Oshili kombinga yaHarmagedon

‘Eemhepo deendemoni otadi i keehamba dounyuni aushe oku di shivila oita, noku di ongaleka ponhele hai ifanwa mOshiheberi Harmagedon.’ — EHOLOLO 16:14, 16.

OSHITYA Harmagedon ile Armagedon otashi ulike kedina lonhele. Ndele nande ongaho, kombada yedu kaku na onhele yolelalela hai ifanwa nedina olo.

Ndele ngeenge osho ngaho, mbela edina “Harmagedon” otali ulike kushike? Omolwashike hali longifwa luhapu okuulika koiningwanima, ngaashi oita?

Oda ongalekwa ponhele hai ifanwa Harmagedon

Oshitya shOshiheberi Har–Magedon otashi ti lelalela “Omhunda yaMegiddo.” Nonande kape na omhunda yo venevene hai ifanwa nedina olo, ope na onhele imwe hai ifanwa Megiddo. Onhele oyo otai hangwa pomashakeneno manene eendjila mbali e li kouningininolundume loshitukulwa omo mwa li hamu kala Ovaisrael vopefimbo lonale. Popepi nonhele oyo opa li hapa lwilwa nale omalwoodi manene mahapu. Onghee hano, ngeenge taku tumbulwa edina Megiddo, luhapu ohashi diladilifa ovanhu oita.a

Eityo lolela ledina Megiddo ihali yukifwa komalwoodi oo a li haa lwilwa ponhele oyo, ndele oketomheno kutya omolwashike a li haa lwilwa po. Megiddo osha li mEdu lEudaneko olo Jehova Kalunga a li a pa Ovaisrael. (Exodus 33:1; Josua 12:7, 21) Jehova okwa li a udaneka kutya ota ka popila oshiwana shaye kovatondi vasho, naasho osho naanaa a li a ninga. (Deuteronomion 6:18, 19) Pashihopaenenwa, okwa li a amena Ovaisrael pashikumwifilonga puMegiddo eshi va li va homonwa komatanga Ovakanaan taa wilikwa kohamba Jabin nokondjai yaye Sisera. — Ovatokolipangeli 4:14-16.

Onghee hano, oshitya “Harmagedon” ile “Armagedon” oshi na eityo la tongomana. Ohashi yukifwa kolwoodi pokati komatanga ovakwaita avali omanaenghono.

Exunganeko olo tali hangwa membo lEhololo otali popi kombinga yaasho tashi ka ningwa po monakwiiwa i li popepi, eshi Satana neendemoni daye tava ka heka omapangelo opanhu a ongele omatangakwaita ao, a shonge oshiwana shaKalunga nodino. Olwoodi olo otali ka etifa efyo lovanhu omamiliyona mahapu eshi Kalunga ta ka finda ovatondi voshiwana shaye. — Ehololo 19:11-18.

Omolwashike Kalunga ta ka dipaa ovanhu vahapuvahapu ngaho ngeenge Ombibeli oye mu popya kutya ‘oha dimine po omatimba, oku na onheni nomunene mouwanghenda’? (Nehemia 9:17) Opo tu ude ko eenghatu daKalunga, tete otwa pumbwa okunyamukula omapulo atatu taa landula: (1) Olyelye ta ka hovela olwoodi? (2) Omolwashike Kalunga ta ka ya mo olunyala? (3) Oita oyo otai ka etela ovanhu omauwa taa kalelele elipi?

1. OLYELYE TA KA HOVELA OLWOODI?

Okukufa ombinga kwaKalunga moita yaHarmagedon inashi hala okutya omukwanyanya. Ponhele yaasho, ote ke shi ninga nelalakano lokuxupifa ovapiya vaye kwaavo va hala oku va hanauna po. ‘Eehamba dounyuni aushe,’ ile tu tye, ovapangeli vounyuni ovo tava ka kufa ombinga moita oyo ovo ovakwanyanya. Omolwashike tadi ka ponokela oshiwana shaKalunga? Omolwaashi Satana oye ta ka tula ediladilo olo lokuhanauna po filufilu ovapiya vaKalunga momitima dovapangeli nodomatanga ovakwaita, ngaashi ashike okadanaukifo ke li meke lenyakwa. — Ehololo 16:13, 14; 19:17, 18.

