Yelekanifa eitavelo loye naasho Ombiibeli tai ti

MBELA owa itavela kutya naave ou li Omukriste? Ngeenge osho, ou li umwe womovanhu ve dulife pomabiliyona avali lwaapo. Konyala omunhu 1 womovanhu 3 ohe liti kutya omushikuli waKristus. Nonande kunena oku na omalongelokalunga mahapu e lili noku lili oo hae liti oopaKriste, omahongo ao otaa kondjifafana noku na omataleko a yoolokafana. Ashike eitavelo loye otashi dulika la yooloka ko komaitavelo aavo have liti Ovakriste. Kashi na nee mbudi kutya owa itavela shike, osha fimana okuyelekanifa eitavelo loye naasho ombiibeli tai ti ngeenge owa hala okukala metwokumwe nomahongo opaKriste oo e li mOmbiibeli.

Ovashikuli vaJesus Kristus vonale ova li hava ifanwa “Ovakriste.” (Oilonga 11:26) Molwaashi okwa li ashike ku na eitavelo lOvakriste limwe, kava li va pumbwa okukala ve na omadina amwe oo taa dulu oku va yoolola mo. Ovakriste okwa li hava shikula omahongo nosho yo omalombwelo Omutoti wOukriste, Jesus Kristus. Ongahelipi shi na sha nelongelokalunga loye? Mbela owa itavela kutya ohali hongo osho Kristus a li ha hongo nosho yo osho ovashikuli vaye vonale va li va itavela? Ongahelipi to dulu oku shi shiiva? Onghedi oyo to dulu okulongifa, okuyelekanifa osho wa itavela nOmbiibeli.

Diladila kwaashi: Jesus Kristus okwa kala a fimaneka neenghono Omishangwa di li Eendjovo daKalunga. Ka li ha hokwa ovo va li hava xutula omahongo Ombiibeli neenghulunghedi davo. (Markus 7:9-13) Onghee hano, ohatu dulu okutya ovashikuli vaJesus vashili ove na okukanghamekela omahongo avo kOmbiibeli. Omukriste keshe ota dulu okulipula kutya, ‘Mbela omahongo elongelokalunga lange otaa tu ngoo kumwe naasho Ombiibeli tai ti?’ Opo u nyamukule epulo olo, omolwashike ito yelekanifa omahongo elongelokalunga loye naasho Ombiibeli tai ti?

Jesus okwa ti kutya okulongela Kalunga kwetu oku na okukala kwa kanghamena koshili oyo tai hangwa mOmbiibeli. (Johannes 4:24; 17:17) Omuyapostoli Paulus naye okwa popya kutya opo tu ka xupifwe otu na okufika “meshiivo loshili.” (1 Timoteus 2:4) Onghee hano, osha fimana opo eitavelo letu li kale la kanghamena koshili yOmbiibeli. Exupifo letu ka li li tuu monghuwo ina onghambe!

NGHEE TO DULU OKUYELEKANIFA OMAHONGO ETU NOMBIIBELI

Lesha omapulo ahamano taa landula ndele to didilike nghee Ombiibeli ye a nyamukula. Lesha yo omishangwa odo da etwa mo, nokudilonga komanyamukulo. Opo nee oto dulu okulipula kutya, ‘Mbela omahongo elongelokalunga lange otaa tu ngoo kumwe naasho Ombiibeli tai ti?’

Omapulo nomanyamukulo taa landula otaa dulu oku ku kwafela opo u dule okuyelekanifa osho wa itavela nOmbiibeli. Mbela ino hala okuyelekanifa omahongo amwe elongelokalunga leni naasho Ombiibeli tai ti? Eendombwedi daJehova otadi ka kala da hafa oku ku kwafela u konakone oshili yOmbiibeli. Omolwashike ito pula umwe womuvo mu konakone naye Ombiibeli oshali? Ile u tale ko-website yetu, o-jw.org/kj.

1 EPULO: Kalunga oye lyelye?

ENYAMUKULO: Jehova oo e li Xe yaJesus, oye Kalunga kaalushe, omunaenghono adishe nOmushiti woinima aishe.

