Oto dimbuluka?

Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

• Olyelye e na okuhonga ounona kombinga yaKalunga?

Nonande otashi dulika vamwe tava dulu okukwafela ovadali, ovadali ovo unene ve na oshinakuwanifwa shokuhonga ounona vavo kombinga yaKalunga nosho yo kombinga yanghee Kalunga a hala oukwaneumbo u kale. — 10/1, epandja 7.

• Kalunga okwa li a hala okutya shike eshi a lombwela Ovalevi a ti: “Aame mwene oshitukulwa shoye”?

Eshi omapata aeshe aIsrael a li a pewa oitukulwafyuululo yedu, Ovalevi vo kava li va pewa molwaashi Jehova oye a li ta ka kala “oshitukulwa” shavo. (Num. 18:20) Ovalevi ova li va pewa oufembanghenda we likalekelwa moilonga yaJehova. Ndele nande ongaho, Jehova okwa li he va wanifile po eemhumbwe davo dopalutu. Onghee hano, ovo hava xumifa komesho oinima yOuhamba kunena otava dulu okukala nelineekelo kutya Jehova ote ke va wanifila po eemhumbwe davo. — 9/15, epandja 7-8, 13.

• Omolwashike sha fimana okufimaneka kaume koye kopahombo?

Efimaneko ohali kwafele ovalihomboli va kale va hafa shili nohombo yavo i kalelele. Ohali ningifa ovalihomboli va kale va wanenwa nove udite va amenwa. Osha fimanenena okukulika oukwatya oo. — 10/1, epandja 10-12.

• Oshike tashi dulu okukwafela Omukriste a mone kutya omalihafifo onhumba omawa ile hasho?

Opo omunhu a mone ngeenge omalihafifo onhumba omawa nonokutya okwa hokiwa kuKalunga, oshiwa okulipula omapulo aa taa landula apa: Mbela okwa kwatela mo naanaa shike? Onaini ndi na okukufa ombinga muo? Oolyelye hatu ka kufa navo ombinga muo? — 10/15, epandja 9-12.

• Otu na ngoo okufuta oifendela?

Eshi Jesus a li a pulwa ngeenge osha yuka ngoo koshipala shaKalunga okufuta oifendela kepangelo laRoma olo la li tali pangele pefimbo opo, okwa nyamukula netumbulo eli lididilikwedi a ti: “Eshi shomukesari, shi peni omukesari, naasho shaKalunga, shi peni Kalunga.” (Mark. 12:13-17) Omapangelo oo taa fanekwa ‘kOmukesari,’ ohaa nduluka oimaliwa noku u fa ongushu yayo. Onghee hano, pataleko laKalunga, oku na oufemba wokupula a shunifilwe oimaliwa oyo panghedi yoifendela. — 10/1, epandja 13, 14.

• Ongahelipi ehokololo olo li li mOmayeletumbulo 7:6-23 tali tu kwafele tu henuke okutala omafano oipala?

Ehokololo olo otali popi kombinga yomulumenhu omunyasha oo e ke liendifa ponhele yonhumba opo e shii kutya ohapa kala ombwada. Ombwada oyo oya li ya kokela omulumenhu oo moluhaelo. Kunena, otashi ka kala shiwa okuhenuka okuya keenhele dokointaneta oko tu shii kutya oku na omafano inaa koshoka nosha fimana okukonga ekwafo kuKalunga okupitila meilikano pefimbo opo hatu diladila okuya keenhele da tya ngaho. — 11/15, epandja 9-10.

• Ongahelipi to dulu okudidilika mo elongelokalunga lashili?

Ovalongelikalunga vashili ova fimaneka Ombibeli i li Eendjovo daKalunga nova fimaneka edina laKalunga, Jehova. Ohava udifa kombinga yOuhamba waKalunga nokave fi oshitukulwa shounyuni ou woukolokoshi. Ovakriste vashili ove holafane nohole ya xwama. — 10/1, epandja 16, 17.

• Kalunga okwa lenga mbela omuhoko umwe shi dulife dimwe?

Hasho nandenande! Ombibeli oya popya sha yela ya ti: “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oil. 10:34, 35) — 10/1, epandja 26.