Ovaleshi tava pula . . . 

Mbela Kalunga oku na ko ngoo nasha ngeenge ohandi shili omakaya?

▪ Omunhu oo e na omutima muwa otashi dulika a pule epulo olo, molwaashi kape na omhango mOmbibeli ya popya kombinga yomakaya. Mbela osho osha hala okutya oshidjuu okushiiva kutya Kalunga okwa tala ko ngahelipi omakaya? Hasho nandenande.

Ombibeli oya ti kutya “Omishangwa adishe [oda] yandjwa keenghono dOmhepo yaKalunga.” (2 Timoteus 3:16) Omishangwa odi na omafinamhango nosho yo omatumbulo oo taa ulike kutya Kalunga okwa hala tu file oshisho oukolele wetu. Tete natu ka taleni osho ovakonakoni voinima va ti shi na sha nanghee omakaya haa kumu oukolele womunhu. Opo nee ohatu ka tala nghee omafinamhango Ombibeli a pambafana naasho va ti.

Omakaya ohaa nyono po oukolele womunhu oo he a shili nohaa dipaa ovanhu. Otaku tiwa kutya omunhu umwe womovanhu 5 keshe ovo hava fi mOilongo ya Hangana, oha fi omolwokushila omakaya. O-National Institute on Drug Abuse oya ti kutya moshilongo osho ovanhu vahapu ohava fi omudo keshe omolwomakaya ve dule ovanhu aveshe ovo hava fi “koalkoholi, kokulongifa oingangamifi, komadipao, kokulidipaa, koiponga yeetuwa nosho yo ko-AIDS.”

Ovo hava shili omakaya ohava ehameke vakwao. Okufudila mo omwifi womakaya okwa nyika oshiponga, kashi na nee mbudi kutya ou fike peni. Ovanhu ovo ihava shili omakaya, ovo hava fudile mo omwifi oo tau di kwaavo hava shili omakaya otava dulu okukwatwa noupu kokankela yokomapunga nosho yo koudu womutima. Omido opo da di ko, eendokotola oda didilika kutya oudiyo womakaya oo hau fyaala koikutu, momamate nosho yo koinima imwe vali ngeenge omwifi wa kana po owa nyika oshiponga. Oudiyo oo ohau kumu unene oukolele wounona nohau nyono po oukwatya wavo wokulihonga.

Omakaya ohaa piki ovanhu. Ohaa ningifa omunhu oo he a shili a kale a pikwa konghedindjikilile ya nyika oshiponga. Ovakonakoni voinima ova itavela kutya ngeenge omunhu okwa pikwa konikotine, oshikwaudiyo shinene osho shi li momakaya, oshidjuu neenghono oku a efa po.

Mbela omafinamhango Ombibeli okwa pambafana ngahelipi nouyelele oo wa kundafanwa metetekelo? Natu ka tale kwaasho tashi landula:

Kalunga okwa hala tu kale twa fimaneka omwenyo. MOmhango oyo Kalunga a li a pa oshiwana shaIsrael, okwa li a ulika kutya ovo va hala oku mu hafifa ove na okukala va fimaneka omwenyo womunhu. (Deuteronomion 5:17) Ovaisrael ova li ve na okutunga oshikelelifongubu ile ekuma lixupi, la dingilila pombada yomaumbo avo. Omolwashike mbela? Omaumbo avo okwa li a lalakana pombada, novanhu ova li hava kala ko omafimbo amwe. Ekuma ola li hali amene oukwaneumbo ile vamwe vaha we ko ndele tava mono oshiponga ile va fye. (Deuteronomion 22:8) Kakele kaasho, Ovaisrael ova li ve na okushilipaleka kutya oimuna yavo itai monifa vamwe oshiponga. (Exodus 21:28, 29) Omunhu oo ha shili omakaya ota nyono omafinamhango oo a kwatelwa meemhango odo. Omunhu a tya ngaho ota nyono po owina oukolele waye. Natango, ota tula yo moshiponga oukolele waavo ve li popepi naye.

Kalunga okwa hala tu kale tu mu hole notu hole ovanhu vakwetu. Jesus Kristus okwa ti kutya ovashikuli vaye ove na okudulika koipango ivali inenenene. Ove na okukala ve hole Kalunga nomutima wavo aushe, nomwenyo wavo, neendunge davo nosho yo neenghono davo adishe nove na okukala ve hole ovanhu vakwao ngaashi ve lihole vo vene. (Markus 12:28-31) Molwaashi omwenyo oo oshali ya dja kuKalunga, omunhu oo ha shili omakaya ina fimaneka nandenande oshali yomwenyo, nokungaho ke hole Kalunga. (Oilonga 17:26-28) Onghedindjikilile yomunhu oo otai dulu okweetela vamwe oshiponga, nomolwaasho ita popi oshili ngeenge ota ti oku hole vakwao.

Kalunga okwa hala tu henuke eenghedindjikilile inadi koshoka. Ombibeli oya lombwela Ovakriste ve likoshe ‘kedilo keshe lombelela naali lomhepo.’ (2 Ovakorinto 7:1) Osha yela kutya okushila omakaya ohaku nyateke omunhu. Ohashi kala shidjuu neenghono okweefa po okushila omakaya komunhu oo a hala okuhafifa Kalunga. Ndele omunhu ota dulu okweefa po onghedindjikilile ya tya ngaho inai koshoka kekwafo laKalunga.