Oto dimbuluka?
Owa lesha ngoo nawanawa Eeshungonangelo dodula ei? Tala ngeenge oto mono omanyamukulo omapulo taa shikula:
Jehova okwa tula po oshihopaenenwa shilipi, ngeenge tashi uya pokuungaunga novakainhu?
Jehova oha ungaunga novakainhu nopehe na okatongo, ina lenga ovalumenhu shi dulife ovakainhu. Ohe va udu, e na ko nasha nanghee hava kala ve udite nosho yo omaupyakadi oo ve na. Okwe ve lineekelela yo oilonga yaye. — w24.01, ep. 15-16.
Ongahelipi hatu dulu okutula moilonga Ovaefeso 5:7, ovo tava ti: “Inamu va hopaenena”?
Omuyapostoli Paulus okwe tu londwela tuha endafane novanhu ovo tave shi ningifa shidjuu kufye okudulika komifikamhango daKalunga. Otwa pumbwa okuhenuka okweendafana novanhu va tya ngaho kutya nee okomudidi, ile opamakwatafano okointaneta. — w24.03, ep. 22-23.
Omahokololo oipupulu elipi tu na okuhenuka?
Otu na okuhenuka omahokololo oo haa di kookaume ketu, oo vehe na oushili muo, ee-email odo hadi kala di na omahokololo taa nyuwifa omatwi, odo hadi di kovanhu ovo tuhe shii, nosho yo omahokololo ovashunimonima, ovo have liningifa va fa ve na ohokwe metumwalaka letu. — w24.04, ep. 12.
Oshike tu shii naasho tuhe shii, shi na sha nanghee Jehova ta ka tokola ohamba Salomo, ovo va fila muSodom naGomorra nosho yo ovo va fila mEyelu?
Katu shi shii ngeenge Jehova ote ke va hanauna po fiyo alushe. Ashike otu shii kutya oku shii ashishe osho sha kwatelwa mo noku na onghenda inene. — w24.05, ep. 3-4.
Outumbulilo Kalunga “Emanya” otau tu hololele oumbangi ulipi? (Deut. 32:4)
Ohatu dulu okukonga eameno kuJehova. Oku shii okulineekelwa, noha wanifa po alushe omaudaneko aye. Iha lunduluka, omaukwatya aye ihaa lunduluka noha kala metwokumwe nomalalakano aye. — w24.06, ep. 26-28.
Oshike tashi dulu oku ku kwafela u tambule ko omalunduluko, ngeenge wa tembukila keongalo limwe?
Lineekela muJehova, oo te ke ku kwafela ngaashi a li a kwafela ovapiya vaye monakudiwa. Henuka okuyelekanifa eongalo loye likulu naako wa tembukila. Kala we lipyakidila meongalo omo wa tembukila, nokukendabala okupanga oukaume navamwe. — w24.07, ep. 26-28.
Oilihongomwa ilipi hatu lihongo momafaneko atatu oo taa hangwa muMateus etukulwa 25?
Efaneko leedi noikombo otali divilike nghee sha fimana okukala ovadiinini. Efaneko loukadona omulongo otali divilike nghee sha fimana okukala twe lilongekida nokukala oupafi. Efaneko loitalenti otali divilike nghee sha fimana okukala hatu longo noudiinini. — w24.09, ep. 20-24.
Okalupale kokufikila kotembeli yaSalomo oka li ke na oule u fike peni?
Mo 2 Omafimbo 3:4, omatoloko amwe okwa ti kutya okalupale oko oka li ke na oule womukokomoko “womaludimbo 120,” osho sha hala okutya oka li ke na eemeta 53. Omashangelo amwe okwa ti: “Oka li ke na oule womaludimbo 20,” ile oule weemeta 9. Okalupale oko otashi dulika ka li ke na ounene u fike pamwe nekuma lotembeli. — w24.10, ep. 31.
Osha hala okutya shike eshi taku ti kutya omuyakuliongalo oku na okukala e na “omukulukadi umwe”? (1 Tim. 3:12)
Osha hala okutya okwa hombola omukulukadi umwe aeke noku na okuhenuka okuya moluhaelo. Natango, ke na okulihumbatela ovakainhu vamwe monghedi inai koshoka. — w24.11, ep. 19.
Omolwashike hatu dulu okupopya kutya eendjovo odo tadi hangwa muJohannes 6:53 itadi popi kombinga yaasho shi na okuningwa pOuvalelo wOmwene?
MuJohannes 6:53, Jesus okwa popya nghee sha fimana okulya olutu laye nosho yo okunwa ohonde yaye. Eendjovo odo Jesus okwa li te di lombwele Ovajuda, ovo va li va pumbwa okukala ve na eitavelo muye, mo 32 O.P. muGalilea. Ashike Ouvalelo wOmwene owa li wa dikwa po lwanima momudo wa shikula ko muJerusalem. Pomhito opo, Jesus okwa li ta popi naavo tava ka pangela pamwe naye meulu. — w24.12, ep. 10-11.