwa ngaashi pokafimbo okatitatu, potundi onhi-6, ile potundi onhi-9, sha hala kutya, lwopeevili odo ngaho. (Mat. 20:3, 5; Oil. 10:3, 9, 30, yelekanifa no-NW.) Nokuli nopeemhito opo kwa tumbulwa eevili dokondadalunde ngaashi “potundi onhi-6,” osha li ashike hashi ningwa ngeenge sha pumbiwa filufilu okuulika kutya oshiningwanima shonhumba osha ningwa pongapi. — Joh. 4:52.
Omahokololo Omavangeli okwa tumbula eetundi tadi tu kumwe di na sha noiningwanima yomefiku olo Jesus a dipawa. Omavangeli aeshe ane okwa hokolola kutya tete ovapristeri novakulunhu vaIsrael ova li va ongala konima yeningino letango, nokudja opo, ova twala Jesus kungoloneya waRoma Pontius Pilatus. (Mat. 27:1; Mark. 15:1; Luk. 22:66; Joh. 18:28) Mateus, Markus naLukas aveshe ova hokolola kutya kombada yedu okwa li kwe uya omilaulu okudja potundi onhi-6 “fiyo okotundi onhi-9,” nopefimbo opo Jesus okwa hangwa nale a valelwa komuti. — Mat. 27:45, 46; Mark. 15:33, 34; Luk. 23:44.
Oshinima shimwe osho tashi dulika sha li sha ningifa omahokololo e na sha nefimbo lokuvalelwa kwaJesus a kale a yoolokafana osho: Okuhepekwa ile okudengwa neeshokoto oko nako kwa li kwa talika ko ku li oshitukulwa shokuvalela omunhu. Efimbo limwe omunhu okwa li ha dengwa neenghono fiyo a fya nokuli nofimbo ina valelwa. Omahepeko aJesus nao oku na okukala a li a kwata moiti neenghono, nomolwaasho umwe a li a pulwa a humbate ko komuti waye womahepeko konima eshi a li ite u dulu vali. (Luk. 23:26, NW; Joh. 19:17, NW) Hano ngeenge omahepeko okwa li a talika ko e li etameko lokuvalela omunhu, ope na okukala pa li pa pita efimbo lonhumba fimbo Jesus ina ka valelwa komuti wo venevene. Onghee hano, omuhokololi keshe otashi dulika a li a tumbula ovili yokuvalelwa kwaJesus she likolelela kefimbo opo pa ningwa oiningwanima oyo a kwatela mehokololo laye.
Omuyapostoli Johannes okwa ka shanga ehokololo laye konima yomido omilongo a hanga ovashangi vOmavangeli vakwao va shanga avo nale. Hano oku na okukala a hangwa a lesha nale omahokololo avakwao, ndele nande ongaho, ina shanga efimbo la faafana naalo la popiwa kuMarkus. Osho otashi yandje oumbangi wa yela kutya Johannes ina tapa ashike osho sha shangwa nale mehokololo laMarkus. Ovashangi ovo vavali, Johannes naMarkus, aveshe ova li va nwefwa mo kuKalunga. Onghee hano, nonande Omishangwa inadi yandja ouyelele we lixwa po tau yelifa kutya omolwashike ovashangi ovo va popya eevili da yoolokafana, ohatu dulu okukala noushili kutya Omavangeli oku shii okulineekelwa.