OSHO OMBIIBELI TAI TI:

• “Ohatu pandula Kalunga Xe yOmwene wetu Jesus Kristus alushe ngenge hatu mu ilikanene.” — Ovakolossi 1:3.

• “Omwene wetu naKalunga ketu, Ove wa wana okutambula efimano nefimaneko nepangelo, osheshi Ove wa shita oinima aishe.” — Ehololo 4:11.

• Tala yoo Ovaroma 10:13; 1 Timoteus 1:17.

2 EPULO: Jesus Kristus oye lyelye?

ENYAMUKULO: Jesus oye Omona waKalunga noku li omushitwa wotete. Molwaashi Jesus okwa shitwa, osho otashi ulike kutya oku na etameko. Okwa li ha dulika noha longo ehalo laXe.

OSHO OMBIIBELI TAI TI:

• “Tate oku dule nge.” — Johannes 14:28.

• ‘Jesus oye olupe laKalunga iha monika, Omudalwa wotete woishitwa aishe.’ — Ovakolossi 1:15.

• Tala yoo Mateus 26:39; 1 Ovakorinto 15:28.

3 EPULO: Omhepo iyapuki oshike?

ENYAMUKULO: Omhepo iyapuki oyo eenghono odo Kalunga ha longifa opo a wanife po ehalo laye. Omhepo iyapuki kai fi omunhu. Ovanhu otava dulu okuyadifwa omhepo iyapuki nokunghonopalekwa kuyo.

OSHO OMBIIBELI TAI TI:

• “Elisabet eshi a uda ekundo laMaria, okaana oka nuka medimo laye, ndele Elisabet okwa yadifwa Omhepo Iyapuki.” — Lukas 1:41.

• ‘Otamu pewa eenghono, omhepo iyapuki ngeenge tai uya munye.’ — Oilonga 1:8.

• Tala yoo Genesis 1:2; Oilonga 2:1-4; 10:38.

4 EPULO: Ouhamba waKalunga oshike?

ENYAMUKULO: Ouhamba waKalunga oo epangelo lomeulu. Jesus oye Ohamba yOuhamba waKalunga. Mafiku Ouhamba oo otau ka wanifa po ehalo laKalunga kombada yedu alishe.

OSHO OMBIIBELI TAI TI:

• “Nomwengeli omuti-7 okwa shika enghuma, ndele meulu omwa udika eendaka dinene, da tya: Ouhamba wounyuni ou wa ninga wOmwene wetu naKristus waye, ndele ta ka pangela alushe fiyo alushe.” — Ehololo 11:15.

• Tala yoo Daniel 2:44; Mateus 6:9, 10.

5 EPULO: Mbela ovanhu aveshe ovo hava longo ouwa otava i meulu?

ENYAMUKULO: Ahowe. Ovanhu ashike ovadiinini vomuvalu munini hava ifanwa “okangudu,” va hoololwa kuKalunga opo vaye meulu. Ovanhu ovo otava ka pangela kombada yedu pamwe naJesus ve li eehamba.

OSHO OMBIIBELI TAI TI:

• “Ino tila, okangudu ove, osheshi Xo a hala oku mu pa ouhamba.” — Lukas 12:32.

• “Otava ka ninga ovapristeri vaKalunga novaKristus, ndele tava ka pangela pamwe naye ngaashi eehamba.” — Ehololo 20:6.

• Tala yoo Ehololo 14:1, 3.

EPULO 6: Ehalo laKalunga olilipi li na sha nedu nosho yo novanhu?

ENYAMUKULO: Eshi Ouhamba waKalunga tau ka pangela, edu otali ka ninga oparadisa novanhu ovadiinini otava ka kala ve na oukolele muwa, ombili nomwenyo waalushe.

OSHO OMBIIBELI TAI TI:

• “Ovananheni vo otava ka fyuulula edu, ndee tava ka hafela ombili inene.” — Epsalme 37:10, 11.

• “Ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:3, 4.

• Tala yoo Epsalme 37:29; 2 Petrus 3:13.