“Otwa li tu na ouladi nohole momitima detu inatu shi mona nande nale”

ONGULA yEtitano muSeptemba 1922, okwa li ku na oupyu muhapu eshi ovanhu 8 000 va li va ongala metungo lokuningila oshoongalele. Omunashipundi okwa li a shiivifa kutya pefimbo lomutumba oo wa fimana, keshe umwe okwa li a manguluka okudja mo, ashike kape na ou ta ka pitikwa a alukile mo.

Ofimbo oshoongalele inashi hovela opa li hapa imbwa omaimbilo nokonima omumwatate Joseph F. Rutherford okwa li a fikama ndele tai komutune. Ovapwilikini vahapu ova li va kala omutumba va limbililwa. Vamwe vo muvo kava li ve lididimikila oupyu oo wa li ko. Omupopi okwa li e va indila va kale omutumba va pwilikine. Eshi oshipopiwa sha hovela, mbela ope na ngoo ou a li a didilika elapi la kula la tonywa olo la li la mangelwa mombada moule?

Omumwatate Rutherford okwa li a yandja oshipopiwa shi na oshipalanyole “Ouhamba weulu ou li popepi.” Oule wovili netata, ewi laye ola kala li uditike mokule metungo omo mwa li mwa ningilwa oshoongalele, eshi a li ta kundafana nghee ovaprofeti vonale va li va shiivifa okuuya kwOuhamba nopehe na oumbada. Eshi e li pokumana, okwa pula a ti: “Mbela omwa itavela kutya Ohamba yoshinge oya hovela nokupangela kwayo?” Ovapwilikini ova li va nyamukula newi lopombada va ti: “Heeno!”

Omumwatate Rutherford okwa ingida ta ti: “Onghee hano ovana vaKalunga omukombadambada, tu yeni tu ka udifeni. Tala, Ohamba otai pangele! Nye ovakalele vayo voku shi shiivifa. Onghee hano, udifeni, udifeni, udifeni Ohamba nouhamba wayo.”

Pefimbo olo tuu olo, ongonga yelapi oya li ya nyanununwa mo, ya shangwa “Udifeni Ohamba nouhamba wayo.”

Ray Bopp okwa ti: “Ovapwilikini ova li va tunhukwa neenghono.” Anna Gardner okwa yelifa “nghee ovanhu va li va pandula omake.” Fred Twarosh okwa ti: “Ovapwilikini aveshe ova li va pandulila oshita.” Evangelos Scouffas okwa ti: “Otwa li ashike twa fa twa fikamekwa keenghono dinene nomesho etu okwa li a kengela omahodi.”

Vahapu ovo va li poshoongalele osho ova kala nale hava tandavelifa onghundana iwa yOuhamba. Ashike paife ova li ve udite va kumikwa nelalakano lipe lokuudifa. Ethel Bennecoff okwa li a popya kutya Ovakonakoni vOmbiibeli ova li va dja po ve na “ouladi nohole momitima davo inaave shi mona nande onale.” Odessa Tuck oo a li e na omido 18 pefimbo olo, okwa li a dja poshoongalele e na omukumo okunyamukula eifano olo tali ti: “Olyelye handi mu tumu?” Okwa ti: “Kanda li ndi shi kutya openi nongahelipi. Ashike onda li ndi shii kutya onda li nda hala okukala nda fa Jesaja,” oo a ti: “Aame ou, tume nge!” (Jes. 6:8) Ralph Leffler okwa ti: “Efiku olo lehafo, ola li ehovelo loshikonga shokuudifa Ouhamba, osho kunena tashi ningwa mounyuni aushe.”

Kape na omalimbililo kutya oshoongalele shopaiwana osho sha li sha ningilwa muCedar Point, Ohio, osha fimana mondjokonona yEendombwedi. George Gangas okwa ti: “Oshoongalele osho osha li sha ningifa nge ndiha ka faule nande efiku limwe oshoongalele.” Ita dimbuluka nande e efiku limwe a faulile oshoongalele. Julia Wilcox okwa shanga a ti: “Kandi na oitya nomatumbulo kutya ohandi kala nda tunhukwa shi fike peni oshikando keshe ngeenge moishangomwa yetu tamu popiwa kombinga yoCedar Point mo 1922. Ohandi kala alushe nda hala okutya: ‘Tangi Jehova eshi wa pitika nge opo ndi kale po poshoongalele osho.’”

Sha faafana, vahapu vomufye kunena ohatu dimbulukwa oyoongalele i tunhula oyo hai shambula omitima detu nohai tu ningifa tu kale tu na ouladi nohole yokuhola Kalunga ketu nOhamba yaye. Eshi alushe hatu dimbuluka oyoongalele oyo, ohashi tu linyengifa tu tye “Tangi Jehova eshi wa pitika nge opo ndi kale po poshoongalele osho.”