Molwaashi ovanhu moilongo imwe ove na emanguluko lokupopya nolokuhoolola elongelokalunga olo va hala, ediladilo olo kutya omapangelo otaa ka ponokela ile taa ka xulifa po omalongelokalunga otashi dulika li kale la fa itali shiiva. Ashike omaponokelo amwe oludi olo okwa kala taa ningwa momukokomoko wefelemudo eti-20 notaa ningwa yo nokunena.b Ndele nande ongaho, ope na eyooloko la kula pokati komaponokelo onale naalo tali ka ningwa puHarmagedon. Shotete, eponokelo lopuHarmagedon otali ka kwata ounyuni aushe. Oshitivali, onghatu oyo Jehova Kalunga ta ka katuka pefimbo opo itai yelekwa nandenande naado a katukile monakudiwa. (Jeremia 25:32, 33) Ombibeli oya popya shi na sha noita oyo ya ti kutya “oita mefiku linene laKalunga omunamapangelo aeshe.”

2. OMOLWASHIKE KALUNGA TA KA YA MO OLUNYALA?

Jehova okwa lombwela ovalongeli vaye kutya ove na okukala ovanambili nove hole ovatondi vavo. (Mika 4:1-3; Mateus 5:43, 44; 26:52) Onghee hano, itava ka longifa oilwifo opo ve liamene eshi tava ka ponokelwa nonyanya. Ngeenge Kalunga okwa kala ina ya mo olunyala opo a xupife oshiwana shaye, otashi ka kombwa po filufilu. Natango, edina laJehova Kalunga otali ka shekwa. Ngeenge ovatondi vaJehova ova pondola okuhanauna po oshiwana shaYe, Jehova ota ka kala a fa ehe fi omunahole, omuyuki ile ehe na eenghono dasha. Onghee hano, ita ka efa oshiwana shaye shi hanaunwe po nandenande. — Epsalme 37:28, 29.

Kalunga ina hala okuhanauna po omunhu nande oumwe, nomolwaasho ota londwele ovanhu shi na sha naasho ta ka ninga. (2 Petrus 3:9) Okupitila momahokololo oo e li mOmbibeli, ota londwele ovanhu aveshe kutya okwa li a katuka eenghatu eshi oshiwana shaye sha li sha ponokelwa monakudiwa. (2 Eehamba 19:35) Ombibeli otai londwele yo kutya Jehova ota ka katuka natango onghatu opo a lwife Satana novanhu vaye ovo tava ka ponokela oshiwana shaYe. Kakele kaasho, Eendjovo daKalunga oda xunganeka nale kutya Jehova ota ka hanauna po ovakolokoshi. (Omayeletumbulo 2:21, 22; 2 Ovatessaloniki 1:6-9) Pefimbo opo, ovo tava ka ponokela oshiwana shaKalunga otava ka mona kutya mboli otava lwifa Omunaenghono adishe. — Hesekiel 38:21-23.

3. OITA OYO OTAI KA ETELA OVANHU OMAUWA TAA KALELELE ELIPI?

Oita yaHarmagedon otai ka xupififa ovanhu omamiliyona. Osho otashi ka etifa ombili kombada yedu. — Ehololo 21:3, 4.

Embo lEhololo ola xunganeka kutya poita oyo otapa ka xupa “ongudu inene” yovanhu ovo va nyengana okuvala. (Ehololo 7:9, 14) Ovaxupipo ovo otava ka wilikwa kuKalunga opo va kwafele mokuninga edu Oparadisa ngaashi Jehova a li a lalakanena okudja pehovelo.

Mbela otu shii kutya oshiwana shaKalunga otashi ka ponokelwa naini?

[Omashangelo opedu]

[Efano pepandja 6]

Jehova Kalunga okwa li a popila oshiwana shaye monakudiwa

[Efano pepandja 7]

Jehova ota ka popila oshiwana shaye natango pefimbo loita yaHarmagedon