Owe shi shiiva tuu?

Omundilo owa li hau humbatwa ngahelipi pefimbo lonale?

Opo omunhu e lilongekidile oku ka yandja exwikiloyambo koshitukulwa shokokule, ehokololo lopaMbiibeli olo li li muGenesis 22:6 ola ti, Abraham “okwa kufa oikuni yexwikiloyambo ndele te i twike komona waye Isak, ndele ta kufa omundilo nomukonda meke laye. Osho ngaha vo vavali va enda pamwe.”

MOmbiibeli inamu popiwa onghedi omo omundilo wa li hau temwa pefimbo lonale. Okutala kepulo olo, omunongononi umwe okwa itavela kutya omundilo otashi dulika “wa li wa kala wa tema momukokomoko wondjila ile,” oyo Abraham naIsak va enda. Otashi dulika osho sha li tashi ulike koshilongifo osho hashi longifwa okuninga omundilo.

Vamwe ova popya kutya kasha li shipu okuhumbata omundilo pefimbo lonale. Ovanhu ova li va mona kutya oshi li xwepo oku ka tala ekala lomundilo poushiinda ponhele yokutema omundilo kuvo vene. Ovahongwanhu vahapu ova itavela kutya Abraham okwa li a humbata omundilo moshitoo osho hashi kaleke omakala mapyu ile omakala a hanya oo tashi dulika a kala a tema okudja konguloshi. (Jes. 30:14) Omakala a hanya ngeenge okwa humbatwa monghedi oyo ohaa dulu okuxwameka oikuni pomhito keshe kutya nee oshinano oshile shi fike peni.