Ehena popepi nOmuudi womailikano

OVANHU vahapu ovo hava ti kutya ova itavela muKalunga itava dulu okupopya kutya omolwashike va itavela muye. Ihava dulu nokuli okuyelifa kutya omolwashike omalongelokalunga luhapu haa longo owii ile kutya omolwashike Kalunga a efa okumona oixuna ku kale po. Ndele nande ongaho, ohava ilikana kuKalunga oo vehe shii.

Ashike oto dulu okweehena popepi elela naKalunga kashili. Oto dulu okupameka eitavelo muKalunga mokulihonga kombinga yaye, naasho otashi ke ku kwafela u kale u mu hole nowe mu lenga. Eitavelo lashili ole likolelela koumbangi. (Ovaheberi 11:1) Ngeenge owe lihongo oshili kombinga yaKalunga, oto ke mu shiiva noto ka dula okupopya naye onga kaume koye. Natu ka tale koimoniwa yavamwe ovo va kala hava ilikana nonande ova kala va limbililwa ngeenge Kalunga oko ngoo e li shili.

◼ Patricia oo a popiwa moshitukulwa shotete okwa ti: “Efiku limwe onda li nookaume kange ve li omulongo lwaapo ovo va li va hovela okupopya kombinga yomalongelokalunga. Onda li nde va lombwela kutya efiku limwe onda li nda dja mo meumbo opo ndi fiye po eenghundafana odo da li pokati katate oo ina itavela muKalunga nosho yo umwe womEendombwedi daJehova, oo a li e uya meumbo letu. Kaume kange umwe okwa ti: ‘Pamwe Eendombwedi daJehova odo di li mondjila.’

Kaume kange umwe vali okwa ti: “‘Omolwashike itatu yeni kokwoongala kwado fiku limwe opo tu ka pwilikine?’ Opo nee otwa li twa ya kokwoongala, ndele nonande otwa li twa limbililwa, vamwe vomufye otwa li twa twikila okuya kokwoongala molwaashi Eendombwedi odi na oukaume neenghono.

“Ndele Osoondaxa shimwe onda li nda uda sha osho sha li sha lundulula oikala yange. Omupopi okwa li a yelifa kutya omolwashike ovanhu hava mono oixuna. Kanda li ndi shii kutya ovanhu ova li va shitwa va wanenena nosho yo kutya oulunde nefyo owa etifwa po komunhu umwe ndele tau tandavela movanhu aveshe. Omupopi okwa li yo a yelifa kutya omolwashike Jesus a li e na okufya opo shi kwafele ovanhu va mone osho sha kanifwa komunhu wotete.a (Ovaroma 5:12, 18, 19) Ohaluka, onda li ndi udite ko keshe shimwe. Onda li nda diladila kutya ‘oku na shili Kalunga oo e na ko nasha nafye.’ Onda li nda twikila okukonakona Ombibeli, nonda li nde lihonga diva oshikando shotete kutya ohandi dulu okwiilikana komunhu oo e li ko shili.”

◼ Allan, oo naye a tumbulwa moshitukulwa shotete okwa ti: “Efiku limwe Eendombwedi daJehova oda li de uya peumbo letu, nomukulukadi wange okwa li a tya nadi uye mo molwaashi okwa li e na ohokwe mwaasho da li tadi popi kombinga yokukala fiyo alushe kombada yedu. Osho osha li sha handukifa nge. Otwa li twa fiya Eendombwedi moseti nokuya mokombifa nomukulukadi wange ndele handi mu lombwele handi ti, ‘Lungama. Ito dulu okwiitavela oinima ya tya ngaho.’

Omukulukadi okwa li a nyamukula a ti: “‘Inda ko nee hano ndele to ka tala ngeenge ova puka.’

“Ndele kanda li nda mona epuko lasha mudo. Oda li ovanambili neenghono noda li da fiila nge embo limwe tali popi shi na sha nongeenge oinima i na omwenyo oya shitwa ile oye uya po ashike ngahenya. Okutomhafana kwembo olo okwa li kwa yela nawa nokwa kanghamena komaumbangi, nomolwaasho onda li nda tokola kutya ondi na okulihonga shihapu kombinga yaKalunga. Onda li nda hovela okukonakona Ombibeli nEendombwedi, nonda li nda mona diva kutya osho tai ti osha yooloka ko filufilu koinima aishe oyo nda kala handi diladila kombinga yomalongelokalunga. Eshi nda enda handi lihongo kombinga yaJehova, onda li nda hovela okwiilikana kuye nda mana mo. Onda li ndi na oikala yonhumba oyo ihe fi iwa, nonda li nda ilikana kuye a kwafele nge. Onda li ndi na oushili kutya Jehova ota ka nyamukula omailikano ange.”

◼ Andrew, wokuEngland, okwa ti: “Nonande onda kala nda itavela neenghono mounongononi nondi na ohokwe neenghono muo, onda kala nda itavela mehongo loevolusi molwaashi ashike ovanhu vamwe tava popi kutya oli li mondjila. Kanda li nda itavela muKalunga omolwoinima aishe ii oyo tai ningwa.

“Ndele nande ongaho, omafimbo amwe onda li handi diladila kutya: ‘Ngeenge Kalunga oko e li, onda hala oku mu shiiva nawa. Omolwashike ku na oita nekaulonyanga lihapu neenghono?’ Omafimbo amwe onda li handi ilikana ngeenge ndi li moudjuu, ashike nghi shii kutya olyelye nda li handi popi naye.

