Osho tashi dulu oku ku kwafela u kale ho ningi ekonakono loye pandjikilile
MBELA oho mono shidjuu okukonakona Ombiibeli pandjikilile, noiho hafele okuninga ngaho? Atushe osho hatu kala tu udite ngaho omafimbo amwe. Ashike diladila koinima imwe, oyo hatu ningi pandjikilile, ngaashi okulikosha. Ohashi pula efimbo neenghono okulikosha, ndele ihatu kala tuu tu udite twa pepelelwa konima eshi twe likosha! Okukonakona Ombiibeli nako otaku dulu okufaafanifwa ‘nokulikosha nomeva, sha hala okutya, neendjovo daKalunga.’ (Ef. 5:26) Apa otapa shikula omaetepo amwe, oo taa dulu okukwafela:
Litulila po efimbo lokondadalunde. Ekonakonombiibeli lopaumwene oli li limwe lomoinima “ya fimanenena,” oyo tu na okuninga. (Fil. 1:10) Opo u kale to li ningi pefimbo, omolwashike ito shi shange pombapila, ndele to i tula opo to dulu oku i mona alushe? Ile oto dulu okutula oalalama kongodi yoye, opo i ku dimbulukife.
Hoolola efimbo nonghedi yokukonakona oyo tai ku wa palele. Mbela oho dulu ngoo okuyandja elitulemo oule wefimbo lile, ile oule ashike wokafimbo kaxupi? Oove u shii osho tashi ku wapalele. Onghee unganeka efimbo loye u na osho momadiladilo. Ngeenge ou udite kutya ito dulu okulesha pefimbo olo wa tula po, omolwashike ito lesha ashike nande oule wominute omulongo? Ngeenge owa lesha ashike nande oule wominute odo, oto ke lihonga oinima ihapu. Nongeenge owa hovele ashike nominute omulongo, otashi dulika shi ke ku linyengife u twikile. — Fil. 2:13.
Hoolola komesho yefimbo osho to ka konakona. Ngeenge owa kala ashike ho diladila kutya oto ka konakona shike efimbo eshi la fika, otashi dulika ito ka ‘longifa nawa efimbo loye.’ (Ef. 5:16) Omolwashike ito shange omusholondodo woikundafanwa oyo wa hala okukonakona? Pashihopaenenwa, ngeenge ou na epulo loshinima osho uhe udite ko nawa, oto dulu oku li shanga momusholondodo. Nokonima eshi wa mana okukonakona, otashi dulika momusholondodo u wede mo osho wa hala oku ka konakona.
Kala ho tifuka. Kendabala okukala ho ningi omalunduluko melandulafanodutilo loye, ngaashi efimbo olo ho longifa, ile oikundafanwa oyo wa hala okukonakona. Eshi sha fimana, hafiku, efimbo, ile kutya oshike to konakona, ndele oku shi ninga pandjikilile.
Ngeenge otwa kala hatu konakona oshivike keshe, ohatu ka mona ouwa. Ohatu ka ehena popepi naJehova, ohatu ke lihonga okukala hatu katuka pandunge notashi ke tu pameka. — Jos. 1:8.