“Opo nee omukulukadi wange okwa li a pewa okafo komunhu wonhumba, ka nyanyangidwa kEendombwedi daJehova, ke na oshipalanyole, Ounyuni Ou Otau Ka Xupa Ngoo? Onda li handi dilonga luhapu kepulo olo. Okafo oko oka li ka diladilifa nge kombinga yOmbibeli kutya, ‘Mbela oshiwa okushiiva omanyamukulo ayo?’ Konima yefimbo fimbo nda li mefudo, umwe okwa li a pa nge embo li na oshipalanyole The Bible—God’s Word or Man’s?b Eshi nda li nda didilika kutya Ombibeli otai tu kumwe nounongononi washili, onda li nda mona kutya onda pumbwa okulihonga shihapu kombinga yOmbibeli. Onghee hano, eshi Ondombwedi yaJehova imwe ya li ya pula i konakone Ombibeli naame, onda li nde shi tambula ko. Eshi nda uda ko elalakano laJehova, onda li ndi udite kutya onde mu shiiva e li omunhu wolela, oo handi dulu okupopya naye nda manguluka okupitila meilikano.”

◼ Jan, oo a kulila meitavelo lOuprotestande muLondon, okwa ti: “Oihelele yomalongelokalunga nosho yo okumona oixuna kuhapu okwa li kwa ningifa nge ndi fiye po elongelokalunga. Natango onda li nda fiya po oshiputudilo shehongo ndele handi hovele okwiimba nokudenga oshiketala opo ndi mone oimaliwa. Pefimbo opo, otwa ka shakena naPat, oo a putukila mongeleka yaKatoolika, ndele lwanima naye okwa ka kala ina itavela vali muKalunga.

“Fye nosho yo vakwetu vamwe ovo navo va fiya po ofikola nova li ve na ohokwe momalongelokalunga okoilongo yokOushilo, otwa li hatu kala meumbo limwe la haulukwa. Keenguloshi otwa li hatu kundafana moule oule weevili dihapu kombinga yeityo longhalamwenyo. Nonande fye naPat katwa li twa itavela muKalunga, otwa li tu udite kutya ope na eenghono donhumba odo da shita oinima i na omwenyo.

“Omonamati wetu okwa ka dalwa konima eshi twa tembukila kolundume laEngland oko twa li twa ka konga oilonga yokushika eengalo. Onguloshi imwe omonamati wetu okwa li ta vele, nonda li nda ilikana kuKalunga nonande inandi itavela muye. Diva konima yaasho, ekwatafano letu naPat ola li la naipala, nonda li nda kufa okaana ndele handi mu fiye po. Natango, onda li handi ilikana opo ndi mone ekwafo, nde lineekela kutya pamwe ope na ngoo oo ta pwilikine. Pat naye okwa li ta ningi sha faafana nonande kanda li ndi shi shii.

“Konima yefimbo efiku olo, Eendombwedi daJehova mbali oda li da konghola pomuvelo waPat ndele tadi mu ulikile omayele mawa okudja mOmbibeli. Pat okwa li a dengela nge nokwa pula nge ngeenge naame onda hala okukonakona Ombibeli pamwe naye nEendombwedi. Diva otwa li twe lihonga kutya ngeenge otwa hala okuhafifa Kalunga, otu na okuhombola paveta. Osha li tashi monika shidjuu oku shi ninga molwaashi katwa li tu na ekwatafano liwa.

“Otwa li twa halelela okushiiva shihapu shi na sha nokuwanifwa kwomaxunganeko Ombibeli, etomheno molwaashi pe na okumona oixuna nosho yo kutya Ouhamba waKalunga oshike. Konima yefimbo, otwa ka mona kutya Kalunga oku na ko nasha novanhu notwa hala okulonga ehalo laye. Opo nee otwa li twa hombola. Omayele Eendjovo daKalunga okwe tu kwafela opo tu dule okutekula ounona vetu vatatu. Otu na oushili kutya Jehova okwa uda omailikano etu.”

Konakona oumbangi kwoove mwene

Ngaashi omamiliyona mahapu kunena, ovo va popiwa moshitukulwa eshi inava efa va pukifwe komalongelokalunga oipupulu nova shiiva kutya omolwashike Kalunga a efa okumona oixuna ku kale po. Owa didilika ngoo kutya moshimoniwa keshe ovanhu ova li va kwafelwa keudeko lashili lOmbibeli opo va shiive kutya Jehova oha pwilikine shili komailikano?

Mbela ino hala okukonakona oumbangi oo tau ulike kutya Kalunga oko e li? Eendombwedi daJehova oda halelela oku ku kwafela u lihonge oshili kombinga yaJehova nosho yo nghee to dulu okweehena popepi ‘nOmuudi womailikano.’— Epsalme 65:3.

[Omashangelo opedu]

[Ouyelele u li pepandja 10]

“Eshi nda uda ko elalakano laJehova, onda li ndi udite kutya onde mu shiiva e li omunhu wolela, oo handi dulu okupopya naye nda manguluka okupitila meilikano”

[Efano pepandja 9]

Eitavelo lashili ole likolelela koumbangi nosho yo kokukala wa hala okulihonga oshili kombinga yaKalunga